LinVB - Job - 36

36:1  Eliu akobi, alobi :

36:2  Kanga motema, nakoyokisa yo makambo masusu Nzambe alingi koyebisa yo.

36:3  Nakokende koluka mayele ma ngai mosika mpo ’te nalongisa Oyo akelaki ngai.

36:4  Solo, monoko mwa ngai mokokosaka te, moto wa bwanya bwa solo azali kosolola na yo.

36:5  Nzambe aleki bokasi, kasi akokinolaka moto wa motema peto te.

36:6  Alingi bato babe baumela na bomoi te, kasi akobatelaka babola.

36:7  Akotalaka moto semba ntango inso, akofandisaka bango o ngwende elongo na bakonzi, akobombela bango esika ya seko ! Kasi soko bakomi na lolendo,

36:8  bakokangema na minyololo mpe na nsinga ikoyokisa bango mpasi.

36:9  Nzambe akopalela bango bongo mpo ya ezalela ya bango mpe akolakisa bango masumu ma bango ma lolendo.

36:10  Akokebisa bango bongo mpo ’te batika mabe ma bango.

36:11  Soko bayoki mpe bandimi kotosa ye, bakosukisa mikolo mya bango na bomengo, mpe mibu mya bango mikosila na nsai.

36:12  Kasi soko bayoki te, bakokufa na mbalakaka, mpo batiaki matoi na ye te.

36:13  Motema libanga bazali se kobomba nkanda mpe basambeli te awa Nzambe akokanga bango na nsinga ;

36:14  bomoi bwa bango bokosila o bolenge, mpe bakokufa noki, na nsoni.

36:15  Kasi akobikisa moto mobola mpo ya bobola bwa ye, na mpasi ayoki, Nzambe azali kokebisa ye.

36:16  Se bongo Nzambe alingi kobikisa yo o mpasi : liboso osepelaki na biloko ndelo te, meza ya yo etondaki na bilei biike bipusi elengi.

36:17  Obangaki kokitisa bato babe mpe kolongisa bana bitike.

36:18  Keba ’te omikosa te na boike bwa biloko mpe na makabo mazangi bosembo !

36:19  Nkita ya yo ebele ekobikisa yo te, wolo ya yo te, makasi ma yo mpe te.

36:20  Otia elikya ya yo te na butu boye, mokolo bato banso ba mokili bakosila.

36:21  Omeka mpe te kolanda bato bazanga bosembo, yango nde ntina ya mpasi ozali koyoka.

36:22  Nzambe aleki binso mpo ya nguya ya ye, mokonzi moko akoki na ye te.

36:23  Nani akolakisa ye nzela eye alanda ? Nani akoki koloba na ye : « Osali mabe ? »

36:24  Yo mpe obosana te kokumisa ye mpo ya bikela bya ye, biye bato banso bakokumisaka na nzembo.

36:25  Bato banso ba nse bakokamwa na mosala mwa ye, ata baye bakozalaka mosika, bakomonoko mwango.

36:26  Solo, Nzambe azali monene, biso toyebi eloko te. Moto moko te akoki kotanga mibu Nzambe akokisi.

36:27  Ye akosangisaka mai ma likolo, mpe akotangisaka mango matanga lokola mbula.

36:28  Mampata ma likolo makotangisaka mango, mpe makosopaka mango o nse mobimba.

36:29  Nani ayebi boniboni mampata makotambolaka ? Nani ayebi boniboni nkake ekobeteke kuna ?

36:30  Akobetisaka nkake likolo lya mampata, mpe akozipaka bozindo bwa mbu enene.

36:31  Akoleisaka bato bongo, mpe akokabelaka bango biloko ebele.

36:32  O maboko ma ye akosimbaka minkalali mpe akotindaka myango o bisika alingi.

36:33  Ntango lokito la nkake loyebisi boyei bwa yango, etonga eyebi ’te ekumbaki ekomi pene.