CopSahBible2 - Sirach - 6

6:1  (cf cap 5 v15)

6:2  ⲙⲡⲣϫⲁⲥⲧⲕ ϩⲙ ⲡϣⲟϫⲛⲉ ⲙⲡⲉⲕϩⲏⲧ ϫⲉⲕⲁⲥ ⲛⲛⲉⲩⲧⲱⲣⲡ ⲛⲧⲉⲕⲯⲩⲭⲏ ⲛⲑⲉ ⲛⲟⲩⲙⲁⲥⲉ

6:3  ⲥⲉⲛⲁⲟⲩⲱⲙ ⲛⲛⲉⲕϭⲱⲱⲃⲉ ⲛⲅⲧⲁⲕⲉⲛⲉⲕⲕⲁⲣⲡⲟⲥ ⲛⲅⲕⲁⲁⲕ ⲛⲑⲉ ⲛⲛⲓϣⲉ ⲉⲧϣⲟⲩⲱⲟⲩ

6:4  ϣⲁⲣⲉⲟⲩⲯⲩⲭⲏ ⲉⲥϩⲟⲟⲩ ⲧⲁⲕⲉⲡⲉⲛⲧⲁϥⲕⲁⲁⲥ ⲛⲁϥ ⲁⲩⲱ ϣⲁⲥⲧⲣⲉⲛⲉϥϫⲁϫⲉⲣⲁϣⲉ ⲙⲙⲟϥ

6:5  ϣⲁⲣⲉⲟⲩⲗⲁⲥ ⲛⲣⲉϥϣⲁϫⲉ ⲧⲁϣⲉⲛⲉⲧⲛⲁⲱϣ ⲉⲃⲟⲗ ϩⲏⲧϥ

6:6  ⲁⲣⲓⲉⲓⲣⲏⲛⲏ ⲙⲛ ⲟⲩⲟⲛ ⲛⲓⲙ ⲛⲉⲕⲣⲉϥϫⲓϣⲟϫⲛⲉ ⲇⲉ ⲉⲟⲩⲁ ⲛⲉ ⲉⲃⲟⲗ ϩⲛ ϣⲟ

6:7  ⲉϣϫⲉ ⲕⲛⲁⲕⲁⲟⲩϣⲃⲏⲣ ⲛⲁⲕ ⲕⲁⲁϥ ⲛⲁⲕ ⲉⲃⲟⲗ ϩⲛ ⲛⲉⲕϩⲓⲥⲉ ⲁⲩⲱ ⲛⲅⲧⲙⲧⲁⲛϩⲟⲩⲧⲕ ⲛⲉⲙⲁϥ ϩⲛ ⲟ[ⲩ]ϭⲉⲡⲏ

6:8  ⲟⲩⲛϣⲃⲏⲣ ⲅⲁⲣ ⲡⲣⲟⲥ ⲟⲩⲟⲩⲟⲉⲓϣ ⲁⲩⲱ ⲉⲛⲛⲉϥϭⲱ ⲛ[ⲁⲕ(?) ϩ]ⲛⲧⲉⲕⲑⲗⲓⲯⲓⲥ

6:9  ⲁⲩⲱ ⲟⲩⲛϣⲃⲏⲣ ⲛⲉϥϭⲱⲗⲡ ⲉⲃⲟⲗ ⲙ

6:10  ⲁⲩⲱ ⲟⲩⲛϣⲃⲏⲣ ⲛⲙⲙⲁⲕ ϩⲙ ⲡⲉϩⲟⲟⲩ [ⲛⲧⲉⲕⲑⲗⲓⲯⲓⲥ]

6:11  ϩⲛ ⲛⲉⲕⲡⲉⲧⲛⲁⲛⲟⲩϥ ⲙ]ⲙⲟϥ ⲉϫⲛ ⲛⲉⲕϩⲙϩⲁⲗ

6:12  ⲉϥⲛⲁϯ ⲟⲩⲃⲏⲕ

6:13  ⲁⲩⲱ ϯ[ϩⲧⲏⲕ ⲉⲃ]ⲟⲗ ϩⲛ ⲛⲉⲕϣⲃⲉⲉⲣ

6:14  ⲟⲩϣⲃⲏⲣ [ⲙⲡⲓ]ⲥⲧⲟⲥ ⲟⲩⲛⲁϣⲧⲉ ⲉⲥⲧⲁϫⲣⲏⲩ ⲧⲉ ⲡⲉⲛⲧⲁϥϩⲉ ⲉⲣⲟϥ ⲁϥϩⲉ ⲉⲩⲁϩⲟ

6:15  ⲟⲩϣⲃⲏⲣ ⲙⲡⲓⲥⲧⲟⲥ ⲙⲛⲧⲉϥϣⲃⲃⲓⲱ ⲁⲩⲱ ⲙⲛϣⲓ ⲙⲡⲉϥⲁⲛⲁⲓ

6:16  ⲟⲩϣⲃⲏⲣ ⲙⲡⲓⲥⲧⲟⲥ ⲟⲩⲡⲁϩⲣⲉ ⲛⲱⲛϩ ⲡⲉ ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲁϩⲉ ⲉⲣⲟϥ

6:17  ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ϣⲁⲩⲥⲟⲟⲩⲧⲛ ⲛⲧⲉⲩⲙⲛⲧϣⲃⲏⲣ ϫⲉ ⲕⲁⲧⲁⲣⲟϥ ⲅⲁⲣ ⲧⲁⲓ ⲧⲉ ⲑⲉ ⲙⲡⲉⲧϩⲓⲧⲟⲩⲱϥ

6:18  ⲡⲁϣⲏⲣⲉ ϫⲓⲛ ⲧⲉⲕⲙⲛⲧⲕⲟⲩⲓ ⲥⲱⲧⲡ ⲛⲧⲉⲥⲃⲱ ⲧⲁⲣⲉⲕϩⲉ ⲉⲩⲭⲁⲣⲓⲥ ϣⲁ ⲧⲉⲕⲙⲛⲧϩⲗⲗⲟ

6:19  ϯⲡⲉⲕⲟⲩⲟⲓ ⲉⲣⲟⲥ ⲛⲑⲉ ⲙⲡⲉⲧⲥⲕⲁⲓ [ⲙⲛ] ⲡⲉⲧϫⲟ ⲛⲅϭⲱϣⲧ ⲉⲃⲟⲗ ϩⲏⲧⲟⲩ ⲛⲛⲉⲥⲕⲁⲣⲡ[ⲟⲥ] ⲉⲧⲛⲁⲛⲟⲩⲟⲩ ⲕⲛⲁϣⲡⲟⲩϣⲏⲙ ⲛϩⲓⲥⲉ ϩⲙ ⲡⲉⲥϩⲱⲃ ⲁⲩⲱ ⲕⲛⲁⲟⲩⲱⲙ ⲛⲛⲉⲥϭⲣⲱϭ ϩⲛ ⲟⲩϭⲉⲡⲏ

6:20  ϣⲁⲥⲣⲑⲉ ⲛⲛⲓϩⲱⲃ ⲉⲧⲛⲁϣⲧ ⲉⲙⲁⲧⲉ ⲛⲛⲓⲁⲑⲏⲧ ⲁⲩⲱ ⲙⲁⲣⲉⲁⲧⲥⲃⲱ ϭⲱ ⲛϩⲏⲧⲥ

6:21  ⲥⲛⲁϣⲱⲡⲉ ⲉϩⲣⲁⲓ ⲉϫⲱϥ ⲛⲑⲉ ⲛⲟⲩⲱⲛⲉ ⲛϫⲓϫⲛⲓⲧ ⲛϭⲟⲙ ⲉⲛⲟϫⲥ ⲉⲃⲟⲗ

6:22  …………ⲡⲉ]ⲥⲣⲁⲛ [ⲁⲩ]ⲱ ⲛⲥⲟⲩⲟⲛϩ ⲁⲛ ⲉ[ⲃⲟⲗ ⲛϩⲁ]ϩ

6:23  [ⲥ]ⲱⲧⲙ ⲡⲁϣⲏⲣⲉ ⲛⲅϣⲱ[ⲡ] ⲉⲣⲟⲕ ⲛⲧⲁⲥⲃⲱ ⲁⲩⲱ ⲙⲡⲣⲕⲱ ⲛⲥⲱⲕ ⲙⲡⲁϣⲟϫⲛⲉ

6:24  ϯⲛⲉⲕⲟⲩⲉⲣⲏⲧⲉ ⲉϩⲟⲩⲛ ⲉⲛⲉⲥⲡⲁⲓⲇⲉⲥ ⲁⲩⲱ ⲡⲉⲕⲙⲁⲕϩ ⲉϩⲟⲩⲛ ⲉⲛⲉⲥⲕⲗⲁⲗ

6:25  ⲕⲁⲧⲉⲕⲛⲁϩⲃⲉ ϩⲁⲣⲟⲥ ⲛⲅϥⲓ ϩⲁⲣⲟⲥ ⲛⲅⲧⲙⲙⲉⲥⲧⲉⲛⲉⲥⲙⲣⲣⲉ

6:26  ϯⲡⲉⲕⲟⲩⲟⲉⲓ ⲉⲣⲟⲥ ϩⲛ ⲧⲉⲕϭⲟⲙ ⲧⲏⲣⲥ ⲛⲅϩⲁⲣⲉϩ ⲉⲛⲉⲥϩⲓⲟⲟⲩⲉ ϩⲛ ⲧⲉⲕⲛⲟⲙⲧⲉ ⲧⲏⲣⲥ

6:27  ϩⲟⲧϩⲧ ⲛⲅϣⲓⲛⲉ ⲁⲩⲱ ⲥⲛⲁⲟⲩⲱⲛϩ ⲉⲣⲟⲕ ⲛⲅⲁⲙⲁϩⲧⲉ ⲙⲙⲟⲥ ⲛⲅⲧⲙⲕⲁⲁⲥ ⲉⲃⲟⲗ

6:28  ⲕⲛⲁϩⲉ ⲅⲁⲣ ⲉⲡⲉⲥⲙⲧⲟⲛ ϩⲛ ⲧⲉⲕϩⲁⲏ ⲛⲥⲕⲟⲧⲥ ⲛⲁⲕ ⲉⲩⲟⲩⲛⲟϥ

6:29  ⲛⲧⲉⲛⲓⲡⲁⲓⲇⲉⲥⲣϩⲁⲉⲓⲃⲉⲥ ⲛⲁⲕ ⲛϭⲟⲙ ⲁⲩⲱ ⲛⲓⲕⲗⲁⲗ ⲛⲥⲧⲟⲗⲏ ⲛⲉⲟⲟⲩ

6:30  ⲟⲩⲕⲟⲥⲙⲟⲥ ⲛⲛⲟⲩⲃ ⲡⲉⲧϩⲓϫⲱⲥ ⲁⲩⲱ ϩⲛϩⲱⲥ ⲛϩⲩⲁⲕⲓⲛⲑⲓⲛⲟⲛ ⲛⲉ ⲛⲉⲥⲙⲣⲣⲉ

6:31  ⲕⲛⲁⲧⲁⲁⲥ ϩⲓⲱⲱⲕ ⲛⲑⲉ ⲛⲛⲓⲥⲧⲟⲗⲏ ⲛⲉⲟⲟⲩ ⲁⲩⲱ ⲛⲅⲧⲁⲗⲟⲥ ⲉϫⲱⲕ ⲛⲕⲗⲟⲙ ⲛⲧⲉⲗⲏⲗ

6:32  ⲉϣⲱⲡⲉ ⲉⲕϣⲁⲛⲟⲩⲱϣ ⲡⲁϣⲏⲣⲉ ⲕⲛⲁϫⲓⲥⲃⲱ ⲉⲕϣⲁⲛϯⲡⲉⲕϩⲏⲧ ⲕⲛⲁⲣⲥⲁⲃⲉ

6:33  ⲉⲕϣⲁⲛ ⲉⲕϣⲁ[ⲛⲣⲉⲕⲧⲡ]ⲉⲕⲙⲁⲁϫⲉ ⲕⲛⲁⲣⲥⲁⲃⲉ

6:34  ⲁϩⲉⲣⲁⲧⲕ [ϩⲙ ⲡ]ⲙⲏⲏϣⲉ ⲛⲛϩⲗⲗⲟ ⲛⲅⲧⲟϭⲕ [ⲉⲡ]ⲥⲁⲃⲉ ⲉⲧⲛϩⲏⲧⲟⲩ

6:35  ⲟⲩⲉϣⲥⲱⲧⲙ ⲉϣⲁϫⲉ ⲛⲓⲙ ⲉⲛⲁⲛⲟⲩ ⲙⲡⲁⲣϩⲟⲓⲙⲓⲁ ⲙⲛ ⲙⲙⲛⲧⲣⲙⲛϩⲏⲧ ⲙⲡⲣⲧⲣⲉⲩⲣⲡⲉⲕⲃⲟⲗ

6:36  ⲉⲕϣⲁⲛϩⲉ ⲉⲩⲥⲁⲃⲉ ϣⲟⲣⲡⲕ ⲉⲣⲟϥ ⲁⲩⲱ ⲙⲁⲣⲉⲧⲉⲕⲟⲩⲉⲣⲏⲧⲉϩⲉⲧⲧⲡⲛⲛⲏ ⲙⲡⲉϥⲏⲓ

6:37  ⲙⲉⲕⲙⲟⲩⲕⲕ ϩⲛ ⲛⲟⲩⲉϩⲥⲁϩⲛⲉ ⲙⲡϫⲟⲉⲓⲥ ⲛⲅⲙⲉⲗⲉⲧⲁ ⲛⲟⲩⲟⲉⲓϣ ⲛⲓⲙ ϩⲛⲛⲉϥⲉⲛⲧⲟⲗⲏ ⲛⲧⲟϥ ⲅⲁⲣ ⲡⲉⲧⲛⲁⲧⲁϫⲣⲉⲡⲉⲕϩⲏⲧ ⲁⲩⲱ ⲡⲟⲩⲱϣ ⲛⲧⲥⲟⲫⲓⲁ ⲥⲉⲛⲁⲧⲁⲁϥ ⲛⲁⲕ