LinVB - Job - 30

30:1  Kasi sikawa bato bazali kotiola ngai, mokóló wa bango ; natiaki batata ba bango nsima ya mbwa ya ngai, iye izalaki kokengele bibwele bya ngai.

30:2  Bakokaki kopesa ngai maboko te, zambi bokasi bwa bango bosila kala.

30:3  Nzala mpe mpasi ilembisaki bango, bazalaki kolia matiti mpamba ma esobe ;

30:4  bazalaki kobuka mbika o bilanga bya kala ; bilei bya bango, se minsisa mya nzete.

30:5  Bato banso babenganaki bango, bawulolaki bango lokola bakowulolaka bayibi.

30:6  Bakendeki kolala o mabwaku ma nsomo, o mibenga mya ngomba mpe o mabulu o kati ya mabelé.

30:7  Wana balelaki o kati ya matiti lokola ngombe, mpe babombamaki o nse ya nzete ya nzube.

30:8  Bazalaki bato ba mpamba baye bazangi lokumu, bato ba ekolo ya bango bazalaki kobengana bango.

30:9  Bakomisi nkombo ya ngai lokola nzembo, nakomi lokola lisapo o minoko mya bango.

30:10  Bayoki ngai nsomo, batelemi mosika na ngai to babwakeli ngai nsoi o elongi, nsoni te !

30:11  Awa Nzambe alembisi ngai mpe abwaki ngai, balakisi ngai limemye soki te.

30:12  Penepene na ngai bakomi ebele, batieli ngai mabaku mpo ’te bakweisa ngai, bamilengeli mpo bazwa nzela ya koboma ngai.

30:13  Bakangeli ngai nzela bipai binso, baluki se kosukisa ngai, moto moko te ayei kosalisa ngai.

30:14  Bakoti ebele o esika babuki lopango, bakimi mabanga malingi kokwela bango.

30:15  Nsomo enene ekangi ngai na mbala yoko, elikya ya ngai ekimi lokola mompepe, lokumu la ngai losili lokola limpata lilimwi.

30:16  Sikawa bomoi bozali kokima ngai, mikolo mya mpasi mizali koyela ngai.

30:17  Na butu mpasi eyeli ngai, eswi ngai minkuwa ; ezali lokola nyama ike ikolia ngai, ikopema te.

30:18  Lokola moto akangi ngai makasi na elamba, afini ngai nkingo.

30:19  Abwaki ngai o kati ya potopoto, nakomi lokola mputulu ya makala.

30:20  Nabeleli yo Nzambe, mpe ondimeli ngai te, natelemi o miso ma yo, otali ngai te.

30:21  Okomi konyokolo ngai mingi mpenza, bokasi bwa loboko la yo bokweisi ngai.

30:22  Omemi ngai na mompepe lokola likolo lya mpunda, lokola ekumbaki oningisi ngai.

30:23  Nayebi solo ’te okotinda ngai o liwa, o mboka eye bato banso bakokendeke.

30:24  Ngai nde naboyaki kosalisa mobola, oyo ayaki kosenge lisalisi o mpasi ya ye ?

30:25  Ngai nalelaki elongo na baye bazalaki na mpasi, mpe nazalaki koyokela bango mawa.

30:26  Nalukaki kozwa bolamu, nazwi se mabe, nazilaki mwinda, kasi tala molili moyei.

30:27  Motema mwa ngai mozali kobete makasi ntango inso ; mokolo na mokolo mokoyela ngai mpasi.

30:28  Ata natamboli na elongi mawa mawa, moto moko abondi ngai te, natelemeki o lisanga se mpo ’te nabelela.

30:29  Nakomi ndeko wa minsole, nakoti o molongo mwa maligbanga.

30:30  Lomposo la ngai loindi mpe lolongwi, minkuwa mya ngai miziki mpe mikauki.

30:31  Nzenze ya ngai ezali koyokisa nzembo ya lilaka, mpiololo ya ngai elandi se mingongo mya baleli.