Kapingamarangi - Matthew - 13

13:1  Di laangi la-hua, Jesus ne-hagatanga i-di hale, gaa-hana, gaa-noho i tongotai belee hai ana agoago.

13:2  Digau dogologowaahee gu-haganiga i dono gili, gaa-hidi-iei Mee, gaa-gaga gi-hongo di boodi, gaa-noho i-lodo, gei nia daangada e-tuu i tongotai.

13:3  Mee nogo agoago i-nia ala-kai, e-hagi ang-gi digaula nia mee e-logo boloo, “Dahi daane ne-hana ga-haga-nonnono ana lii.

13:4  Dana haga-nonnono i-lodo di hadagee deelaa, hunu lii guu-too gi-hongo di ala-dulii, gei nia manu gu-mmaangi-mai, guu-gai nia maa.

13:5  Hunu maa ne-monnono gi-lodo di gowaa haduhadu, di gowaa dela e-hogoohi ono gelegele, gei guu-tomo limalima, idimaa, nia gelegele la-hagalee llala.

13:6  Di madagoaa di laa ne-dii, gei nia lii ala ne-tomo, la-guu-mae, idimaa, nia aga o-nia maa digi tomo gi-di gowaa llala.

13:7  Hunu lii ne-monnono gi-lodo nia geinga duduia. Di madagoaa nia geinga duduia ne-tomo-aga, gu-hagadeaadee nia lii gi-dee-tomo.

13:8  Hunu lii ne-monnono gi-hongo nia gelegele humalia, guu-tomo, guu-huwa dagi-llau, dagi-modoono, dagi-motolu.”

13:9  Jesus ga-hagaodi dana agoago, ga-helekai, “Tangada ono dalinga i-golo, gi-hagalongo!”

13:10  Ana dama-agoago ne-lloomoi gi Jesus, ga-heeu gi Mee, “Goe e-aha dela e-hai-hegau i-nia ala-kai ang-gi nia daangada?”

13:11  Jesus ga-helekai, “Idimaa, ma-gu-dumaalia-adu gi goodou gi-iloo nia mee ngala huogodoo o Teenua King o God di Langi, gei hagalee ang-gi digaula.

13:12  Tangada dela iai dana mee, geia e-haga-uda-anga ginai nia mee e-logo gii-dohu gi-nonua. Gei tangada dela dana mee ai, dana mee dulii dela i dono baahi, le e-daa gi-daha.

13:13  Deenei tadinga o agu ala-kai agoago: digaula e-mmada, gei e-de-gidee, e-hagalongo gei e-de-longono be e-de-modongoohia.

13:14  Deenei-laa di kokohp o Isaiah e-helekai i digaula boloo, ‘Digau aanei ga-hagalongo, ga-hagalongo, gei e-de-iloo, digaula gaa-mmada, gaa-mmada, gei e-de-gidee.

13:15  Idimaa, nia hagamaanadu digaula gu-hamaaloo, nia dalinga digaula gu-bonodia, nia golomada digaula gu-dee-gida. Gei di-maa hagalee hai beenei, nadau golomada e-mee-hua di-mmada, nadau dalinga e-mee di-hagalongo, gei nadau hagamaanadu le e-modongoohia, gei digaula ga-lloomoi gi-muli gi-di-Au, gei Au ga-hagahili digaula. Aanei nnelekai a God.’

13:16  “Gei goodou gu-maluagina, idimaa, godou golomada e-gidee, godou dalinga e-longono.

13:17  Au e-hagi-adu gi goodou di tonu bolo nia soukohp dogologo mo nia daangada a God dogologo e-hiihai huoloo e-mmada gi-nia mee ala ne-mmada ginai goodou, gei digaula e-deemee. Digaula e-hiihai e-hagalongo gi-nia mee ala ne-hagalongo ginai goodou, gei digaula e-deemee.

13:18  “Hagalongo, kaabee-ina tadinga di ala-kai o tangada haga-nonnono lii:

13:19  Digau ala gu-longono nia helekai o Teenua King o God, gei e-de-iloo, le e-hai gadoo be nia lii ala ne-monnono gi-hongo di ala-dulii. Di hagataalunga huaidu ga-hanimoi, gaa-kae nia mee ne-haga-monnono gi nadau lodo.

13:20  Nia lii ala ne-monnono gi-hongo di gowaa haduhadu, aalaa go digau e-hagalongo gi-nia agoago, ga-limalima ga-tenetene i-di nadau longono nia maa.

13:21  Gei hagalee mau i nadau baahi, i-di madagoaa di haingadaa be taaligi gaa-tale gi digaula i-di gili nia agoago aanei, digaula ga-limalima-hua di-kili gi-daha nadau hagadonu.

13:22  Gei nia lii ala ne-monnono gi-mehanga nia geinga duduia, go digau ala ne-longono nia agoago, gei te-nnoomaalia o-di mouli-nei, mo-di hiihai gi-nia maluagina gu-haga-deaadee nia agoago aalaa, gaa-hidi-ai digaula ga-dee-huwa.

13:23  Gei nia lii ala ne-monnono gi-hongo nia gelegele humalia, go digau ala ne-longono nia helekai ga-iloo, gaa-huwa dagi-llau, dagi-modoono, dagi-motolu.”

13:24  Jesus ne-hagi ang-gi digaula tuai ala-kai: “Teenua King o God di Langi e-hai beenei: Dahi daane hai-hadagee ne-haga-nonnono ana lii humalia i-lodo dana hadagee.

13:25  Dahi boo hua, di madagoaa nia daangada guu-kii, tangada hagadaumee ga-hanimoi, ga-haga-nonnono ana lii huaidu i-mehanga nia lii humalia aalaa, gaa-hana.

13:26  Nia lii humalia gaa-tomo, gu-daamada gaa-huwa, gei nia geinga huaidu gu-tomo-aga labelaa.

13:27  Digau hai-hegau ga-lloomoi gi mee, ga-helekai boloo, ‘Meenei, nia lii humalia ne-haga-nonnono kooe gi-lodo dau hadagee, ma nia geinga huaidu ne-lloomoi i-hee?’

13:28  Tangada dana hadagee ga-helekai boloo, ‘Tangada hagadaumee dela ne-hai di mee deenei.’ Digaula ga-heeu, ‘Goe e-hiihai bolo gimaadou gi-daagia nia geinga huaidu aalaa?’

13:29  Mee ga-helekai, ‘Deeai. Maa goodou ga-daagi nia geinga huaidu, gei goodou ga-daagi labelaa nia laagau humalia dalia nia geinga huaidu aalaa.

13:30  Goodou heia nia geinga huaidu mono laagau humalia gii-tomo ngaadahi, gii-dae gi-di laangi dela e-hadi-ai nia maa. Gei-au ga-helekai gi digau hadi huwa-laagau gi-daagia nia geinga huaidu i-mua, gi-nnoodia gii-hai nia uu-mee e-dudu, gei nia huwa-laagau humalia la-ga-hagabudu, gaa-dugu gi-lodo dogu hale benebene-mee.’ ”

13:31  Jesus ne-helekai gi digaula i-tuai ala-kai: “Teenua King o God di Langi le e-hai be-di lii-laagau-‘mustard’. Tangada ne-kae di-maa, gaa-dogi i-lodo dana gowaa dogi-mee.

13:32  Di lii deenei, dela koia e-dulii-loo i-nia lii huogodoo, ga-tomo-aga gaa-hai di laagau damanaiee i-nia laagau huogodoo. Gei nia manu ga-mmaangi-mai gaa-hai nadau waehongo i-hongo nia manga.”

13:33  Jesus ne-helekai ang-gi digaula i-tuai ala-kai: “Teenua King o God di Langi le e-hai beenei. Di ahina ne-kae ana ‘yeast’, ga-unugi gi-nia palaawaa, gei nia palaawaa aalaa la-guu-tanga huogodoo.”

13:34  Jesus e-agoago nia mee huogodoo aanei gi digau dogologo i-nia ala-kai. Mee e-agoago-hua i-nia ala-kai gi digaula.

13:35  Mee ne-hai beenei bolo gi-gila-ai nia helekai soukohp boloo, “Au e-hai-hegau i-nia ala-kai i dogu madagoaa e-helekai gi digaula. Au ga-haga-modongoohia gi digaula nia mee huogodoo ala e-dee-modongoohia mai taamada henuailala.”

13:36  Jesus ga-hagatanga gi-daha mo digau dogologo, ga-ulu gi-lodo di hale. Ana dama-agoago ga-lloomoi gi Mee, ga-helekai, “Hagamodongoohia-ina di ala-kai o-nia geinga huaidu ala i-lodo di hadagee le e-hai bolo-aha?”

13:37  Jesus ga-helekai, “Tangada ne-haga-nonnono ana lii humalia, la-go Tama-Tangada.

13:38  Di hadagee la-go henuailala. Nia lii humalia la-go digau Teenua King o God. Nia geinga huaidu la-go nia hoo o Setan.

13:39  Di hagadaumee dela ne-haga-nonnono ana lii geinga huaidu, la-go Setan. Di madagoaa e-hadi nia huwa-laagau la-go di hagaodi o-di madagoaa. Digau hadi huwa-laagau, la-go digau di-langi.

13:40  Di hai o-nia geinga huaidu ala e-hagabudu-mai gi-di gowaa e-dahi e-kae e-dudu i-lodo di ahi, e-hai gadoo be-di hai dela gaa-hai i-di laangi hagaodi.

13:41  Tama-Tangada ga-hagau ana gau di-langi gi-daawaa gi-daha mo dono Heenua King digau huogodoo ala e-hai nia daangada gii-too gi-lodo di huaidu, mo nia daangada ala e-haihai nia mee huaidu huogodoo ala i-golo,

13:42  bolo gi-kilia digaula gi-lodo di ahi maaloo, di gowaa e-tangitangi-ai, ge e-gadigadi nadau niha.

13:43  Gei nia dama a God ga-maahina gadoo be-di laa i-lodo Teenua King o di-nadau Damana. Tangada ono dalinga i-golo, gi-hagalongo!

13:44  “Teenua King o God di Langi e-hai beenei: Taane gaa-gida di maluagina dela e-ngala i-lodo di gelegele. Gei taane gaa-danu labelaa di-maa, gu-tenetene huoloo, gaa-hana gaa-hui gi-daha ana mee huogodoo ala e-hai-mee ginai, gaa-hana gaa-hui di gowaa.

13:45  “Teenua King o God di Langi e-hai beenei: Tangada e-halahala ana hadu lodo-baehua humalia.

13:46  Geia ga-gidee-ia di hadu kaedahi hagalabagau, geia gaa-hana, gaa-hui gi-daha ana mee huogodoo, gaa-hui di hadu lodo-baehua deelaa.

13:47  “Teenua King o God di Langi le e-hai labelaa beenei: Digau hai-iga ne-hudu nadau gubenge gi-lodo di monowai belee kumi nnagadilinga iga huogodoo.

13:48  Gei di gubenge la-guu-honu, digaula ga-hudi-aga gi tongotai, gaa-noho gi-lala belee hili nia iga. Nia iga humalia gaa-haa gi-lodo nia begedu, nia iga huaidu gaa-kili gi-daha.

13:49  Deenei di mee gaa-hai i-di hagaodi o-di madagoaa. Digau di-langi ga-hagau e-hili digau huaidu huogodoo gi-daha mo digau humalia,

13:50  gaa-kili digau huaidu gi-lodo di ahi maaloo i-di gowaa e-tangitangi-ai digaula, gei e-gadigadi nadau niha.”

13:51  Jesus ga-heeu gi digaula, “Goodou gu-iloo nia mee aanei?” Digaula ga-helekai, “Uaa.”

13:52  Ge-Ia ga-helekai gi digaula, “Malaa, tangada haga-donudonu haganoho dela ma-gaa-hai tama-agoago i-lodo Teenua King o God di Langi, le e-hai be tagi o-di hale dela e-daa ono maluagina hoou mo pobo gi-daha mo dono hale benebene-mee.”

13:53  Jesus ga-haga-lawa ana ala-kai nogo agoago gi digaula, ga-hagatanga gi-daha mo-di gowaa deelaa,

13:54  gaa-hana gi dono guongo, ga-agoago i-lodo synagogee, gei digaula gu-goboina huoloo, ga-heeu boloo, “Di kabemee mono haga-goboina a-maa ne-gaamai i-hee?

13:55  Mee hagalee go tama a taane hau-hale? Tinana o-Maa hagalee go Mary, ono duaahina go James, Joseph, Simon mo Judas?

13:56  Gei ono duaahina-ahina la hagalee aanei i tadau baahi? Malaa, nia mee a-Maa ne-gaamai i-hee?”

13:57  Gei digaula gu-haga-balumee a-Mee. Jesus ga-helekai gi digaula, “Nia soukohp e-hagalaamua i-nia gowaa huogodoo, gei hagalee hagalaamua go dono guongo donu mo ono gau donu.”

13:58  Jesus digi hai ana mogobuna e-logo i-golo, idimaa, digaula hagalee hagadonu.