LinVB - Job - 34

34:1  Eliu akobi koloba :

34:2  Bino bato ba bwanya, boyoka maloba ma ngai, bino bato ba mayele, botia matoi,

34:3  zambi litoi likoyoka elengi ya maloba, lokola edada ekomeka elengi ya bilei.

34:4  Toyokana sikawa nini ezali semba, tomeka koyeba eloko nini ezali malamu.

34:5  Yob alobaki : « Nazali na likambo lyoko te, kasi Nzambe aboyi kondima yango.

34:6  Akosalaka ngai malamu te ; na makula ma ye akozokisaka ngai, ata nasali lisumu te. »

34:7  Epai wapi okozwa moto lokola Yob, oyo ameseni na lofundo lokola moto akomeleke mai ?

34:8  Akotambolaka nzela yoko na bato babe, mpe alingi bobele nzela ya basumuki.

34:9  Alobi : « Koluka boyokani na Nzambe ezali na ntina te. »

34:10  Bongo, bino bato ba mayele, boyoka ngai : Nzambe akosalaka mabe soki te ; Mokonzi wa bokasi azangi bosembo te.

34:11  Akofutaka bato engebene na misala mya bango, akokataka makambo ma bango se na bosembo.

34:12  Ya solo, Nzambe akosalaka mabe moko te, Mokonzi wa bokasi akobongolaka bosembo te.

34:13  Nani moto apesaki ye bokonzi bwa nse ? Nani atindaki ye ayangela mokili mobimba ?

34:14  Soko Nzambe azalaki se komikanisa mpe kopima bato mpema ya ye,

34:15  mbele bato banso bakufaki na mbala yoko, mbele banso bakomaki mabelé lisusu.

34:16  Bongo, yoka, yo moto wa mayele, tia matoi na maye nakoyebisa yo.

34:17  Nzambe akokaki koyangela binso, soko azangaki bosembo ? Okoki kokitisa Oyo aleki bato banso na bosembo ?

34:18  Ye akoki kotanga mokonzi wa ekolo ‘moto mpamba’, mpe kotala bankumu lokola bato babe.

34:19  Akobondelaka bato banene te, akotalaka moto wa nkita na mobola ndenge se yoko, mpo banso bazali mosala mwa maboko ma ye.

34:20  Bakoki kokufa na mbala yoko na butu : ata bato banene bakoki kolimwa bongo ; ye akoki kolongola monyokoli o bokonzi, mpasi te.

34:21  Mpo Nzambe akotalaka bizalela bya bato, ayebi nzela ya bango inso.

34:22  Ezali na butu to na molili, bato bakoki kobombama o miso ma ye te.

34:23  Soko alingi kobyanga moto mpo ’te asambisa ye, asengeli kolaka ye mokolo te :

34:24  akoki kolongola baye bazali na bokonzi, kotuna te, mpe kofandisa basusu o esika ya bango,

34:25  mpo ayebi misala mya bango minso ; o butu yoko bakwei mpe banyatami.

34:26  Akoki kobete bango fimbo lokola bato babe, o miso ma bato banso,

34:27  soko balandaki nzela ya bango moko, mpe batosaki ye te.

34:28  Boleli bwa babola bokokomaka tee o matoi ma Nzambe, akoyokaka boleli bwa bato ba mawa.

34:29  Soko atikali nye mpe asali eloko te, nani akomono ye mabe ? Soko amibombi, nani akosambisa ye ?

34:30  Akokengeleke bato ba bikolo binso, alingi te ’te monyokoli azala mokonzi.

34:31  Soko alobi na Nzambe : « Nabungaki, nakosala mabe lisusu te ;

34:32  lakisa ngai maye nasengeli kosala ; nazangaki bosembo, nakozongela yango lisusu te » ?

34:33  Bongo Nzambe akopesa ye etumbu ? Okanisi nini ? Loba ko, yo moto oboyi maloba ma ye ma bopaleli, mpe okanisi ’te oyebi manso ! Ngai nakoloba eloko te.

34:34  Mbele bato ba mayele bakoloba na ngai, na mpe moto nyonso wa bwanya azali koyoka ngai :

34:35  « Esopa oyo Yob ayebi eloko te, maloba ma ye mazangi ntina.

34:36  Batuna Yob malamu mpenza, mpo akopesaka biyano lokola moto aboya Nzambe.

34:37  Kutu, ayoki lolendo na maloba ma ye ma botombokeli Nzambe, mpe o miso ma biso awangani mabe ma ye. »