LinVB - Job - 39

39:1  Oyebi ntango nini ntaba ya ngomba ikobotaka bana ? Osili omoni kulupa o ntango ekobotaka ?

39:2  Oyebi sanza boni ekomemeke zemi, oyebi mpe mokolo na ngonga nini ekobotaka ?

39:3  Yango ikokumbama mpo ya kobimisa bana, mpe ntango kobota esili, mpasi mpe esili ;

39:4  bana bakolenda mpe bakokola noki, na nsima bakei mpe bakozongela mama wa bango lisusu te.

39:5  Nani apesaki mpunda ya zamba bonsomi ? Nani akataki nsinga ya mpunda ya esobe ?

39:6  Ngai nalakisaki yango eliki efanda kuna na mpe mabelé mazali mongwa mongwa.

39:7  Ekopanganaka na makeléle ma mboka ya bato te, mpe ekoyokaka lolaka la mokengeli te.

39:8  Ekotambolaka o ngomba mpo ya koluka matiti, ezwa ata mwa matiti mabesu mpo elia.

39:9  Mpakasa ekondima nde kosalela yo mosala ? Na butu ekoya kolala o ndako ya ngombe ya yo ?

39:10  Okoki kokanga yango esala mosala mwa bilanga ? Okondimisa yango epasola to enika mabelé ?

39:11  Okoki kotia motema na bokasi bonene bwa yango ? Okotikela yango mosala mwa yo mwa mpasi ?

39:12  Ekokumbela yo nde mbuma ya mampa ma bilanga, ekosalisa yo kokotisa yango o bibombelo ?

39:13  Maligbanga ekoningisaka mapapu na lipombo, kasi ezali na nsala kitoko te lokola nkongi na engondo.

39:14  Awa eboti maki, ekotika mango o mabelé, zelo eyokisa mango molunge mouti na moi.

39:15  Ekobosana ’te bakoki konyata mango na makolo, mpe nyama ya zamba ekoki koboma mango.

39:16  Ekoyokelaka bana mawa te lokola eyebi bango te, ekoyoka motema mpasi te ata mosala mwa yango mokei mpamba.

39:17  Loba ’te Nzambe apimi yango mayele, apesi yango ata ndambo ya mayele te.

39:18  Nzokande soko etelemi likolo mpo ’te ekima, ekotala farasa na motambwisi wa yango se mpamba.

39:19  Yo moto okopesaka farasa bokasi, mpe nsuki ilai o nkingo ?

39:20  Yo moto okopimbwisaka yango lokola lipalela ? Ebandi yango kolela, bato banso bakomi kobanga.

39:21  Ekosepela makasi ma yango, ekobete mabelé na makolo, mpe ekokende se liboso o etumba.

39:22  Ekoyoka nsomo te, ekobanga likambo te, ekokima likama lya kokufa na mopanga te.

39:23  Emeseni na makeléle ma libenga lya makula mpe na likongo lya mobuni lingengi na moi.

39:24  Motema likolo ekopotaka mbangu. Soko babeti mondule, bakoki kokanga yango lisusu te.

39:25  Mbala inso mondule moleli, ekoloba : Iyee ! Ata bitumba bizali naino mosika, esili eyebi, eyoki mingongo mya bakambi babimisi migango mya etumba.

39:26  Yo nde opesaki kombekombe nsala ya yango, okofungolaka mapapu ma yango mpo ekende o Sudi ?

39:27  Yo nde okotinda mpongo etinda mpo ebuta o likolo, mpo etonga zumbu lya yango o nsonge ya ngomba ?

39:28  Ezali na esika ya kolala wana, o nsonge ya libanga lilai, esika moto akoki kokoma te.

39:29  Kuna ezali koluka koboma nyama, miso ma yango makomonoko eloko ya kolia mosika.

39:30  Bana ba yango bakolete makila, ezali bipai binso bibembe bilali.