LinVB - Job - 21

21:1  Yob azongiseli bango maloba maye :

21:2  Boyoka ngai mwa moke, bokoki kobondo ngai bongo.

21:3  Botika ngai naloba naino ; soko nasilisi, bokoki koseke ngai.

21:4  Soko nazalaki komilela mpo ya bato, mbele nakokaki kokanga motema lisusu te.

21:5  Yakani kotala ngai mpe bokokamwa, bokozipa minoko mya bino na loboko.

21:6  Ngai moko nazali kobanga soko nakanisi makambo mana, mpe nabandi kolenge nzoto mobimba.

21:7  Mpo nini bato babe batikali na bomoi ? Awa banuni bakobi se kosangisa biloko.

21:8  Bana ba bango bazali kokola o ndako ya bango, bazali komono bankoko ba bango na miso.

21:9  O ndako bafandi na boboto, babangi eloko te, fimbo ya Nzambe ebeti bango te.

21:10  Ngombe babali ya bango ikobotisa basi malamu, ngombe basi ya bango ikosopaka zemi te.

21:11  Bakotika bana ba bango básakana o libanda, batiki bilenge bakende kobina.

21:12  Bayembi nzembo na bobeti mbonda mpe likembe, basepeli mpe babini na bobeti mpiololo.

21:13  Mikolo mya bango mikosuka na esengo mpe bakokita na boboto o mboka ya bawa.

21:14  Nzokande balobaki na Nzambe : « Tika biso, mibeko mya yo misepelisi biso te.

21:15  Mpo nini tosalela Nzambe wa bokasi ? Na bobondeli ye tokozwa eloko nini ? »

21:16  Esengo ya bango ezali o maboko ma bango, ata baboyi kondima Nzambe o makambo ma bango.

21:17  Tozali komono : mwinda mwa bato babe mokozimaka noki te, makambo ma mpasi makokwelaka bango te, nkanda ya Nzambe ekosilisa bango te,

21:18  mompepe mokopimbwisa bango lokola matiti te, ekumbaki ekomeme bango lokola nkasa te ?

21:19  Nzambe akopesaka bana etumbu mpo ya mabe ma tata ? Oyo asali mabe azwa etumbu, ye moko, bongo ayeba !

21:20  Amono na miso ’te makambo ma ye makomi kobeba, ayeba ndenge nkanda ya Nzambe ekozalaka !

21:21  Soko mikolo mya ye misili mikoki, etumbu bana bakozwa ekosala ye nini ?

21:22  Kasi nani akoki kopesa Nzambe mayele, Oyo akosambisa bato ut’o likolo ?

21:23  Mosusu akokufa o ntango azali naino makasi, na motema esengo mpe na boboto ;

21:24  azali se moto monene, na nzoto mafuta, mpe minkuwa mya ye milembi te.

21:25  Mosusu akokufa na mawa o motema, zambi azwaki bolamu mokolo moko te.

21:26  Bango babale bakokundama bobele esika yoko, bakoliama na nkusu motindo se moko.

21:27  E, nayebi makanisi ma bino malamu, solo, nayebi nini bozali kokanisela ngai.

21:28  Bokotuna ngai : « Wapi libota lya mokonzi monene ? Ema ya bato babe esuki boni ? »

21:29  Batunaki bato bakokendeke mibembo te ? Bondimaki masolo ma bango te ?

21:30  O mokolo mwa minyoko moto mabe akobika ; o eleko ya nkanda akozwa esika ya kobombama.

21:31  Nani akopalela ye mpo ya ezalela ya ye ebe ? Nani akomeka kozongisela ye mabe asali ?

21:32  O mokolo mwa liwa lya ye bato bakoya ebele, mpe bakokengele lilita lya ye malamu.

21:33  Akolala na boboto o kati ya mabelé, bato baike basili kokende liboso lya ye, bato ebele bakolanda ye nsima.

21:34  Bongo mpo nini bokoya kobondo ngai ? Biyano bya bino bizali bya lokuta.