CopSahBible2 - Epistle of Jeremiah - 1

1:1  ⲉⲧⲃⲉ ⲛⲉⲧⲛⲛⲟⲃⲉ ⲉⲛⲧⲁⲧⲉⲧⲛⲁⲁⲩ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲉⲩⲛⲁϫⲓⲧⲏⲩⲧⲛ ⲉⲧⲉⲧⲛⲟ ⲛⲁⲓⲭⲙⲁⲗⲱⲧⲟⲥ ⲉϩⲣⲁⲓ ⲉⲧⲃⲁⲃⲩⲗⲱⲛ ⲉⲃⲟⲗ ϩⲓⲧⲟⲟⲧϥ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ

1:2  ⲉⲧⲉⲧⲛϣⲁⲛⲃⲱⲕ ϭⲉ ⲉϩⲟⲩⲛ ⲉⲧⲃⲁⲃⲩⲗⲱⲛ ⲧⲉⲧⲛⲛⲁⲉⲓⲣⲉ ⲛϩⲉⲛⲣⲟⲙⲡⲉ ⲉⲛⲁϣⲱⲟⲩ ϩⲙ ⲡⲙⲁ ⲉⲧⲙⲙⲁⲩ ⲙⲛ ⲟⲩⲛⲟϭ ⲛⲟⲩⲟⲉⲓϣ ϣⲁϩⲣⲁⲓ ⲉⲥⲁϣϥ ⲛϫⲱⲙ ⲙⲛⲛⲥⲁ ⲛⲁⲓ ⲇⲉ ϯⲛⲁⲛⲧⲏⲩⲧⲛ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ϩⲛ ⲟⲩⲉⲓⲣⲏⲛⲏ

1:3  ⲧⲉⲛⲟⲩ ϭⲉ ⲧⲉⲧⲛⲁⲛⲁⲩ ϩⲛ ⲧⲃⲁⲃⲩⲗⲱⲛ ⲉϩⲉⲛⲛⲟⲩⲧⲉ ⲛϩⲁⲧ ⲙⲛ ϩⲉⲛⲛⲟⲩⲃ ⲙⲛ ϩⲉⲛϣⲉ ⲉⲩⲧⲁⲗⲟ ⲙⲙⲟⲟⲩ ⲉϫⲱⲟⲩ ⲁⲩⲱ ⲉⲩϯϩⲟⲧⲉ ⲛⲛϩⲉⲑⲛⲟⲥ

1:4  ⲛⲧⲱⲧⲛ ϭⲉ ϯϩⲧⲏⲧⲛ ⲉⲣⲱⲧⲛ ⲉⲧⲙϫⲓ ⲙⲡⲉⲥⲙⲟⲧ ⲛⲛϩⲉⲑⲛⲟⲥ ⲉⲣϩⲟⲧⲉ ϩⲏⲧⲟⲩ ⲛⲧⲉ ⲟⲩϩⲟⲧⲉ ϫⲓⲧⲏⲩⲧⲛ ⲉⲧⲃⲏⲧⲟⲩ

1:5  ϩⲙ ⲡⲧⲣⲉⲧⲛⲛⲁⲩ ⲉⲩⲙⲏⲏϣⲉ ϩⲓ ϩⲏ ⲙⲙⲟⲟⲩ ⲁⲩⲱ ⲉⲩⲟⲩⲏϩ ⲛⲥⲱⲟⲩ ⲉⲩⲟⲩⲱϣⲧ ⲛⲁⲩ ⲛⲧⲱⲧⲛ ⲇⲉ ⲁϫⲓⲥ ϩⲙ ⲡⲉⲧⲛϩⲏⲧ ⲛⲧⲟⲕ ⲡⲉ ⲡϫⲟⲉⲓⲥ ⲡⲉⲧⲉϣϣⲉ ⲉⲟⲩⲱϣⲧ ⲛⲁⲕ ⲙⲁⲩⲁⲁⲕ

1:6  ⲡⲁⲁⲅⲅⲉⲗⲟⲥ ⲅⲁⲣ ϥⲛⲁϣⲱⲡⲉ ⲛⲙⲙⲏⲧⲛ ⲛⲧⲟϥ ⲡⲉⲧⲛⲁⲕⲱⲧⲉ ⲛⲥⲁ ⲛⲉⲧⲙⲯⲩⲭⲏ

1:7  ⲡⲗⲁⲥ ⲅⲁⲣ ⲛⲛⲉⲩⲛⲟⲩⲧⲉ ⲟⲩϩⲁⲙϣⲉ ⲡⲉⲛⲧⲁϥϩⲱⲕ ⲙⲙⲟϥ ⲁⲩⲱ ⲛⲧⲟⲟⲩ ⲉⲩϭⲟⲟⲗⲉ ⲛⲛⲟⲩⲃ ϩⲓ ϩⲁⲧ ⲉⲛⲉϩϭⲟⲗ ⲛⲉ ⲉⲛⲥⲉⲛⲁϣ ϣⲁϫⲉ ⲁⲛ

1:8  ⲁⲩⲱ ⲛⲑⲉ ⲛⲟⲩⲡⲁⲣⲑⲉⲛⲟⲥ ⲉⲩⲙⲁⲓ ⲉⲧⲥⲁⲛⲟⲥ ⲧⲉ ⲥⲉϫⲓⲛⲟⲩⲃ

1:9  ⲁⲩⲱ ⲥⲉⲙⲟⲩⲛⲅ ⲛϩⲉⲛⲕⲗⲟⲙ ⲥⲉⲕⲱ ⲙⲙⲟⲟⲩ ⲉϫⲛ ⲛⲁⲡⲏⲩⲉ ⲛⲛⲉⲩⲛⲟⲩⲧⲉ ϣⲁⲣⲉⲥⲟⲡ ⲇⲉ ⲟⲛ ϣⲱⲡⲉ ⲛⲧⲉ ⲛⲟⲩⲏⲏⲃ ϥⲓ ⲛⲛⲟⲩⲃ ϩⲓ ϩⲁⲧ ⲛⲥⲉϫⲟⲟⲩ ⲉⲃⲟⲗ ⲉⲣⲟⲟⲩ ⲉⲃⲟⲗ ϩⲛ ⲛⲉⲩⲛⲟⲩⲧⲉ

1:10  ϣⲁⲩϯ ⲇⲉ ⲟⲛ ⲉⲃⲟⲗ ⲛϩⲏⲧⲟⲩ ⲛⲛⲕⲉⲡⲟⲣⲛⲏ ⲉⲧϩⲓⲣⲙ ⲡⲙⲁ ⲉⲧⲥⲟⲟϥ ⲥⲉⲕⲟⲥⲙⲓ ⲇⲉ ⲟⲛ ⲛⲛⲉⲩⲛⲟⲩⲧⲉ ⲛⲑⲉ ⲛⲣⲣⲱⲙⲉ ϩⲛ ϩⲉⲛϩⲟⲉⲓⲧⲉ ⲉϩⲉⲛⲛⲟⲩⲧⲉ ⲛⲉ ⲛϩⲁⲧ ϩⲓ ⲛⲟⲩⲃ ϩⲓ ϣⲉ

1:11  ⲛⲁⲓ ⲇⲉ ⲙⲉⲩⲣⲃⲟⲗ ⲉϣⲏⲃⲉ ϩⲓϫⲟⲟⲗⲉⲥ ⲉϣⲁⲩϭⲟⲗⲟⲩ ⲇⲉ ⲛϩⲉⲛϩⲟⲉⲓⲧⲉ ⲛϫⲏϭⲉ

1:12  ϣⲁⲩϥⲱⲧⲉ ⲉⲃⲟⲗ ⲙⲡⲉⲩϩⲟ ⲉⲧⲃⲉ ⲡϣⲟⲉⲓϣ ⲙⲡⲏⲓ ⲉⲛⲧⲁϥⲗⲱϫϭ ⲉⲣⲟⲟⲩ ⲉⲛⲁϣⲱⲟⲩ ⲉϩⲣⲁⲓ ⲉϫⲱⲟⲩ

1:13  ⲁⲩⲱ ϣⲁⲕϩⲉ ⲉⲩϭⲉⲣⲱⲃ ⲛⲛⲟⲩⲃ ⲛⲧⲟⲟⲧⲟⲩ ⲛⲑⲉ ⲛⲟⲩⲣⲱⲙⲉ ⲉϥⲟ ⲛⲕⲣⲓⲧⲏⲥ ⲉⲩⲭⲱⲣⲁ ⲛⲉⲧⲣⲛⲟⲃⲉ ⲉⲣⲟⲟⲩ ⲙⲁⲩϣ ⲙⲟⲟⲩⲧⲟⲩ

1:14  ϣⲁⲩϭⲛⲟⲩⲥⲏϥⲉ ⲇⲉ ⲟⲛ ⲛⲧⲟⲟⲧⲟⲩ ϩⲛ ⲧⲉⲩⲟⲩⲛⲁⲙ ⲙⲛ ⲟⲩⲕⲉⲗⲉⲃⲓⲛ ⲛⲧⲟⲟⲩ ⲇⲉ ⲙⲉⲩϣⲛⲁϩⲙⲟⲩ ⲣⲱ ⲉⲩⲡⲟⲗⲉⲙⲟⲥ ⲁⲩⲱ ⲉⲛⲥⲟⲟⲛⲉ ⲉⲧⲃⲉ ⲡⲁⲓ ϭⲉ ⲥⲉⲟⲩⲟⲛϩ ⲉⲃⲟⲗ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲙⲡⲣⲣϩⲟⲧⲉ ϩⲏⲧⲟⲩ

1:15  ⲛⲑⲉ ⲅⲁⲣ ⲙⲡⲉϩⲛⲁⲩ ⲛⲟⲩⲣⲱⲙⲉ ⲉϥϣⲁⲛⲟⲩⲱϭⲡ ⲉⲙⲉϥⲣϣⲁⲩ ⲉⲗⲁⲁⲩ

1:16  ⲧⲁⲓ ⲧⲉ ⲑⲉ ⲙⲡⲉⲥⲙⲟⲧ ⲛⲛⲉⲩⲛⲟⲩⲧⲉ ⲁⲩⲱ ⲉⲩⲕⲏ ⲉϩⲣⲁⲓ ϩⲛ ⲛⲉⲩⲏⲓ ⲛⲉⲩⲃⲁⲗ ⲥⲉⲙⲉϩ ⲛϣⲟⲉⲓϣ ⲉϣⲁϥⲁⲗⲉ ⲉⲣⲟⲟⲩ ⲉⲃⲟⲗ ϩⲛ ⲛⲉⲩⲟⲩⲉⲣⲏⲧⲉ ⲛⲛⲉⲧⲉ ϣⲁⲩⲃⲱⲕ ⲉϩⲟⲩⲛ ϣⲁⲣⲟⲟⲩ

1:17  ⲁⲩⲱ ⲛⲑⲉ ⲛⲟⲩⲣⲱⲙⲉ ⲉⲁϥⲣⲛⲟⲃⲉ ⲉⲩⲣⲣⲟ ⲉϣⲁϥⲱⲣϫ ⲉⲣⲱϥ ⲛⲛⲉϥⲙⲁ ⲛϣⲱⲡⲉ ⲉϥⲣϩⲟⲧⲉ ϩⲏⲧϥ ⲙⲡⲙⲟⲩ ⲧⲁⲓ ⲧⲉ ⲑⲉ ⲉϣⲁⲣⲉ ⲛⲟⲩⲏⲏⲃ ⲱⲣϫ ⲉⲣⲱⲟⲩ ⲛⲛⲉⲩⲏⲓ ⲛϩⲉⲛⲣⲟ ⲙⲛ ϩⲉⲛⲕⲗⲗⲉ ⲙⲛ ϩⲉⲛⲙⲟⲭⲗⲟⲥ ϫⲉⲕⲁⲁⲥ ⲛⲛⲉⲛⲥⲟⲟⲛⲉ ⲥⲩⲗⲁ ⲙⲙⲟⲟⲩ

1:18  ⲥⲉϫⲉⲣⲟ ⲛϩⲉⲛϩⲏⲃⲥ ⲉⲛⲁϣⲱⲟⲩ ⲉⲛⲉⲩⲛⲟⲩⲧⲉ ⲉϩⲟⲩⲟ ⲉⲛⲉⲧⲟⲩϫⲉⲣⲟ ⲙⲙⲟⲟⲩ ⲉⲣⲟⲟⲩ ⲛⲥⲉⲛⲁϣ ⲛⲁⲩ ⲉⲗⲁⲁⲩ ⲁⲛ ⲛϩⲏⲧⲟⲩ

1:19  ⲥⲉⲟ ⲙⲉⲛ ⲛⲑⲉ ⲙⲡⲉⲥⲙⲟⲧ ⲛⲟⲩⲥⲟⲓ ⲛⲛⲉⲧⲟⲩⲏϩ ϩⲁ ⲡⲏⲓ ϣⲁⲩⲗⲱϫϩ ⲛⲥⲁ ⲛⲉⲩϩⲏⲧ ⲙⲙⲓⲛⲉ ⲛⲑⲉ ⲉⲧⲟⲩϫⲱ ⲙⲙⲟⲥ ⲉⲣⲉⲛϫⲁⲧϥⲉ ⲙⲡⲕⲁϩ ⲟⲩⲱⲙ ⲛⲥⲱⲟⲩ ⲙⲛ ⲛⲉⲩⲕⲉϩⲟⲉⲓⲧⲉ ⲁⲩⲱ ⲙⲉⲩⲁⲓⲥⲑⲁⲛⲉ

1:20  ⲉⲣⲉϣⲁⲛⲛⲉⲩϩⲟ ⲕⲣⲟⲙⲣⲙ ⲉⲃⲟⲗ ϩⲙ ⲡⲕⲁⲡⲛⲟⲥ ⲙⲡⲏⲓ

1:21  ⲛⲕⲉϭⲓⲛϭⲗⲱ ⲙⲛ ⲛⲃⲏⲛⲉ ⲙⲛ ⲛϩⲁⲗⲁⲧⲉ ⲙⲛ ⲛⲕⲉⲉⲙⲟⲩ ⲉϣⲁⲩⲟⲩⲱϩ ⲉϫⲙ ⲡⲉⲩⲥⲱⲙⲁ ⲙⲛ ⲡⲉⲩⲁⲡⲉ

1:22  ⲉⲧⲃⲉ ⲡⲁⲓ ϭⲉ ⲧⲉⲧⲛⲛⲁⲉⲓⲙⲉ ⲉⲣⲟⲟⲩ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲙⲡⲣⲣϩⲟⲧⲉ ϭⲉ ϩⲏⲧⲟⲩ

1:23  ⲡⲛⲟⲩⲃ ⲅⲁⲣ ⲉⲧⲟⲩϭⲟⲟⲗⲉ ⲙⲙⲟϥ ⲉⲩⲥⲁ ⲛⲁⲩ ⲉⲩⲧⲙϥⲱⲧⲉ ⲉⲃⲟⲗ ⲙⲡⲉϥϣⲏⲃⲉ ⲉⲙⲉⲩϯⲥⲁ ϩⲁⲣⲟⲟⲩ ⲙⲡⲉⲟⲩⲟⲉⲓϣ ⲅⲁⲣ ⲉⲩⲟⲩⲱⲧϩ ⲙⲙⲟⲟⲩ ⲙⲉⲩⲁⲓⲥⲑⲁⲛⲉ

1:24  ⲉⲁⲩϣⲟⲡⲟⲩ ϩⲁ ϩⲟⲙⲧ ⲛⲓⲙ ⲉⲙⲛ ϣⲟⲟⲡ ⲛϩⲏⲧⲟⲩ

1:25  ⲉⲩⲉⲓⲛⲉ ⲙⲙⲟⲟⲩ ⲉⲃⲟⲗ ⲉⲩϥⲓ ⲙⲙⲟⲟⲩ ϩⲓ ⲛⲉⲩⲛⲁϩⲃ ⲉⲙⲛⲟⲩⲉⲣⲏⲧⲉ ⲙⲙⲟⲟⲩ ⲉⲙⲟⲟϣⲉ ⲉⲩⲟⲩⲱⲛϩ ⲙⲡⲉⲩⲥⲱϣ ⲉⲃⲟⲗ ⲛⲛⲣⲱⲙⲉ ⲛⲉⲧϣⲙϣⲉ ⲇⲉ ⲙⲙⲟⲟⲩ ϣⲁⲩϣⲓⲡⲉ

1:26  ⲙⲏⲡⲱⲥ ⲛⲥⲉϩⲉ ⲛⲧⲟⲟⲧⲟⲩ ⲉϫⲙ ⲡⲕⲁϩ ⲛⲥⲉⲛⲁϣ ⲧⲱⲟⲩⲛ ⲁⲛ ϩⲁⲣⲟⲟⲩ ⲙⲁⲩⲁⲁⲩ ⲉⲣϣⲁⲛⲣⲱⲙⲉ ⲟⲛ ⲧⲁϩⲟⲟⲩ ⲉϩⲣⲁⲓ ⲛⲥⲉⲛⲁϣⲕⲓⲙ ⲁⲛ ⲙⲁⲩⲁⲁⲩ ⲉⲩϣⲁⲛⲣⲓⲕⲉ ⲇⲉ ⲟⲛ ⲉⲃⲟⲗ ⲉϩⲉ ⲙⲉⲩϣⲥⲁϩⲱⲟⲩ ⲁⲗⲗⲁ ϣⲁⲩⲕⲱ ϩⲁⲣⲱⲟⲩ ⲛⲛⲇⲱⲣⲟⲛ ⲛⲑⲉ ⲛⲛⲉⲧⲙⲟⲟⲩⲧ

1:27  ⲛⲉⲩⲑⲩⲥⲓⲁ ⲇⲉ ϣⲁⲣⲉⲛⲟⲩⲏⲏⲃ ⲡⲟϣⲟⲩ ⲉϫⲱⲟⲩ ϩⲟⲙⲟⲓⲱⲥ ⲇⲉ ⲛⲉⲩⲕⲉϩⲓⲟⲙⲉ ϣⲁⲩⲙⲟⲩⲗϩ ⲛϩⲏⲧⲟⲩ ⲛⲥⲉⲧⲙϯⲗⲁⲁⲩ ⲙⲙⲟⲟⲩ ⲛⲟⲩϩⲏⲕⲉ ⲙⲛ ⲟⲩϭⲱⲃ

1:28  ϣⲁⲩϫⲱϩⲙ ⲛⲙⲙⲁⲩ ⲉⲧⲉⲧⲛⲏϩ ⲉⲃⲟⲗ ⲙⲛ ⲛⲧⲛⲧⲉⲧⲟ ⲛⲙⲏⲥⲉ ⲉⲁⲧⲉⲧⲛⲉⲓⲙⲉ ϭⲉ ⲉⲃⲟⲗ ϩⲛ ⲛⲁⲓ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲙⲡⲣⲣϩⲟⲧⲉ ϩⲏⲧⲟⲩ

1:29  ⲉⲩⲛⲁϣ ⲙⲟⲩⲧⲉ ⲅⲁⲣ ⲉⲣⲟⲟⲩ ⲛⲁϣ ⲛϩⲉ ϫⲉ ⲛⲟⲩⲧⲉ ϫⲉ ϩⲉⲛϩⲓⲟⲙⲉ ⲛⲉⲧⲕⲱ ϩⲁⲣⲱⲟⲩ ⲛⲛⲉⲩⲛⲟⲩⲧⲉ ⲛϩⲁⲧ ⲙⲛ ⲛⲛⲟⲩⲃ ⲙⲛ ⲛϣⲉ ⲛⲛⲉⲩⲑⲩⲥⲓⲁ

1:30  ⲁⲩⲱ ⲛⲉⲩⲟⲩⲏⲏⲃ ⲥⲉϩⲙⲟⲟⲥ ⲉϩⲟⲩⲛ ϩⲛ ⲛⲉⲩⲏⲓ ⲉⲣⲉⲛⲉⲩϩⲟⲉⲓⲧⲉ ⲡⲏϩ ϩⲓⲱⲟⲩ ⲁⲩⲱ ⲛⲉⲩⲁⲡⲏⲟⲩⲉ ⲙⲛⲛⲉⲩⲙⲟⲣⲧ ⲉⲩϩⲟⲟⲕⲉ ⲛⲁⲓ ⲉⲣⲉⲛⲉⲩⲁⲡⲏⲟⲩⲉ ϭⲟⲗⲡ ⲉⲃⲟⲗ

1:31  ⲥⲉⲱϣ ⲇⲉ ⲉⲃⲟⲗ ⲙⲡⲉⲙⲧⲟ ⲉⲃⲟⲗ ⲛⲛⲉⲩⲛⲟⲩⲧⲉ ⲛⲑⲉ ⲛϩⲟⲉⲓⲛⲉ ⲉⲩϣⲟⲟⲡ ϩⲛ ⲟⲩϩⲁⲡ ⲛⲕⲱⲱⲥ

1:32  ⲛⲟⲩⲏⲏⲃ ⲇⲉ ϣⲁⲩϥⲓ ⲉⲃⲟⲗ ϩⲛ ⲛⲉⲩϩⲟⲉⲓⲧⲉ ⲛⲥⲉϯ ϩⲓⲱⲟⲩ ⲛⲛⲉⲩϩⲓⲟⲙⲉ ⲙⲛ ⲛⲉⲩϣⲏⲣⲉ

1:33  ⲉⲣⲉϣⲁⲛ ⲟⲩⲁ ⲇⲉ ⲟⲛ ⲣⲟⲩⲡⲉⲑⲟⲟⲩ ⲛⲁⲩ ⲏ ⲟⲩⲡⲉⲧⲛⲁⲛⲟⲩϥ ⲙⲉⲩϣⲧⲱⲱⲃⲉ ⲛⲁϥ ⲙⲁⲩϣⲕⲁⲑⲓⲥⲧⲁ ⲟⲛ ⲛⲟⲩⲣⲣⲟ ⲟⲩⲇⲉ ⲙⲉⲩⲉϣⲡⲟⲟⲛⲉϥ

1:34  ϩⲟⲙⲟⲓⲱⲥ ⲇⲉ ⲙⲉⲩϣϯ ⲛⲟⲩⲙⲛⲧⲣⲙⲙⲁⲟ ⲟⲩⲧⲉ ϩⲁⲧ ⲉⲣϣⲁⲛⲟⲩⲁ ⲇⲉ ⲟⲛ ⲉⲣⲏⲧ ⲛⲁⲩ ⲛⲟⲩⲉⲣⲏⲧ ⲛϥⲧⲙⲧⲁⲁϥ ⲙⲉⲩⲕⲱⲧⲉ ⲛⲥⲱϥ

1:35  ⲟⲩⲇⲉ ⲛⲥⲉⲛⲁϣ ⲛⲁϩⲙⲣⲱⲙⲉ ⲁⲛ ⲉⲧⲟⲟⲧϥ ⲙⲡⲙⲟⲩ ⲟⲩϩⲏⲕⲉ ⲛⲥⲉⲛⲁϣ ⲧⲟⲕⲙⲉϥ ⲁⲛ ⲉⲃⲟⲗ ϩⲛ ⲧⲟⲟⲧϥ ⲙⲡϫⲱⲱⲣⲉ ⲉⲣⲟϥ

1:36  ⲟⲩⲣⲱⲙⲉ ⲛⲃⲗⲗⲉ ⲛⲥⲉⲛⲁϣ ⲧⲣⲉϥⲛⲁⲩ ⲉⲃⲟⲗ ⲁⲛ ⲁⲩⲱ ⲟⲩⲁ ⲉϥϩⲛⲟⲩϩⲱϣ ⲛⲥⲉⲛⲁϣ ϯⲧⲟⲟⲧϥ ⲁⲛ

1:37  ⲟⲩⲭⲏⲣⲁ ⲛⲥⲉⲛⲁϣⲛⲁ ⲛⲁⲥ ⲁⲛ ⲟⲩⲇⲉ ⲛⲥⲉⲛⲁϣⲣⲟⲩⲡⲉⲧⲛⲁⲛⲟⲩϥ ⲁⲛ ⲛⲟⲩⲟⲣⲫⲁⲛⲟⲥ

1:38  ⲛⲉⲩⲛⲟⲩⲧⲉ ⲛϣⲉ ⲙⲛ ⲛⲛⲟⲩⲃ ⲙⲛ ⲛϩⲁⲧ ⲉⲩⲧⲛⲧⲱⲛ ⲉⲛⲱⲛⲉ ⲉⲧⲟⲩϥⲓ ⲙⲙⲟⲟⲩ ⲉⲃⲟⲗ ⲙⲡⲧⲟⲟⲩ ⲉⲧⲃⲉ ⲡⲁⲓ ⲛⲉⲧϣⲙϣⲉ ⲙⲙⲟⲟⲩ ⲥⲉⲛⲁϫⲓ ϣⲓⲡⲉ ⲉϫⲱⲟⲩ

1:39  ⲉⲩⲛⲁϣⲙⲉⲉⲩⲉ ⲉⲣⲟⲟⲩ ⲏ ⲉⲩⲛⲁϣ ⲙⲟⲩⲧⲉ ϭⲉ ⲉⲣⲟⲟⲩ ⲛⲁϣ ⲛϩⲉ ϫⲉ ⲛⲟⲩⲧⲉ

1:40  ⲛⲕⲉⲭⲁⲗⲇⲁⲓⲟⲥ ϩⲱⲟⲩ ⲉⲩⲥⲱϣ ⲙⲙⲟⲟⲩ ⲉⲣϣⲁⲛⲟⲩⲥⲟⲉⲓϥ ⲉⲓ ⲉⲣⲁⲧⲟⲩ ⲉⲛϥϣ ϣⲁϫⲉ ⲁⲛ ϣⲁⲩⲁⲝⲓⲟⲩ ⲛⲃⲏⲗ ⲉⲩⲱϣ ⲉϩⲣⲁⲓ ⲉⲣⲟϥ ⲉⲧⲣⲉϥⲧⲁⲗϭⲟⲟⲩ ⲉⲩϫⲱ ⲙⲙⲟⲥ ϫⲉ ⲟⲩⲛϭⲟⲙ ⲙⲙⲟϥ ⲉⲁⲓⲥⲑⲁⲛⲉ

1:41  ⲉⲙⲉϥⲁⲓⲥⲑⲁⲛⲉ ⲉϣⲁⲩⲃⲱⲕ ⲛⲥⲉⲕⲁⲁⲩ ⲙⲛⲁⲓⲥⲑⲏⲥⲓⲥ ⲅⲁⲣ ⲛϩⲏⲧⲟⲩ

1:42  ⲛⲉϩⲓⲟⲙⲉ ⲇⲉ ϣⲁⲩⲙⲟⲣⲟⲩ ⲛϩⲉⲛⲛⲟⲩϩ ⲛⲥⲉϩⲙⲟⲟⲥ ϩⲛ ⲛⲉϩⲓⲟⲟⲩⲉ ⲉⲩϯ ⲉϩⲣⲁⲓ ⲛⲛⲧⲁⲗⲟ ⲛⲛⲁⲡⲣⲉ ⲉⲛⲧⲁⲩⲟϣⲙⲟⲩ

1:43  ⲉⲣⲉϣⲁⲛⲟⲩⲁ ⲇⲉ ⲉⲛⲛⲉⲧⲡⲁⲣⲁⲅⲉ ⲥⲉⲕⲡⲧⲟⲡ ⲛⲟⲩⲉⲓ ⲙⲙⲟⲟⲩ ⲛϥⲛⲕⲟⲧⲕ ⲛⲙⲙⲁⲥ ϣⲁⲥⲛⲉϭⲛⲟϭ ⲧⲉⲥϣⲃⲉⲉⲣ ϫⲉ ⲙⲡⲟⲩⲟⲡⲥ ⲛⲧⲟⲥ ⲛⲧⲉⲥϩⲉ ⲁⲩⲱ ⲡⲉⲥⲛⲟⲩϩ ⲉⲧⲙⲏⲣ ⲙⲙⲟⲥ ⲙⲡⲟⲩⲥⲟⲗⲡϥ

1:44  ϩⲱⲃ ϭⲉ ⲛⲓⲙ ⲉⲧⲟⲩⲉⲓⲣⲉ ⲙⲙⲟⲟⲩ ⲛⲁⲩ ⲙⲛ ⲙⲛⲧⲙⲉ ⲛϩⲏⲧⲟⲩ ⲉⲩⲛⲁϫⲟⲟⲥ ϭⲉ ⲉⲣⲟⲟⲩ ⲛⲁϣ ⲛϩⲉ ⲏ ⲉⲙⲉⲉⲩⲉ ⲣⲱ ⲉⲣⲟⲟⲩ ϫⲉ ϩⲉⲛⲛⲟⲩⲧⲉ ⲛⲉ

1:45  ⲉϩⲉⲛϩⲁⲙϣⲉ ⲙⲛ ϩⲉⲛϩⲁⲩⲛⲟⲩⲃ ⲛⲉⲛⲧⲁⲩⲙⲟⲅⲕⲟⲩ ⲉⲙⲛⲕⲉϩⲱⲃ ⲛⲁϣⲱⲡⲉ ⲛⲥⲁ ⲡⲉⲧⲉⲣⲉⲛⲣⲉϥⲣ ⲉⲓⲟⲡⲉ ⲟⲩⲱϣ ⲉⲧⲣⲉϥϣⲱⲡⲉ

1:46  ⲁⲩⲱ ⲛⲧⲟⲟⲩ ⲛⲉⲧⲙⲟⲩⲛⲅ ⲙⲙⲟⲟⲩ ⲙⲉⲩⲣⲛⲟϭ ⲛⲁϩⲉ

1:47  ⲁⲩⲱ ⲛⲉⲛⲧⲁⲩⲙⲟⲅⲕⲟⲩ ⲉⲩⲛⲁⲙⲟⲩⲛ ⲉⲃⲟⲗ ⲛⲁϣ ⲛϩⲉ ϩⲉⲛϩⲱⲃ ⲅⲁⲣ ⲙⲙⲛⲧⲛⲟⲩϫ ⲛⲉ ⲙⲛ ϩⲉⲛⲛⲟϭⲛⲉϭ ⲛⲉⲛⲧⲁⲩⲕⲁⲁⲩ ⲛⲛⲉⲧⲛⲁϣⲱⲡⲉ

1:48  ⲉⲣⲉϣⲁⲛ ⲟⲩⲡⲟⲗⲉⲙⲟⲥ ⲅⲁⲣ ⲉⲓ ⲉϩⲣⲁⲓ ⲉϫⲱⲟⲩ ⲙⲛ ϩⲉⲛⲡⲉⲑⲟⲟⲩ ϣⲁⲩϣⲟϫⲛⲉ ⲛϭⲓ ⲛⲟⲩⲏⲏⲃ ⲙⲛ ⲛⲉⲩⲉⲣⲏⲩ ϫⲉ ⲉⲩⲛⲁϩⲟⲡⲟⲩ ⲛⲙⲙⲁⲩ ⲛⲁϣ ⲙⲙⲁ

1:49  ⲉⲧⲃⲉ ⲟⲩ ϭⲉ ⲛⲧⲉⲧⲛⲛⲁⲁⲓⲥⲑⲁⲛⲉ ⲁⲛ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲉⲛⲥⲉⲛⲁϣ ⲛⲁϩⲙⲟⲩⲣⲱⲙⲉ ⲁⲛ ⲟⲩⲇⲉ ϩⲉⲛⲕⲟⲟⲩⲉ ⲉⲩⲡⲟⲗⲉⲙⲟⲥ ⲟⲩⲇⲉ ⲉϩⲉⲛϩⲓⲥⲉ

1:50  ϩⲉⲛⲉⲓⲉⲡϣⲉ ⲅⲁⲣ ⲛⲉ ⲙⲛ ϩⲉⲛⲛⲟⲩⲃ ⲁⲩⲱ ⲛϩⲁⲧ ⲛϩⲉⲑⲛⲟⲥ ⲛⲁⲉⲓⲙⲉ ⲉⲣⲟⲟⲩ ⲙⲛⲛⲥⲁ ⲛⲁⲓ ϫⲉ ϩⲉⲛⲙⲛⲧⲣϩⲁⲗ ⲛⲉ ⲛⲕⲉⲣⲣⲱⲟⲩ ⲇⲉ ⲥⲉⲛⲁⲟⲩⲱⲛϩ ⲉⲣⲟⲟⲩ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲁⲗⲗⲁ ϩⲉⲛϩⲱⲃ ⲛϭⲓϫ ⲛⲣⲱⲙⲉ ⲛⲉ ⲙⲛⲗⲁⲁⲩ ⲛϩⲱⲃ ⲛⲛⲟⲩⲧⲉ ⲛϩⲏⲧⲟⲩ

1:51  ⲛⲓⲙ ϭⲉ ⲡⲉⲧⲉⲛϥⲛⲁⲉⲓⲙⲉ ⲉⲣⲟⲟⲩ ⲁⲛ ϫⲉ ϩⲉⲛⲛⲟⲩⲧⲉ ⲁⲛ ⲛⲉ

1:52  ⲟⲩⲣⲣⲟ ⲅⲁⲣ ⲛⲥⲉⲛⲁϣ ϭⲟⲗⲡϥ ⲁⲛ ⲉϫⲛ ⲟⲩⲭⲱⲣⲁ ⲟⲩⲇⲉ ⲛⲥⲉⲛⲁϣ ϯϩⲟⲩⲙⲡⲉ ⲁⲛ ⲛⲣⲣⲱⲙⲉ

1:53  ⲟⲩⲇⲉ ⲛⲥⲉⲛⲁϣ ⲇⲓⲁⲕⲣⲓⲛⲉ ⲁⲛ ⲛⲟⲩϩⲁⲡ ⲟⲩⲇⲉ ⲛⲥⲉⲛⲁϣ ϥⲓ ⲁⲛ ⲙⲙⲁⲩ ⲛⲟⲩϫⲓϭⲟⲛⲥ ⲙⲙⲛϭⲟⲙ ⲅⲁⲣ ⲙⲙⲟⲟⲩ

1:54  ⲉⲩⲟ ⲅⲁⲣ ⲛⲑⲉ ⲛⲛⲓⲁⲃⲟⲟⲕⲉ ⲉⲩⲟⲩⲧⲉ ⲧⲡⲉ ⲙⲛ ⲡⲕⲁϩ ⲕⲁⲓ ⲅⲁⲣ ⲉⲣϣⲁⲛⲟⲩⲕⲱϩⲧ ⲛⲉϩⲥⲉ ϩⲙⲡⲏⲓ ⲛϩⲉⲛⲛⲟⲩⲧⲉ ⲛϣⲉ ⲙⲛ ϩⲉⲛⲛⲟⲩⲧⲉ ⲛⲛⲟⲩⲃ ⲙⲛ ϩⲉⲛϩⲁⲧ ⲛⲉⲩⲟⲩⲏⲏⲃ ⲙⲉⲛ ⲥⲉⲡⲱⲧ ⲉⲡⲥⲁ ⲃⲃⲟⲗ ⲛⲥⲉⲟⲩϫⲁⲓ ⲛⲧⲟⲟⲩ ⲇⲉ ⲛⲉⲩⲛⲟⲩⲧⲉ ⲥⲉⲛⲁϭⲱⲡⲉ ⲛⲥⲉⲣⲱⲭϩ ⲛⲑⲉ ⲛϩⲉⲛⲥⲟⲓ ⲉⲩϫⲡⲏⲟⲩ

1:55  ⲟⲩⲣⲣⲟ ⲁⲩⲱ ⲛⲉⲧϯ ⲛⲙⲙⲁⲩ ⲛⲥⲉⲛⲁϣ ⲁϩⲉⲣⲁⲧⲟⲩ ⲁⲛ ⲉⲣⲟⲟⲩ

1:56  ⲉⲩⲛⲁϫⲟⲟⲥ ϭⲉ ⲉⲣⲟⲟⲩ ⲛⲁϣ ⲛϩⲉ ⲏ ⲉⲙⲉⲉⲩⲉ ⲣⲱ ⲉⲣⲟⲟⲩ ϫⲉ ϩⲉⲛⲛⲟⲩⲧⲉ ⲛⲉ ⲟⲩⲇⲉ ⲛⲥⲉⲛⲁϣ ⲛⲁϩⲙⲟⲩ ⲁⲛ ⲉⲧⲟⲟⲧⲟⲩ ⲛⲛⲣⲉϥϫⲓⲟⲩⲉ ⲙⲛ ⲛⲥⲟⲟⲛⲉ ⲉϩⲉⲛⲛⲟⲩⲧⲉ ⲛⲉ ⲛϣⲉ ϩⲓ ϩⲁⲧ ϩⲓ ⲛⲟⲩⲃ

1:57  ⲛⲉⲧϫⲟⲟⲣⲉ ⲉⲣⲟⲟⲩ ⲉⲩⲛⲁϥⲓ ϩⲓⲱⲟⲩ ⲙⲡⲛⲟⲩⲃ ⲙⲛ ⲫⲁⲧ ⲙⲛ ⲛϩⲟⲉⲓⲧⲉ ⲛⲥⲉⲙⲟⲟϣⲉ ⲉⲩⲛⲧⲟⲟⲧⲟⲩ ⲛⲥⲉⲛⲁϣ ⲃⲟⲏⲑⲓ ⲉⲣⲟⲟⲩ ⲁⲛ

1:58  ϥⲥⲟⲧⲡ ϭⲉ ⲛϭⲓ ⲟⲩⲣⲱⲙⲉ ⲉϥⲛⲁⲟⲩⲱⲛϩ ⲉⲃⲟⲗ ⲛⲧⲉϥⲙⲛⲧϫⲱⲱⲣⲉ ⲁⲩⲱ ⲟⲩϩⲛⲁⲩ ⲛⲭⲣⲏⲥⲓⲙⲟⲛ ⲉϥϩⲛⲟⲩⲏⲓ ⲉϥⲛⲁⲣⲭⲣⲓⲁ ⲙⲙⲟϥ ⲛϭⲓ ⲡⲉⲛⲧⲁϥⲕⲁⲁϥ ⲛⲁϥ ⲡⲁⲣⲁ ⲛⲉⲉⲓⲛⲟⲩⲧⲉ ⲛⲛⲟⲩϫ ⲥⲉⲛⲁⲟⲡϥ ⲟⲛ ⲛϭⲓ ⲟⲩⲣⲟ ϩⲛ ⲟⲩⲏⲓ ⲉϥⲛⲁⲁⲣⲉϩ ⲛⲛⲉⲧⲛϩⲏⲧϥ ⲡⲁⲣⲁ ⲛⲉⲓⲛⲟⲩⲧⲉ ⲛⲛⲟⲩϫ ⲁⲩⲱ ϥⲥⲟⲧⲡ ⲛϭⲓ ⲟⲩⲥⲧⲩⲗⲟⲥ ⲛϣⲉ ϩⲛ ϩⲉⲛⲃⲁⲥⲓⲗⲉⲓⲟⲛ ⲉϩⲟⲩⲉ ⲉⲛⲉⲓⲛⲟⲩⲧⲉ ⲛⲛⲟⲩϫ

1:59  ⲡⲣⲏ ⲅⲁⲣ ⲙⲛ ⲡⲟⲟϩ ⲙⲛ ⲛⲥⲓⲟⲩ ⲉϩⲉⲛⲟⲩⲟⲉⲓⲛ ⲛⲉ ⲉϥϫⲟⲟⲩ ⲙⲙⲟⲟⲩ ⲛϭⲓ ⲡⲉⲛⲧⲁϥⲥⲟⲛⲧⲟⲩ ⲉⲫⲱⲃ ⲉⲧⲟⲩⲛⲁⲁⲁϥ ⲥⲉⲥⲱⲧⲙ ⲛⲥⲱϥ ⲧⲕⲉⲉⲃⲣⲏϭⲉ ⲉⲥϣⲁⲛⲟⲩⲱⲛϩ ⲉⲃⲟⲗ ϣⲁⲥⲟⲩⲱⲛϩ ⲉⲃⲟⲗ ⲕⲁⲗⲱⲥ ⲡⲗⲏⲛ ⲡⲛⲓϥⲉ ⲛⲟⲩⲱⲧ ϣⲁⲥⲛⲓϥⲉ ϩⲛ ⲭⲱⲣⲁ ⲛⲓⲙ

1:61  ⲁⲩⲱ ⲛⲉⲕⲗⲟⲟⲗⲉ ⲉⲣⲉϣⲁⲛⲡⲛⲟⲩⲧⲉ ⲟⲩⲉϩⲥⲁϩⲛⲉ ⲉⲧⲣⲉⲩⲡⲱⲣϣ ⲉⲃⲟⲗ ⲉϫⲛ ⲧⲟⲓⲕⲟⲩⲙⲉⲛⲏ ⲧⲏⲣⲥ ϣⲁⲩϫⲱⲕ ⲉⲃⲟⲗ ⲙⲫⲱⲃ ⲉⲛⲧⲁϥⲟⲩⲉϩⲥⲁϩⲛⲉ ⲙⲙⲟϥ ⲛⲁⲩ

1:62  ⲡⲕⲱϩⲧ ϩⲟⲙⲟⲓⲱⲥ ⲉⲩϣⲁⲛⲧⲛⲛⲟⲟⲩϥ ⲉⲃⲟⲗ ϩⲛ ⲧⲡⲉ ⲉⲣⲱⲭϩ ⲛⲛⲧⲟⲟⲩ ⲙⲛ ⲙⲙⲁ ⲛϣⲏⲛ ϣⲁϥⲉⲓⲣⲉ ⲙⲫⲱⲃ ⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟϥ ⲛⲁϥ ⲛⲁⲓ ⲇⲉ ⲙⲉⲩϣⲱⲣϫ ⲟⲩⲇⲉ ⲛⲥⲉⲧⲙⲧⲛⲧⲛⲛⲉⲩⲥⲙⲟⲧ ⲟⲩⲇⲉ ⲛⲉⲩⲛⲟⲙⲧⲉ

1:63  ⲉⲧⲃⲉ ⲡⲁⲓ ϭⲉ ⲙⲡⲉⲧⲉϣϣⲉ ⲁⲛ ⲉⲙⲉⲉⲩⲉ ⲉⲣⲟⲟⲩ ⲣⲱ ⲟⲩⲇⲉ ⲉⲙⲟⲩⲧⲉ ⲉⲣⲟⲟⲩ ϫⲉ ⲛⲟⲩⲧⲉ ⲉⲙⲛϭⲟⲙ ⲙⲙⲟⲟⲩ ⲉⲕⲣⲓⲛⲉ ⲛⲟⲩϩⲁⲡ ⲟⲩⲇⲉ ⲉⲣⲡⲉⲧⲛⲁⲛⲟⲩϥ ⲛⲛⲣⲱⲙⲉ

1:64  ⲉⲁⲧⲉⲧⲛⲉⲓⲙⲉ ϭⲉ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲙⲡⲣⲣϩⲟⲧⲉ ϩⲏⲧⲟⲩ

1:65  ⲛⲥⲉⲛⲁϣ ⲥⲁϩⲟⲩ ⲅⲁⲣ ⲁⲛ ⲉϩⲉⲛⲉⲣⲣⲱⲟⲩ ⲟⲩⲇⲉ ⲛⲥⲉⲛⲁϣ ⲥⲙⲟⲩ ⲉⲣⲟⲟⲩ ⲁⲛ

1:66  ϩⲉⲛⲙⲁⲉⲓⲛ ⲇⲉ ⲟⲛ ϩⲛ ⲧⲡⲉ ⲛⲥⲉⲛⲁϣ ⲧⲥⲁⲃⲉ ⲛϩⲉⲑⲛⲟⲥ ⲁⲛ ⲉⲣⲟⲟⲩ ⲟⲩⲇⲉ ⲛⲥⲉⲛⲁϣ ⲣⲟⲩⲟⲉⲓⲛ ⲁⲛ ⲛⲑⲉ ⲙⲡⲣⲏ ⲟⲩⲇⲉ ϯⲟⲩⲟⲉⲓⲛ ⲛⲑⲉ ⲙⲡⲟⲟϩ

1:67  ⲛⲉⲑⲏⲣⲓⲟⲛ ⲥⲟⲧⲡ ⲉⲣⲟⲟⲩ ⲛⲁⲓ ⲛⲉⲧϣⲡⲱⲧ ⲉⲩⲥⲕⲉⲡⲏ ⲛⲥⲉϭⲛϩⲏⲩ ⲉⲣⲟⲟⲩ

1:68  ⲥⲉⲟⲩⲱⲛϩ ⲉⲣⲟⲛ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲕⲁⲧⲁ ⲗⲁⲁⲩ ⲛⲥⲙⲟⲧ ⲉⲧⲃⲉ ⲡⲁⲓ ⲙⲡⲣⲣϩⲟⲧⲉ ϩⲏⲧⲟⲩ

1:69  ⲛⲑⲉ ⲅⲁⲣ ⲛⲟⲩⲛⲁϣⲡ ϩⲁⲗⲁⲧⲉ ⲉϥϩⲛⲟⲩⲙⲁ ⲛⲃⲟⲛⲧⲉ ⲉⲙⲉϥⲁⲣⲉϩ ⲉⲗⲁⲁⲩ ⲧⲁⲓ ⲧⲉ ⲑⲉ ⲛⲛⲉⲩⲛⲟⲩⲧⲉ ϩⲉⲛϣⲉ ⲛⲉ ⲙⲛ ϩⲉⲛⲛⲟⲩⲃ ⲙⲛ ϩⲉⲛϩⲁⲧ

1:70  ⲙⲡⲉⲥⲙⲟⲧ ⲟⲛ ⲛⲟⲩϩⲣⲁⲙⲛⲟⲥ ⲉⲥϩⲛⲟⲩϣⲛⲏ ⲧⲁⲓ ⲉϣⲁⲣⲉ ϩⲁⲗⲏⲧ ⲛⲓⲙ ϩⲙⲟⲟⲥ ϩⲓϫⲱⲥ ⲏ ⲛⲑⲉ ⲛⲟⲩⲣⲉϥⲙⲟⲟⲩⲧ ⲉϥⲛⲏϫ ϩⲙ ⲡⲕⲁⲕⲉ ⲧⲁⲓ ⲧⲉ ⲑⲉ ⲛⲛⲉⲩⲛⲟⲩⲧⲉ ϩⲉⲛϣⲉ ⲛⲉ ⲙⲛ ϩⲉⲛⲛⲟⲩⲃ ⲙⲛ ϩⲉⲛϩⲁⲧ

1:71  ⲉⲃⲟⲗ ⲇⲉ ⲙⲡϫⲏϭⲉ ⲉϣⲁϥⲗⲟϥⲗϥ ⲉⲃⲟⲗ ⲙⲛ ⲡⲙⲁⲣⲙⲁⲣⲟⲛ ⲉϣⲁⲩⲧⲁⲕⲟ ⲉϩⲣⲁⲓ ⲉϫⲱⲟⲩ ⲉⲧⲃⲉ ⲡⲁⲓ ⲧⲉⲧⲛⲁⲉⲓⲙⲉ ⲉⲣⲟⲟⲩ ϫⲉ ϩⲉⲛⲛⲟⲩⲧⲉ ⲁⲛ ⲛⲉ ⲛⲧⲟⲟⲩ ⲇⲉ ⲥⲉⲛⲁⲟⲩⲟⲙⲟⲩ ⲁⲩⲱ ⲙⲛⲛⲥⲁ ⲛⲁⲓ ⲥⲉⲛⲁϣⲱⲡⲉ ⲛⲟⲩⲛⲟϭⲛⲉϭ ϩⲛ ⲧⲉⲭⲱⲣⲁ

1:72  ϥⲥⲟⲧⲡ ϭⲉ ⲛϭⲓ ⲟⲩⲣⲱⲙⲉ ⲛⲇⲓⲕⲁⲓⲟⲥ ⲟⲩⲣⲱⲙⲉ ⲛⲇⲓⲕⲁⲓⲟⲥ ⲉⲙⲛⲧϥ ⲉⲓⲇⲱⲗⲟⲛ ϥⲛⲁϣⲱⲡⲉ ⲅⲁⲣ ⲉϥⲟⲩⲏⲩ ⲉⲃⲟⲗ ⲛⲟⲩⲛⲟϭⲛⲉϭ