Kapingamarangi - Psalms - 89

89:1  Meenei Dimaadua, au ga-daahili i do aloho dee-odi gaa-hana-hua beelaa. Au ga-hagadele di hai o do manawa-dahi gaa-hana-hua beelaa.

89:2  Au e-iloo bolo do aloho la-deai dono hagaodi ai, gei do manawa-dahi le e-hai-hua beelaa, hagalee hulihuli-loo e-hai gadoo be-di langi.

89:3  Goe gu-helekai, “Au guu-hai dagu hagababa ang-gi dagu dangada ne-hilihili-aga. Au ne-hagababa ang-gi dagu dangada hai-hegau go David boloo,

89:4  ‘Tangada mai i-lodo do madawaawa gaa-hai di king i-nia madagoaa huogodoo. Au ga-madamada humalia do madawaawa-king gi-mau-dangihi gaa-hana-hua beelaa.’ ”

89:5  Meenei Dimaadua, digau o-di langi e-dadaahili i-nia mee haga-goboina ala e-hai Kooe. Digau ala e-dabu e-daahili e-haga-hagaamu do manawa-dahi.

89:6  Meenei Dimaadua, ma deai tangada i-di langi i-nua e-hai be Goe ai. Ma deai tangada di langi e-tungaadahi adu gi-di-Goe ai.

89:7  Tagabuulinga o digau ala e-dabu le e-mmaadagu i-di-Goe, digaula huogodoo e-hagalaamua Goe.

89:8  Meenei Yihowah go di God Koia e-Aamua, ma deai tangada ono mogobuna be Goe ai. Meenei Dimaadua, ma Kooe hua dela e-manawa-dahi-hua i-nia mee huogodoo.

89:9  Ma Kooe dela e-dagi di moana maaloo, gei go Kooe dela e-mee di-hagakila nia beau llauehaa.

89:10  Kooe dela ne-haga-magedaa di manu hagamadagudagu-dangada go Rahab, ga-daaligi a-mee gii-made. Ma Kooe dela ne-haga-magedaa o hagadaumee i oo mahi aamua.

89:11  Di langi i-nua la di mee ni-aau, mo henuailala labelaa. Ma Kooe dela ne-hai henuailala mo ono haga-honu huogodoo.

89:12  Kooe dela ne-hai bahi-i-ngeia mo bahi-i-ngaaga. Di Gonduu Tabor mo-di Gonduu Hermon e-dadaahili mo-di tenetene adu gi-di-Goe.

89:13  E-damanaiee go o mogobuna, gei e-aamua huoloo go oo mahi!

89:14  Do henua e-hagamau gi-di tonu mo-di hai-hegau donu. Di aloho mo-di manawa-dahi e-modongoohia-aga i-nia mee huogodoo ala guu-lawa-ai dau hai.

89:15  E-maluagina go nia daangada ala e-daumaha adu gi-di-Goe gi-nia daahili, ala e-mouli i-di maalama o do dumaalia!

89:16  Digaula e-tenetene mai-loo luada gaa-dae-loo gi-di boo i-di gili do ingoo, ge e-haga-hagaamu do dumaalia damanaiee.

89:17  Goe gu-gaamai gi gimaadou di mogobuna damanaiee bolo gi-aali i-nia madagoaa huogodoo. Ma go do aloho dela ne-hidi-mai-ai gimaadou ga-aali.

89:18  Meenei Dimaadua, ma Kooe dela ne-dugu-mai gi gimaadou di-madau hagaloohi. Go Kooe dela go di God Dabu o Israel dela ne-dugu-mai gi gimaadou di-madau king.

89:19  I-lodo-hua di moe dela adu gi-mua gei Goe gu-helekai gi au gau hai-hegau manawa-dahi boloo, “Au gu-hagamaamaa tangada-dauwa e-dau, gei Au gu-hilihili-aga dagu dangada i-lodo nia daangada, gaa-wanga gi mee dono lohongo-king.

89:20  Au gu-haga-noho-aga dagu dangada hai-hegau go David belee hai di king i dagu hagatulu a-mee gi-di lolo dabuaahia.

89:21  Ogu mahi ga-madalia a-mee i-nia madagoaa huogodoo, gei ogu mogobuna ga-hagamaaloo a-mee.

89:22  Ono hagadaumee ga-deemee-loo di-nadau hai-baahi-anga, gei digau huaidu ga-deemee di-aali i mee.

89:23  Au ga-dagadagahi gi-lala ono hagadaumee, gei e-daaligi gi-daha digau huogodoo ala e-de-hiihai gi mee.

89:24  Au e-aloho i mee, gei e-hagalaamua a-mee, gei Au gaa-hai a-mee gi-aali i ono hagadaumee i-nia madagoaa huogodoo.

89:25  Au ga-haga-damanaiee dono henua, tugi i-di Tai Mediterranean gaa-tugi i-di Monowai Euphrates.

89:26  Gei mee ga-helekai-mai gi-di-Au, ‘Kooe go dogu damana go dogu God. Kooe go dogu hagaloohi mo dogu hagamouli.’

89:27  Gei Au gaa-dugu a-mee bolo dagu dama-madua, dela e-aamua i-nia king huogodoo.

89:28  Gei Au e-dadaahi-hua dagu hagababa dela ne-hai gi mee i-nia madagoaa huogodoo, di hagababa deenei e-hana-hua beelaa, deai dono hagaodi ai.

89:29  Tangada mai i dono madawaawa gaa-hai di king i-nia madagoaa huogodoo, dono henua le e-noho-hua beelaa i-di waalooloo o-di langi i-nua.

89:30  “Gei maa dono madawaawa ga-de-hagalongo gi agu haganoho, gei hagalee daudali agu mee ala ne-haga-noho,

89:31  gei maa digaula ga-haga-balumee-hua agu helekai, ge hagalee hogi e-haga-kila-aga agu haganoho,

89:32  malaa, gei Au ga-hagaduadua digaula i nadau huaidu. Gei Au ga-daaligi digaula i nadau ihala.

89:33  Gei Au hagalee modu dogu aloho i David, be e-haga-hala dagu hagababa dela ne-hai gi mee.

89:34  Au hagalee e-oho dagu hagababa dela ne-hai ang-gi mee, be e-daa dahi mee i-di hagababa dela ne-hai ang-gi mee.

89:35  “Au gu-hagamodu hagadahi i dogu ingoo dabu boloo: Au hagalee-loo e-hai-kai tilikai ang-gi David.

89:36  Dono madawaawa e-hana-hua beelaa i-nia madagoaa huogodoo, gei Au ga-hagaloohi dono henua i-di waalooloo o-di maahina o-di laa.

89:37  Dono lohongo-king gaa-noho mau-hua beelaa be-di malama, dela e-gila-mai hua beelaa i-lala di langi.”

89:38  Meenei God, Goe e-hagawelewele gi dau king dela ne-hilihili-aga, Goe guu-hudu a-mee gi-daha, guu-dugu gi-daha mo Goe.

89:39  Goe gu-oho dau hagababa dela ne-hai ang-gi dau dangada hai-hegau, gei guu-hudu gi-lala dono hau-king gi-lodo di gelegele.

89:40  Goe gu-oho gi-lala di abaaba o dono waahale, gei gu-oho hogi dana gowaa hai-dauwa.

89:41  Digau huogodoo ala ma-ga-hula-laalaa, digaula e-gagaiaa nia goloo a-maa, gei digau ala i dono baahi e-gadagada gi mee.

89:42  Gei Goe guu-dugu ang-gi ono hagadaumee di mogobuna o-di aali, gei guu-hai digaula huogodoo gi-tenetene.

89:43  Ma Kooe dela ne-hai ana goloo-dauwa gi deai ono hadinga ai, gaa-hai a-mee gi-magedaa i-lodo tauwa.

89:44  Gei Goe dela ne-daa dono dogodogo-king, gaa-hudu di lohongo-king o-maa gi-lodo nia gelegele.

89:45  Goe ne-hai a-mee gi-madumadua i-mua dono madagoaa, gaa-dugu-anga di haadanga-balua gi mee.

89:46  Meenei Dimaadua, Goe ga-haga-ngala Goe gaa-hana-hua beelaa? Malaa, e-waalooloo behee go do hagawelewele dela ma-ga-ulaula gadoo be-di ahi?

89:47  Goe gi-langahia di bodobodo o dogu mouli. Goe gi-langahia bolo Goe ne-hai gimaadou nia daangada hua dangada!

89:48  Ma koai dela e-mee di-mouli hagalee made? Ma koai dela e-mee di-bida daa ia gi-daha mo dono daalunga?

89:49  Meenei di-madau Dagi, aahee nia haga-modongoohia namua i-di hai o do aloho? Aahee au hagababa ala ne-hai ang-gi David?

89:50  Goe hudee de-langahia digau ala ne-haganneennee au, go dau dangada hai-hegau, mo dogu manawa-hagakono gi-nia haganneennee huogodoo o digau bouli.

89:51  Meenei Dimaadua, o hagadaumee e-haganneennee dau king dela ne-hilihili-aga! Digaula e-haganneennee a-mee i-nia madagoaa huogodoo ala ma-gaa-hana ginai mee.

89:52  Hagaamuina Dimaadua gaa-hana-hua beelaa! Amen! Amen!