LinVB - Job - 22

22:1  Na nsima Elifas wa Teman alobi :

22:2  Moto akoki nde kopesa Nzambe eloko ? Ata moto wa bwanya akoki bobele komisalisa.

22:3  Nzambe wa bokasi akotala nde bosembo bwa yo ? Nzambe akozwa nini mpo ya ezalela elamu ya yo ?

22:4  Nzambe abengi yo nde o esambi mpo ya bosembo bwa yo ? Yango wana alingi kosambisa yo ?

22:5  Eloko te, ezali se mpo ya bobe bwa yo, mpo ya mabe ma yo ndelo te !

22:6  Osengeki bandeko ndanga ezangi ntina, obotoloki bango bilamba, yango wana batikalaki bolumbu.

22:7  Bato balembi na mosala, opimaki bango mai, opimaki bato bakufi na nzala mampa balia.

22:8  Solo, bato makasi bazali na bokonzi, mpe bato ba bango bakokonzaka mokili.

22:9  Ozongisaki basi bakufeli babali maboko mpamba, mpe na bana bitike ozalaki maboko makasi.

22:10  Yango wana mitambo mizingi yo, mpe makambo ma nsomo mayeli yo na mbalakaka.

22:11  Ozali komono lisusu te mpo ya molili makasi, ozindi o mai manene.

22:12  Oyebi ’te Nzambe azali mosika, o nta likolo, omoni minzoto mizali mosika mingi,

22:13  yango wana olobi : « Nzambe akoki koyeba eloko te ! Akoki nde kotala bato bazali o nse ya mampata ?

22:14  Mampata mazali lokola elamba, akomono eloko te ; ye atikali bobele o mokili mwa likolo. »

22:15  Bongo, olingi kolanda nzela ya kala, eye bato babe bazalaki kotambola ?

22:16  Bango bawei, ata mikolo mya bango mikokaki te, mai ma ebale mazindisi ndako ya bango.

22:17  Balobaki na Nzambe : « Tika biso nye ! Nzambe wa bokasi akoki kosala biso nini ? »

22:18  Nzokande Ye atondisaki ndako ya bango na biloko, ata baboyaki kondima malako ma ye.

22:19  Awa bakwei bato balamu basepeli, moto wa bosembo aseki bango,

22:20  alobi : « Tala banguna ba biso basuki, móto mosilisi biloko bya bango binso ! »

22:21  Yo, senge bolimbisi mpe luka bondeko, bongo Nzambe akozongisela yo bolamu bwa kala.

22:22  Ndima mateya okoyoka o monoko mwa ye, mpe bomba maloba ma ye o motema mwa yo.

22:23  Soko ozongeli Nzambe wa bokasi na motema bosawa, olongoli makambo mabe manso o ema ya yo.

22:24  Soko obwaki biloko bya yo bya motuya o mabelé, mpe obwaki wolo ya Ofir o mai esika mabanga mazali,

22:25  Nzambe wa bokasi bonso akozala wolo ya yo mpe mosolo mwa yo, moye okotiaka motema.

22:26  Bongo okosepela Nzambe wa bokasi mpe okotombola elongi epai ya ye.

22:27  Soko obondeli ye, akondimela yo, mpe okobonzela ye mabonza olakelaki ye.

22:28  Maye okani kosala, makotambola malamu, mwinda mokopela o nzela ya yo inso.

22:29  Ndokoki koloba na bato bakwei : « Boteleme ! », zambi Nzambe akobikisa bato bakomikitisaka.

22:30  Akobikisa ata moto azali na likambo, akokitisa yo te, mpo ozali na maboko peto.