Kapingamarangi - Leviticus - 26

26:1  Dimaadua ga-helekai, “Goodou hudee heia nia ada dangada, be nia ada i-di gili nia duludulu, be nia ada i-di gili nia hadu belee daumaha ginai goodou. Au go Dimaadua, go di-godou God.

26:2  Hagagila-ina-aga di hai-daumaha, gei gi-hagalabagau-ina-aga di gowaa dela e-daumaha-iei nia daangada mai gi-di-Au. Au dela go Dimaadua.

26:3  “Maa goodou ga-mouli gii-hai be agu haganoho, ga-hagagila-aga agu mee ala ne-hagababa,

26:4  gei au ga-gowadu gi goodou nia uwa i-di madagoaa dela e-humalia, bolo gii-mee di-godou henua gi-gowadu nia huwa-laagau humalia, gei nia laagau gi-gowadu gi goodou nia golee-laagau.

26:5  Godou huwa-laagau ga-logowaahee gei goodou ga-hadihadi godou huwa-‘wheat’, gaa-dae-loo gi-di madagoaa e-hadi-ai nia golee-waini. Goodou ga-hadihadi godou golee-waini gaa-dae-loo gi-di madagoaa e-haga-nonnono-ai godou hadu-‘wheat’. Goodou ga-hai-mee gi-nia mee ala e-hiihai ginai goodou e-gai, gei goodou ga-mouli humalia i-lodo di-godou lohongo.

26:6  “Au ga-gowadu gi goodou di noho i-di aumaalia i-lodo di-godou henua, gei goodou gaa-kii ge hagalee mmaadagu i-nia daangada. Au ga-daa gi-daha nia manu hagalliga gi-daha mo di-godou henua, gei nia dauwa ga-hagalee hai i-golo.

26:7  Goodou ga-maaloo i godou hagadaumee.

26:8  Digau dogolima i goodou e-mee-hua di haga-magedaa nadau daangada e-lau i digaula, gei digau e-lau i goodou e-mee-hua di haga-magedaa nadau daangada e-mana.

26:9  Au ga-haga-maluagina goodou ga-gowadu gi goodou godou dama gi-dogologowaahee. Au ga-haga-gila-aga dagu hagababa dela ne-hai-adu gi goodou.

26:10  Nia huwa-laagau ala ma-gaa-hadi go goodou la-ga-logowaahee huoloo. Goodou ga-miami i-nia maa i-lodo di ngadau e-dahi, gei goodou gaa-kili hunu maa gi-daha bolo gii-pono go nia mee hoou.

26:11  Au ga noho i-lodo dogu Hale-laa dabu i godou baahi, Au hagalee-loo e-huli gi-daha mo goodou.

26:12  Au ga-madalia goodou, gei Au gaa-hai di God ni goodou, gei goodou gaa-hai nia daangada ni-aagu.

26:13  Au go Dimaadua, go di-godou God, dela ne-laha-mai goodou gi-daha mo Egypt bolo gi-hagalee hai goodou nia hege. Au gu-oho gi-daha nia mogobuna ala nogo daahi goodou, gaa-hai goodou gi-taele huudonu.”

26:14  Dimaadua ga-helekai, “Maa goodou ga-hagalee daudali agu haganoho, gei goodou ga-hagaduadua.

26:15  Maa goodou gaa-buhi di-daudali agu haganoho mo agu mee ala ne-haganoho, gaa-oho agu hagababa ala ne-hai-adu gi goodou,

26:16  gei Au ga-hagaduadua goodou. Au ga-gowadu gi goodou nia hagaduadua ala be nia magi hili-ngadaa, mo nia magi welengina ala e-hai goodou gi-dee-gida gaa-podo godou mouli. Goodou gaa-dogi godou hagadili, gei nia maa ono humalia adu gi goodou ai, idimaa, godou hagadaumee ga-haga-magedaa goodou, gaa-gai nia huwa o godou mee ala ne-dogi.

26:17  Au gaa-huli gi-daha mo goodou, bolo gi-magedaa goodou, gei digau ala e-de-hiihai-adu gi goodou la-gaa-dagi goodou. Goodou ga-mmaadagu huoloo gaa-llele, gei di-maa tangada ne-waluwalu goodou ai.

26:18  “Gei i-muli nia mee aanei huogodoo, goodou hagalee hagalongo hua igolo mai gi-di-Au, gei Au ga-haga-uda gi nonua godou hagaduadua i-nia holongo e-hidu.

26:19  Au gaa-oho godou de-hagalongo mo godou hagamuamua, nia uwa ga-hagalee monnono, godou henua ga-maangoo ga-hamaaloo gadoo be-di baalanga.

26:20  Goodou ngalua hagamadabouli huogodoo ga ono hadinga adu gi goodou ai, idimaa di-godou henua la-ga-hagalee huwa, gei nia laagau ga-hagalee hai ono huwa.

26:21  “Maa goodou ga-daahi-maaloo-hua beelaa godou manawa hagamuamua ga-hagalee hagalongo mai gi-di-Au, gei Au ga-haga-uda labelaa gi nonua godou hagaduadua i-nia holongo e-hidu.

26:22  Au ga-hagau-adu gi goodou nia manu haga-madagudagu dangada e-daaligi godou dama, ga-haga-huaidu godou manu, gei goodou ga-hogoohi, nia daangada e-taele i-hongo godou ala ai.

26:23  “Gei i-muli nia hagaduadua aanei, goodou e-de-hagalongo hua igolo mai gi-di-Au, e-daahi-hua beelaa di-godou hai-baahi mai gi-di-Au,

26:24  gei Au ga-huli-adu gi goodou ga-hagaduadua goodou i-nia holongo e-hidu gi nonua i-nia holongo mai i-mua.

26:25  Au ga-hagau-adu gi goodou nia dauwa e-hagaduadua goodou idimaa goodou la-gu-oho tadau hagababa, gei goodou ma-ga-dagabuli i-lodo godou waahale belee pala hagammuni i-di-Au, gei Au ga-hagau-adu gi goodou di magi dela e-hili-ngadaa, gei goodou ga-tangi-anga gi godou hagadaumee bolo goodou gu-magedaa.

26:26  Au gaa-hai godou meegai gi-hagalee, gei nia ahina dilongoholu ga-hai-hegau-hua di mee dunu palaawaa e-dahi e-dunu nia palaawaa huogodoo ala i nadau baahi. Digaula gaa-duhe-adu nia maa gi goodou, gei goodou gaa-gai nia maa huogodoo, ga-nomuli gei goodou e-hiigai hua igolo.

26:27  “Gei i-muli nia mee aanei huogodoo, goodou e-daahi-hua beelaa di-godou hai-baahi mai gi-di-Au ge hagalee hiihai e-hagalongo-mai gi-di-Au,

26:28  malaa, i-lodo dogu hagawelewele, Au ga-huli-adu gi goodou ga-hagaduadua labelaa goodou gi-huaidu gi nonua i-nia holongo e-hidu i-nia holongo mai i-mua.

26:29  Goodou koia ga-hiigai gi nonua, gaa-gai godou dama.

26:30  Au gaa-oho gi-daha godou gowaa dudu tigidaumaha ala i-hongo nia gonduu, gaa-oho gi-daha godou gowaa dudu tigidaumaha lolo-kala, gaa-kili godou huaidina ala guu-mmade gi-hongo godou ada-god ala guu-mmoe i-hongo di gelegele. I-lodo dogu dee-hiihai huoloo adu gi goodou,

26:31  gei Au gaa-oho godou waahale, gaa-oho godou gowaa hai-daumaha, ga-hagalee hila gi godou tigidaumaha.

26:32  Au gaa-oho di-godou henua gi-huaidu, gei godou hagadaumee ala ma-ga-hai-henua ginai ga-goboina-e-ginaadou di mooho deenei.

26:33  Au ga-hagau-adu gi goodou nia dauwa, gaa-hai goodou gi-mooho-adu gi-lodo nia henua ala i-daha. Di-godou henua gaa-dugu ono daangada ai, gei godou waahale gaa-dugu mooho.

26:34  Gei tenua deelaa ga-tenetene i dono hagamolooloo i-nia ngadau aalaa, di hagamolooloo dela hagalee ne-wanga go goodou gi-di-maa. Tenua deelaa ga-diiagi ga-hagamolooloo i-lodo di madagoaa dela goodou guu-lahi guu-noho i-lodo nia henua o godou hagadaumee.

26:35  Gei tenua deelaa ga-tenetene i dono hagamolooloo i-nia ngadau aalaa, di hagamolooloo dela hagalee ne-wanga go goodou gi-di-maa. Tenua deelaa ga-diiagi ga-hagamolooloo i-lodo di madagoaa dela goodou guu-lahi guu-noho i-lodo nia henua o godou hagadaumee.

26:36  “Au gaa-hai goodou ala ne-lahi gi-daha gi-mmaadagu ngoohia gaa-llele gi-daha i-di godou madagoaa ma-ga-hagalongo gi-nia lee o-nia lau laagau ala ma-ga-iliili go di madangi. Goodou gaa-llele gadoo be goodou ala ma-gaa-llele gi-daha mo godou hagadaumee i-lodo tauwa, gei goodou ga-tingatinga gei godou hagadaumee la-hagalee i godou baahi.

26:37  Goodou ga-dugidugi i godou mehanga gei di-maa digau e-waluwalu goodou ai, gei goodou e-deemee di heebagi gi godou hagadaumee.

26:38  Goodou ga-mmade-hua i-lodo nia henua ala ne-hagabagi ginai goodou, gaa-danu i-lodo nia henua o godou hagadaumee.

26:39  Digau hua dulii i goodou ala ga-mouli i-lodo tenua o godou hagadaumee, gei digaula ga-hagalee, idimaa i godou huaidu mo nia huaidu o godou maadua-mmaadua.

26:40  “Gei godou madawaawa ga-haagi nadau ihala mo nia hala o nadau maadua-mmaadua, ala nogo hai-baahi-mai gi-di-Au ge de-hagalongo mai gi-di-Au,

26:41  gaa-hai Au gi-hai-baahi ang-gi digaula, ga-hagabagi digaula gi-lodo nia henua o nadau hagadaumee. Ga-nomuli, godou madawaawa ga-manawa-hila-gi-lala gaa-donu ang-gi ginaadou, gaa-hui di hui ang-gi nadau huaidu mo nadau de-hagalongo,

26:42  gei Au ga-langahia dagu hagababa ang-gi Jacob, mo Isaac mo Abraham, gei Au ga-haga-hoou dagu hagababa bolo Au gaa-wanga tenua deelaa gi digaula.

26:43  Matagidagi, digau o tenua deelaa le e-hai gi-daa gi-daha, gii-mee di-hagamolooloo tenua deelaa, gei digaula e-kae di hagaduadua i-di nadau kili gi-daha agu haganoho mo agu mee ala ne-hagi-anga gi digaula.

26:44  Malaa, i-di madagoaa dela e-noho-iei digaula i-lodo tenua o nadau hagadaumee, gei Au hagalee bolo gu-diiagi-hua digaula be e-hagahuaidu digaula. Ma-gaa-hai beenei gei deenei di hagalawa o dagu hagababa ang-gi digaula. Au go Dimaadua, go di God digaula.

26:45  Au ga-haga-hoou dagu hagababa dela ne-hai ko-Au gi nadau maadua-mmaadua, i dogu madagoaa ne-haga-modongoohia-ai Au ang-gi nia henua ogu mahi i dogu laha-mai agu daangada gi-daha mo Egypt, idimaa, bolo Au dela go Dimaadua, le e-hai di God ni digaula.”

26:46  Nia mee aanei huogodoo la-go nia haganoho mo nia hagababa ala ne-wanga go Dimaadua gi Moses i-hongo di Gonduu Sinai bolo gi-hagi-anga-ina gi digau Israel.