CopSahBible2 - I Samuel - 14

14:1  ⲁⲩⲱ ⲓⲱⲛⲁⲑⲁⲛ ⲡϣⲏⲣⲉ ⲛⲥⲁⲟⲩⲗ ⲡⲉϫⲁϥ ⲙⲡⲉϥϩⲙϩⲁⲗ ⲡⲉⲧϥⲓ ⲛⲛⲉϥⲥⲕⲉⲩⲏ ϫⲉ ⲁⲙⲟⲩ ⲛⲙⲙⲁⲓ ⲛⲧⲉⲛⲃⲱⲕ ⲉϩⲣⲁⲓ ⲉⲙⲉⲥⲁⲃ ⲛⲧⲉ ⲛⲁⲗⲗⲟⲫⲩⲗⲟⲥ ⲧⲉⲧϩⲓⲡⲉⲕⲣⲟ

14:2  ⲥⲁⲟⲩⲗ ⲇⲉ ⲛⲉϥϩⲙⲟⲟⲥ ϩⲓϫⲛ ϩⲧⲏϥ ⲙⲡⲃⲟⲩⲛⲟⲥ ϩⲁ ⲧⲃⲱ ⲛϩⲉⲣⲙⲁⲛ ⲉⲧϩⲛⲙⲁⲅⲇⲟⲛ ⲁⲩⲱ ⲛⲉⲣⲉⲁⲥⲟⲟⲩ ⲛϣⲉ ⲛⲣⲱⲙⲉ ⲛⲙⲙⲁϥ

14:3  ⲁⲭⲓⲃ ⲡϣⲏⲣⲉ ⲛⲁⲭⲓⲇⲱⲃ ⲡⲥⲟⲛ ⲛⲓⲱⲭⲁⲃⲏⲗ ⲡϣⲏⲣⲉ ⲙⲫⲓⲛⲉⲉⲥ ⲡϣⲏⲣⲉ ⲛϩⲏⲗⲓ ⲡⲟⲩⲏⲏⲃ ⲙⲡⲛⲟⲩⲧⲉ ⲉⲧϩⲛⲥⲏⲗⲱ ⲛⲉϥϥⲓ ⲙⲡⲉⲫⲟⲩⲇ ⲁⲩⲱ ⲡⲗⲁⲟⲥ ⲛⲉϥⲥⲟⲟⲩⲛ ⲁⲛ

14:4  ϫⲉ ⲓⲱⲛⲁⲑⲁⲛ ⲉϥⲃⲱⲕ ⲉⲧⲙⲏⲧⲉ ⲛⲧⲉϩⲓⲏ ⲉⲡⲙⲁ ⲛⲧⲁⲓⲱⲛⲁⲑⲁⲛ ⲟⲩⲉϣⲃⲱⲕ ⲉϩⲣⲁⲓ ⲉⲣⲟϥ ⲉⲡⲙⲏⲏϣⲉ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲉⲣⲉⲟⲩⲕⲟⲟϩ ⲙⲡⲉⲧⲣⲁ ϣⲟⲟⲡ ⲛⲥⲁ ⲡⲓⲥⲁ ⲁⲩⲱ ⲛⲥⲁ ⲡⲁⲓ ⲡⲣⲁⲛ ⲇⲉ ⲙⲡⲟⲩⲁ ⲙⲙⲟⲟⲩ ⲡⲉ ⲃⲁⲥⲏⲥ ⲁⲩⲱ ⲡⲣⲁⲛ ⲙⲡⲕⲉⲟⲩⲁ ⲡⲉ ⲥⲉⲛⲉⲃⲉ

14:5  ⲧⲟⲩⲉⲓ ⲛⲛⲉϩⲓⲏ ⲉⲥϫⲓ ⲉⲡⲉⲙϩⲓⲧ ⲉϩⲣⲁⲓ ⲉⲙⲁⲭⲉⲙⲁⲥ ⲁⲩⲱ ⲧⲕⲉⲟⲩⲉⲓ ⲉⲥϫⲓ ϫⲓⲛ ⲡⲣⲏⲥ ϣⲁ ⲉϩⲣⲁⲓ ⲉⲅⲁⲃⲁⲁ

14:6  ⲡⲉϫⲉⲓⲱⲛⲁⲑⲁⲛ ⲙⲡⲉϥϩⲙϩⲁⲗ ⲡⲉⲧϥⲓ ⲛⲛⲉϥⲥⲕⲏⲩⲉ ϫⲉ ⲁⲙⲟⲩ ⲛⲧⲉⲛⲃⲱⲕ ⲉϩⲣⲁⲓ ⲉⲙⲉⲥⲁⲫ ⲡⲙⲁ ⲛⲛⲉⲓⲁⲧⲥⲃⲃⲉ ⲁⲩⲱ ⲡⲉⲧⲉⲣⲉⲡϫⲟⲉⲓⲥ ⲛⲁⲁⲁϥ ⲛⲁⲛ ϫⲉ ⲛⲉϥⲕⲏ ⲁⲛ ⲉϩⲣⲁⲓ ⲙⲡϫⲟⲉⲓⲥ ⲉⲧⲣⲉϥⲛⲟⲩϩⲙ ⲙⲡⲉⲧϩⲏϣ ϩⲛ ϩⲁϩ ⲏ ϩⲛ ⲥⲉⲃⲕⲉ

14:7  ⲡⲉϫⲁϥ ⲛⲁϥ ⲛϭⲓ ⲡⲉⲧϥⲓ ⲛⲛⲉⲥⲕⲏⲩⲉ ϫⲉ ⲁⲣⲓⲡⲉⲧⲉⲣⲉⲡⲉⲕϩⲏⲧ ⲟⲩⲁϣϥ ⲧⲏⲣϥ ⲉⲁⲁϥ ⲉⲓⲥ ϩⲏⲏⲧⲉ ⲁⲛⲟⲕ ϯⲟⲩⲏϩ ⲛⲥⲱⲕ ⲉⲣⲉⲡⲁϩⲏⲧ ⲧⲏϭ ⲉⲡⲉⲕϩⲏⲧ

14:8  ⲡⲉϫⲉⲓⲱⲛⲁⲑⲁⲛ ⲛⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲛ ⲉⲛⲛⲁⲃⲱⲕ ⲉⲣⲁⲧⲟⲩ ⲛⲛⲣⲱⲙⲉ ⲛⲧⲉⲛⲙⲟⲟϣⲉ ⲉⲣⲟⲟⲩ

14:9  ⲉⲩϣⲁⲛϫⲟⲟⲥ ⲛⲁⲛ ϫⲉ ⲥⲁϩⲉⲧⲏⲩⲧⲛ ⲉⲡⲓⲥⲁ ϣⲁⲛⲧⲛϣⲁϫⲉ ⲛⲙⲙⲏⲧⲛ ⲉⲛⲛⲉϭⲱ ϩⲁⲣⲓϩⲁⲣⲟⲛ ⲛⲧⲛⲧⲙⲃⲱⲕ ⲉϫⲱⲟⲩ

14:10  ⲉⲩϣⲁⲛϫⲟⲟⲥ ⲇⲉ ⲛⲁⲛ ⲇⲉ ⲁⲙⲏⲓⲧⲛ ⲛⲁⲛ ⲉϩⲣⲁⲓ ⲉⲛⲛⲉⲃⲱⲕ ⲉϫⲱⲟⲩ ϫⲉ ⲁⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧⲛ ⲡⲁⲓ ⲡⲉ ⲡⲙⲁⲉⲓⲛ ⲉⲧⲛⲁϣⲱⲡⲉ ⲛⲁⲛ

14:11  ⲁⲩⲱ ⲛⲧⲟⲟⲩ ⲙⲡⲉⲥⲛⲁⲩ ⲁⲩⲃⲱⲕ ⲉϩⲣⲁⲓ ⲉⲙⲉⲥⲁⲫ ⲡⲙⲁ ⲛⲛⲁⲗⲗⲟⲫⲩⲗⲟⲥ ⲡⲉϫⲉⲛⲁⲗⲗⲟⲫⲩⲗⲟⲥ ⲛⲛⲉⲩⲉⲣⲏⲩ ϫⲉ ⲉⲓⲥ ⲛϩⲉⲃⲣⲉⲟⲥ ⲁⲩⲉⲓ ⲉϩⲣⲁⲓ ϩⲛ ⲛⲉⲩⲃⲏⲃ ⲛⲧⲁⲩⲗⲟϭⲟⲩ ⲛϩⲏⲧⲟⲩ

14:12  ⲁⲩⲱ ⲛⲣⲱⲙⲉ ⲙⲙⲉⲥⲁⲫ ⲉⲧⲉⲡⲉⲩⲙⲁ ⲛⲣⲟⲉⲓⲥ ⲡⲉ ⲡⲉϫⲁⲩ ⲛⲓⲱⲛⲁⲑⲁⲛ ⲙⲛ ⲡⲉⲧϥⲓ ⲛⲛⲉϥⲥⲕⲏⲩⲉ ⲉⲩϫⲱ ⲙⲙⲟⲥ ⲛⲁⲩ ϫⲉ ⲁⲙⲏⲉⲓⲧⲛ ⲉϩⲣⲁⲓ ϣⲁⲣⲟⲛ ⲁⲩⲱ ⲧⲉⲛⲛⲁⲧⲁⲙⲱⲧⲛ ⲉⲡⲉⲓϣⲁϫⲉ ⲡⲉϫⲉⲓⲱⲛⲁⲑⲁⲛ ⲙⲡⲉⲧϥⲓ ⲛⲛⲉϥⲥⲕⲉⲩⲏ ϫⲉ ⲟⲩⲁϩⲕ ⲛⲥⲱⲓ ϫⲉ ⲁⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧϥ ⲙⲡ

14:13  ⲁⲩⲱ ⲓⲱⲛⲁⲑⲁⲛ ⲁϥⲃⲱⲕ ⲛⲁⲩ ⲉϩⲣⲁⲓ ⲉⲣⲉⲧⲟⲟⲧϥ ⲙⲛ ⲣⲁⲧϥ ⲧⲁϫⲣⲏⲩ ⲉⲣⲉⲡⲉⲧϥⲓ ⲛⲛⲉϥⲥⲕⲉⲩⲏ ⲟⲩⲏϩ ⲛⲥⲱϥ ⲛⲁⲗⲗⲟⲫⲩⲗⲟⲥ ⲁⲩⲉⲓⲱⲣⲙ ⲛⲥⲁ ⲡϩⲟ ⲛⲓⲱⲛⲁⲑⲁⲛ ⲓⲱⲛⲁⲑⲁⲛ ⲇⲉ ⲁϥϩⲓⲟⲩⲉ ⲛⲥⲱⲟⲩ ⲡⲉⲧϥⲓ ⲛⲛⲉⲥⲕⲉⲩⲏ ⲛⲉϥϯ ⲉⲧⲟⲟⲧϥ

14:14  ⲁⲩⲱ ⲧϣⲟⲣⲡⲉ ⲙⲡⲗⲏⲅⲏ ⲛⲧⲁⲓⲱⲛⲁⲑⲁⲛ ⲡⲁⲧⲁⲥⲥⲉ ⲙⲙⲟⲟⲩ ⲛϩⲏⲧⲥ ⲙⲛ ⲡⲉⲧϥⲓ ⲛⲛⲉϥⲥⲕⲉⲩⲏ ⲉⲩⲛⲁⲣϫⲟⲩⲱⲧ ⲛⲣⲱⲙⲉ ϩⲛ ϩⲉⲛⲥⲟⲧⲉ ⲙⲛ ϩⲉⲛϣⲁⲩ ⲛⲱⲛⲉ ⲙⲛ ϩⲉⲛϩⲣⲟⲩϫⲉⲃ ⲛⲧⲉ ⲧⲥⲱϣⲉ

14:15  ⲁⲩϩⲟⲧⲉ ϣⲱⲡⲉ ϩⲛ ⲧⲡⲁⲣⲉⲙⲃⲟⲗⲏ ⲁⲩⲱ ϩⲛ ⲧⲥⲱϣⲉ ⲁⲩⲱ ⲡⲗⲁⲟⲥ ⲧⲏⲣϥ ⲉⲧϩⲛⲙⲉⲥⲁⲫ ⲙⲛ ⲛⲉϣⲁⲩⲙⲓϣⲉ ⲁⲩϣⲧⲟⲣⲧⲣ ⲛⲧⲟⲟⲩ ϩⲱⲟⲩ ⲛⲉⲩⲟⲩⲱϣ ⲁⲛ ⲉϣⲉⲡⲙⲕⲁϩ ⲡⲕⲁϩ ⲇⲉ ⲁϥⲣϩⲟⲧⲉ ⲛⲁⲩ ⲁⲩⲱ ⲟⲩϩⲟⲧⲉ ⲛⲧⲉ ⲡϫⲟⲉⲓⲥ ⲁⲥⲉⲓ ⲉϫⲱⲟⲩ

14:16  ⲁⲩⲱ ⲛⲉⲧⲣⲟⲩⲱ ⲛⲥⲁⲟⲩⲗ ⲁⲩⲛⲁⲩ ϩⲛ ⲅⲁⲃⲁⲁ ⲛⲧⲉ ⲃⲉⲛⲓⲁⲙⲓⲛ ⲁⲩⲱ ⲉⲓⲥ ⲧⲡⲁⲣⲉⲙⲃⲟⲗⲏ ⲛⲉⲥϣⲧⲣⲧⲱⲣ ⲛⲥⲁ ⲡⲓⲥⲁ ⲙⲛ ⲡⲁⲓ

14:17  ⲡⲉϫⲉⲥⲁⲟⲩⲗ ⲙⲡⲗⲁⲟⲥ ⲉⲧⲛⲙⲙⲁⲩ ϫⲉ ⲙⲉϣⲧⲧⲏⲩⲧⲛ ⲛⲧⲉⲧⲛⲛⲁⲩ ϫⲉ ⲛⲓⲙ ⲉⲃⲟⲗ ⲙⲙⲱⲧⲛ ⲡⲉ ⲛⲧⲁϥⲃⲱⲕ ⲁⲩⲙⲟϣⲧⲟⲩ ⲇⲉ ⲁⲩⲱ ⲉⲓⲥ ϩⲏⲏⲧⲉ ⲙⲡⲟⲩϩⲉ ⲉⲓⲱⲛⲁⲑⲁⲛ ⲙⲛ ⲡⲉⲧϥⲓ ⲛⲛⲉϥⲥⲕⲉⲩⲏ

14:18  ⲡⲉϫⲉⲥⲁⲟⲩⲗ ⲛⲁⲭⲓⲃ ϫⲉ ⲁⲩⲉⲡⲉⲫⲟⲩⲇ ⲉⲡⲉⲓⲙⲁ ϫⲉ ⲛⲧⲟϥ ⲛⲉϥϥⲓ ⲙⲡⲉⲫⲟⲩⲇ ⲙⲡⲉϩⲟⲟⲩ ⲉⲧⲙⲙⲁⲩ ϩⲓⲑⲏ ⲙⲡ

14:19  ⲉⲣⲉⲥⲁⲟⲩⲗ ⲇⲉ ϣⲁϫⲉ ⲙⲛ ⲡⲩⲏⲏⲃ ⲟⲩⲛⲟϭ ⲛϩⲣⲟⲟⲩ ⲉⲙⲁⲧⲉ ⲁϥϣⲱⲡⲉ ϩⲛ ⲧⲡⲁⲣⲉⲙⲃⲟⲗⲏ ⲛⲛⲁⲗⲗⲟⲫⲩⲗⲟⲥ ⲡⲉϫⲉⲥⲁⲟⲩⲗ ⲙⲡⲟⲩⲏⲏⲃ ϫⲉ ⲥⲁϩⲉⲧⲟⲟⲧⲕ ⲉϩⲟⲩⲛ

14:20  ⲁⲩⲱ ⲥⲁⲟⲩⲗ ⲁϥⲙⲟⲟϣⲉ ⲉϩⲣⲁⲓ ⲙⲛ ⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲩⲡⲱϩ ϣⲁ ⲡⲙⲁ ⲙⲙⲓϣⲉ ⲁⲩⲱ ⲉⲓⲥ ⲧⲥⲏϥⲉ ⲙⲡⲟⲩⲁ ⲡⲟⲩⲁ ⲁⲥⲉⲓ ⲉϫⲛ ⲛⲉⲩⲉⲣⲏⲩ ⲁⲩⲛⲟϭ ⲛϩⲃⲁ ϣⲱⲡⲉ ⲛϩⲏⲧⲟⲩ

14:21  ⲁⲩⲱ ⲛⲕⲉϩⲙϩⲁⲗ ⲉⲧⲧⲏϩ ⲛⲥⲁϥ ⲙⲛ ϣⲟⲙⲛⲧ ⲙⲡⲟⲟⲩ ⲛϩⲟⲟⲩ ⲙⲛ ⲛⲁⲗⲗⲟⲫⲩⲗⲟⲥ ⲛⲉⲛⲧⲁⲩⲉⲓ ⲉϩⲣⲁⲓ ⲛⲙⲙⲁⲩ ⲉⲧⲡⲁⲣⲉⲙⲃⲟⲗⲏ ⲁⲩⲡⲱⲱⲛⲉ ⲉⲧⲣⲉⲩϣⲱⲡⲉ ϩⲱⲟⲩ ⲙⲛ ⲡ ⲛⲉⲧⲏⲡ ⲉⲥⲁⲟⲩⲗ ⲙⲛ ⲓⲱⲛⲁⲑⲁⲛ

14:22  ⲁⲩⲱ ⲡ ⲧⲏⲣϥ ⲛⲉⲩⲗⲏϫ ϩⲙ ⲡⲧⲟⲟⲩ ⲛⲉⲫⲣⲁⲓⲙ ⲁⲩⲥⲱⲧⲙ ϫⲉ ⲛⲁⲗⲗⲟⲫⲩⲗⲟⲥ ⲁⲩϭⲱⲧⲡ ⲛⲧⲟⲟⲩ ϩⲱⲟⲩ ⲁⲩⲡⲱⲧ ⲛⲥⲱⲟⲩ ⲉⲡⲡⲟⲗⲉⲙⲟⲥ

14:23  ⲁⲡϫⲟⲉⲓⲥ ⲧⲟⲩϫⲉⲡ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲡⲡⲟⲗⲉⲙⲟⲥ ⲁϥⲡⲱϩ ϣⲁ ⲉϩⲣⲁⲓ ⲉⲃⲁⲓⲑⲱⲛ ⲁⲩⲱ ⲡⲙⲏⲏϣⲉ ⲧⲏⲣϥ ⲉⲧⲙⲟⲟϣⲉ ⲙⲛ ⲥⲁⲟⲩⲗ ⲛⲉⲩⲛⲁⲣⲟⲩⲧⲃⲁ ⲛⲣⲱⲙⲉ ⲁⲩⲱ ⲡⲉⲙⲗⲁϩ ⲛⲉϥⲥⲏⲣ ⲉⲃⲟⲗ ϩⲛ ⲧⲡⲟⲗⲓⲥ ⲧⲏⲣⲥ ϩⲙ ⲡⲧⲟⲟⲩ ⲛⲉⲫⲣⲁⲓⲙ

14:24  ⲥⲁⲟⲩⲗ ⲇⲉ ⲁϥϣⲱⲡⲉ ϩⲛ ⲟⲩⲛⲟϭ ⲙⲙⲛⲧⲁⲧⲥⲟⲟⲩⲛ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲥⲁⲟⲩⲗ ⲁϥⲣⲁⲛⲁϣ ⲙⲡⲗⲁⲟⲥ ⲉϥϫⲱ ⲙⲙⲟⲥ ϫⲉ ϥⲥϩⲟⲩⲟⲣⲧ ⲛϭⲓ ⲡⲉⲧⲛⲁⲟⲩⲉⲙⲟⲉⲓⲕ ϣⲁ ⲡⲛⲁⲩ ⲛⲣⲟⲩϩⲉ ϫⲉ ⲉⲓⲉϫⲓⲕⲃⲁ ⲙⲡⲁϫⲁϫⲉ ⲁⲩⲱ ⲡⲗⲁⲟⲥ ⲇⲉ ⲧⲏⲣϥ ⲙⲡⲉϥⲧⲉⲡⲟⲉⲓⲕ

14:25  ⲡⲕⲁϩ ⲇⲉ ⲧⲏⲣϥ ⲛⲉϥⲁⲣⲓⲥⲧⲁ ⲛⲉⲣⲉⲟⲩⲙⲁ ⲛϣⲏⲛ ⲇⲉ ⲛϯϩⲙⲉϥ ⲛⲉⲃⲓⲱ ϣⲟⲟⲡ ⲙⲡⲙⲧⲟ ⲉⲃⲟⲗ ⲛⲧⲥⲱϣⲉ

14:26  ⲁⲩⲱ ⲡⲗⲁⲟⲥ ⲁϥⲧⲁⲁϥ ⲉϩⲣⲁⲓ ⲉⲡⲙⲁ ⲛϯϩⲙⲉϥ ⲛⲉⲃⲓⲱ ⲛⲉⲣⲉⲡⲗⲁⲟⲥ ⲇⲉ ⲙⲟⲟϣⲉ ⲉϥϣⲁϫⲉ ⲉⲙⲛⲗⲁⲁⲩ ⲕⲧⲟ ⲛⲧⲉϥϭⲓϫ ⲉϩⲟⲩⲛ ⲉⲧⲉϥⲧⲁⲡⲣⲟ ϫⲉ ⲡⲗⲁⲟⲥ ⲁϥⲣϩⲟⲧⲉ ⲛϩⲏⲧϥ ⲙⲡⲁⲛⲁϣ ⲙⲡϫⲟⲉⲓⲥ

14:27  ⲓⲱⲛⲁⲑⲁⲛ ⲇⲉ ⲙⲡⲉϥⲥⲱⲧⲙ ϫⲉ ⲁⲡⲉϥⲉⲓⲱⲧ ⲧⲁⲣⲕⲉⲡⲗⲁⲟⲥ ⲁⲩⲱ ⲓⲱⲛⲁⲑⲁⲛ ⲁϥⲥⲟⲩⲧⲛϩⲧⲏϥ ⲉⲃⲟⲗ ⲙⲡⲉϥϭⲉⲣⲱⲃ ⲉⲧϩⲛⲧⲉϥϭⲓϫ ⲁϥⲥⲟⲡϥ ϩⲙ ⲡⲙⲟⲩⲗϩ ⲛⲉⲃⲓⲱ ⲁϥⲕⲧⲟ ⲛⲧⲉϥϭⲓϫ ⲉϩⲟⲩⲛ ⲉⲣⲱϥ ⲁⲛⲉϥⲃⲁⲗ ⲛⲁⲩ ⲁⲩϫⲱⲧⲉ

14:28  ⲟⲩⲁ ⲇⲉ ⲉⲃⲟⲗ ϩⲙ ⲡⲗⲁⲟⲥ ⲛⲉϥϫⲱ ⲙⲙⲟⲥ ⲛⲁϥ ϫⲉ ϩⲛ ⲟⲩⲁⲛⲁϣ ⲡⲉⲕⲉⲓⲱⲧ ⲁϥⲧⲁⲣⲕⲉⲡⲗⲁⲟⲥ ⲉϥϫⲱ ⲙⲙⲟⲥ ϫⲉ ϥⲥϩⲟⲩⲟⲣⲧ ⲛϭⲓ ⲟⲩⲣⲱⲙⲉ ⲉⲧⲛⲁⲟⲩⲉⲙⲟⲉⲓⲕ ⲙⲡⲟⲟⲩ ⲡⲗⲁⲟⲥ ⲇⲉ ⲁϥⲥⲱϣⲙ

14:29  ⲁⲩⲱ ⲓⲱⲛⲁⲑⲁⲛ ⲁϥⲉⲓⲙⲉ ⲡⲉϫⲁϥ ϫⲉ ⲡⲁⲉⲓⲱⲧ ⲁϥⲑⲉⲙⲕⲉⲡⲕⲁϩ ⲁⲛⲁⲩ ⲉⲑⲉ ⲛⲧⲁⲛⲁⲃⲁⲗ ϫⲱⲧⲉ ⲉⲃⲟⲗ ϫⲉ ⲁⲓⲧⲉⲡⲟⲩϣⲏⲙ ⲉⲃⲟⲗ ϩⲙ ⲡⲉⲓⲉⲃⲓⲱ

14:30  ⲉⲓⲉ ⲉⲛⲉⲛⲧⲁⲡⲗⲁⲟⲥ ϭⲉ ⲟⲩⲱⲙ ϩⲛ ⲟⲩⲱⲙ ⲙⲡⲟⲟⲩ ⲉⲃⲟⲗ ϩⲛ ⲛⲉϣⲱⲗ ⲛⲛⲉⲩϫⲁϫⲉ ⲛⲁⲓ ⲛⲧⲁϥϩⲉ ⲉⲣⲟⲟⲩ ⲧⲉⲛⲟⲩ ⲛⲉⲣⲉⲧⲉⲡⲗⲏⲅⲏ ⲛⲁⲁϣⲁⲓ ⲡⲉ ⲉϫⲛ ⲛⲁⲗⲗⲟⲫⲩⲗⲟⲥ

14:31  ⲁⲩⲱ ⲁϥⲡⲁⲧⲁⲥⲥⲉ ⲉⲃⲟⲗ ϩⲛ ⲛⲁⲗⲗⲟⲫⲩⲗⲟⲥ ⲙⲡⲉϩⲟⲟⲩ ⲉⲧⲙⲙⲁⲩ ϩⲙ ⲙⲁⲭⲉⲙⲁⲥ ⲡⲗⲁⲟⲥ ⲇⲉ ⲁϥϩⲓⲥⲉ ⲉⲙⲁⲧⲉ

14:32  ⲁⲩⲱ ⲡⲗⲁⲟⲥ ⲁϥⲧⲁⲁϥ ⲉⲛϣⲱⲗ ⲁⲡⲗⲁⲟⲥ ϫⲓ ⲛϩⲉⲛⲟϩⲉ ⲛⲉⲥⲟⲟⲩ ⲙⲛ ϩⲉⲛⲁϩⲟⲟⲩ ⲁⲩⲱ ϩⲉⲛⲕⲧⲏⲣ ⲛⲉϩⲉ ⲁⲩϣⲱⲱⲧ ⲙⲙⲟⲟⲩ ϩⲓϫⲙ ⲡⲕⲁϩ ⲁⲩⲱ ⲡⲗⲁⲟⲥ ⲛⲉϥⲟⲩⲱⲙ ⲙⲛ ⲡⲉϥⲥⲛⲟϥ

14:33  ⲁⲩⲧⲁⲙⲉⲥⲁⲟⲩⲗ ⲇⲉ ⲉⲩϫⲱ ⲙⲙⲟⲥ ⲛⲁϥ ϫⲉ ⲁⲡⲗⲁⲟⲥ ⲣⲛⲟⲃⲉ ⲉⲡϫⲟⲉⲓⲥ ⲁϥⲟⲩⲉⲙⲁϥ ⲙⲛ ⲡⲉϥⲥⲛⲟϥ ⲁⲩⲱ ⲡⲉϫⲉⲥⲁⲟⲩⲗ ⲛⲁⲩ ϫⲉ ⲁⲛⲓⲟⲩⲛⲟϭ ⲛⲱⲛⲉ ⲉⲡⲉⲓⲙⲁ ⲉⲃⲟⲗ ϩⲛ ⲅⲑⲁⲉⲓⲙ

14:34  ⲡⲉϫⲉⲥⲁⲟⲩⲗ ⲇⲉ ⲛⲁⲩ ϫⲉ ⲃⲱⲕ ⲉⲃⲟⲗ ϩⲙ ⲡⲗⲁⲟⲥ ⲛⲧⲉⲧⲛϫⲟⲟⲥ ⲛⲁⲩ ϫⲉ ⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲉⲓⲛⲉ ⲉⲡⲉϥⲙⲁ ⲙⲡⲉϥⲣⲁⲥⲧⲉ ⲁⲩⲱ ⲡⲉϥⲉⲥⲟⲟⲩ ⲛϥϣⲁⲁⲧϥ ϩⲓϫⲙ ⲡⲉⲓⲱⲛⲉ ϫⲉ ⲛⲛⲉⲧⲛⲣⲛⲟⲃⲉ ⲉⲡϫⲟⲉⲓⲥ ⲉⲧⲣⲉⲧⲉⲧⲛⲟⲩⲉⲙⲁϥ ⲙⲛ ⲡⲉϥⲥⲛⲟϥ ⲁⲩⲱ ⲡⲗⲁⲟⲥ ⲧⲏⲣϥ ⲡⲟⲩⲁ ⲡⲟⲩⲁ ⲁϥⲉⲓⲛⲉ ⲙⲡⲉⲧⲛⲧⲟⲟⲧϥ ⲁⲩϣⲱⲱⲧ ⲙⲙⲟⲟⲩ ⲙⲡⲙⲁ ⲉⲧⲙⲙⲁⲩ

14:35  ⲁⲩⲱ ⲥⲁⲟⲩⲗ ⲁϥⲕⲱⲧ ⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲡⲁⲓ ⲡⲉ ⲡⲉⲑⲩⲥⲓⲁⲥⲧⲏⲣⲓⲟⲛ ⲛⲧⲁⲥⲁⲟⲩⲗ ⲁⲣⲭⲓⲥⲑⲁⲓ ⲛⲕⲟⲧϥ ⲙⲡϫⲟⲉⲓⲥ

14:36  ⲁⲩⲱ ⲡⲉϫⲉⲥⲁⲟⲩⲗ ⲙⲡⲗⲁⲟⲥ ϫⲉ ⲙⲁⲣⲉⲛⲃⲱⲕ ⲉϫⲛ ⲛⲁⲗⲗⲟⲫⲩⲗⲟⲥ ⲛⲧⲉⲩϣⲏ ⲛⲧⲉⲛϩⲁⲣⲡⲁⲍⲉ ⲉⲃⲟⲗ ⲛϩⲏⲧⲟⲩ ϣⲁ ⲡⲛⲁⲩ ⲛϩⲧⲟⲟⲩⲉ ⲛⲧⲉⲛⲧⲙϣⲉϫⲡⲟⲩⲣⲱⲙⲉ ⲉⲃⲟⲗ ⲛϩⲏⲧⲟⲩ ⲡⲉϫⲁⲩ ⲛⲁϥ ϫⲉ ⲡⲁⲅⲁⲑⲟⲛ ⲧⲏⲣϥ ⲁⲣⲓϥ ⲛⲁϩⲣⲁⲕ ⲡⲉϫⲉⲡⲟⲩⲏⲏⲃ ϫⲉ ⲙⲁⲣⲉⲛϯ ⲙⲡⲉⲛⲟⲩⲟⲓ ⲉⲡⲉⲓⲙⲁ ⲉⲣⲁⲧϥ ⲙⲡⲛⲟⲩⲧⲉ ⲛⲧⲛϫⲛⲟⲩϥ

14:37  ⲁⲩⲱ ⲥⲁⲟⲩⲗ ⲁϥϫⲛⲉⲡⲛⲟⲩⲧⲉ ϫⲉ ⲉⲛⲉⲧⲁⲃⲱⲕ ⲉⲣⲁⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲉⲕⲛⲁⲧⲁⲁⲩ ⲉϩⲣⲁⲓ ⲉⲛϭⲓϫ ⲙⲡ ⲙⲡⲉⲡϫⲟⲉⲓⲥ ⲇⲉ ⲉⲣⲟⲩⲱ ⲛⲁϥ ⲙⲡⲉϩⲟⲟⲩ ⲉⲧⲙⲙⲁⲩ

14:38  ⲡⲉϫⲉⲥⲁⲟⲩⲗ ⲛⲁⲩ ϫⲉ ⲁⲛⲓⲛⲉ ⲉⲡⲉⲓⲙⲁ ⲛⲛⲉⲧⲁⲅⲙⲁ ⲧⲏⲣⲟⲩ ⲙⲡ ⲛⲧⲉⲧⲛⲉⲓⲙⲉ ⲁⲩⲱ ⲛⲧⲉⲧⲛⲛⲁⲩ ϫⲉ ⲛⲧⲁⲡⲉⲓⲛⲟⲃⲉ ϣⲱⲡⲉ ϩⲛ ⲛⲓⲙ ⲙⲡⲟⲟⲩ

14:39  ϫⲉ ⲡϫⲟⲉⲓⲥ ⲟⲛϩ ⲡⲉⲛⲧⲁϥⲧⲟⲩϫⲉⲡ ϫⲉ ⲉϥϣⲁⲛⲧⲁⲙⲟⲛ ⲉⲧⲃⲉ ⲓⲱⲛⲁⲑⲁⲛ ⲡⲁϣⲏⲣⲉ ϩⲛ ⲟⲩⲙⲟⲩ ϥⲛⲁⲙⲟⲩ ⲡⲉ ⲁⲩⲱ ⲙⲡⲉⲗⲁⲁⲩ ϣⲁϫⲉ ϩⲙ ⲡⲗⲁⲟⲥ ⲧⲏⲣϥ

14:40  ⲡⲉϫⲉⲥⲁⲟⲩⲗ ⲛⲛⲣⲱⲙⲉ ⲧⲏⲣⲟⲩ ⲙⲡ ϫⲉ ⲛⲧⲱⲧⲛ ⲧⲉⲧⲛⲛⲁϣⲱⲡⲉ ϩⲛ ⲟⲩⲙⲛⲧϩⲙϩⲁⲗ ⲁⲛⲟⲕ ϩⲱⲱⲧ ⲟⲛ ⲙⲛ ⲓⲱⲛⲁⲑⲁⲛ ⲡⲁϣⲏⲣⲉ ⲧⲉⲛⲛⲁϣⲱⲡⲉ ϩⲛ ⲟⲩⲙⲛⲧϩⲙϩⲁⲗ ⲡⲉϫⲉⲡⲗⲁⲟⲥ ⲛⲥⲁⲟⲩⲗ ϫⲉ ⲡⲁⲅⲁⲑⲟⲛ ⲉⲧⲛⲁϩⲣⲁⲕ ⲁⲣⲓϥ

14:41  ⲡⲉϫⲉⲥⲁⲟⲩⲗ ϫⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡ ⲉⲧⲃⲉ ⲟⲩ ⲙⲡⲉⲕϣⲁϫⲉ ⲙⲡⲟⲟⲩ ⲙⲛ ⲡⲉⲕϩⲙϩⲁⲗ ⲉⲛⲉⲣⲉⲡⲛⲟⲃⲉ ⲉⲣⲟⲓ ⲏ ⲓⲱⲛⲁⲑⲁⲛ ⲡⲁϣⲏⲣⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡ ϯⲙⲁⲉⲓⲛ ⲛⲁⲛ ⲁⲩⲱ ⲉⲕϣⲁⲛϫⲟⲟⲥ ϩⲓⲛⲁⲓ ⲧⲁⲓ ⲧⲉ ⲑⲉ ⲉⲧⲛⲁϣⲱⲡⲉ ϯⲙⲁⲉⲓⲛ ⲡϫⲟⲉⲓⲥ ⲉⲡⲉⲕⲗⲁⲟⲥ ⲡ ⲁⲩⲱ ⲡⲉⲕⲗⲏⲣⲟⲥ ⲁϥⲓ ⲉϫⲛ ⲓⲱⲛⲁⲑⲁⲛ ⲙⲛ ⲥⲁⲟⲩⲗ ⲡⲗⲁⲟⲥ ⲁϥⲉⲓ ⲉⲃⲟⲗ

14:42  ⲡⲉϫⲉⲥⲁⲟⲩⲗ ϫⲉ ⲛⲉϫⲕⲗⲏⲣⲟⲥ ϩⲛ ⲧⲁⲙⲏⲧⲉ ⲁⲩⲱ ϩⲛ ⲧⲙⲏⲧⲉ ⲛⲓⲱⲛⲁⲑⲁⲛ ⲡⲁϣⲏⲣⲉ ⲁⲩⲱ ⲡⲉⲧⲉⲣⲉⲡϫⲟⲉⲓⲥ ⲛⲁⲉⲓⲛⲉ ⲙⲡⲉⲕⲗⲏⲣⲟⲥ ⲉϫⲱϥ ⲉϥⲉⲙⲟⲩ ⲡⲉϫⲉⲡⲗⲁⲟⲥ ⲉϩⲟⲩⲛ ϩⲛ ⲥⲁⲟⲩⲗ ϫⲉ ⲛⲛⲉⲡⲉⲓϣⲁϫⲉ ϣⲱⲡⲉ ⲥⲁⲟⲩⲗ ⲇⲉ ⲁϥⲁⲛⲁⲅⲕⲁⲍⲉ ⲙⲡⲗⲁⲟⲥ ⲁⲩⲛⲉϫⲕⲗⲏⲣⲟⲥ ϩⲛ ⲧⲉϥⲙⲏⲧⲉ ⲁⲩⲱ ϩⲛ ⲧⲙⲏⲧⲉ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲡⲉⲕⲗⲏⲣⲟⲥ ⲉⲓ ⲉϫⲛ ⲓⲱⲛⲁⲑⲁⲛ

14:43  ⲡⲉϫⲉⲥⲁⲟⲩⲗ ⲛⲓⲱⲛⲁⲑⲁⲛ ϫⲉ ⲙⲁⲧⲁⲙⲟⲓ ϫⲉ ⲟⲩ ⲡⲉⲛⲧⲁⲕⲁⲁϥ ⲁⲩⲱ ⲓⲱⲛⲁⲑⲁⲛ ⲁϥⲧⲁⲙⲟϥ ⲉϥϫⲱ ⲙⲙⲟⲥ ϫⲉ ⲛⲧⲁⲓⲥⲉⲡϩⲧⲏϥ ⲙⲡⲁϭⲉⲣⲱⲃ ⲛⲟⲩⲕⲟⲩⲓ ⲛⲉⲃⲓⲱ ⲁⲓⲧⲟⲡϥ ⲁⲩⲱ ⲉⲓⲥ ϩⲏⲏⲧⲉ ⲁⲛⲟⲕ ⲉⲓⲛⲁⲙⲟⲩ ⲉⲧⲃⲉ ⲡⲁⲓ

14:44  ⲡⲉϫⲉⲥⲁⲟⲩⲗ ⲛⲁϥ ϫⲉ ⲛⲁⲓ ⲛⲉⲧⲉⲣⲉⲡⲛⲟⲩⲧⲉ ⲛⲁⲁⲁⲩ ⲛⲁⲓ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉϫⲱⲓ ϫⲉ ϩⲛ ⲟⲩⲙⲟⲩ ⲕⲛⲁⲙⲟⲩ ⲙⲡⲟⲟⲩ ⲛϩⲟⲟⲩ

14:45  ⲁⲩⲱ ⲡⲗⲁⲟⲥ ⲡⲉϫⲁϥ ⲛⲥⲁⲟⲩⲗ ϫⲉ ⲉⲛⲉⲡⲟⲟⲩ ϩⲏ ϥⲛⲁⲙⲟⲩ ⲛϭⲓ ⲡⲉⲛⲧⲁϥⲉⲓⲣⲉ ⲙⲡⲉⲓⲛⲟϭ ⲛⲟⲩϫⲁⲓ ϩⲙ ⲡ ⲡϫⲟⲉⲓⲥ ⲟⲛϩ ϫⲉ ⲉϣⲱⲡⲉ ⲟⲩⲛⲟⲩⲃⲱ ⲛⲟⲩⲱⲧ ⲛⲁϩⲉ ⲉⲃⲟⲗ ϩⲛ ⲧⲉϥⲁⲡⲉ ⲉϩⲣⲁⲓ ⲉϫⲙ ⲡⲕⲁϩ ϫⲉ ⲡⲗⲁⲟⲥ ⲙⲡⲛⲟⲩⲧⲉ ⲁϥⲉⲓⲣⲉ ⲙⲡⲉⲓⲛⲟϭ ⲛⲛⲟⲃⲉ ⲁⲩⲱ ⲡⲗⲁⲟⲥ ⲁϥϣⲗⲏⲗ ⲉϩⲣⲁⲓ ⲉⲡⲛⲟⲩⲧⲉ ⲉϩⲣⲁⲓ ⲉϫⲛ ⲓⲱⲛⲁⲑⲁⲛ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲙⲡⲉϥⲙⲟⲩ

14:46  ⲥⲁⲟⲩⲗ ⲇⲉ ⲁϥⲃⲱⲕ ⲉⲣⲁⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲟⲗⲟⲩ ⲉϩⲣⲁⲓ ⲉⲛⲉⲩⲙⲁ

14:47  ⲁⲩⲱ ⲥⲁⲟⲩⲗ ⲁϥⲕⲗⲏⲣⲟⲩ ⲉⲧⲣⲉϥⲣⲣⲟ ⲁϥϣⲱⲡⲉ ⲛⲟⲩⲛⲟϭ ⲛϩⲱⲃ ⲉϫⲙ ⲡ ⲁⲩⲱ ⲛⲉϥⲡⲟⲗⲉⲙⲉⲓ ⲙⲛ ⲛⲉϫⲁϫⲉ ⲧⲏⲣⲟⲩ ⲉⲧϩⲙⲡⲉϥⲕⲱⲧⲉ ⲙⲱⲁⲃ ⲙⲛ ⲛⲉϣⲏⲣⲉ ⲛⲁⲙⲙⲱⲛ ⲁⲩⲱ ⲛϣⲏⲣⲉ ⲛⲉⲇⲱⲙ ⲁⲩⲱ ⲙⲛ ⲃⲁⲓⲑⲉⲱⲣ ⲙⲛ ⲡⲣⲣⲟ ⲛⲥⲟⲩⲃⲁ ⲁⲩⲱ ⲙⲛ ⲛⲁⲗⲗⲟⲫⲩⲗⲟⲥ ⲡⲙⲁ ⲉϣⲁϥⲃⲱⲕ ⲉⲣⲟϥ ϣⲁϥⲟⲩϫⲁⲓ ⲛϩⲏⲧϥ

14:48  ⲁⲩⲱ ⲁϥⲉⲓⲣⲉ ⲛⲟⲩϭⲟⲙ ⲉⲥⲛⲁϣⲧ ⲁϥⲡⲁⲧⲁⲥⲥⲉ ⲙⲡⲁⲙⲁⲗⲏⲕ ⲁⲩⲱ ⲁϥⲛⲟⲩϩⲙ ⲙⲡ ⲛⲧⲟⲟⲧⲟⲩ ⲛⲛⲉⲧⲑⲗⲓⲃⲉ ⲙⲙⲟⲟⲩ

14:49  ⲛϣⲏⲣⲉ ⲇⲉ ⲛⲥⲁⲟⲩⲗ ⲛⲁⲓ ⲛⲉ ⲓⲱⲛⲁⲑⲁⲛ ⲙⲛ ⲓⲉⲥⲥⲓⲟⲩ ⲁⲩⲱ ⲙⲉⲗⲭⲓⲥⲁ ⲁⲩⲱ ⲛⲣⲁⲛ ⲛⲧⲉϥϣⲉⲉⲣⲉ ⲥⲛⲧⲉ ⲡⲣⲁⲛ ⲛⲧϣⲣⲡⲙⲓⲥⲉ ⲡⲉ ⲙⲉⲣⲟⲃ ⲡⲣⲁⲛ ⲛⲧⲙⲉϩⲥⲛⲧⲉ ⲡⲉ ⲙⲉⲗⲭⲟⲗ

14:50  ⲡⲣⲁⲛ ⲇⲉ ⲛⲧⲉϥⲥϩⲓⲙⲉ ⲡⲉ ⲁⲭⲓⲛⲟⲟⲃ ⲧϣⲉⲉⲣⲉ ⲛⲁⲭⲓⲛⲁⲁⲥ ⲁⲩⲱ ⲡⲣⲁⲛ ⲙⲡⲉϥⲁⲣⲭⲓⲥⲧⲣⲁⲧⲏⲅⲟⲥ ⲡⲉ ⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲡϣⲏⲣⲉ ⲛⲑⲙϩⲁⲗ ⲛⲥⲁⲟⲩⲗ

14:51  ⲁⲩⲱ ϭⲓⲥ ⲡⲉ ⲡⲉⲓⲱⲧ ⲛⲥⲁⲟⲩⲗ ⲁⲩⲱ ⲛⲏⲣ ⲡⲉ ⲡⲓⲱⲧ ⲛⲁⲃⲉⲛⲛⲏⲣ ⲡϣⲏⲣⲉ ⲛⲓⲁⲃⲓⲛ ⲡϣⲏⲣⲉ ⲛⲁⲃⲓⲏⲣ

14:52  ⲁⲩⲱ ⲡⲡⲟⲗⲉⲙⲟⲥ ⲛⲉϥⲛⲁϣⲧ ⲉϫⲛ ⲛⲁⲗⲗⲟⲫⲩⲗⲟⲥ ⲛⲛⲉϩⲟⲟⲩ ⲧⲏⲣⲟⲩ ⲛⲥⲁⲟⲩⲗ ⲁⲩⲱ ⲥⲁⲟⲩⲗ ⲛⲧⲉⲣⲉϥⲛⲁⲩ ⲉⲣⲱⲙⲉ ⲛⲓⲙ ⲛⲇⲩⲛⲁⲧⲟⲥ ⲁⲩⲱ ⲣⲱⲙⲉ ⲛⲓⲙ ⲉϥϫⲟⲟⲣ ⲁϥⲥⲟⲟⲩϩⲟⲩ ⲉϩⲟⲩⲛ ⲉⲣⲟⲟⲩ