Kapingamarangi - Luke - 20

20:1  Dahi laangi-hua, Jesus nogo agoago gi-nia daangada i-lodo di Hale Daumaha i-di Longo-Humalia, gei nia dagi hai-mee-dabu mo digau haga-donudonu haganoho ngaadahi mo nia dagi mmaadua ga-lloomoi,

20:2  ga-helekai gi Mee, “Hagia-mai gi gimaadou be nia mogobuna dagi mai ihee ala e-hai-ai au mee aanei? Ma koai dela ne-gowadu di mogobuna dagi e-hai au mee aanei?”

20:3  Jesus ga-helekai gi digaula, “Dolomeenei gei Au e-heeu-adu dagu mee: Hagia-mai,

20:4  nia mogobuna a John nogo hai ana babdais, la-ne-lloomoi i-baahi o God, be mai i-baahi nia daangada?”

20:5  Gei digaula ga-helehelekai i nadau mehanga, “Gidaadou la-ga-helekai bolo-aha? Maa gidaadou ga-helekai boloo: ‘Ne-loomoi i-baahi o God,’ gei Mee ga-helekai boloo, ‘Malaa e-aha goodou hagalee hagadonu John?’

20:6  Gei gidaadou ma-ga-helekai boloo, ‘Ne-loomoi i-baahi nia daangada,’ gei digau dogologo aanei ga-dilidili gidaadou, idimaa digaula e-hai bolo John la di soukohp.”

20:7  Gei digaula ga-helekai, “Gimaadou e-de-iloo be nia mogobuna a maa ne-gaamai i-hee.”

20:8  Gei Jesus ga-helekai gi digaula, “Au hagalee hagi-adu hogi be nia mogobuna dagi ni-ooi ala e-hai-ai agu mee aanei.”

20:9  Jesus gaa-kai dana ala-kai gi digaula, “Taane ne-dogi dana hadagee-waini, gaa-wanga gi ana gau benebene-hadagee, geia gaa-hana haga-mogowaa gu-duai-nau.

20:10  Gaa-dae-mai di madagoaa dela e-hadi-ai nia huwa o-di hadagee, gei mee ga-hagau dana hege belee kumi dono duhongo i-nia huwa o-di hadagee-waini deelaa. Gei digau benebene-hadagee ga-daaligi di hege deelaa, ga-hagau a mee gii-hana ana mee ne-kae ai.

20:11  Gei mee ga-hagau labelaa dana huai hege, gei digaula ga-daaligi labelaa a-mee, gaa-hai a-mee hagahuaidu, ga-hagau a-mee gii-hana ana mee ne-kae ai.

20:12  Gei mee ga-hagau togodolu hege, gei digaula ga-daaligi a-mee gi-moholehole labelaa, gaa-hudu a-mee gi-daha.

20:13  Gei tangada dana hadagee-waini deelaa, ga-helekai, ‘Au gaa-hai dagu-aha? Au ga-hagau-hua go dagu dama daane donu hagalabagau. Holongo digaula ga-hagalaamua-laa a-mee!’

20:14  Malaa, digau benebene di hadagee deelaa ne-mmada gi mee, ga-helekai i nadau mehanga, ‘Deenei la-go tama-daane donu tangada dana hadagee-waini. Gidaadou ga-daaligi a-mee gii-made, gei ono maluagina gaa-hai nia mee ni gidaadou.’

20:15  Gei digaula gaa-hudu a-mee gi-daha mo di hadagee-waini, ga-daaligi a-mee gii-made.” Gei Jesus ga-heeu, “Malaa, dehee-laa di hai o tangada dana hadagee-waini gaa-hai ang-gi digau benebene hadagee aalaa?

20:16  Mee ga-hanimoi, ga-daaligi digau benebene-hadagee aalaa, gaa-wanga di hadagee gi nnuai gau benebene-hadagee.” Gei digaula ala ne-hagalongo gi-di mee deenei ga-helekai-aga, “Hagalee-loo e-hai beenaa!”

20:17  Jesus gaa-mmada gi digaula ga-helekai, “Malaa, di Beebaa-Dabu deenei le e-hai bolo-aha, ‘Di hadu dela ne-haga-balumee go digau hau-hale, la-guu-hai di hadu e-kaedahi e-hagalabagau!’

20:18  “Digau huogodoo ala ga-hingahinga gi-hongo di hadu deelaa, la-ga-mooho haga-ligiligi, gei di hadu deelaa ma-gaa-doo gi-hongo tangada, gei tangada deelaa la-ga-mooho haga-ligiligi, guu-hai hua nia gelegele.”

20:19  Digau haga-donudonu haganoho mo nia dagi aamua hai-mee-dabu ne-hagamada belee galabudi Jesus i-di madagoaa-hua deelaa, idimaa digaula gu-iloo bolo di ala-kai a-Mee ne-hai, le e-hai-baahi ang-gi ginaadou, gei digaula e-mmaadagu i-nia daangada.

20:20  Digaula ga-halahala di madagoaa humalia, ga-hagau nia daane ala e-haga-maanadu bolo ginaadou le e-donu, e-hagalongo hagammuni gi nnelekai a Jesus gii-mee ginaadou di haga-hala a Jesus e-lahi a-Mee gi-nia mogobuna gabunga o-di gobinaa o Rome.

20:21  Digau madamada-gaiaa aanei ga-helekai gi Jesus, “Tangada Agoago, gimaadou gu-iloo bolo au mee ala nogo agoago-ai le e-donu. Gimaadou e-iloo labelaa bolo Goe hagalee haga-dahidamee nia haganoho nia daangada, ge e-agoago-hua di tonu a God mo dono hiihai gi-nia daangada.

20:22  Hagia-mai be di-maa e-hai-baahi gi tadau haganoho maa gidaadou gaa-hui dagitedi gi-di king o Rome be deeai?”

20:23  Gei Jesus gu-iloo-Ia di hai-haga-magiaa digaula, ga-helekai,

20:24  “Gaamai tei bahihadu-silber. Di ada mo di ingoo ni-ooi aanei i-hongo di-maa?” Digaula ga-helekai, “Ni di king o Rome.”

20:25  Gei Jesus ga-helekai, “Malaa, huia gi-di king o Rome nia mee a di king, ge huia gi God nia mee a God.”

20:26  Digaula gu-deemee di-haga-hala a-Mee i-mua nia daangada, guu-noho dee-muu, gu-goboina i ana helekai.

20:27  Hunu Sadduccee, ala e-hai bolo nia daangada le-hagalee mouli-aga, ne-lloomoi gi Jesus ga-helekai,

20:28  “Meenei, Tangada Agoago, Moses ne-hihi taganoho deenei, bolo taane ma-gaa-made, ga-diiagi dono lodo nau dama ai, gei tuaahina-daane o-maa e-hai gii-lodo gi-di ahina deelaa, gaa-hai nau dama, ga-hagaingoo bolo nia dama ni taane dela ne-made.

20:29  Taga-haanau daane dogohidu i-golo. Tama-daane madua gaa-hai dono lodo gi-di ahina deelaa, gaa-made, gei digi hai dana dama.

20:30  Nomuli, gei togolua duaahina-daane o-maa gaa-lodo gi-di ahina deelaa.

20:31  Nomuli go togodolu duaahina-daane. Taga-haanau dogohidu huogodoo guu-mmade, nadau dama gi-di ahina deelaa ai.

20:32  Haga-muliagina, gei di ahina deelaa la-gaa-made.

20:33  Malaa, i-di laangi dela e-mouli-aga nia daangada, di ahina deelaa la-gaa-hai di lodo ni-ooi? Idimaa, tagahaanau dogohidu huogodoo guu-lodo gi-di ahina deelaa!”

20:34  Gei Jesus ga-helekai gi digaula, “Nia daane mono ahina dolomeenei e-haga-hai-lodo,

20:35  gei nia daane mono ahina ala e-tau ang-gi di-mouli-aga mai di made mo e-mouli i-di madagoaa dela e-hanimoi, la-hagalee haga-hai-lodo.

20:36  Digaula gaa-hai be digau di-langi, ga-deemee di-mmade. Digaula nia dama ni God, idimaa, digaula ne-mouli-aga mai i di-made.

20:37  Gei Moses gu-haga-modongoohia haga-madammaa bolo digau ala ne-mmade le e-mouli-aga. Di kai o-di laagau duduia dela ne-ulaula, Moses ne-helekai i Dimaadua bolo Mee go di God o Abraham, di God Isaac, mo di God Jacob.

20:38  Mee di God ni digau mouli, hagalee ni digau mmade, idimaa digau huogodoo le e-mouli ang-gi Mee.”

20:39  Hunu gau haga-donudonu haganoho ga-helekai-aga, “Meenei Tangada Agoago, e-donu go dau helekai deenaa!”

20:40  Idimaa, digaula gu-mmaadagu di heeu labelaa nadau mee gi Mee.

20:41  Jesus ga-heeu gi digaula, “Ma e-hai behee dela digaula e-helekai bolo di Mesaia la-di hagadili ni David?

20:42  Idimaa, David gu-helekai i-lodo di Beebaa-Pisalem, boloo, ‘Dimaadua gu-helekai gi dogu Dagi: Noho i-ginei i dogu baahi gau-donu,

20:43  gaa-dae-loo gi dagu dugu o hagadaumee gi-lala o babaawae be di mee dugu wae.’

20:44  “David ne-gahi a-Mee bolo dono Dagi, malaa, e-hai behee di Mesaia gaa-hai di hagadili ni David?”

20:45  I-di madagoaa digau huogodoo nogo hagalongo gi Mee, gei Jesus ga-helekai gi ana dama-agoago,

20:46  “Gii-pula i goodou gi-dee hai be digau haga-donudonu haganoho ala e-hiihai e-heehee i-lodo nadau gahu-lloo, e-hiihai bolo nia daangada gi-hai nadau hagaaloho ge hagalaamua ginaadou i-lodo nia gowaa huihui-mee. Digaula e-hilihili nia lohongo aamua i-lodo nia synagogee mo nia gowaa ala koia e-humalia i-lodo nia hagamiami.

20:47  Digaula e-kae nia haga-humalia o-nia ahina guu-mmade nadau lodo ge gaiaa digaula i nadau hale, gei e-dalodalo lloo! Di hagaduadua digaula la koia e-huaidu huoloo!”