UyCyr - Genesis - 30

30:1  Раһилә Яқупқа бала туғуп берәлмигәчкә, һәдисигә көрәлмәс­лик қилип, Яқупқа: — Мәндинму бала тепиң, болмиса өлгиним яхши! — деди.

30:2  Яқуп Раһиләгә аччиқлинип: — Сени туғмас қилип қойған Худа турса, мән немә қилалаттим? — деди.

30:3  Раһилә униңға: — Сиз мениң қиз хизмәткарим Билһа билән бир орунда йетиң. У маңа бала туғуп бәрсун, буниң билән мәнму ана болуп қалай, — деди.

30:4  Шундақ қилип, Раһилә қиз хизмәткари Билһани йолдишиға кичик хотунлуққа бәрди. Яқуп Билһа билән бир орунда ятти.

30:5  Билһа һамилдар болуп, Яқупқа бир оғул туғуп бәрди.

30:6  Раһилә: «Худа адил һөкүм чиқирип, дуайимни аңлап, маңа бир оғул бәрди!» деди. Шуңа балиниң исмини Дан дәп қойди.

30:7  Билһа йәнә һамилдар болуп, Яқупқа иккинчи оғулни туғуп бәрди.

30:8  Раһилә: «Мән һәдәм билән қаттиқ күрәш қилип, ахири уни йәңдим», деди. Шуңа балиниң исмини Нафтали дәп қойди.

30:9  Леяһ өзиниң туғути тохтап қалғанлиғини сезип, хизмәткари Зилпани Яқупқа кичик хотунлуққа бәрди.

30:10  Зилпа Яқупқа бир оғул туғуп бәрди.

30:11  Леяһ: «Мән һәқиқәтән тәләйлик!» деди вә балиниң исмини Гад қойди.

30:12  Зилпа Яқупқа иккинчи оғулни туғуп бәрди.

30:13  Леяһ: «Мән һәқиқәтән бәхитлик-һә! Аяллар мени бәхитлик аял дейишиду!» деди. Шуңа балиниң исмини Ашер дәп қойди.

30:14  Ома мәзгилидә Леяһниң чоң оғли Рубен буғдайлиқтин туғмас­лиқ кесилигә шипа болидиған бир хил дора өсүмлүк тепивелип, Леяһқа бәрди. Буни көргән Раһилә Леяһқа: — Маңа оғлуң тепивалған дора өсүмлүктин бир аз бәргинә, — деди.

30:15  Леяһ униңға: — Мениң йолдишимни тартивалғиниң йәтмәмду? Әнди мениң оғлум тепивалған дора өсүмлүкниму тартивелип, мени бала туғуш­тин мәһрум қилмақчимусән? — дәп җавап қайтурди. Раһилә: — Әгәр сән оғлуң тепивалған дора өсүмлүкни маңа бәрсәң, бүгүн кечә Яқуп сән билән биллә болсун, — деди.

30:16  Шу күни күн патқанда, Яқуп буғдайлиқтин қайтип кәлгинидә, Леяһ алдиға чиқип, униңға: — Бүгүн ахшам чоқум мән билән йетиң. Чүнки оғлум тепивалған дора өсүмлүкниң төләмигә сиз билән бүгүн кечә бир орунда болуш һоқуқиға ериштим, — деди. Шуңа у кечә Яқуп Леяһ билән биллә ятти.

30:17  Леяһниң дуаси Худаға йәтти. У йәнә һамилдар болуп, Яқупқа бәшинчи оғулни туғуп бәрди.

30:18  Леяһ: «Худа маңа әҗир қилди, чүнки мән өз хизмәткаримни йолдишимға бәрдим!» деди. Шуңа у балиниң исмини Иссакар дәп қойди.

30:19  Леяһ йәнә һамилдар болуп, Яқупқа алтинчи оғулни туғуп бәрди.

30:20  У: «Худа маңа қиммәтлик соға бәрди. Әнди йолдишим маңа яхши муамилә қилиду, чүнки мән униңға алтә оғул туғуп бәрдим», деди. Шуңа у балиниң исмини Зәбулун дәп қойди.

30:21  Униңдин кейин у бир қиз туғди вә униң исмини Дина дәп қойди.

30:22  Кейин Худа Раһиләни яд етип, дуасини иҗавәт қилип, уни туғидиған қилди.

30:23  У һамилдар болуп, бир оғул туғди. У: «Худа маңа оғул берип, мени номустин халас қилди.

30:24  Пәрвәрдигардин йәнә бир оғул тиләймән!» деди. Шуңа оғлиниң исмини Йүсүп дәп қойди.

30:25  Раһилә Йүсүпни туққандин кейин, Яқуп Лабанға: — Маңа рухсәт қилиң, өз жутумға қайтай.

30:26  Аял вә бала-җақили­римни елип кетишимгә рухсәт қилиң. Улар мениң сизгә ишләп бәргән иш һәққим болсун. Мениң сизгә қандақ тиришип ишлиги­ним өзиңизгә мәлум, — деди.

30:27  Лабан униңға: — Сән мәндин хошал болсаң, мениң йенимдин кәтмә. Мән һазир бай болуп кәттим. Пәрвәрдигарниң маңа бәхит ата қилғанлиғини сениң йенимда бар болғиниңдин екәнлигини пал ечиш арқилиқ билдим.

30:28  Ейтқин, қанчилик һәқ сорисаң, җәзмән шунчилик беримән, — деди.

30:29  Яқуп мундақ җавап бәрди: — Мениң қандақ җан тикип ишлигәнлигим, әҗрим билән қой-калилириңизниң қанчилик көпийип кәткәнлиги өзиңизгә аян.

30:30  Мән келиштин илгири сизниң қол-илкиңиздә анчә йоқ еди, һазир байлиғиңиз шунчә көпәйди. Пәрвәрдигар мениң йениңизда болғинимдин сизгә бәхит ата қилди. Әнди мән өз аиләмни ойлишим керәк, — дәп җавап қайтурди.

30:31  — Әмсә, саңа немә беришим керәк? — дәп сориди Лабан. Яқуп мундақ җавап бәрди: — Маңа иш һәққи керәк әмәс! Әгәр төвәндики бу тәкливимгә қошулсиңиз, падилириңизни давамлиқ бақай.

30:32  Тәкливим мундақ: бүгүн падилириңизниң арисиға кирип, тағил, чипар вә қара қойларни һәм чипар вә тағил өшкиләрни айрип чиқай. Булар мениң иш һәққим болсун.

30:33  Кәлгүсидә сизгә сәмимийлигимни мундақ көрсәтмәкчимән: сиз мениң иш һәққимни тәкшүрүп кәлгиниңиздә, әгәр мениң падилиримниң ичидә тағил вә чипар болмиған өшкә яки қара болмиған қойларни учратсиңиз, уларни оғрилап келингән дәп биләләйсиз.

30:34  Лабан: — Сениң тәкливиңгә қошулдум, дегиниңдәк болсун! — деди.

30:35  Бирақ шу күни Лабан әсли Яқупқа тегишлик болған тағил вә чипар әркәк өшкиләр билән чипар вә ақ рәң арилашқан чиши өшкиләрни һәм барлиқ қара қойларни астиртин айрип чиқип, өз оғуллириға бақтурди.

30:36  Андин у бу малларни Яқуптин үч күнлүк йол жирақлиқтики бир җайға елип кәтти. Яқуп Лабанниң қалған падилирини бақти.

30:37  Буни билгән Яқуп терәк, бадам вә чинар дәрәқлиридин көк шахларни кесип, қовзиғини тағил шәкилдә, йәни бир йолида қовзақ бар, йәнә бир йолида қовзақ йоқ қилип сойди.

30:38  У бу шахларни малларниң оқурлириға, йәни малларниң алдиға санчип қойди. Маллар су ичкили кәлгәндә, шу йәрдә җүплишип қалатти. Маллар шахларниң алдида җүпләшсә, тағил вә чипар қозиларни туғатти.

30:39  У бу шахларни малларниң оқурлириға, йәни малларниң алдиға санчип қойди. Маллар су ичкили кәлгәндә, шу йәрдә җүплишип қалатти. Маллар шахларниң алдида җүпләшсә, тағил вә чипар қозиларни туғатти.

30:40  Яқуп уларни қалғанлардин айрип қойди. У қалғанларни Лабанниң тағил вә қара қойлириға қаритип қоюп уруқландурди. Шундақ қилип, Яқуп өз падилирини көпәйтти һәм Лабанниң падилиридин айриди.

30:41  Сағлам маллар җүпләшсә, Яқуп шахларни уларниң алдидики оқурға санчип қоятти, маллар шу шахларниң йенида җүплишәтти.

30:42  Лекин тени аҗиз маллар җүпләшсә, шахларни санчиматти. Узун өтмәй, оруқ маллар Лабанға қелип, семиз маллар Яқупқа өтти.

30:43  Шундақ қилип, Яқуп барғансири бейип, нурғун қой падилар, әр-аял қуллар, төгә вә ешәкләргә егә болди.