Kapingamarangi - II Samuel - 22

22:1  David ne-daahili ang-gi Dimaadua nia helekai o dana daahili deenei i-di madagoaa Dimaadua ne-benebene-mai ia gi-daha mo ono hagadaumee huogodoo, mo Saul:

22:2  Dimaadua la-go dogu Madaloohi, go Mee go dogu Abaaba Maaloo.

22:3  Dogu God la-go dogu Madaloohi, e-bala ginai au. Mee e-abaaba au gadoo be-di mee abaaba. Mee e-daa-mai au gi-daha, ga-benebene au. Go Mee go dogu Dangada Hagamouli. Mee e-madamada humalia i-di-au, gei e-abaaba au gi-daha mo nia mee huaidu.

22:4  Au e-haga-gahi Dimaadua, gei Mee ga-daa-mai au gi-daha mo ogu hagadaumee. Hagaamuina Dimaadua!

22:5  Nia beau o-di made gu-i dogu baahi. Nia beau hagamadagudagu-dangada gu-hagaholi au.

22:6  Nia manuu o-di made gu-i dogu baahi. Taalunga la-guu-lawa di-hele au.

22:7  I-lodo dogu haingadaa, gei au gu-haga-gahi Dimaadua. Au gu-haga-gahi dogu God bolo Mee gi-hagamaamaa-ina-mai au. Mee gu-longono-Ia dogu lee mai i-lodo dono Hale-Daumaha. Mee gu-longono-Ia dagu dangi-anga i dogu hagamaamaa.

22:8  Henuailala guu-bole gu-lullulu mo-di ngalungalua. Di hagamau o-di langi gu-ngalua, gu-bolebole i-di hagawelewele o God.

22:9  Di huiahi e-buu-mai i-lodo ono mada-uhi. Di ahi e-ulaula mo nia malala-gaa e-ulu-mai i-lodo o dono ngudu.

22:10  Mee guu-huge di langi gu-haneia. Nia gololangi luuli la-gu i-lala ono babaawae.

22:11  Mee gu-maangi-iha i-hongo dono dangada-di-langi e-hai ono bakau. Mee gu-maangi i-hongo nia bakau o-di madangi.

22:12  Mee gu-abaaba Ia gi-di bouli. Nia gololangi maadolu gu-honu-wai gu-haganiga i dono gili.

22:13  Nia malala-gaa e-haga-ula go di ila i ono mua.

22:14  Dimaadua la-ga-helekai dono lee e-ngoloolo gadoo be-di atili i-lala di langi. Di lee o-di God Koia e-Aamua la-guu-hai.

22:15  Mee guu-puu ana amu-maalei e-hagamadagudagu-ai ono hagadaumee. Mee gu-waluwalu digaula gi-di gaagaa o-di ila.

22:16  Tua di baba o-di moana gu-gila-aga, di hagamau o henuailala gu-gila-aga labelaa, i-di madagoaa o Dimaadua gu-hagawelewele gi ono hagadaumee, Mee gu-haga-hohooho i dono hagawelewele.

22:17  Dimaadua gu-daahi-iha dono lima i-di langi gaa-kumi au. Mee gu-hudi-aga au gi-daha mo tua o-di moana.

22:18  Mee gu-haga-dagaloaha au gi-daha mo ogu hagadaumee maaloo dangihi, mo digau huogodoo ala e-hudiou-mai gi-di-au. Digaula gu-maaloo i-di-au.

22:19  Digaula gu-hai-dauwa-mai gi-di-au i dogu madagoaa ne-tale gi di haingadaa, gei-ogo Dimaadua gu-hagamaamaa au.

22:20  Mee gu-hagamaamaa-mai au i-lodo ogu haingadaa, gu-haga-dagaloaha au, i dono manawa-tene mai gi-di-au.

22:21  Dimaadua e-dugu-mai dogu hagahumalia, i-di-au e-hai nia mee ala e-donu. Mee e-hila-mai gi-di-au, i-di-au e-dei ogu huaidu ai.

22:22  Au gu-hagalongo gi-nia haganoho o Dimaadua. Au digi huli gi-daha mo dogu God.

22:23  Au gu-haga-gila-aga ana haganoho huogodoo. Au digi de-hagalongo gi ana helekai.

22:24  Mee e-iloo-Ia dogu madammaa, i dagu hai dela e-haga-mogowaa au gi-daha mo nia hegau hai-hala.

22:25  Dimaadua e-dugu-mai dogu hagahumalia, i dagu hai nia mee ala e-donu. Mee e-iloo-Ia bolo au deai ogu huaidu ai.

22:26  Meenei Dimaadua, Goe e-manawa-dahi ang-gi digau ala e-manawa-dahi adu gi-di-Goe. Goe e-manawa lamalia ang-gi digau ala guu-dohu-anga.

22:27  Goe e-manawa-madammaa ang-gi digau ala e-manawa-madammaa, gei goe e-hai-baahi ang-gi digau ala e-hai nia mee huaidu.

22:28  Goe e-haga-dagaloaha digau ala e-hila gi-lala, gei e-haga-lligi digau ala e-manawa hagamuamua.

22:29  Meenei Dimaadua, Goe go dogu haga-maalama. Goe gu-daa gi-daha di bouli mo au.

22:30  Goe e-hagamaaloo-aga au bolo gii-mee di-hai dagu dauwa ang-gi ogu hagadaumee. Goe e-dugu-mai gi-di-au di mogobuna bolo gi-aali au i nadau abaaba hai-dauwa.

22:31  Di God deenei e-humalia huoloo go dono hai ana mee huogodoo. Ana helekai e-mee di-gana ginai gidaadou! Mee e-hai gadoo be-di mee abaaba ang-gi digau huogodoo ala e-halahala nadau hagaloohi ang-gi de-Ia.

22:32  Ma di God labelaa i-daha mo Dimaadua ai! Ma go Mee dela go tadau God dela go tadau dangada daa.

22:33  Di God deenei la-go dagu gowaa maaloo e-bala ginai au, gei e-hai di ala dela e-haele-iei au gii-baba.

22:34  Mee e-dugu-mai ogu wae e-lele-iei au gii-mau, bolo gii-lele au gadoo be-di ee, gei e-madamada humalia i-di-au i-hongo nia gonduu.

22:35  Mee e-haga-wouwou ogu lima ang-gi di hai-dauwa, ogu lima guu-mee di-haga-biga di maalei dela e-maaloo.

22:36  Meenei Dimaadua, Goe dela e-loohi au, gei e-haga-dagaloaha-mai au. Dau hagamaamaa la-gu-haga-madamada au.

22:37  Goe dela gu-duuli au bolo gi-dee-tale gi-lodo ogu haingadaa, gei au digi hinga-loo.

22:38  Au e-waluwalu ogu hagadaumee ga-haga-magedaa digaula. Au hagalee noho-loo gaa-dae-loo gi digaula gaa-mmade.

22:39  Au gaa-kili digaula huogodoo gi-lala, gi-deemee di-nadau tuu-aga. Digaula guu-too gi-lala ogu babaawae.

22:40  Goe dela e-hai au gi-maaloo bolo gii-mee au di-hai dagu dauwa, gei e-hai au gi-aali i ogu hagadaumee.

22:41  Goe e-hai ogu hagadaumee la-gii-llele gi-daha mo au. Au e-daaligi gii-odi digau ala nogo hagadugina-e-ginaadou au.

22:42  Digaula e-halahala di-nadau hagamaamaa, gei deai tangada e-haga-dagaloaha digaula ai. Digaula e-haga-gahi Dimaadua, gei Mee digi helekai gi-di haga-gahi digaula.

22:43  Au e-beehi digaula gei digaula guu-hai gadoo be nia gelegele gohu o henuailala. Au e-dagadagahi digaula, gadoo be au ma-ga-dagadagahi nia gelegele waiwai ala i-hongo nia ala.

22:44  Goe dela gu-haga-dagaloaha-mai au gi-daha mo agu daangada ala e-hai-baahi mai gi-di-au. Kooe ne-haga-noho au bolo e-dagi nia henua. Digau ala digi iloo-eau la-guu-hai agu gau hai-hegau dangi-nei.

22:45  Digau mai-i-daha e-pala-iha gi-lala gi ogu mua. Digaula e-limalima-hua e-hagalongo-mai, i-di nadau longono-ginaadou dogu lee.

22:46  Digaula la-gu-hagalee manawa-maaloo, gu-ulu-iha gi-daha mo lodo nadau waahale maaloo mo-di polepole.

22:47  Dimaadua e-mouli! Di hagaamu ang-gi dogu Dangada Daa! Goodou hagadele-ina nia mahi o God dela gu-haga-dagaloaha au!

22:48  Ma go God dela ne-hai au gi-aali i ogu hagadaumee. Ma go Mee dela ne-hai nia henua la-gii-noho i-lala ogu mogobuna.

22:49  Ma go Mee dela gu-haga-dagaloaha-mai au gi-daha mo ogu hagadaumee. Meenei Dimaadua, Goe e-hila-mai bolo gi-aali au i ogu hagadaumee, gei e-duuli au gi-daha mo digau ala e-hai-baahi mai gi-di-au.

22:50  Deenei-laa, meenei Dimaadua, au e-hagaamu huoloo Goe i-mehanga nia henua llauehe. Au e-daahili e-haga-hagaamu do ingoo.

22:51  Dimaadua e-dugu ang-gi dana king di aali. Mee e-haga-gida-anga dono aloho dee-odi gi dono dangada dela ne-hili, ang-gi David mo dono hagadili gaa-hana-hua beelaa, dono hagaodi ai.