SPVar - Leviticus - 11

11:1  וידבר יהוה אל משה ואל אהרן לאמר אליהם

11:2  דברו אל בני ישראל לאמר זאת החיה אשר תאכלו מכל הבהמה אשר על הארץ

11:3  כל מפריסת פרסה ושסעת שסע שתי פרסות מעלת גרה בבהמה אתה תאכלו

11:4  אך את זה לא תאכלו ממעלי הגרה וממפרסי הפרסה את הגמל כי מעלה גרה הוא ופרסה איננו מפריס טמא הוא לכם

11:5  ואת השפן כי מעלה גרה הוא ופרסה לא הפריס טמא הוא לכם

11:6  ואת הארנבת כי מעלת גרה היא ופרסה לא הפריסה טמאה היא לכם

11:7  ואת החזיר כי מפריס פרסה הוא ושסע שסע פרסה והוא גרה לא יגור טמא הוא לכם

11:8  מבשרם לא תאכלו ובנבלתם לא תגעו טמאים הם לכם

11:9  ואת זה תאכלו מכל אשר במים כל אשר לו סנפיר וקשקשת במים בימים ובנחלים אתם תאכלו

11:10  וכל אשר אין לו סנפיר וקשקשת במים בימים ובנחלים מכל שרץ המים ומכל נפש החיה אשר במים שקץ הם לכם

11:11  ושקץ יהיו לכם מבשרם לא תאכלו ואת נבלתם תשקצו

11:12  וכל אשר אין לו סנפיר וקשקשת במים שקץ הוא לכם

11:13  ואת אלה תשקצו מן העוף לא תאכלו שקץ הם את הנשר ואת הפרס ואת העזניה

11:14  ואת הדאה ואת האיה למינה

11:15  ואת כל ערב למינו

11:16  ואת בת היענה ואת התחמס ואת השחף למינו ואת הנץ

11:17  ואת הכוס ואת השלך ואת הינשוף

11:18  ואת התנשמת ואת הקאת ואת הרחמה

11:19  ואת החסידה והאנפה למינה ואת הדגיפת ואת העטלף

11:20  וכל שרץ העוף ההלך על ארבע שקץ הוא לכם

11:21  אך את זה תאכלו מכל שרץ העוף ההלך על ארבע אשר לא כרעים ממעל לרגליו לנתר בהם על הארץ

11:22  את אלה מהם תאכלו את הארבה למינהו ואת הסלעם למינהו ואת החרגל למינה ואת החגב למינהו

11:23  וכל שרץ העוף אשר לו ארבע רגלים שקץ הוא לכם

11:24  ולאלה תטמאו כל הנגע בנבלתם יטמא עד הערב

11:25  וכל הנשא מנבלתם יכבס בגדיו ורחץ במים וטמא עד הערב

11:26  לכל הבהמה אשר היא מפריסת פרסה ושסעה איננה שסע וגרה איננה מעלה טמאים הם לכם כל הנגע בהם יטמא

11:27  וכל ההלך על כפיו בכל החיה ההלכת על ארבע טמאים הם לכם כל הנגע בנבלתם יטמא עד הערב

11:28  והנשא מנבלתם יכבס בגדיו וטמא עד הערב טמאים הם לכם

11:29  וזה לכם הטמא בשרץ השרץ על הארץ החלד והעכבור והצב למינו

11:30  והאנקה והכח והלטאה והחמט והתנשמת

11:31  אלה הטמאים לכם מכל השרץ כל הנגע בהם במותם יטמא עד הערב

11:32  וכל אשר יפל עליו מהם במותם יטמא מכל כלי עץ או בגד או עור או שק כל כלי אשר יעשה מלאכה בהם במים יבוא וטמא עד הערב וטהר

11:33  וכל כלי חרש אשר יפל מהם אל תוכו כל אשר בתוכו יטמא ואתו תשברו

11:34  מכל האכל אשר יאכל אשר יבוא עליו מים יטמא וכל משקה אשר ישתה בכל כלי יטמא

11:35  וכל אשר יפל מנבלתם עליו יטמא תנור וכרים יתצו טמאים הם וטמאים יהיו לכם

11:36  אך מעין מים ובור מקוה מים יהיה טהור ונגע בנבלתם יטמא

11:37  וכי יפל מנבלתם על זרע זרע אשר יזרע טהור הוא

11:38  וכי יתן מים על הזרע ונפל מנבלתם עליו טמא הוא לכם

11:39  וכי ימות מן הבהמה אשר היא לכם לאכלה הנגע בנבלתה יטמא עד הערב

11:40  והאכל מנבלתה יכבס בגדיו וטמא עד הערב והנשא את נבלתה יכבס בגדיו וטמא עד הערב

11:41  וכל השרץ השרץ על הארץ שקץ הוא לא יאכל

11:42  כל ההלך על גחון וכל ההלך על ארבע עד כל מרבה רגלים לכל השרץ השרץ על הארץ לא תאכלום כי שקץ הם

11:43  אל תשקצו את נפשתיכם בכל השרץ השרץ ולא תטמאו בהם ונטמאתם בם

11:44  כי אני יהוה אלהיכם והתקדשתם והייתם קדשים כי קדוש אני ולא תטמאו את נפשתיכם בכל השרץ הרמש על הארץ

11:45  כי אני יהוה אלהיכם המעלה אתכם מארץ מצרים להיות לכם לאלהים והייתם קדשים כי קדוש אני

11:46  זאת תורת הבהמה והעוף וכל נפש החיה הרמשת במים לכל הנפש השרצת על הארץ

11:47  להבדיל בין הטמא ובין הטהור ובין החיה הנאכלת ובין החיה אשר לא תאכל