SPVar - Leviticus - 13

13:1  וידבר יהוה אל משה ואל אהרן לאמר

13:2  אדם כי יהיה בעור בשרו שאת או ספחת או בהרת והיה בעור בשרו לנגע צרעת והובא אל אהרן הכהן או אל אחד מבניו הכהנים

13:3  וראה הכהן את הנגע בעור הבשר ושער בנגע הפך לבן ומראה הנגע עמק מעור בשרו נגע צרעת הוא וראה הכהן וטמא אתו

13:4  ואם בהרת לבנה היא בעור בשרו ועמק אין מראה מן העור ושערה לא הפך לבן והסגיר הכהן את הנגע שבעת ימים

13:5  וראה הכהן ביום השביעי והנה הנגע עמד בעיניו לא פשה הנגע בעור והסגירו הכהן שבעת ימים שנית

13:6  וראה הכהן ביום השביעי שנית והנה כהה הנגע לא פשה הנגע בעור וטהרו הכהן מספחת היא וכבס בגדיו וטהר

13:7  ואם פשה תפשה המספחת בעור אחרי הראתו אל הכהן לטהרתו ונראה שנית אל הכהן

13:8  וראה הכהן והנה פשתה המספחת בעור וטמאו הכהן צרעת היא

13:9  ונגע צרעת כי תהיה באדם והובא אל הכהן

13:10  וראה הכהן והנה שאת לבנה בעור והיא הפכה שער לבן ומחית בשר חי בשאת

13:11  צרעת נושנת היא בעור בשרו וטמאו הכהן לא יסגרנו כי טמא הוא

13:12  ואם פרח תפרח הצרעת בעור וכסתה הצרעת את כל עור הנגע מראשו ועד רגליו לכל מראה עיני הכהן

13:13  וראה הכהן והנה כסתה הצרעת את כל בשרו וטהר את הנגע כלו הפך לבן טהור הוא

13:14  וביום הראות בו בשר חי יטמא

13:15  וראה הכהן את הבשר החי וטמאו הבשר החי טמא הוא צרעת היא

13:16  או כי ישוב הבשר החי ונהפך ללבן ובא אל הכהן

13:17  וראה הכהן והנה נהפך הנגע ללבן וטהר הכהן את הנגע טהור הוא

13:18  ובשר כי יהיה בו שחין ונרפא

13:19  והיה במקום השחין שאת לבנה או בהרת לבנה אדמדמת ונראה אל הכהן

13:20  וראה הכהן והנה מראהו שפל מן העור ושערה הפך לבן וטמאו הכהן נגע צרעת היא בשחין פרחה

13:21  ואם יראה הכהן והנה אין בה שער לבן ושפלה איננה מן העור והיא כהה והסגירו הכהן שבעת ימים

13:22  ואם פשה תפשה בעור וטמא הכהן אתו נגע הוא

13:23  ואם תחתיה תעמד הבהרת לא פשתה צרבת השחין היא וטהרו הכהן

13:24  או בשר כי יהיה בעורו מכות אש והיתה מחית המכוה בהרת לבנה אדמדמת או לבנה

13:25  וראה אתה הכהן והנה הפך שער לבן בבהרת ומראה עמק מן העור צרעת היא במכוה פרחה וטמא אתו הכהן נגע צרעת היא

13:26  ואם יראה הכהן והנה אין בבהרת שער לבן ושפלה איננה מן העור והיא כהה והסגירו הכהן שבעת ימים

13:27  וראה הכהן ביום השביעי אם פשה תפשה בעור וטמא אתו הכהן נגע צרעת היא

13:28  ואם תחתיה תעמד הבהרת לא פשתה בעור והיא כהה שאת המכוה היא וטהרו הכהן כי צרבת המכוה היא

13:29  ואיש או אשה כי יהיה בו נגע בראש או בזקן

13:30  וראה הכהן את הנגע והנה מראהו עמק מן העור ובו שער צהב דק וטמא הכהן אתו נתק הוא צרעת הראש או הזקן היא

13:31  וכי יראה הכהן את נגע הנתק והנה אין מראהו עמק מן העור ושער שחר אין בו והסגיר הכהן את נגע הנתק שבעת ימים

13:32  וראה הכהן את הנתק ביום השביעי והנה לא פשה הנתק ולא היה בו שער צהב ומראה הנתק אין עמק מן העור

13:33  והתגלח ואת הנתק לא יגלח והסגיר הכהן את הנתק שבעת ימים שנית

13:34  וראה הכהן את הנתק ביום השביעי והנה לא פשה הנתק בעור ומראהו איננו עמק מן העור וטהרו הכהן וכבס בגדיו וטהר

13:35  ואם פשה יפשה הנתק בעור אחרי טהרתו

13:36  וראה הכהן והנה פשה הנתק בעור לא יבקר הכהן לשער הצהב טמא הוא

13:37  ואם בעיניו עמד הנתק ושער שחר צמח בו נרפא הנתק טהור הוא וטהרו הכהן

13:38  ואיש או אשה כי יהיה בעור בשרם בהרת בהרת לבנות

13:39  וראה הכהן והנה בעור בשרם בהרת כהות לבנות בהק הוא פרח בעור טהור הוא

13:40  ואיש כי ימרט ראשו קרח הוא טהור הוא

13:41  ואם מפאת פניו ימרט ראשו גבח הוא טהור הוא

13:42  וכי יהיה בקרחתו או בגבחתו נגע לבן אדמדם צרעת פרחת היא בקרחתו או בגבחתו

13:43  וראה אתה הכהן והנה שאת הנגע לבנה אדמדמת בקרחתו או בגבחתו כמראה צרעת עור בשר

13:44  איש צרוע הוא טמא הוא טמא יטמאנו הכהן בראשו נגעו

13:45  והצרוע אשר בו הנגע בגדיו יהיו פרומים וראשו יהיה פרוע ועל שפם יעטא וטמא טמא יקרא

13:46  כל ימי אשר הנגע בו יטמא טמא הוא בדד ישב מחוץ למחנה מושבו

13:47  והבגד כי יהיה בו נגע צרעת בבגד צמר או בבגד פשתים

13:48  או בשתי או בערב לפשתים ולצמר או בעור או בכל מלאכת עור

13:49  והיה הנגע ירקרק או אדמדם בבגד או בעור או בשתי או בערב או בכל כלי עור נגע צרעת הוא והראה את הכהן

13:50  וראה הכהן את הנגע והסגיר את הנגע שבעת ימים

13:51  וראה את הנגע ביום השביעי כי פשה הנגע בבגד או בשתי או בערב או בעור לכל אשר יעשה העור למלאכה צרעת ממראת הנגע טמא הוא

13:52  ושרף את הבגד או את השתי או את הערב בצמר או בפשתים או את כל כלי העור אשר יהיה בו הנגע כי צרעת ממראת היא באש תשרף

13:53  ואם יראה הכהן והנה לא פשה הנגע בבגד או בשתי או בערב או בכל כלי עור

13:54  וצוה הכהן וכבסו את אשר בו הנגע והסגירו שבעת ימים שנית

13:55  וראה הכהן אחרי הכבס את הנגע והנה לא הפך הנגע את עיניו והנגע לא פשה טמא הוא באש תשרפנו פחתת היא בקרחתו או בגבחתו

13:56  ואם ראה הכהן והנה כהה הנגע אחרי הכבסו אתו וקרעו אתו מן הבגד או מן העור או מן השתי או מן הערב

13:57  ואם תראה עוד בבגד או בשתי או בערב או בכל כלי עור פרחת היא באש תשרפנו את אשר בו הנגע

13:58  והבגד או השתי או הערב או כל כלי העור אשר תכבס וסר מהם הנגע וכבס שנית וטהר

13:59  זאת תורת נגע הצרעת בגד הצמר או הפשתים או השתי או הערב או כל כלי העור לטהרו או לטמאו