Pohnpeian - Psalms - 105

105:1  Kumwail patohwan kapingkalahngan ong KAUN-O; kumwail kalohkiseli sapwellime roson lapalap, oh kehsehki wehi kan wiepen nin lime kan.

105:2  Kumwail koul kapikapinga KAUN-O; kumwail lohkiseli soahng kapwuriamwei koaros me e ketin wiadahr.

105:3  Kumwail nsenamwahuki eh ketin sapwellimanikin kitail; koaruhsie me kin kaudokiong en perenda.

105:4  Kumwail patohdo rapahki sawasepamwail rehn KAUN-O; oh kaudokiong ahnsou koaros.

105:5  Kumwail kadaudok en Eipraam, sapwellimen KAUN-O ladu, kumwail kadaudok en Seikop, aramaso me e ketin pilada; kumwail tamanda manaman kapwuriamwei kan me Koht ketin wiahda oh kopwung kan me e ketin wiadahr.

105:6  Kumwail kadaudok en Eipraam, sapwellimen KAUN-O ladu, kumwail kadaudok en Seikop, aramaso me e ketin pilada; kumwail tamanda manaman kapwuriamwei kan me Koht ketin wiahda oh kopwung kan me e ketin wiadahr.

105:7  Iei ih, KAUN-O, me atail Koht; sapwellime mahsen kan pahn kowohng sampah koaros.

105:8  E pahn kin ketin dadaur sapwellime inou kohkohlahte, inou kan me e ketin wiadahr erein dih koaros,

105:9  inou me e ketin wiahiong Eipraam oh inou me e ketin wiahiong Aisek.

105:10  KAUN-O ketin wiahiong Seikop inou ehu, inou ehu me pahn poatopoat kohkohlahte.

105:11  E ketin mahsanih, “I pahn kihong uhk wehin Kenan; e pahn wiahla uhdahn omw sohso.”

105:12  Sapwellimen Koht aramas akan me malaulau, re wia aramas en liki kei nan Kenan.

105:13  Re ahpw kakahnseli sang nan ehu sahpw kolahng nan ehu, sang nan ehu wehi kolahng nan ehu.

105:14  Ahpw KAUN-O sohte ketin mweidohng emen en wiakauwe irail; oh e ketin kaloke nanmwarki kan pwehki irail.

105:15  E ketin mahsanih, “Kumwail dehr sair ei ladu pilipil pwukat; kumwail dehr wia mehkot suwed ong nei soukohp akan.”

105:16  KAUN-O ketin kadarodohng pohn sapwarail lehk lapalap oh ketikihsang irail arail tungoal akan koaros.

105:17  Ahpw e ketin kadarala mwohrail Sosep, me netla nin duwen ladu men.

105:18  Neh kan eri lipwalipwkihla sahl kehlail kei, me pirapiriong, oh selmete pwoat pirapiriong nin tepinwere,

105:19  e lao pwme e kohpadahro. Mahsen en KAUN-O eri dehdehda pwe ih me pwung.

105:20  Nanmwarkien Isip eri ketikihsang Sosep nan imweteng; kaunen wehi kan eri kasaledekala.

105:21  E ahpw ketin kasapwiladahng Sosep sounkohwa lapalap en tehnpese oh kaunen sapwellime wehi pokon,

105:22  me ahneki manaman koaros pohn sapwellimen nanmwarki soumas akan oh pwungen kaweid ong sapwellime sounkaweid kan.

105:23  Seikop eri soulahng Isip oh kousoanla nan sahpwo.

105:24  KAUN-O ahpw ketin kangederehla sapwellime aramas akan oh ketin koasoanehdi pwe re en kehlail sang ar imwintihti kan.

105:25  E ahpw ketin wekidala kapehd en mehn Isip ko pwe re en kailongkihla sapwellime aramas akan oh kin widiwidinge sapwellime ladu kan.

105:26  KAUN-O eri ketin poaronehla sapwellime ladu Moses, oh Aaron, me e ketin pilada.

105:27  Ira eri wiahda sapwellimen Koht wiewia lapalap ekei oh manaman kapwuriamwei kei nan Isip.

105:28  KAUN-O ketin kadaridiong rotorot mosul pohn sahpwo, ahpw mehn Isip ko sohte peikiong sapwellime mahsen kan.

105:29  E ketin kawekiong ni nta pilen ar pillap akan oh kemehla mwahmw en nan pillap ako koaros.

105:30  Sapwarailo inenen direkihla kairu kan; pil iangahki tehnpas en nanmwarkio.

105:31  Koht ketin mahsente, a mwutumwut en loahng oh amwise pa audehla sahpwo pwon.

105:32  E ketin kadaridiong pohn sahpwo keteu aihs takai oh lioal, wiliandi keteu;

105:33  e ketin kamwomwala arail wahn wain oh tuhke pik kan oh ketin karaukehdi tuhke koaros.

105:34  E ketin mahsente, a loukust kan pa pipihrpene, uwen tohto ieu me sohte kak wadawad;

105:35  re ahpw kangala dihpw koaros en sahpwo; oh wahntuhke koaros.

105:36  E ketin kemehla mesenih koaros en sahpwo mesenihen peneinei koaros en Isip.

105:37  KAUN-O eri ketin kahluwaiei mehn Israel ko sang Isip; re wisik silper oh kohl, irail koaros kehlail, sohte me soumwahu.

105:38  Mehn Isip ko perenkihda ar mweselda, pwehki ar kin masak irail.

105:39  E ketin kipehkipeseng pelien depwek pali pohn sapwellime aramas ako oh ketikihong irail kisiniei pwe en kamarainih irail nipwong.

105:40  Re peki, a e ketin kadarodohng irail kulu kei, oh ketin kammedkinirailla kisin saken nanleng.

105:41  E ketin ritingada paipalalapo, a pihl pa kusieisang, oh pwilipwillahng nan sapwtehn duwehte pillap pwoat.

105:42  E ketin kupwukupwurehte sapwellime inou sarawi ong Eipraam, sapwellime ladu.

105:43  Eri, e ketin kahluwaiei sapwellime aramas pilipil kan, me kokoul oh ngisingiski ar peren.

105:44  E ahpw ketikihong irail sapwen mehn liki kan, oh ketin mweidohng pwe re en sapwenikihla,

105:45  pwe re en kin peikiong sapwellime kosonned akan oh kapwaiada sapwelime mahsen kan. Kapinga KAUN-O!