Kapingamarangi - Genesis - 27

27:1  Di madagoaa Isaac ne-madua gei gu-dee-gida, gei mee ga-gahi-mai dana dama-madua go Esau, ga-helekai, “Dagu dama-daane!” Esau ga-helekai, “Deenei au.”

27:2  Isaac ga-helekai, “Goe gu-iloo-hua bolo au gu-madua, gei gu-hoohoo gaa-made.

27:3  Kae-ina dau maalei mo ono daalo, hana gi-lodo henua, puugia dau manu, goweia e-gai ko-au.

27:4  Duna-ina gii-kala gii-hai be dogu hiihai, gaamai gi-di-au. I-muli-hua dogu gai nia maa, gei au gaa-hai-adu gi-di-goe dagu boloagi i-mua dogu made.”

27:5  Di madagoaa-hua Isaac dela e-leelee gi Esau, gei Rebecca e-hagalongo. I-muli-hua Esau dela ne-hana gi-lodo henua,

27:6  gei Rebecca ga-helekai gi Jacob, “Au gu-hagalongo gi do damana e-helekai gi Esau boloo,

27:7  ‘Hana, goweia dau manu, duna-ina mai gi-di-au. I-muli-hua dogu gai di-maa, gei au gaa-hai-adu gi-di-goe dagu boloagi i-mua nia hadumada o Dimaadua i-mua dogu made.’ ”

27:8  Rebecca ga-helekai-adu labelaa, “Dagu dama-daane, hagalongo-mai gi-di-au: Heia agu mee ala ga-hagi-adu gi-di-goe gi-heia.

27:9  Hana gi-baahi nia kuudi, goweia au kuudi pedi e-lua, gaamai gi-di-au, gei au gaa-dunu gii-kala gii-hai be-di hiihai o do damana.

27:10  Gaa-kae kooe gi mee gi-geina, gei mee gaa-hai-adu gi-di-goe dana boloagi i-mua dono made.”

27:11  Jacob ga-helekai gi dono dinana, “Goe e-iloo-hua bolo Esau la tangada huluhulu, gei au la tangada hua malallali dogu gili.

27:12  Dolomaa dogu damana gaa-bili-mai gi-di-au, ga-iloo-ia bolo au e-halahalau ia, gei mee ga-haga-halauwa au, ga-hagalee haga-maluagina au.”

27:13  Tinana o-maa ga-helekai gi mee, “Dagu dama-daane, o haga-halauwa la-gi-lloomoi gi-di-au. Hagalongo-mai-hua gi agu mee ala e-hai-adu, hana goweia nia kuudi gi-di-au.”

27:14  Gei Jacob gaa-hana ga-goweia nia kuudi gi dono dinana, gei dono dinana gaa-dunu nia maa gii-kala huoloo gii-hai be-di hiihai o Isaac.

27:15  Gei Rebecca ga-gaamai nia gahu humalia o Esau ala nogo benebene go mee i-lodo di hale, ga-haga-ulu-ginai Jacob,

27:16  ga-gaamai nia gili kuudi gaa-hii nia lima o-maa mo-di uwa o-maa.

27:17  Rebecca gaa-wanga gi mee taga-ngudu kala huoloo mono palaawaa dulii ala ne-dunu go mee.

27:18  Jacob gaa-hana gaa-kae nia maa gi dono damana, ga-helekai, “Tamana!” Isaac ga-helekai, “Deenei au. Goe go dagu dama-daane behee deenaa?”

27:19  Jacob ga-helekai-anga, “Ko-au go dau dama-daane madua go Esau. Au guu-hai au mee huogodoo ala bolo gi-heia. Nnoinua gii-gai au mee mada-goneiga ala ne-gaamai ko-au belee gai kooe, gi-heia-mai dau boloagi mai gi-di-au.”

27:20  Isaac ga-helekai, “Dagu dama-daane, goe ne-limalima ne-gida dau manu behee?” Jacob ga-helekai, “Dimaadua go doo God ne-hagamaamaa-mai au.”

27:21  Isaac ga-helekai gi Jacob, “Menege-mai-mua gi-bili-adu au gi-di-goe be di-maa e-donu bolo goe go Esau.”

27:22  Jacob ga-menege-adu gi-hoohoo gi dono damana, gei Isaac gaa-bili-adu gi Jacob ga-helekai, “Doo lee le e-hai gadoo be-di lee o Jacob, gei oo lima le e-hai gadoo be nia lima o Esau.”

27:23  Mee digi maanadu-loo bolo ma go Jacob deelaa, idimaa, nia lima o-maa e-huluhulu gadoo be nia lima o Esau. Malaa, Isaac belee haga-maluagina a-mee,

27:24  geia ga-heeu-adu labelaa, “Ma e-donu bolo goe go Esau?” Jacob ga-helekai, “Uaa, ma ko-au deenei.”

27:25  Isaac ga-helekai, “Gaamai-laa nia meegai. I-muli-hua dogu miami, gei au gaa-hai-adu gi-di-goe dagu boloagi.” Jacob ga-gaamai nia meegai gi mee, ga-gaamai labelaa ana waini belee inu go mee.

27:26  Gei tamana o-maa ga-helekai gi mee, “Menege-mai, hongia dogu uhi, dagu dama-daane.”

27:27  Di madagoaa-hua Jacob ne-menege-adu belee hongi-adu a-mee, gei Isaac ga-longono-ia di hauiha kala o-nia gahu o-maa, gei mee gaa-hai ang-gi mee dana boloagi, ga-helekai, “Di hauiha kala o dagu dama-daane le e-kala gadoo be tenua o Dimaadua dela gu-haga-maluagina.

27:28  God gi-dugu-adu gi-di-goe di magalillili o lala di langi, ga-haga-logowaahee nia hagahonu o do henua, ga-dugu-adu gi-di-goe taugai huwa-laagau mono waini.

27:29  Nia henua huogodoo gi-hege-adu gi-di-goe, gei nia daangada gi-pala-adu gi-di-goe, gei goe gaa-dagi do madawaawa, gei nia madawaawa o do dinana gi-pala-adu gi-di-goe. Digau huogodoo ala ma-ga-hagahuaidu goe, ginaadou e-kae di halauwa, gei digau huogodoo ala ma-ga-hagahumalia goe, ginaadou e-kae di haadanga-lamalia.”

27:30  Isaac gaa-lawa-loo dana haga-maluagina a Jacob, gei Jacob ga-hagatanga gaa-hana. Digi duai-hua, gei dono duaahina go Esau gaa-dau i dono haneia i-lodo henua.

27:31  Gaa-dunu dana manu la-gii-kala ga-gaamai gi dono damana, ga-helekai-anga, “Tamana, nnoinua, miami i agu goneiga ala ne-gaamai gi-di-goe, gei goe ga-hai-mai dau boloagi gi-di-au.”

27:32  Isaac ga-heeu-adu, “Goe ko-ai?” Gei mee ga-helekai, “Ko-au go dau dama-daane madua go Esau.”

27:33  Isaac ga-bolebole huoloo dono huaidina hagatau, ga-heeu, “Malaa ko-ai-laa dela ne-daaligi dana manu ga-gaamai gi-di-au? Guu-gai ko-au i-mua-hua do haneia. Gei au guu-wanga gi mee dogu maluagina hagatau, gu-hai-hua di mee ni mee gaa-hana-hua beelaa.”

27:34  Esau ga-iloo-ia bolo ma guu-hai beelaa, geia ga-daamada gaa-dangi, gaa-dangi-loo gi-nua-loo mo-di wawwawe huoloo, mo-di helekai, “Tamana, gaamai labelaa gi-di-au do maluagina!”

27:35  Isaac ga-helekai, “Do duaahina-daane gu-hanimoi gu-halahalau au, guu-kae do maluagina!”

27:36  Esau ga-helekai, “Deenei di holongo lua a-mee ne-halahalau au. Deelaa guu-tau gi dono ingoo go Jacob. Mee guu-kae di mogobuna o tama madua. Dolomeenei gei mee guu-kae dogu maluagina. E-hai behee tamana, goe digi dugua-mai dahi maluagina gi-di-au i-golo?”

27:37  Isaac ga-helekai, “Au guu-hai a-mee e-dagi goe. Au guu-hai ono duaahina huogodoo bolo gii-hai nia hege ni mee. Au guu-wanga gi mee taugai o-nia huwa-laagau mo nia waini, malaa dolomeenei gei au gu-deai dagu mee e-mee di-hai-adu gi-di-goe ai, dagu dama-daane!”

27:38  Esau ga-hagamahi ga-heeu, “Tamana, ma di maluagina hua e-dahi i do baahi? Gaamai labelaa gi-di-au!” mo-di dangi labelaa.

27:39  Isaac ga-helekai gi mee, “Do gowaa dela ga-noho-iei goe, gu-deai di hagahumalia mai i henuailala ai, gei deai hogi di haga-magalillili iha i-di langi ang-gi au gowaa dogi-mee ai.

27:40  Gei goe e-mouli-hua i dau hulumanu-dauwa, gei goe e-hege gi do duaahina-daane. Do madagoaa-hua dela ga-hai-baahi ang-gi do duaahina-daane, gei goe gu-hagalee di hege ni mee.”

27:41  Esau gu-de-hiihai huoloo gi Jacob, idimaa dono damana dela ne-wanga di maluagina gi Jacob, gei mee ga-helekai ang-gi deia boloo, “Tangihangi o-di made o dogu damana la-gu-hoohoo-mai-loo, gei au ga-daaligi Jacob i-di madagoaa deelaa.”

27:42  Rebecca ga-longono-ia nia helekai o Esau, gei mee ga-gahi-mai a Jacob, ga-helekai gi mee, “Do duaahina-daane go Esau la-guu-hai dana helekai bolo ia ga-daaligi goe.

27:43  Deenei-laa, dagu dama-daane, hagalongo-mai gi agu helekai: Goe hana dolomeenei gi-baahi dogu duaahina-daane go Laban i Haran.

27:44  Noho i-baahi o mee gi-hili-loo di hagawelewele o do duaahina-daane,

27:45  gei mee ga-de-langahia-ia dau mee dela ne-hai ang-gi deia. Gei au ga-hagau-adu dagu dangada e-laha-mai goe. Ma e-aha goolua gaa-hula gi-daha mo au i-di laangi hua e-dahi?”

27:46  Rebecca ga-helekai gi Isaac, “Au gu-de-hiihai huoloo gi-nia lodo tuadimee o Esau. Maa nei bolo Jacob e-lodo labelaa gi tei ahina Hittite, malaa e-humalia-hua au gii-made dolomeenei.”