Site uses cookies to provide basic functionality.

OK
JOB
Prev Up Next
Chapter 38
Job Kapingam 38:1  Dimaadua e-leelee-mai i-lodo di madangi gono maaloo gi Job,
Job Kapingam 38:2  “Goe ko-ai dela e-heeu-mai dogu iloo mee i au balu helekai ono hadinga ai?
Job Kapingam 38:3  Duu-i-nua be taane, helekai gi agu heeu ala ma-ga-heeu-adu.
Job Kapingam 38:4  Goe nogo i-hee i-di madagoaa Au ne-hai henuailala? Maa goe e-iloo nia mee e-logo, hagia-mai-laa.
Job Kapingam 38:5  Gei di-ma koai dela ne-hagamaanadu bolo henuailala le e-hai gi-damana beelaa? Ma koai dela ne-dagi dana mee hagatau-mee e-hagatautau di-maa? Goe e-iloo di heeu deenei?
Job Kapingam 38:6  Ma di-aha dela e-daahi nia duludulu ala e-daahi henuailala gi-huudonu? Ma koai dela ne-dugu dana hadu madaaduge e-hagamau henuailala?
Job Kapingam 38:7  I-di heniheni di laangi deelaa, nia heduu o-di luada gu-dadaahili i-di gowaa e-dahi, digau di-langi gu-wwolowwolo tenetene.
Job Kapingam 38:8  Ma koai dela ne-tai nia bontai ala nogo daahi di tai i-di madagoaa ne-biia-mai i-lodo tinae henuailala?
Job Kapingam 38:9  Ma ko-Au dela ne-gahu di tai gi-nia gololangi, gei ne-hii di-maa gi-di bouli dongoeho.
Job Kapingam 38:10  Au ne-maaga di haga-geinga o-di tai, gei ne-benebene di-maa gi-tua nia bontai ala guu-tai.
Job Kapingam 38:11  Ko-Au ne-helekai gi-di tai boloo, ‘Guu-tugi di gowaa dela e-hana ginai goe! I-kinei, o beau maaloo ga hagalee.’
Job Kapingam 38:12  “Job, i-lodo do mouli, goe guu-hai do holongo e-haga-heni di laangi?
Job Kapingam 38:13  Goe guu-hai di heniheni gi-daahia hua beelaa henuailala mo-di hagangalungalua digau huaidu gi-daha mo nadau gowaa nogo pala-ai?
Job Kapingam 38:14  Di maalama o-di aa e-hai nia gonduu mono gowaa baba gi-gila-mai gadoo be nia haduhadui o-di gahu, e-madammaa gadoo be-di maaga dela e-maaga i-hongo di gelegele.
Job Kapingam 38:15  Di maalama o-di laangi la-gu-maalama balua gi digau huaidu, e-duuli digaula gi-daha mo nadau hegau huaidu.
Job Kapingam 38:16  “Goe guu-hana gi-di gowaa iai nia monowai e-uwa-aga i tua di moana? Goe gu-haele i-hongo di baba di moana?
Job Kapingam 38:17  Ma iai tangada guu-hagi-adu gi-di-goe nia bontai o-di abaaba dela e-duuli tenua bouli o digau mmade?
Job Kapingam 38:18  Goe gu-iloo be tamanaiee o henuailala le e-damana behee? Hagia-mai-laa gi-di-Au be goe e-iloo.
Job Kapingam 38:19  “Goe e-iloo be-di maalama le e-hanimoi i-hee, be-di bouli la di mee e-daamada i-hee?
Job Kapingam 38:20  Goe e-mee di hagi-anga gi meemaa be e-mogowaa behee nau gowaa ala e-mee di hula ginai, be e-hagau meemaa gi-muli gi-di gowaa ne-lloomoi ai?
Job Kapingam 38:21  Au bolo goe e-mee-hua, idimaa, goe gu-madua, gei goe nogo i-golo i-di madagoaa henuailala ne-hai!
Job Kapingam 38:22  “Goe guu-hana gu-madamada i-lodo nia hale benebene-mee, nia gowaa ala e-dugu-ai agu ‘snow’ mono uwa-hadu-magalillili?
Job Kapingam 38:23  Au e-hagatogomaalia nia maa gi-nia madagoaa haingadaa mo nia laangi ala e-hai nia dauwa llauehe mo lligi.
Job Kapingam 38:24  Goe guu-hana gi-di gowaa dela e-hobo-aga-iai di laa, be-di gowaa dela e-gono-mai-ai di madangi dela e-haneia i-dua?
Job Kapingam 38:25  Ma koai dela ne-geli di madaawa dela e-malingi-ia nia uwa, gei ne-haga-aadee di ala gi-nia atili?
Job Kapingam 38:26  Ma koai dela ne-hai di uwa gii-doo i-di gowaa dela ono daangada ai?
Job Kapingam 38:27  Ma koai dela e-hagatiu di gowaa maangoo ge e-haga-inu di gowaa hieinu, e-hagatomo-aga nia geinga-tolo?
Job Kapingam 38:30  Ma di-aha dela e-huli nia wai gii-hai be-di hadu, ga-haga-hamaaloo i-hongo tai?
Job Kapingam 38:31  Goe e-mee di-nnoo nia heduu Madaligi gi-di gowaa e-dahi, be e-wwede di nnoo dela e-daahi nia heduu Waga-dogo-dolu?
Job Kapingam 38:32  Goe e-mee di-dagi nia heduu gi-lloomoi i nadau madagoaa donu, ge e-dagi nia heduu ala e-haga-ingoo bolo di Ibu Damana mo-di Ibu Dulii la-gii-hula gi nadau gowaa?
Job Kapingam 38:33  Goe e-iloo nia haganoho ala e-dagi di ahiaalangi, gei goe e-mee di-haga-hai-hegau nia haganoho aalaa gi henuailala?
Job Kapingam 38:34  “Goe e-mee di-wolo hagadaba gi nia gololangi gi-haga-tiulia goe gi-di uwa?
Job Kapingam 38:35  Maa goe ga-helekai gi-di ila gii-daba, di ila e-mee di-hanadu gi-di-goe ga-helekai adu boloo, ‘Deenei au, au gaa-hai dau hegau?’
Job Kapingam 38:36  Ma koai e-helekai gi-di manu-‘ibis’ bolo di monowai Nile ga-doloo, koai e-helekai gi-nia deduu-daane bolo di uwa gaa-doo?
Job Kapingam 38:37  Ma-koai dela e-mee di-iloo di-dau nia gololangi, be e-hulihuli nia maa hagabaahi gi-malingi nia uwa,
Job Kapingam 38:38  nia uwa ala e-haga-hamaaloo nia gelegele gii-hai nia bahi-mee hamaaloo?
Job Kapingam 38:39  “Goe e-mee di-halahala nia meegai ang-gi nia laion e-gai, ge e-hagamaaluu nia dama-laion,
Job Kapingam 38:40  i-di madagoaa digaula e-pala hagammuni i-lodo nadau bongoo, be e-togo e-talitali i-hongo nadau gowaa kiikii?
Job Kapingam 38:41  Ma koai dela e-haangai nia manu ‘raven’ i-di madagoaa digaula e-heehee hiigai, i-di madagoaa nia dama digaula gaa-tangi i-nia meegai?