Kapingamarangi - Jeremiah - 31

31:1  Dimaadua ga-helekai, “Di madagoaa ga-dau-mai, gei Au gaa-hai di God nia madawaawa huogodoo o Israel, gei digaula huogodoo gaa-hai nia daangada ni-aagu.

31:2  Au gu-haga-modongoohia dogu dumaalia ang-gi digau ala digi mmade i-lodo di anggowaa. I-di madagoaa o digau Israel ala e-halahala di-nadau madagoaa belee haga-molooloo-ai,

31:3  Au gu-haga-gida ang-gi digaula mai di gowaa mogowaa-loo. Digau Israel nei, Au e-aloho huoloo i goodou i-nia madagoaa huogodoo, Au e-daahi gi-muli dogu aloho i-nia madagoaa huogodoo i goodou.

31:4  Gei Au ga-haga-duu-aga labelaa goodou. Goodou ga-gaamai labelaa godou mee haga-dangidangi gagaalege, gei goodou ga-gagaalege mo-di tenetene.

31:5  Goodou gaa-dogi labelaa godou hadagee-waini i-hongo nia gonduu i Samaria. Digau ala ma-gaa-dogi nia hadagee aalaa gei ginaadou ga-miami-mai i-nia laagau aalaa.

31:6  Uaa, di madagoaa ga-dau-mai, gei digau hagaloohi i tomo nia gonduu i Ephraim ga-wwolo-ia boloo, ‘Goodou lloomoi, gidaadou gaa-hula gi Zion gi-baahi o Dimaadua go tadau God!’ ”

31:7  Dimaadua ga-helekai, “Goodou tenetene dadaahili idimaa i Israel, tenua dela koai e-aamua i-nia henua huogodoo. Goodou daahili di-godou daahili hagaamu, gaa-hai boloo, ‘Dimaadua gu-haga-dagaloaha ana daangada, gei ne-hagamouli digau ala ne-dubu i-golo.’

31:8  Gei Au ga-laha-mai digaula i-bahi-i-ngeia, ga-haga-dagabuli-mai digaula i-nia mada o henuailala. Digau ala e-dee-gida mo digau ala e-habehabe, nia ahina hai-dama mo nia ahina ala e-hoohoo ga-haanau, digaula huogodoo e-loomoi dalia digaula. Digaula ga-dagabuli-mai gaa-hai tenua damana.

31:9  Gei agu daangada ga-loomoi mo-di tangitangi, gaa-hai nadau dalodalo i dagu laha-mai digaula. Au ga-dagi-ia digaula gi-nia dama-monowai, i-hongo di ala dela e-malali, tangada e-hinga ai. Idimaa, Au e-hai gadoo be tamana ni Israel, gei Ephraim deelaa dagu dama-madua.”

31:10  Dimaadua ga-helekai, “Goodou ala go digau o-nia henua huogodoo, goodou hagalongo-mai gi-di-Au, gi-hagadele-ina agu helekai gi-nia henua mogowaa-loo. Ko-Au dela ne-hagabagi digau Israel gi nnenua i-daha. Malaa dolomeenei, gei Au ga-haga-dagabuli-mai digaula, ga-hagaloohi digaula gadoo be tangada hagaloohi dela e-hagaloohi ana siibi.

31:11  Ko-Au dela ne-haga-dagaloaha digau Israel, guu-daa digaula gi-daha mo tenua maaloo dangihi.

31:12  Digaula ga-loomoi ga-daahili mo di tenetene i-hongo di Gonduu Zion. Digaula ga-tenetene gi agu wanga-dehuia, agu golee-laagau, agu waini mo agu lolo-olib, nia siibi mono kau. Digaula gaa-hai gadoo be-di hadagee dela gu-haga-magalillili hagahumalia. Digaula ga-hai-mee gi-nia mee huogodoo ala e-hiihai ginai ginaadou.

31:13  I-di madagoaa deelaa, gei nia dama-ahina ga-gaalege mo-di tenetene, gei nia daane-mmaadua mono dama-daane ga-tenetene gi nadau tene. Gei Au ga-haga-manawa lamalia digaula, gaa-huli nadau manawa-gee gi-di manawa lamalia, nadau lodo-huaidu ang-gi di tene.

31:14  Gei Au gaa-hai digau hai-mee-dabu gi-maaluu gi-nia meegai ala koia e-humalia, ga-haga-dohu nia hiihai o agu daangada huogodoo. Ma ko-Au go Dimaadua ne-helekai.”

31:15  Dimaadua ga-helekai, “Di lee e-hanimoi i-lodo o Ramah. Di lee dangidangihia huoloo. Rachel e-dangidangi i ana dama, gei gu-deemee di-manawa lamalia, idimaa ana dama la-gu-de-i-golo.

31:16  Guu-lawa, hudee dangidangi, omaa-ina oo dangi gi-daha. Gei Au gaa-hui goe gi-nia mee huogodoo i au mee ala ne-hai ang-gi au dama. Digaula ga-loomoi gi-daha mo tenua o nadau hagadaumee.

31:17  Do hagadagadagagee i-golo i-lodo di madagoaa ma-ga-dau-mai. Au dama ga-loomoi gi-lodo di-nadau henua donu. Ma ko-Au go Dimaadua ne-helekai.

31:18  “Au e-longono digau Israel ala e-helehelekai lodo-huaidu boloo, ‘Meenei Dimaadua, gimaadou la-guu-hai gadoo be-di manu hagalee gaidala, gei Goe gu-aago-mai gi gimaadou di hai dela e-hagalongo-adu gi-di-Goe. Go Kooe gi-haga-dagabuli-ina-mai gimaadou, gei dolomeenei, gei gimaadou ga-loo-adu gi-di-Goe, go Kooe go Dimaadua, go di-madau God.

31:19  Gimaadou gu-huli-hua gi-daha mo Goe, gei gimaadou e-hagalimalima e-hiihai e-lloo-adu labelaa gi-di-Goe. I-muli-hua do hagaduadua gimaadou, gei gimaadou ga-pala-ia-hua gi-lala i madau lodo-huaidu. Gimaadou guu-tee, gei gu-langaadia, idimaa i madau huaidu ala nogo haihai i madau damagiigi.’

31:20  “Israel, go kooe dela go dagu dama hagalabagau huoloo, di tama dela e-aloho huoloo-iei Au. I-nia madagoaa huogodoo Au ma-ga-mamaanadu do ingoo, gei Au e-hidihidi huoloo i-di-goe. Ogu lodo e-ngalungalua huoloo i-di-goe, gei Au e-manawa dumaalia-adu gi-di-goe.

31:21  Haga-duulia-aga au hagailongo, e-haga-modongoohia-ai di ala. Halahala-ina labelaa di ala dela nogo heehee-iei goe. Goodou go digau Israel, goodou lloomoi, goodou lloomoi labelaa gi godou waahale ala ne-diiagi.

31:22  Goodou go agu gau manawa-logo, dehee di waalooloo o godou de-hagadonu? Au guu-hai dagu mee hoou: di ahina e-abaaba dana daane.”

31:23  Dimaadua di Gowaa Aamua, di God o digau Israel ga-helekai, “I dagu haga-noho haga-hoou digau Israel i-lodo di-nadau henua, gei digaula gaa-hai di hagaamu deenei i-lodo tenua go Judah mo ono waahale, e-hai boloo, ‘Dimaadua gi-manawa lamalia gi-di gonduu-dabu o Jerusalem, di gowaa dabu dela e-noho-iei Mee.’

31:24  “Nia daangada gaa-noho i Judah mo nia waahale huogodoo o Judah. Digau ala e-dogi nadau gowaa, mo digau ala e-hagaloohi nadau manu.

31:25  Gei Au ga-hagamaaloo-aga digau ala gu-duadua, gei gaa-hai digau ala gu-paagege i nadau hiigai la-gi-maaluu.

31:26  Malaa, gei nia daangada ga-helekai boloo, ‘Au ne-kii ga-ala-aga maaloo.’

31:27  “Ko-Au go Dimaadua deenei e-helekai bolo di madagoaa ga-dau-mai, gei Au gaa-hai nia guongo o Israel mo Judah gii-honu dangada mono manu.

31:28  Gadoo be dagu hai dela guu-hai gi digaula i dagu hudi-aga digaula gi-daha mo nadau gowaa, gaa-hono digaula gi-lala, gaa-kili gi-daha, ga-hagahuaidu mo-di daa digaula gi-daha, deenei gadoo dagu hai dela gaa-hai ang-gi digaula, e-dogi digaula, gei e-haga-duu-aga digaula.

31:29  Di madagoaa deelaa gei nia daangada ga-hagalee helekai boloo, ‘Tamana mo tinana guu-gai di-nau golee gii, gei nau dama guu-gii labelaa i-nia maa.’

31:30  “Gei tangada dela ma-gaa-gai dana golee gii, go ono niha la-hua ala gaa-gii i di-maa. Tangada-nei mo tangada-nei e-made-hua i ono huaidu.”

31:31  Dimaadua ga-helekai, “Di madagoaa ga-dau-mai, gei Au gaa-hai dagu hagababa hoou ang-gi digau Israel mo digau Judah.

31:32  E-hagalee hai be-di hagababa namua dela ne-hai ko-Au ang-gi nadau damana-mmaadua, i dagu kumi nia lima digaula ga-dagi-mai i Egypt. Ma e-aha maa Au guu-hai gadoo be-di lodo ni digaula, gei digaula gu-hagalee manawa-dahi ang-gi di hagababa deelaa.

31:33  Di hagababa hoou dela belee hai ang-gi digau Israel le e-hai beenei: Au gaa-dugu agu haganoho gi-lodo digaula, gaa-hihi gi-lodo nia hadu-manawa digaula. Au gaa-hai di God ni digaula, gei digaula gaa-hai nia daangada ni-aagu.

31:34  Deai tangada bolo ia e-aago tangada dela i dono baahi bolo gi-iloo Dimaadua ai, idimaa, huogodoo gu-iloo-ginaadou Au, mai i-nia dama-lligi gaa-dae-loo gi digau mmaadua. Gei Au ga-dumaalia-anga nia huaidu o digaula, ga-haga-de-langahia-eau nadau mee hala. Ma ko-Au go Dimaadua ne-helekai.”

31:35  Dimaadua ne-dugu-mai gi gidaadou di laa belee haga-maalama di laangi, gei di malama mo nia heduu e-haga-maalama di boo. Mee e-haga-ngalua-aga di moana bolo gi-bagibagia, dono ingoo dela go Yihowah di Gowaa Aamua.

31:36  Mee gu-hagababa bolo tenua o Israel le e-noho-hua beelaa e-waalooloo, gaa-dae-loo gi ana mee ala ne-haga-noho gaa-hai-hua beelaa.

31:37  Maa iai tangada e-mee di-hagatau i-lala di langi, ga-modongoohia be nia maa ni-aha ala i-lala di hagamau o henuailala, deelaa di madagoaa o God ga-diiagi digau Israel, idimaa i nadau mee huogodoo ala ne-hai. Dimaadua ne-helekai.

31:38  Dimaadua ga-helekai, “Di madagoaa ga-dau-mai, gei Jerusalem ga-haga-duu-aga hoou, gaa-hai-ai dogu waahale, e-tugi i-di angulaa i Hananel gaa-hana gi bahi-i-dai, gaa-tugi i-di ngudu di Bontai Madaaduge.

31:39  Gei tagageinga dela e-hagageinga-ai di waahale deelaa ga-daa gi-daha mo-di gowaa deelaa, gaa-kae gi-bahi-i-dai gi-di Gonduu go Gareb, gaa-huli gi Goah.

31:40  Di gowaa baba hagatau deelaa le e-kili ginai nia huaidina mo nia lehu-ahi, mo nia gowaa huogodoo ala i-bahi-i-nua tama-monowai Kidron gaa-tugi di ngudu di Bontai Hoodo i-bahi-i-dua, la-ga-haga-dabu-mai gi-di-Au. Gei di waahale deelaa ga-hagalee-loo e-mooho be e-daaligi gi-daha labelaa.”