LinVB - Job - 20

20:1  Na nsima Sofar wa Naamat alobi :

20:2  Nazali motema likolo mpo ’te nayanola ; nakoki kokanga motema lisusu te.

20:3  Solo, maloba ma yo matumoli ngai, kasi nazwi mayele ma kozongisela yo eyano.

20:4  Obungi te ’te, uta kala mpenza, banda moto abimá o mokili,

20:5  esengo ya moto mabe ekoumelaka te, mpe nsai ya mosumuki ekoumelaka mingi te.

20:6  Ata azali molai tee o likolo, mpe motó mwa ye motutani na mampata,

20:7  akolimwa seko lokola elima, mpe bayebani ba ye bakotuna : « Akomi wapi ? »

20:8  Akolimwa na mbala yoko lokola ndoto, bakozwa ye te ; akokima lokola limoni lya butu.

20:9  Bato bazalaki komono ye na miso, bakomono ye lisusu te, ata o esika azalaki kofanda.

20:10  Bana ba ye ndebazongiseli babola biloko, bankoko ba ye ndebatikeli bango nkita ya ye.

20:11  Azalaki na nzoto makasi lokola elombe, kasi sikawa alali o mabelé.

20:12  Mabe manso mayokisi ye elengi o monoko, abombaki mango o motema ;

20:13  ayokaki mango elengi, abombi mabe mana, abosani mango te ;

20:14  bilei biye bibebi o misopo mya ye, bikomeli ye lokola ngenge ya nyoka.

20:15  Mosolo aliaki, sikawa akosanza mwango, Nzambe abimisi mwango o libumu lya ye.

20:16  Ameleki ngenge ya nyoka, yango wana lolemu la nyoka lobomi ye.

20:17  Akomono lisusu moluka to ebale te, esika mafuta ma nzoi to mabéle ma ngombe mazalaki.

20:18  Akosanza biloko binso aliaki, akomele byango te, ata azwaki mosolo mingi, mokosepelisa ye te.

20:19  Azalaki konyata mpe konyokolo babola, azalaki kobotolo bango ndako esika ’te abatela bango.

20:20  Awa azalaki kopima libumu lya ye eloko te, akobikisa ata eloko yoko ya nkita ya ye te.

20:21  Azalaki kolulalula biloko na lokoso, yango wana bomengo bwa ye bokoumela soki te.

20:22  Mokolo akomi na biloko biike, nzala ekokanga ye ; mpasi inso ikokwela ye o nzoto.

20:23  Ntango azali kotondisa libumu lya ye, nkanda ya Nzambe ekobete ye, ekoyela nzoto ya ye bitumbu biike.

20:24  Soko akimi mbeli ya bibende, litimbo lya mbengi likotubola ye.

20:25  Likongo likobima o mokongo mwa ye, nsonge ya likula ekokoto o libale, mpasi ya nsomo ekokwela ye.

20:26  Bipai binso alingi kobombama, akokuta se molili, móto bapelisi te, mokozikisa binso mpe mokosilisa biloko bitikalaki o ema ya ye.

20:27  Likolo likosakola mabe ma ye, mpe mokili mokotombokela ye makasi.

20:28  Mbula enene ekozindisa ndako ya ye mpe ekobenda ye o mokolo mwa nkanda.

20:29  Yango nde etumbu Nzambe akopesaka moto mobe, mpe lisango akobombelaka ye.