UyCyr - Psalms - 144

144:1  Улуқлаймән Падишайим Худа Сени, Махтаймән та әбәт нам-шәривиңни.

144:2  Һәмдусана ейтимән һәр күни Саңа, Апирин ейтимән мәңгү намиңға.

144:3  Худа улуқ, һәссиләп мәдһийиләшкә лайиқтур, Улуқлуғини билишкә һечким қадир әмәстур.

144:4  Әвлатлардин-әвлатқа қалар яхши ишлириң, Елан қилинар уларниң тиллирида қудритиң.

144:5  Тәпәккүр қилимән шан-шөһритиң һәққидә, Чоңқур ойлаймән мөҗүзилириң үстидә.

144:6  Дастан болуп таралған чоң ишлириң тилларда, Мәнму баян әйләймән улуқлуғиңни дайима.

144:7  Улар әсләп, сөзлишәр шәпқитиңни бәс-бәстә, Адалитиңни күйлишәр нахша ейтип һәвәстә.

144:8  Худа рәһимдил, шәпқәтликтур, Асанлиқчә ғәзиви кәлмәс, Меһир-муһәббити чәксиздур.

144:9  Пәрвәрдигар һәммигә илтипат қилар, Барлиқ яратқанлириға рәһимдил болар.

144:10  Әй Пәрвәрдигар, Саңа улар шүкүр ейтар, Саңа садиқ бәндилириң мәдһийә оқар.

144:11  Улуғвар һөкүмранлиғиң һәққидә улар сөзләр, Бүйүк қудритиңни һәммә инсанға баян әйләр.

144:12  Җаһан әһлини улуқ ишлириң билән улар хәвәрдар қилар, Падишалиғиңниң шәрәплик сәлтәнитини мәлум қилар.

144:13  Падишалиғиң мәңгүлүк падишалиқтур, Һөкүмранлиғиң әвлаттин-әвлатқичидур, Пәрвәрдигар вәдисигә садиқтур, У һәммигә һәр дайим вападардур.

144:14  Пәрвәрдигар йөләр жиқилғанларни, Руслар егилгәнләрниң қәддини.

144:15  Әй Пәрвәрдигар, Тәлмүрәр һәммисиниң көзи Саңа, Берисән рисқини уларға өз вақтида.

144:16  Җанлиқларниң еһтияҗини қандурисән, Уларға қоли очуқ мәрттурсән.

144:17  Пәрвәрдигар һәммә ишта адилдур, У һәммигә һәр дайим вападардур.

144:18  Пәрвәрдигар Өзигә дуа қилғанларниң йенидидур, Уни чин дилидин сеғинғанларға йеқиндур.

144:19  У йәткүзәр мурадиға Өзигә ихлас қилғанларни, Аңлап налисини қутқузар уларни.

144:20  Қоғдар Пәрвәрдигар Өзини сөйгәнләрни, Амма һалак қилар барлиқ яманларни.

144:21  Һәмдусаналар чүшмәс мениң еғизимдин Пәрвәрдигарға, Пүткүл җанлиқлар мәңгү мәдһийә ейтсун муқәддәс намиға.