LinVB - Joel

Chapter 1

1:1  Liloba lya Yawe lokola alobaki lyango na Yoel, mwana wa Petuel.

1:2  Bino bakolo, boyoka maloba maye, bino bato banso ba ekolo, botia matoi ! Bosili bomoni makambo ma mo­ti­ndo moye o ntango ya bino, to o ntango ya bankoko ba bino ?

1:3  Bosolola makambo mana na bana ba bino, bana mpe basolola mango na ba­nkoko ba bino, mpe bankoko bayebisa mango na bana ba bango.

1:4  Biloko bitiki lipalela, libanki lilei byango ! Biloko bitiki libanki, likonki lilei byango ! Biloko bitiki likonki, nyonyo elei byango !

1:5  Bino balangwi, bolamuka mpe bolela ! Bino bameli vino, bomilela mpo ya vino ya sika : babotoli bino yango !

1:6  Bato ba ekolo esusu bayei kobu­ndisa ekolo ya ngai, bazali makasi mpenza mpe ebele. Bazali na mino lokola nkosi, na mbanga lokola nkosi mwasi.

1:7  Babebisi elanga ya ngai ya vino, ekomi eliki, babomi nzete ya figi ya ngai, balongoli mposo ya nzete inso, bakweisi yango o nse, bitapi binso bya nzete bikomi mpe­mbe.

1:8  Bokimela lokola elenge mwasi azali kosala lilaka, alati ngoto mpo ya mobali wa bolenge bwa ye.

1:9  O ndako ya Yawe mabonza ma bolei mpe ma bomeli malimwi. Banganga Nzambe, basaleli ba Yawe bazali na lilaka.

1:10  Bilanga bibebi mpe mabelé makomi mpamba ; mbuma ya mampa ibebi, mbuma ya vino lokola, mafuta ma sika mazali lisusu te.

1:11  Bino bato ba bilanga, bobanga ; bino baloni ba vino, bomilela, zambi mbuma ya mampa mpe ya masangu isili, mbuma inso ya bilanga ibebi nye.

1:12  Mbuma ya vino ikauki, mbuma ya figi ikomeli te, nzete inso ya bilanga ikufi na mpo­sa ya mai : nzete ya ndimo, ya mbila mpe ya mangolo. Solo, esengo elongwi o ntei ya bato.

1:13  Banganga Nzambe, bolata ngo­to, bolela ! Boya o Tempelo, bolata ngoto mpe bolala bongo butu mobimba, bino basaleli ba Nzambe wa ngai ! Mpo o ndako ya Nzambe wa bino bakobonzaka mabonza ma bolei mpe ma bomeli lisusu te.

1:14  Botinda ’te bato balala nzala, bobenga bato o likita lisantu, bosangisa bakolo ba mboka na bato basusu banso, boya o ndako ya Yawe, Nzambe wa bino ; bobelela Yawe makasi.

1:15  « Mawa na biso ! Mokolo mwa mawa moyei, mokolo mwa Yawe mobelemi, mozali koya lokola bobebisi bwa Nzambe wa bokasi bonso. »

1:16  Biloko bya bolei bisili nye, tozali komono byango na miso lisusu te ; o ndako ya Yawe esengo ezali lisusu te.

1:17  Mboto ikauki o kati ya mabelé, babomi bibombelo binso bya biloko, zambi mbuma ya mampa izali lisusu te.

1:18  Bibwele bizali kolela, ngombe izali koyengayenga, zambi matiti ma kolia mazali lisusu te, bitonga bya mpata bizali kokufa.

1:19  E Yawe, nabeleli yo, móto mosilisi matiti manso ma esobe, móto motumbi nzete inso o bila­nga.

1:20  Ata nyama ya zamba izali kolela yo, miluka na mingala minso mikauki, móto motumbi matiti manso ma esobe.

Chapter 2

2:1  Bobete mindule o Sion, boganga o ngomba ya ngai esa­ntu. Bato banso ba ekolo balenge na nsomo, zambi mokolo mwa Yawe mokoya, mobelemi mpenza !

2:2  Mokolo mona mokozala mokolo mwa molili, mokolo mwa londende mpe mwa mampata maindo. Lokola moi mokobimaka na nto­ngo bato ba ye bakoya kotonda o mokili mwa ngomba, ebele, lokola emononi naino te, lokola mpe ekozala nsima lisusu te kin’o bileko binso.

2:3  O boso bwa bango móto mokosilisa binso, mokotumba mpe binso nsima ya bango. O liboso lya bango mokili mokozala lokola elanga ya Eden, nsima ya bango ekotikala se esobe mpamba ! Eloko yoko ekokima bango te.

2:4  Bakozala lokola farasa, bakopota mbangu lokola bata­mbwisi farasa,

2:5  na lokito lokola la makalo, maye makoleka mbangu o ngo­mba. Ekozala lokola lokito la móto mwa nkoni mokotumba mitondo mya ndako : ekozala lokola limpinga linene lya basoda bakei etumba.

2:6  Na bomoni bongo bato banso bakolenge, mpo ya nsomo elongi ya bango ekobongwana.

2:7  Bato ba limpinga lina bakopota mbangu lokola bilombe, bakobuta o bifelo lokola babuni, moto na moto akolanda se nzela ya ye, ata moko akobunga nzela te.

2:8  Moko te akokweisa moninga, moko moko akokoba nzela ya ye. Bakobanga makula te, bakotika milongo mya bango te.

2:9  Bakokoto o engumba na makasi, bakobuta o bifelo mpe o mitondo mya ndako, bakoyingela epai ya maninisa lokola bayibi.

2:10  O ntango ena mokili mokoningana, likolo likolenge, mwese na sanza ikoyinda, minzoto mikongenge lisusu te.

2:11  Bo mokambi wa limpinga lina Yawe akoyokisa lolaka la ye. Bato ba ye bazali ebele ; oyo akokokisa etinda ya ye azali makasi. Mokolo mwa Yawe mozali monene, mokolo mwa nsomo : nani akobika o mokolo mona ?

2:12  Yawe alobi boye : « Ata sikawa bozongela ngai noki na motema mobimba. Bolala nzala, bolela mpe bokimela. »

2:13  Bopasola bilamba te, kasi bopasola mitema, bozongela Yawe Nzambe wa bino, ye nta bolamu, nta ngolu, akosilikaka noki te, zambi aleki bolingi, azali na mawa mpo ya bobe bwa bato.

2:14  Nani ayebi ? Mbele akozonga mpe akoyoka motema mawa ? Mbele akotikela bino bobenisi bwa ye mpo ’te bobonzela Yawe Nzambe wa bino mabonza ma bolei mpe ma bomeli ?

2:15  Bobete mindule o Sion, botinda ’te bato balala nzala, bobenga bato o likita lisantu.

2:16  Bosangisa bato banso, baya o likita lya bato ba Nzambe ; bobyanga babange mpe bana bake bazali konunga ma­béle. Mobali abali sika atika ndako ya ye, mwasi atika ndako ya ye ya kolala.

2:17  Banganga Nzambe, basaleli ba Yawe, bayingela o Tempelo, balela : « E Yawe, yokela bato ba yo mawa, oyokisa bato ba ekolo ya yo nsoni te ; bato ba bikolo bisusu bawulola bango te ! Baloba te : Wapi Nzambe wa ba­ngo ? » Eyano ya Yawe

2:18  Yawe akoteli ekolo ya ye, ayokeli bato ba ye mawa.

2:19  Azongiseli bato ba ye maloba maye : « Tala natindeli bino mbuma ya mampa, vino na mafuta ma sika, bokolia mpe bokotonda. Ata mokolo moko te bokosa­mbwa o miso ma bikolo bisusu.

2:20  Nakobengana moto wa Nordi mosika, nakokimisa ye o mopotu, o mokili mozangi mai, nakokimisa basoda ba liboso epai ya mbu ya Esti, baye balandi bango epai ya mbu ya Westi. Mai mana makolumba nsolo ebe, makokoma mai makobelisa bato. » Yawe akosalaka makambo manene !

2:21  Nse mobimba, obanga lisusu te, bina mpe sepela, mpo Yawe akosalaka mambi manene !

2:22  Bino, nyama ya bisobe, bobanga lisusu te, mpo matiti makomi kokola lisusu, mpe nzete ikobota mbuma lisusu, mbuma ya vino mpe ya figi ikopesa bino bolamu.

2:23  Bato ba Sion, bobina, boyoka nsai, mpe bosepela mpo ya Yawe Nza­mbe wa bino. Alakisi bino bolamu bwa ye, anokisi lisusu mbula lokola kala ; bokozwa mbula ya mpela mpe mbu­la ya elanga.

2:24  Bitutelo bikotonda lisusu na mbu­ma ya mampa ; bikamelo bikotonda na vino mpe na mafuta ma sika.

2:25  « Nakopesa bino biloko bozwaki liboso te, ntango mapalela masilisaki milona, ntango natindelaki bino makonki, mabanki na nyonyo, limpinga lya ngai linene.

2:26  Bokolia lisusu biloko biike tee bokotonda ; bokokumisa nkombo ya Yawe Nza­mbe wa bino, mpo akosalaka makamwisi mpo ya bino. Bato ba ngai bakoyoka nsoni mokolo moko lisusu te !

2:27  Bokoyeba ’te ngai nazali o kati ya Israel, nazali Yawe Nzambe wa bino, mosusu azali te ! Bato ba ngai bakoyoka nsoni mokolo moko lisusu te ! »

Chapter 3

3:1  Na nsima nakokitisela bato banso elimo ya ngai ; bana babali na bana basi ba bino bakosakola, babange bakoloto ndoto, bilenge bakomono mamoni.

3:2  O mikolo mina nakotondisa mpe basaleli, babali na basi, na elimo ya ngai.

3:3  Nakosala makamwisi o likolo mpe o nse : makila, móto na milinga mikobuta o likolo !

3:4  Mwese mokobongwana molili mpe sanza ekobongwana makila liboso ’te mokolo mwa Yawe moya, mokolo mwa nsomo enene !

3:5  Kasi bato banso bakobondela nko­mbo ya Yawe, bakobika. O ngomba Sion mpe o Yeruzalem bato bakobika lokola Yawe alobaki : « Baye Yawe aponi, bakobika ! »

Chapter 4

4:1  Ya solo, o mokolo mona, o eleko ena, nakobongisa makambo ma Yuda mpe ma Yeruzalem.

4:2  Nakosangisa bato banso ba mokili mpe nakokotisa bango o lobwaku la Yozafat. Nakosambisa bango mpo ya lika­mbo lya Israel, ekolo mpe mokili mwa ngai. Mpamba te, bapanzaki bango o bikolo bisusu mpe bakabolaki mokili mwa ngai.

4:3  Babeteki zeke mpo ya kozwa bato ba ngai, batekeki bana babali mpo ’te ba­zwa basi bandumba, batekeki bana basi mpo ’te bamele vino !

4:4  Bato ba Tiro mpe ba Sidoni, bolingi kosala ngai nini ? Bato ba Filisti, bolingi nini ? Bolingi kosala ngai mango noki ? Soko bomeki kosala ngai mabe, nakozongisela bino mango !

4:5  Bino bato boyibaki palata na wolo ya ngai, botiaki biloko binzenga bya ngai o tempelo ya bino.

4:6  Botekelaki bato ba ekolo Yavan bato ba Yuda mpe ba Yeruzalem, mpe botindaki bango mosika na ekolo ya bango.

4:7  Ngai nakokamata bango o esika botekeki bango, mpe nakosala ’te mabe mana mazongela bino.

4:8  Nakoteke bana ba bino, babali na basi, nakokaba bango o maboko ma bato ba Yuda ; bakoteke bango mosika na bato ba Saba. Yawemei alobi bongo.

4:9  Bosakola makambo maye o bikolo bisusu, bomibongisa mpo ya kokende etumba, bobyanga basoda ba mpiko, bilombe banso babeleme mpe bakende etumba.

4:10  Na nkongo ya bino botula mi­mpa­nga, na soka ya bino botula makongo. Oyo azali na bokasi te amilendisa, aloba : « Nazali makasi lokola elombe. »

4:11  Bino bato ba bikolo bya penepene, boya noki kosalisa bato o bitu­mba ; banso boya kosangana awa. E Yawe, tinda bato ba yo ba mpiko.

4:12  Bato ba bikolo binso, bateleme mpe bakende o lobwaku la Yozafat ! Nakotia ngwende ya ngai ya bosambi kuna mpo ’te nakata makambo ma bikolo bisusu binso.

4:13  Bosimba mbeli mpo ya kokata milona mya mampa, zambi mbuma inso iteli. Boyaka mpe bonyata mbuma, ekamelo etondi meke, bingwongolo bitondi mpenza, mabe ma bango maleki !

4:14  Bato bazali ebele, ebele mpenza o lobwaku la Bosambi ; mokolo mwa Yawe mobelemi o lobwaku la Bosambi.

4:15  Mwese na sanza ikokoma molili, minzoto mikongenge lisusu te.

4:16  Ut’o Sion Yawe akoganga makasi, ut’o Yeruzalem akoyokisa lolaka la ye : likolo na nse bikolenge ! Kasi Yawe azali ebombamelo ya bato ba ye ; bato ba Israel bakomibomba epai ya ye.

4:17  Bokoyeba ’te ngai nazali Yawe Nzambe wa bino, nafandi o Sion, ngomba ya ngai esantu. Yeruzalem ekokoma esika esantu, bampaya bakoyingela wana lisusu te.

4:18  O mokolo mona ngomba inene ikotangisa vino ya sika, ngomba ike ikotangisa mabéle ma ngombe ; miluka minso mya Yuda mikotonda na mai. O ndako ya Yawe liziba likobima mpe likopesa mai na lobwaku la Sitim.

4:19  Ezipeti ekokoma mopotu, ekolo ya Edom esobe ya mawa, mpo ya makambo makasi makasi bayokisi bana ba Yuda, babomaki bango o ekolo ya ba­ngo, ata basalaki mabe te.

4:20  Yuda akozala na bato baike seko, Yeruzalem akozala na bato mikolo minso.

4:21  « Nakozongisela banguna mabe ma bosopi makila, bakokima etumbu te. » Yawe akofanda o Sion seko.