VulgSistine - Sirach - 51

51:1  Oratio Iesu filii Sirach: Confitebor tibi Domine rex, et collaudabo te Deum salvatorem meum.

51:2  Confitebor nomini tuo: quoniam adiutor et protector factus es mihi,

51:3  et liberasti corpus meum a perditione, a laqueo linguae iniquae, et a labiis operantium mendacium, et in conspectu astantium factus es mihi adiutor.

51:4  Et liberasti me secundum multitudinem misericordiae nominis tui a rugientibus, praeparatis ad escam,

51:5  de manibus quaerentium animam meam, et de portis tribulationum quae circumdederunt me:

51:6  a pressura flammae, quae circumdedit me, et in medio ignis non sum aestuatus:

51:7  de altitudine ventris inferi, et a lingua coinquinata, et a verbo mendacii, a rege iniquo, et a lingua iniusta:

51:8  laudabit usque ad mortem anima mea Dominum,

51:9  et vita mea appropinquans erat in inferno deorsum.

51:10  Circumdederunt me undique, et non erat qui adiuvaret. Respiciens eram ad adiutorium hominum, et non erat.

51:11  Memoratus sum misericordiae tuae Domine, et operationis tuae, quae a saeculo sunt.

51:12  quoniam eruis sustinentes te Domine, et liberas eos de manibus gentium.

51:13  Exaltasti super terram habitationem meam, et pro morte defluente deprecatus sum.

51:14  Invocavi Dominum patrem Domini mei, ut non derelinquat me in die tribulationis meae, et in tempore superborum sine adiutorio.

51:15  Laudabo nomen tuum assidue, et collaudabo illud in confessione, et exaudita est oratio mea.

51:16  Et liberasti me de perditione, et eripuisti me de tempore iniquo.

51:17  Propterea confitebor, et laudem dicam tibi, et benedicam nomini Domini.

51:18  Cum adhuc iunior essem, priusquam oberrarem, quaesivi sapientiam palam in oratione mea.

51:19  Ante tempus postulabam pro illis, et usque in novissimis inquiram eam. Et florebit tamquam praecox uva,

51:20  laetatum est cor meum in ea. Ambulavit pes meus iter rectum, a iuventute mea investigabam eam.

51:21  Inclinavi modico aurem meam, et excepi illam.

51:22  Multam inveni in meipso sapientiam, et multum profeci in ea.

51:23  Danti mihi sapientiam, dabo gloriam.

51:24  Consiliatus sum enim ut facerem illam: zelatus sum bonum, et non confundar.

51:25  Colluctata est anima mea in illa, et in faciendo eam confirmatus sum.

51:26  Manus meas extendi in altum, et in sapientia eius luxit anima mea, et ignorantias meas illuminavit.

51:27  Animam meam direxi ad illam, et in agnitione inveni eam.

51:28  Possedi cum ipsa cor ab initio: propter hoc non derelinquar.

51:29  Venter meus conturbatus est quaerendo illam: propterea bonam possidebo possessionem.

51:30  Dedit mihi Dominus linguam mercedem meam: et in ipsa laudabo eum.

51:31  Appropiate ad me indocti, et congregate vos in domum disciplinae.

51:32  quid adhuc retardatis? et quid dicitis in his? animae vestrae sitiunt vehementer.

51:33  Aperui os meum, et locutus sum: Comparate vobis sine argento,

51:34  et collum vestrum subiicite iugo, et suscipiat anima vestra disciplinam: in proximo est enim invenire eam.

51:35  Videte oculis vestris quia modicum laboravi, et inveni mihi multam requiem.

51:36  Assumite disciplinam in multo numero argenti, et copiosum aurum possidete in ea.

51:37  Laetetur anima vestra in misericordia eius, et non confundemini in laude ipsius.

51:38  Operamini opus vestrum ante tempus, et dabit vobis mercedem vestram in tempore suo.