Ndebele - II Samuel - 22

22:1  UDavida wasekhuluma eNkosini amazwi alelihubo mhla iNkosi imkhulula esandleni sezitha zakhe zonke lesandleni sikaSawuli.

22:2  Wasesithi: INkosi ilidwala lami, lenqaba yami, lomkhululi wami;

22:3  uNkulunkulu wedwala lami, ngizaphephela kuye, isihlangu sami, lophondo losindiso lwami, inqaba yami ephakemeyo, lesiphephelo sami, umsindisi wami; ungisindisile odlakeleni.

22:4  Ngizabiza iNkosi edumisekayo, ngakho ngizasindiswa ezitheni zami.

22:5  Ngoba izinsizi zokufa zingizingelezele, lezikhukhula zobubi zangethusa.

22:6  Izibopho zesihogo zangigombolozela, imijibila yokufa yayiphambi kwami.

22:7  Ekuhluphekeni kwami ngayibiza iNkosi, ngakhala kuNkulunkulu wami; waselizwa ilizwi lami esethempelini lakhe, lokukhala kwami kwafinyelela endlebeni zakhe.

22:8  Khona umhlaba wazamazama, wanyikinyeka, izisekelo zamazulu zaqhaqhazela, zazamazama, ngoba wayethukuthele.

22:9  Kwenyuka intuthu emakhaleni akhe, lomlilo ophuma emlonyeni wakhe waqothula; amalahle avuthiswa yiwo.

22:10  Wasekhothamisa amazulu, wehlela phansi; lomnyama onzima wawungaphansi kwenyawo zakhe.

22:11  Wasegada ikherubhi*, waphapha, wabonakala phezu kwempiko zomoya.

22:12  Wasemisa umnyama waba ngamadumba inhlangothi zonke zakhe, lokuqoqana kwamanzi, amayezi amnyama omkhathi.

22:13  Ekukhazimuleni okuphambi kwakhe kwavuthiswa amalahle omlilo.

22:14  INkosi yaduma isemazulwini, loPhezukonke walikhupha ilizwi lakhe.

22:15  Yathuma imitshoko, yabachitha; imibane, yabaphaphathekisa.

22:16  Khona kwabonakala imisele yolwandle, kwembulwa izisekelo zomhlaba, ekusoleni kweNkosi, ekuvutheleni komoya wamakhala ayo.

22:17  Iphezulu yathuma, yangibamba, yangenyula emanzini amanengi.

22:18  Yangophula esitheni sami esilamandla, kwabangizondayo, ngoba babelamandla kulami.

22:19  Babephambi kwami osukwini lwenhlupheko yami, kodwa iNkosi yaba yisisekelo sami.

22:20  Yangikhuphela endaweni ebanzi, yangikhulula, ngoba yayithokoza ngami.

22:21  INkosi yangivuza njengokulunga kwami, yangibuyisela njengokuhlanzeka kwezandla zami.

22:22  Ngoba ngizilondolozile indlela zeNkosi, kangisukanga kuNkulunkulu wami ngenkohlakalo.

22:23  Ngoba zonke izahlulelo zayo zaziphambi kwami, lezimiso zayo, kangiphambukanga kuzo.

22:24  Njalo ngangiqondile phambi kwayo, ngizinqandile ebubini bami.

22:25  Ngakho iNkosi ingibuyisele njengokulunga kwami, njengokuhlanzeka kwami phambi kwamehlo ayo.

22:26  Kolesihawu uzaziveza ulesihawu; koqotho uzaziveza uqotho;

22:27  kohlanzekileyo uzaziveza uhlanzekile; lakophambukileyo uzaziveza uphambukile.

22:28  Labantu abahlutshwayo uzabasindisa, kodwa amehlo akho aphezu kwabaziphakamisayo, uzabehlisela phansi.

22:29  Ngoba uyisibane sami, Nkosi, iNkosi izakhanyisa-ke ubumnyama bami.

22:30  Ngoba ngawe ngigijimile ngadabula phakathi kwebutho, ngoNkulunkulu wami ngeqe umthangala.

22:31  UNkulunkulu; indlela yakhe iphelele; ilizwi leNkosi lihloliwe; uyisihlangu kubo bonke abaphephela kuye.

22:32  Ngoba ngubani onguNkulunkulu ngaphandle kweNkosi? Njalo ngubani olidwala ngaphandle kukaNkulunkulu wethu?

22:33  UNkulunkulu uyinqaba yami lamandla, owenza indlela yami iphelele.

22:34  Owenza inyawo zami zibe njengezezimpala, wangimisa ezingqongeni zami.

22:35  Ofundisela izandla zami impi, ukuze idandili lethusi ligotshiswe zingalo zami.

22:36  Unginikile lesihlangu sosindiso lwakho, lokuzithoba kwakho kungikhulisile.

22:37  Wenze laba banzi inyathelo lami ngaphansi kwami, ukuze inqagala zami zingatsheleli.

22:38  Ngixotshene lezitha zami ngazibhubhisa, kangibuyanga ngaze ngaziqeda.

22:39  Ngaziqeda, ngazigwaza, ukuze zingavuki; kodwa zawa ngaphansi kwenyawo zami.

22:40  Ngoba ungibhincise amandla kusenzelwa impi, wabakhothamisela phansi kwami abangivukelayo.

22:41  Unginike intamo yezitha zami, labo abangizondayo ngababhubhisa.

22:42  Bakhangela, kodwa engekho umsindisi; eNkosini, kodwa kayibaphendulanga.

22:43  Ngasengibacholisisa njengothuli lomhlaba, ngabagxoba njengodaka lwezitalada, ngabatsahaza.

22:44  Wasungikhulula ekuphikiseni kwabantu bami, wangigcina ngiyinhloko yezizwe; abantu engangingabazi bangisebenzela.

22:45  Abezizweni bazazehlisela phansi kimi; bangenela ukuzwa ngendlebe bazangilalela.

22:46  Abezizweni bazabuna, baphume ezinqabeni zabo bethuthumela.

22:47  INkosi iyaphila; njalo kalibusiswe idwala lami, kaphakanyiswe uNkulunkulu, idwala losindiso lwami;

22:48  uNkulunkulu onginika impindiselo, lowehlisela izizwe ngaphansi kwami;

22:49  longikhupha ezitheni zami; laphezu kwabangivukelayo wena wangiphakamisa; lemuntwini wodlakela wangikhulula.

22:50  Ngenxa yalokhu ngizakudumisa, Nkosi, phakathi kwezizwe, ngihubele ibizo lakho indumiso.

22:51  Ingumphotshongo wosindiso kuyo inkosi yayo, isenzela ogcotshiweyo wayo umusa, kuDavida, lenzalweni yakhe kuze kube nininini.