LinVB - Job - 37

37:1  Emoni ngai bongo, nakomi kolenge, mpe motema mokomi kobete makasi lokola molingi kobima.

37:2  Boyoka naino mongongo makasi mwa Nzambe, boyoka makeléle makobimaka o monoko mwa ye.

37:3  Akoyokisaka mango bipai binso o likolo, minkalali mya ye mikokendeke o nse mobimba.

37:4  Na nsima, lokito lokoyokanaka makasi, ye mokonzi monene azali koloba na mongongo monene. Awa ayokisi mongongo mwa ye bongo, atambwisi mpe minkalali mya ye.

37:5  Nzambe akosalaka makamwisi ma ye na mongongo makasi, bikela biye binene bileki mayele ma biso.

37:6  Soko alobi na mbula ya mpembe : « Kweya o nse ! » mpe na mbula : « Bete makasi ! »,

37:7  bato banso batiki mosala mwa bango mpo ’te bandima bikela bya ye.

37:8  Nyama ya zamba ikei koluka esika ya kolala, mpe kobombama o kati ya mabulu.

37:9  Na nsima ekumbaki ebimi o esika ezalaki, mpe mompepe moyokisi mpio makasi.

37:10  Mpema ya Nzambe ekangisi mai mabongwana, makoma makasi lokola libanga.

37:11  Ebimi moi, mampata manso makolongwa, mampata mayaki na nkake makopanzana.

37:12  Ye moto akotambwisaka mango bipai binso mpo ’te masala mosala lokola ye alingi, o mokili mobimba, se lokola ye atindi.

37:13  Apesa etumbu to bolamu, manso mazali se mosala mwa mampata ma ye.

37:14  E Yob, yoka mango malamu, fanda nye mpe tala makamwisi ma Nzambe.

37:15  Boniboni Nzambe akotindaka mango, oyebi ? Boniboni akongengisa monkalali o mampata, oyebi ?

37:16  Botamboli bwa mampata o likolo, oyebi ? Oyebi makamwisi manso ma bwanya bwa ye ?

37:17  Yo, soko bilamba bileki molunge mingi, o ntango mokili mokauki na moi makasi,

37:18  ozalaki wana mpo ’te okomisa mampata makasi, lokola bakobeteke talatala ya bibende ?

37:19  Yebisa ngai makambo nini tokoki koloba na ye, awa molili molekeli biso, toyebi yango te.

37:20  Likambo nazali koloba, ayoki lyango te, solo ? Maye moto azali kotinda, ayebi mango te ?

37:21  Ntango esusu moi mokomonono lisusu te, zambi mampata maindo mazipi mwango, kasi na nsima mompepe moyei kolongola mango ;

37:22  mpe mwinda kitoko mobimi lokola wolo epai ya Nordi, Nzambe amizingi na nkembo enene mpenza.

37:23  Ye azali nta bokasi, tokoki kokoma epai ya ye te, aleki binso na bokasi mpe na bosembo, akonyokoloko moto moko te.

37:24  Yango wana bato banso basengeli kobanga ye, bato ba mayele banso elongo bazali se mpamba o miso ma ye.