Kapingamarangi - John - 4

4:1  Nia Pharisee gu-longono bolo digau agoago ala ne-babdais go Jesus le e-dogologo i-nia gau agoago ala ne-babdais go John.

4:2  (Gei di tonu, Jesus la-digi babdais dana dangada e-dahi, ala-hua go ana dama-agoago.)

4:3  Di madagoaa Jesus ne-longono nnelekai digaula, Mee ga-hagatanga i Judea, gaa-hana gi-muli gi Galilee,

4:4  gei Mee e-hai-loo gii-hana laa-lodo Samaria.

4:5  Mee gaa-dau-adu gi Sychar i Samaria, dela e-hagalee mogowaa i-di gowaa a Jacob ne-wanga gi dana dama-daane go Joseph.

4:6  Di monowai-geli Jacob la i-golo. Jesus gu-duadua i dono heehee, ge-Ia gaa-noho i-baahi di monowai-geli, gei gu-oodee.

4:7  Di ahina Samaria ga-hanimoi, belee udu ana wai, Jesus ga-helekai gi mee, “Gaamai hunu wai e inu.”

4:8  (Nia dama-agoago a-maa guu-hula gi-lodo di waahale e-hui mai nadau meegai.)

4:9  Di ahina ga-helekai, “Goe tangada o Jew, gei au tangada Samaria, malaa Goe e-madau au wai mai gi-di-au behee?” (Digau o Jew hagalee hai-hegau gi-nia ibu mo nia boolo o digau Samaria ala e-hai-hegau-ai.)

4:10  Jesus ga-helekai gi mee, “Maa goe e-iloo di mee a God dela e-wanga, ge e-iloo ma koai dela e-madau ana wai, goe gaa-dangi gi Mee, gei Mee ga-gowadu nia wai haga-mouli.”

4:11  Di ahina deelaa ga-helekai, “Meenei, dau begedu ai, gei di monowai-geli le e-llala. Gei nia wai haga-mouli le e-gaamai Kooe i-hee?

4:12  Ma go di-madau damana i-mua, go Jacob dela ne-gaamai gi gidaadou di monowai-geli deenei. Mee mo ana dama mo ana manu huogodoo nogo inu-mai i-di maa. Malaa, Goe e-koia e-aamua i Jacob?”

4:13  Jesus ga-helekai gi mee, “Digau ma-ga-inu nia wai aanei, e-hieinu labelaa.

4:14  Gei digau ala ga-inu nia wai gaa-wanga ko-Au, ginaadou hagalee hieinu labelaa. Nia wai ala gaa-wanga ko-Au, gaa-hai di monowai mouli i nadau lodo, e-wanga gi digaula di mouli dee-odi.”

4:15  Di ahina ga-helekai, “Meenei, gaamai-laa nia wai aalaa! Gi-dee hieinu hua au, ga-hanimoi labelaa gi-kinei e-udu agu wai.”

4:16  Jesus ga-helekai gi mee, “Hana, gahigahia-mai doo lodo, lloomoi.”

4:17  Di ahina ga-helekai, “Dogu lodo ai.” Jesus ga-helekai, “E-donu go dau helekai bolo goe doo lodo ai.

4:18  Gei goe gu-hai-lodo gi-nia daane dogolima, gei taane dela e-noho goolua dolomeenei, la-hagalee di lodo donu ni-oou. E-donu go au helekai.”

4:19  Di ahina deelaa ga-helekai, “Meenei, au gu-modongoohia bolo Goe di soukohp.

4:20  Madau maadua Samaria i-mua nogo daumaha ang-gi God i-tomo di gonduu deenei, gei goodou digau o Jew e-hai bolo Jerusalem la-hua go di gowaa belee daumaha-ai nia daangada ang-gi God.”

4:21  Jesus ga-helekai gi mee, “Di ahina-nei, hagadonu-ina Au, di madagoaa ga-dau-mai, gei nia daangada ga-hagalee daumaha ang-gi Tamana i-tomo di gonduu deenei, be i-lodo Jerusalem.

4:22  Goodou digau Samaria la-digi modongoohia-loo be goodou e-daumaha gi di-ai, gei gimaadou digau o Jew e-iloo be di-ma koai dela e-daumaha ginai gimaadou, idimaa, di hagamouli le e-hanimoi i-baahi digau o Jew.

4:23  Di madagoaa ga-dau-mai, gei gu-i kinei, di madagoaa nia daangada ga-daumaha ang-gi Tamana i-di hagataalunga mo-di tonu. Idimaa, deenei taumaha e-donu dela e-hiihai ginai Tamana bolo gidaadou gi-daumaha ang-gi de-Ia.

4:24  God la-di hagataalunga, gei digau ala e-daumaha ang-gi Mee, la-gi-daumaha mai i-di hagataalunga mo-di tonu.”

4:25  Di ahina ga-helekai gi Mee, “Au e-iloo bolo di Mesaia le e-hanimoi. Mee ga-hanimoi, le e-hagamodongoohia nia mee huogodoo.”

4:26  Gei Jesus ga-helekai, “Deenei Au go Mee, dela e-helehelekai-adu.”

4:27  Di madagoaa-hua deelaa, nia dama-agoago a Jesus gu-lloomoi labelaa, digaula gu-homouli huoloo i-di nadau gidee a Jesus e-hagabooboo gi-di ahina deelaa. Gei tangada i digaula ne-heeu gi-di ahina deelaa ai, boloo, “Ma di-aha e-hiihai ginai goe?” be e-heeu gi Jesus, “Goe e-aha, dela e-hagabooboo gi mee?”

4:28  Di ahina deelaa gaa-dugu dana mee udu-wai, gaa-hana gi-muli gi-di waahale deelaa, ga-odi gi-nia daangada,

4:29  “Lloomoi, mmada gi Taane dela ne-hagi-mai agu mee huogodoo ala nogo hai. Mee hagalee go di Mesaia?”

4:30  Digaula ga-hagatanga i-di waahale, gaa-hula gi Jesus.

4:31  Di madagoaa hua deelaa, gei nia dama-agoago a Jesus ga-helekai gi Mee, “Tangada Agoago, miami!”

4:32  Gei Mee ga-helekai gi digaula, “Agu meegai i-golo ala digi iloo-goodou.”

4:33  Gei nia dama-agoago a-Maa ga-daamada ga-heheeu i nadau mehanga, “Ma tangada gu-gaamai ana meegai gi Mee?”

4:34  Jesus ga-helekai, “Agu meegai la-go di daudali di hiihai o Tangada dela ne-hagau-mai Au, ge e-haga-lawa ana hegau bolo gi-heia.

4:35  Goodou di-godou kai i-golo: ‘Nia malama e-haa i-golo, gei taugai gaa-hagi.’ Malaa, au e-helekai-adu gi goodou: Mmada gi-humalia gi-di hadagee, nia huwa-laagau la-gu-mmaadua, gu-humalia di-hagi.

4:36  Tangada dela e-hagi, le e-kae dono hui i dana moomee, geia e-hagi gi-di mouli dee-odi. Deenei-laa, tangada dela e-dogi mo tangada dela e-hagi, meemaa huogodoo e-tenetene.

4:37  Di kai deenei le e-donu, boloo: ‘Tangada e-dahi e-dogi, ge dahi e-hagi.’

4:38  Au ne-hagau goodou, belee hagi di hadagee digi ngalua ginai goodou. Nia daangada ne-ngalua gi di-maa, gei goodou ga-hagahumalia mai nadau ngalua.”

4:39  Digau Samaria dogologo i-lodo di waahale deelaa ne-hagadonu a Jesus i nnelekai di ahina dela ne-hai: “Mee gu-hagi-mai agu mee huogodoo nogo hai.”

4:40  Gei di madagoaa digau o Samaria ne-lloomoi gi Mee, digaula gu-tangi gi Mee, bolo gii-noho i nadau baahi, gei Jesus gaa-noho i-golo nia laangi e-lua.

4:41  Digau dogologo gu-hagadonu a-Mee mai i ana agoago.

4:42  Gei digaula ga-helekai gi-di ahina, “Gimaadou gu-hagadonu dolomeenei, hagalee mai i au helekai, go gimaadou hua ne-bida hagalongo gi Mee. Gimaadou gu-iloo bolo ma go Mee go tahida o-di Hagamouli o henuailala.”

4:43  I-muli dono noho i-golo i-nia laangi e-lua, Jesus ga-hagatanga, gaa-hana gi Galilee.

4:44  Idimaa, Mee gu-helekai, “Soukohp la-hagalee hagalaamua i-lodo dono guongo donu.”

4:45  Dono dau i Galilee, nia daangada gu-hagaahi-mai a-Mee, idimaa, digaula ne-hula gi Tagamiami Pasoobaa i Jerusalem, gu-gidee ana mee huogodoo nogo hai i Tagamiami.

4:46  Jesus gaa-hana labelaa gi Cana i Galilee, di gowaa a-Mee ne-huli nia wai gii-hai nia waini. Tangada aamua oobidi i-golo, dana dama-daane e-magi i Capernaum.

4:47  Dono longono-hua bolo Jesus gu-hanimoi i Judea gi Galilee, mee gaa-hana gi Mee, gaa-dangi gi Mee gii-hana gi Capernaum, e-hagahili dana dama gu-hoohoo gaa-made.

4:48  Jesus ga-helekai gi mee, “Tangada i goodou e-hagadonu ai, maa goodou digi mmada gi-nia mogobuna mono mee haga-goboina dangada.”

4:49  Tangada aamua ga-helekai, “Meenei, hanimoi dalia au i-mua di made dagu dama.”

4:50  Jesus ga-helekai gi mee, “Hana, dau dama la-ga-mouli.” Taane deelaa gu-hagadonu nnelekai a Jesus, gaa-hana.

4:51  I dono hanadu-hua gi dono hale, nia hege a-maa ga-heetugi gi mee mo nadau longo, “Dau dama la-gu-mouli!”

4:52  Mee ga-heeu gi digaula di madagoaa behee dela ne-humalia-ai dana dama. Gei digaula ga-helekai, “Di laa e-dahi muli di oodee anaahi ne-hili-ai di magi o-maa.”

4:53  Tamana gu-langahia bolo deelaa di aawaa ne-helekai Jesus boloo, “Dau dama la-ga-mouli.” Malaa, mee mo digau o dono hale huogodoo gu-hagadonu.

4:54  Deenei di lua mogobuna Jesus ne-hai i-muli dono hanimoi i Judea gi Galilee.