Geez - Ruth

Chapter 1

1:1  (ኦሪት ፡ ዘሩት ።)ወኮነ ፡ በመዋዕለ ፡ ይኴንኑ ፡ መሳፍንት ፡ መጽአ ፡ ረኃብ ፡ ውስተ ፡ ብሔር ፡ ወሖረ ፡ አሐዱ ፡ ብእሲ ፡ እምነ ፡ ቤተ ፡ ልሔም ፡ ዘይሁዳ ፡ ከመ ፡ ይንበር ፡ ውስተ ፡ ሐቅለ ፡ ሞአብ ፡ ውእቱ ፡ ወብእሲቱ ፡ ወደቂቁ ።

1:2  ወስሙ ፡ ለውእቱ ፡ ብእሲ ፡ አሊሜሌክ ፡ ወስመ ፡ ብእሲቱ ፡ ኖሔሚን ፡ ወአስማተ ፡ ደቂቁ ፡ ክልኤቱ ፡ መሐሎን ፡ ወኬሌዎን ፡ ኤፍራታዊያን ፡ እምነ ፡ ቤተ ፡ ልሔም ፡ ዘይሁዳ ፡ ወመጽኡ ፡ ውስተ ፡ ሐቅለ ፡ ሞአብ ፡ ወነበሩ ፡ ህየ ።

1:3  ወሞተ ፡ አሊሜሌክ ፡ ምታ ፡ ለኖሔሚን ፡ ወተርፈት ፡ ይእቲ ፡ ወደቂቃ ፡ ክልኤሆሙ ።

1:4  ወነሥኡ ፡ ሎሙ ፡ አንስተ ፡ ሞአባውያተ ፡ ስማ ፡ ለአሐቲ ፡ ዖርፋ ፡ ወስመ ፡ ካልእታ ፡ ሩት ፡ ወነበሩ ፡ ህየ ፡ የአክል ፡ ዐሠርተ ፡ ዓመተ ።

1:5  ወሞቱ ፡ ክልኤሆሙ ፡ መሐሎን ፡ ወኬሌዎን ፡ ወተርፈት ፡ ይእቲ ፡ ብእሲት ፡ እምነ ፡ ምታ ፡ ወእምነ ፡ ክልኤሆሙ ፡ ደቂቃ ።

1:6  ወተንሥአት ፡ ይእቲ ፡ ወክልኤሆን ፡ መራዕዊሃ ፡ ወተመይጣ ፡ እምነ ፡ ሐቅለ ፡ ሞአብ ፡ እስመ ፡ [ሰምዐት ፡ ከመ ፡] ተሣሀሎሙ ፡ እግዚአብሔር ፡ ለሕዝቡ ፡ ከመ ፡ የሀቦሙ ፡ እክለ ።

1:7  ወወፅኣ ፡ እምነ ፡ ውእቱ ፡ መካን ፡ ኀበ ፡ ይነብራ ፡ ወክልኤሆን ፡ መራዕዊሃ ፡ ምስሌሃ ፡ ወሖራ ፡ ውስተ ፡ ፍኖት ፡ ከመ ፡ ይእትዋ ፡ ውስተ ፡ ምድረ ፡ ይሁዳ ።

1:8  ወትቤሎን ፡ ኖሔሚን ፡ ለመራዕዊሃ ፡ ሑራ ፡ እትዋ ፡ አብያተ ፡ እማቲክን ፡ ወይግበር ፡ እግዚአብሔር ፡ ምስሌክን ፡ ምሕረቶ ፡ ከመ ፡ ገበርክን ፡ ምስለ ፡ እለ ፡ ሞቱ ፡ ወምስሌየ ።

1:9  ወየሀብክን ፡ እግዚአብሔር ፡ ትርከባ ፡ ዕረፍተ ፡ ውስተ ፡ አብያተ ፡ አምታቲክን ፡ ወሰዐመቶን ፡ ወጸርኃ ፡ ወበከያ ።

1:10  ወይቤላሃ ፡ ምስሌኪ ፡ ንገብእ ፡ ውስተ ፡ ሕዝብኪ ።

1:11  ወትቤሎን ፡ ኖሔሚን ፡ እትዋ ፡ አዋልድየ ፡ ለምንት ፡ ትመጽኣ ፡ ምስሌየ ፡ ቦኑ ፡ ዘብየ ፡ ዓዲ ፡ ውሉደ ፡ ውስተ ፡ ከርሥየ ፡ እለ ፡ ያወስቡክን ።

1:12  እትዋ ፡ እንከሰ ፡ አዋልድየ ፡ እስመ ፡ ረሣእኩ ፡ እምነ ፡ አውስቦ ፡ ዘእምወለድኩ ፡ ውሉደ ።

1:13  ወትፀንሓሆሙ ፡ እስከ ፡ አመ ፡ ይልህቁ ፡ ወታጽንዓ ፡ ርእሰክን ፡ ወኢታውስባ፤አልቦ ፡ አዋልድየ ፡ እስመ ፡ መረረተኒ ፡ ነፍስየ ፡ ጥቀ ፡ ፈድፋደ ፡ እምኔክን ፡ እስመ ፡ ወፅአት ፡ እምኔየ ፡ እደ ፡ እግዚአብሔር ።

1:14  ወጸርኃ ፡ ካዕበ ፡ ወበከያ ፡ ወሰዐመታ ፡ ዖርፋ ፡ [ለ]ሐማታ ፡ ወተመይጠት ፡ ኀበ ፡ ሕዝባ ፡ ወሩትሰ ፡ ተለወታ ።

1:15  ወትቤላ ፡ ኖሔሚን ፡ ለሩት ፡ ናሁ ፡ አተወት ፡ ካልእትኪ ፡ ኀበ ፡ ሕዝባ ፡ ወኀበ ፡ አማልክቲሃ ፡ እትዊ ፡ አንቲኒ ፡ ምስለ ፡ ካልእትኪ ።

1:16  ወትቤላ ፡ ሩት ፡ ኢያብሐኒ ፡ ከመ ፡ እኅድጊ ፡ ወከመ ፡ እትመየጥ ፡ እምድኅሬኪ ፡ ኀበ ፡ ሖርኪ ፡ አንቲ ፡ አሐውር ፡ ወኀበ ፡ ኀደርኪ ፡ አኀድር ፡ ሕዝብኪ ፡ ሕዝብየ ፡ ወአምላክኪ ፡ አምላክየ ።

1:17  ወበኀበ ፡ ሞትኪ ፡ እመውት ፡ ወህየ ፡ እትቀበር ፡ ከመዝ ፡ ለይረስየኒ ፡ እግዚአብሔር ፡ ወከመዝ ፡ ለይኩን ፡ ከመ ፡ አልቦ ፡ ዘይፈልጠኒ ፡ እምኔኪ ፡ እንበለ ፡ ሞት ።

1:18  ወሶበ ፡ ርእየት ፡ ኖሔሚን ፡ ከመ ፡ አጽንዐት ፡ ለሐዊር ፡ ምስሌሃ ፡ ኀደገት ፡ እንከ ፡ ብሂሎታ ።

1:19  ወሖራ ፡ ክልኤሆን ፡ እስከ ፡ በጽሓ ፡ ቤተ ፡ ልሔም ፡ ወደምፀት ፡ ኵሉ ፡ ሀገር ፡ በእንቲአሃ ፡ ወይቤልዋ ፡ ሕያውትኑ ፡ አንቲ ፡ ኖሔሚን ።

1:20  ወትቤሎን ፡ ኢትስምያኒ ፡ ኖሔሚን ፡ ስምያኒ ፡ መራር ፡ እስመ ፡ መረርኩ ፡ ፈድፋደ ፡ ወብዙኀ ።

1:21  አንሰ ፡ ምልእትየ ፡ ሖርኩ ፡ ወዕራቅየ ፡ አግብአኒ ፡ እግዚአብሔር ፡ ለምንት ፡ ትብላኒ ፡ ኖሔሚን ፡ እንዘ ፡ እግዚአብሔር ፡ አኅሰረኒ ፡ ወፈድፋደ ፡ አሕመመኒ ።

1:22  ወገብአት ፡ ኖሔሚን ፡ ወሩት ፡ መርዓታ ፡ ሞአባዊት ፡ ወአተዋ ፡ እምነ ፡ ሐቅለ ፡ ሞአብ ፡ ወበጽሓ ፡ ውስተ ፡ ቤተ ፡ ልሔም ፡ አመ ፡ ቀዳሜ ፡ ማእረረ ፡ ስገም ።

Chapter 2

2:1  ወባቲ ፡ ኖሔሚን ፡ ብእሴ ፡ ዘያአምሮ ፡ ለምታ ፡ ወውእቱ ፡ ብእሲ ፡ ጽኑዕ ፡ ወከሃሊ ፡ እምነ ፡ አዝማዲሁ ፡ ውእቱ ፡ ለአሊሜሌክ ፡ ወስሙ ፡ ቦዖስ ።

2:2  ወትቤላ ፡ ሩት ፡ ሞአባዊት ፡ ለኖሔሚን ፡ እሑርኑ ፡ ውስተ ፡ ገራህት ፡ እእሪ ፡ እክለ ፡ ኀበ ፡ እለ ፡ ረከብኩ ፡ ሞገሰ ፡ ወትቤላ ፡ ሑሪ ፡ ወለትየ ።

2:3  ወሖረት ፡ ወአረየት ፡ እምውስተ ፡ ገራህት ፡ እንዘ ፡ ትተልዎሙ ፡ ለእለ ፡ የዐፅዱ ፡ ወበጽሐት ፡ ውስተ ፡ አሐዱ ፡ ሕብር ፡ እምነ ፡ ገራህቱ ፡ ለቦዖስ ፡ ዘእምነ ፡ ዘመዱ ፡ ለአሊሜሌክ ።

2:4  ወመጽአ ፡ ቦዖስ ፡ እምነ ፡ ቤተ ፡ ልሔም ፡ ወይቤሎሙ ፡ ለእለ ፡ የዐፅዱ ፡ እግዚአብሔር ፡ ምስሌክሙ ፡ ወይቤልዎ ፡ ይባርከ ፡ እግዚአብሔር ።

2:5  ወይቤሎ ፡ ቦዖስ ፡ ለወልዱ ፡ ዘይቀውም ፡ ላዕለ ፡ እለ ፡ የዐፅዱ ፡ እንተ ፡ መኑ ፡ ዛቲ ፡ ወለት ።

2:6  ወአውሥኦ ፡ ውእቱ ፡ ወልድ ፡ ዘይቀውም ፡ ላዕለ ፡ እለ ፡ የዐፅዱ ፡ ወይቤ ፡ እንታክቲ ፡ ወለት ፡ ሞአባዊት ፡ እንተ ፡ ገብአት ፡ ምስለ ፡ ኖሔሚን ፡ እምነ ፡ ሐቅለ ፡ ሞአብ ።

2:7  ወትቤ ፡ እእሪ ፡ ወኣስተጋብእ ፡ እምነ ፡ ዘወድቀ ፡ እምነ ፡ ክልስስታት ፡ ወእምድኅሬሆሙ ፡ ለእለ ፡ የዐፅዱ ፡ ወመጽአት ፡ ወቆመት ፡ እምነግህ ፡ እስከ ፡ ስርክ ፡ ወኢኀደገት ፡ ንስቲተኒ ፡ ውስተ ፡ ገራህት ።

2:8  ወይቤላ ፡ ቦዖስ ፡ ለሩት ፡ ኢሰማዕኪኑ ፡ ወለትየ ፡ ኢትባኢ ፡ ውስተ ፡ ገራህተ ፡ ባዕድ ፡ ለአስተጋብኦ ፡ ወአንቲኒ ፡ ኢትሑሪ ፡ እምዝየ ፡ ባዕደ ፡ ትልዊዮን ፡ ለአዋልድየ ።

2:9  ወነጽሪ ፡ ውስተ ፡ ገራህት ፡ ኀበ ፡ ዐፀዱ ፡ ወትልዊዮሙ ፡ ናሁ ፡ አዘዝኩ ፡ ለደቅ ፡ ከመ ፡ አልቦ ፡ ዘይልክፍኪ ፡ ወእመኒ ፡ ጸማእኪ ፡ ሑሪ ፡ ኀበ ፡ ንዋይ ፡ ወስተዪ ፡ እምነ ፡ ዘአምጽኡ ፡ ደቅ ።

2:10  ወወድቀት ፡ በገጻ ፡ ወሰገደት ፡ ውስተ ፡ ምድር ፡ ወትቤሎ ፡ እመ ፡ ረከብኩ ፡ ሞገሰ ፡ ቅድመ ፡ አዕይንቲከ ፡ ዑቀኒ ፡ እስመ ፡ እንግዳ ፡ አነ ።

2:11  ወአውሥኣ ፡ ቦዖስ ፡ ወይቤላ ፡ ዜና ፡ ዜነውኒ ፡ ኵሎ ፡ ዘገበርኪ ፡ ምስለ ፡ ሐማትኪ ፡ እምድኅረ ፡ ሞተ ፡ ምትኪ ፡ ወእፎ ፡ ኀደጊ ፡ [አባኪ ፡ ወ]እመኪ ፡ ወብሔረ ፡ ሙላድኪ ፡ ወመጻእኪ ፡ ኀበ ፡ ሕዝብ ፡ ዘኢታአምሪ ፡ ትካት ።

2:12  ወይዕሲኪ ፡ እግዚአብሔር ፡ በከመ ፡ ገበርኪ ፡ ወይኩን ፡ ዕሴትኪ ፡ ፍጹመ ፡ በኀበ ፡ እግዚአብሔር ፡ አምላከ ፡ እስራኤል ፡ ዘመጻእኪ ፡ ኀቤሁ ፡ ከመ ፡ ትትአመኒ ፡ በክነፊሁ ።

2:13  ወትቤሎ ፡ ሩት ፡ ረከብኩ ፡ ሞገሰ ፡ ቅድመ ፡ አዕይንቲከ ፡ እስመ ፡ አስተፈሣሕከኒ ፡ ወናዘዝካሁ ፡ ለልበ ፡ አመትከ ፡ ወናሁ ፡ አነ ፡ እከውነከ ፡ ከመ ፡ አሐቲ ፡ እምነ ፡ አእማቲከ ።

2:14  ወይቤላ ፡ ቦዖስ ፡ ሶበ ፡ ኮነ ፡ ጊዜ ፡ ምሳሕ ፡ ንዒ ፡ ዝየ ፡ ወብልዒ ፡ እክለኪ ፡ ወትጻብኂ ፡ ኅብስተኪ ፡ በብሒእ ፡ ወነበረት ፡ ሩት ፡ መንገለ ፡ ገቦሆሙ ፡ ለእለ ፡ የዐፅዱ ፡ ወአስተጋብአ ፡ ላቲ ፡ ቦዖስ ፡ ጥሕነ ፡ ወበልዐት ፡ ወጸግበት ፡ ወአትረፈት ።

2:15  ወተንሥአት ፡ ትትቀረም ፡ ወአዘዞሙ ፡ ቦዖስ ፡ ለደቁ ፡ ወይቤሎሙ ፡ ለትእሪ ፡ ማእከለ ፡ ክልስስታት ፡ ወኢታስተኀፍርዋ ።

2:16  ወጹሩ ፡ ላቲ ፡ እምነ ፡ ዘአስተጋብአት ፡ [ወኅድጉ ፡] ላቲ ፡ ወትብላዕ ፡ ወትእሪሂ ፡ ወኢትገሥጽዋ ።

2:17  ወአረየት ፡ እምነ ፡ ገራህት ፡ እስከ ፡ መስየ ፡ ወዘበጠቶ ፡ ለዝክቱ ፡ ዘአስተጋብአት ፡ ወኮነ ፡ ስገሙ ፡ በመስፈርተ ፡ ኢፍ ።

2:18  ወነሥአት ፡ ወአእተወት ፡ ሀገረ ፡ ወርእየት ፡ ሐማታ ፡ ዘአረየት ፡ ወአምጽአት ፡ ሩት ፡ ወወሀበታ ፡ ዘአትረፈት ፡ እምድኅረ ፡ ጸግበት ።

2:19  ወትቤላ ፡ ሐማታ ፡ በአይቴ ፡ አረይኪ ፡ ዮም ፡ ወበአይቴ ፡ ገበርኪ፤ቡሩከ ፡ ለይኩን ፡ ዘአእመረኪ ፡ ወአይድዐታ ፡ ሩት ፡ ለሐማታ ፡ በአይቴ ፡ ገብረት ፡ ወነገረታ ፡ ስሙ ፡ ለውእቱ ፡ ብእሲ ፡ ዘኀቤሁ ፡ ወዓልኩ ፡ ዮም ፡ ቦዖስ ።

2:20  ወትቤላ ፡ ኖሔሚን ፡ ለመርዓታ ፡ ቡሩክ ፡ ውእቱ ፡ ለእግዚአብሔር ፡ እስመ ፡ ኢኀደገ ፡ ምሕረቶ ፡ ምስለ ፡ ሕያዋን ፡ ወምስለ ፡ ምውታን ፡ ወትቤላ ፡ ኖሔሚን ፡ ብእሲሁሰ ፡ ቅሩብነ ፡ ውእቱ ፡ እምእለ ፡ ይትሐመውነ ፡ ውእቱ ።

2:21  ወትቤላ ፡ ሩት ፡ ለሐማታ ፡ እስመ ፡ ይቤለኒ ፡ ምስለ ፡ አዋልድየ ፡ ትልዊ ፡ እስከ ፡ አመ ፡ የኀልቅ ፡ ማእረርነ ።

2:22  ወትቤላ ፡ ኖሔሚን ፡ ለሩት ፡ መርዓታ ፡ ሠናይ ፡ ወለትየ ፡ እስመ ፡ ተለውኪ ፡ ምስለ ፡ አዋልዲሁ ፡ ወኢይርከቡኪ ፡ ውስተ ፡ ገራህተ ፡ ባዕድ ።

2:23  ወተለወቶን ፡ ሩት ፡ ለአዋልደ ፡ ቦዖስ ፡ ከመ ፡ ትእሪ ፡ እስከ ፡ አመ ፡ የኀልቅ ፡ ማእረረ ፡ ስገም ፡ ወስርናይ ፡ ወነበረት ፡ ምስለ ፡ ሐማታ ።

Chapter 3

3:1  ወትቤላ ፡ ኖሔሚን ፡ ሐማታ ፡ ወለትየ ፡ ኢየኀሥሥኑ ፡ ለኪ ፡ ዕረፍተ ፡ ከመ ፡ ትሠኒ ፡ ላዕሌኪ ።

3:2  ወይእዜኒ ፡ አኮኑ ፡ ቦዖስ ፡ ማእምርነ ፡ ዘምስለ ፡ አዋልዲሁ ፡ ሀሎኪ ፡ ናሁ ፡ ውእቱ ፡ ይገብር ፡ ውስተ ፡ ዐውደ ፡ እክሉ ፡ ዮም ፡ በዛቲ ፡ ሌሊት ።

3:3  ወአንቲሰ ፡ ተኀፀቢ ፡ ወተቀብኢ ፡ ወተለበሲ ፡ አልባሰኪ ፡ ወሑሪ ፡ ኀበ ፡ ዐውደ ፡ እክሉ ፡ ወአልቦ ፡ ሰብእ ፡ ዘይርአይኪ ፡ እስከ ፡ የኀልቅ ፡ በሊዐ ፡ ወሰትየ ።

3:4  ወሶበ ፡ ሰክበ ፡ አእምርዮ ፡ መካኖ ፡ ኀበ ፡ ኖመ ፡ ህየ ፡ ወሑሪ ፡ ወክሥቲ ፡ ኀበ ፡ እገሪሁ ፡ ወስክቢ ፡ ወውእቱ ፡ ለሊሁ ፡ ይኤዝዘኪ ፡ ዘከመ ፡ ትገብሪ ።

3:5  ወትቤላ ፡ ሩት ፡ ኵሎ ፡ ዘከመ ፡ ትቤልኒ ፡ እገብር ።

3:6  ወወረደት ፡ ኀበ ፡ ዐውደ ፡ እክል ፡ ወገብረት ፡ ኵሎ ፡ ዘከመ ፡ አዘዘታ ፡ ሐማታ ።

3:7  ወበልዐ ፡ ቦዖስ ፡ ወተፈሥሐ ፡ ልቡ ፡ ወሖረ ፡ ወሰክበ ፡ ኀበ ፡ ክምር ፡ ወመጽአት ፡ ጽምሚተ ፡ ወከሠተት ፡ ኀበ ፡ እገሪሁ ፡ ወሰከበት ።

3:8  ወመንፈቀ ፡ ሌሊት ፡ ከዊኖ ፡ ነቅሀ ፡ ብእሲ ፡ ወደንገፀ ፡ ወረከበ ፡ ብእሲተ ፡ ኀበ ፡ እገሪሁ ።

3:9  ወይቤላ ፡ መኑ ፡ አንቲ ፡ ወትቤሎ ፡ አነ ፡ ሩት ፡ አመትከ ፡ ወክድነኒ ፡ ጽንፈ ፡ ልብስከ ፡ እስመ ፡ መስተሐምው ፡ አንተ ።

3:10  ወይቤላ ፡ ቦዖስ ፡ ቡርክት ፡ አንቲ ፡ ለእግዚአብሔር ፡ ወለትየ ፡ እስመ ፡ ኀየሰት ፡ ምሕረት ፡ ደኃሪት ፡ እምነ ፡ ቀዳሚትኪ ፡ ዘኢሖርኪ ፡ ወኢተለውኪ ፡ አቀልዳተ ፡ እለ ፡ ነዳያት ፡ ወኢለአብዕልት ።

3:11  ወይእዜኒ ፡ ወለትየ ፡ ኢትፍርሂ ፡ ኵሎ ፡ ዘትቤሊ ፡ እገብር ፡ ለኪ ፡ ወያአምር ፡ ኵሉ ፡ ነገደ ፡ ሕዝብየ ፡ ከመ ፡ ብእሲተ ፡ ኀይሎሙ ፡ አንቲ ፡ ወከመ ፡ መስተሐምው ፡ አነ ።

3:12  ወባሕቱ ፡ ቦ ፡ መስተሐምወ ፡ ዘይቀርብ ፡ እምኔየ ።

3:13  ቢቲ ፡ ዛተ ፡ ሌሊተ ፡ ወሶበ ፡ ጸብሐ ፡ ለእመ ፡ ተሐመወ ፡ ሠናይ ፡ ለይትሐመውኪ ፡ ውእቱ ፡ ወእመሰ ፡ ኢፈቀደ ፡ ይትሐሞ ፡ ውእቱ ፡ ሕያው ፡ እግዚአብሔር ፡ ከመ ፡ አነ ፡ እትሐመወኪ ፡ ወቢቲ ፡ እስከ ፡ ይጸብሕ ።

3:14  ወቤተት ፡ ኀበ ፡ እገሪሁ ፡ እስከ ፡ ይጸብሕ ፡ ወተንሥአት ፡ እንበለ ፡ ይትራአይ ፡ ሰብእ ፡ ወይቤ ፡ ቦዖስ ፡ አልቦ ፡ ዘያአምር ፡ ከመ ፡ መጽአት ፡ ብእሲት ፡ ኀበ ፡ ዐውደ ፡ እክል ።

3:15  ወይቤላ ፡ አምጽኢ ፡ ልብሰ ፡ ዘላዕሌኪ ፡ ወአኀዘ ፡ ወሰፈረ ፡ ውስቴቱ ፡ ስድሰ ፡ እክለ ፡ ስገም ፡ ወአጾራ ፡ ወቦአት ፡ ውስተ ፡ ሀገር ።

3:16  ወአተወት ፡ ሩት ፡ ኀበ ፡ ሐማታ ፡ ወትቤላ ፡ ምንት ፡ ዝንቱ ፡ ወለትየ ፡ ወአይድዐታ ፡ ኵሎ ፡ ዘከመ ፡ ገብረ ፡ ላቲ ፡ ውእቱ ፡ ብእሲ ።

3:17  ወትቤላ ፡ እላንተ ፡ ስድሰ ፡ እክለ ፡ ስገም ፡ ወሀበኒ ፡ እስመ ፡ ይቤለኒ ፡ ኢትእትዊ ፡ ዕራቅኪ ፡ ኀበ ፡ ሐማትኪ ።

3:18  ወትቤላ ፡ ንበሪ ፡ ወለትየ ፡ እስከ ፡ ትሬእዪ ፡ ከመ ፡ ኢይስ[ሕ]ት ፡ ቃልየ ፡ እስመ ፡ ኢያረምም ፡ ውእቱ ፡ ብእሲ ፡ ወኢያዐርፍ ፡ ዮም ፡ እስከ ፡ ይገብሮ ፡ ለዝንቱ ፡ ነገር ።

Chapter 4

4:1  ወዐርገ ፡ ቦዖስ ፡ ኀበ ፡ አንቀጽ ፡ ወነበረ ፡ ህየ ፡ ወመጽአ ፡ ዝክቱ ፡ መስተሐምው ፡ ዘይቤ ፡ ቦዖስ ፡ የኀልፍ ፡ ወይቤሎ ፡ ቦዖስ ፡ ገሐሥ ፡ ወንበር ፡ ዝየ ፡ ንትናገር ፡ ወግሕሠ ፡ ወነበረ ።

4:2  ወነሥአ ፡ ቦዖስ ፡ ዐሠርተ ፡ ዕደወ ፡ እምነ ፡ ሊቃናተ ፡ ሀገር ፡ ወይቤሎሙ ፡ ንበሩ ፡ ዝየ ፡ ወነበሩ ።

4:3  ወይቤሎ ፡ ቦዖስ ፡ ለመስተሐምው ፡ መክፈልተ ፡ ገራህት ፡ ዘእኁነ ፡ አሊሜሌክ ፡ አገብእ ፡ ላቲ ፡ ለኖሔሚን ፡ እንተ ፡ አተወት ፡ እምነ ፡ ሐቅለ ፡ ሞአብ ።

4:4  ወአንሰ ፡ ነገርኩከ ፡ ትስማዕ ፡ እንዘ ፡ እብል ፡ ኅረይ ፡ ለከ ፡ በቅድመ ፡ እለ ፡ ይነብሩ ፡ ወበቅድመ ፡ ሊቃናት ፡ ወበቅድመ ፡ ሕዝብየ ፡ እመ ፡ ትትሐሞ ፡ ተሐሞ ፡ ወእመሰ ፡ ኢትትሐሞ ፡ አይድዐኒ ፡ ወኣእምር ፡ እስመ ፡ ይቀድመከ ፡ ተሐምዎ ፡ አንተ ፡ ወአነ ፡ እምድኅሬከ ፡ ወይቤሎ ፡ አነኑ ፡ ውእቱ ፡ መስተሐምው ።

4:5  ወይቤሎ ፡ ቦዖስ ፡ ከመ ፡ ነሣእከ ፡ ገራህተ ፡ እምእደ ፡ ኖሔሚን ፡ ወእምኀበ ፡ ሩት ፡ ሞአባዊት ፡ ብእሲቱ ፡ ለዘ ፡ ሞተ ፡ ወኪያሃኒ ፡ ርቱዕ ፡ ትንሥኣ ፡ ከመ ፡ ታቅም ፡ ስሞ ፡ ለዘ ፡ ሞተ ፡ ላዕለ ፡ ርስቱ ።

4:6  ወይቤ ፡ መስተሐምው ፡ ኢይክል ፡ ተሐምዎ ፡ ከመ ፡ ኢይሕጐል ፡ ርስትየ ፡ ተሐሞ ፡ ለርእስከ ፡ ተሐምዎ ፡ ዘዚአየ ፡ እስመ ፡ ኢይክል ፡ ተሐምዎ ።

4:7  ወከመዝ ፡ ውእቱ ፡ ለተሐምዎ ፡ ኵነኔሁ ፡ በቅድመ ፡ እስራኤል ፡ ወበእንተ ፡ ተዋልጦ ፡ ከመ ፡ ያቅም ፡ ቃሎ ፡ ወፈትሐ ፡ ውእቱ ፡ ብእሲ ፡ ሣእኖ ፡ ወወሀቦ ፡ ለካልኡ ፡ ዘይትሐሞ ፡ ተሐምዎ ፡ ዚአሁ ፡ ወከመዝ ፡ ውእቱ ፡ ስምዑ ፡ በውስተ ፡ እስራኤል ።

4:8  ወይቤሎ ፡ መስተሐምው ፡ ለቦዖስ ፡ ንሣእ ፡ ለከ ፡ ተሐምዎ ፡ ዘዚአየ ፡ ወፈትሐ ፡ ሣእኖ ፡ ወወሀቦ ።

4:9  ወይቤሎሙ ፡ ቦዖስ ፡ ለሊቃናት ፡ ወለሕዝብ ፡ ኵሉ ፡ ስምዑ ፡ አንትሙ ፡ ዮም ፡ ከመ ፡ ነሣእኩ ፡ ኵሎ ፡ ዘአሊሜሌክ ፡ ወኵሎ ፡ ንዋዮ ፡ ለኬሌዎን ፡ [*ወለመሐሎን* ፡] እምነ ፡ እዴ[ሃ] ፡ ለኖሔሚን ።

4:10  ወለሩት ፡ ሞአባዊት ፡ ብእሲተ ፡ መሐሎን ፡ ነሣእክዋ ፡ ሊተ ፡ ትኩነኒ ፡ ብእሲተ ፡ ወከመ ፡ ኣቅም ፡ ስሞ ፡ ለዘ ፡ ሞተ ፡ ላዕለ ፡ ርስቱ ፡ ወኢይጥፋእ ፡ ስሙ ፡ ለዘ ፡ ሞተ ፡ እምነ ፡ አኀዊሁ ፡ ወእምነ ፡ ነገደ ፡ ሕዝቡ ፡ ስምዕየ ፡ አንትሙ ፡ ዮም ።

4:11  ወይቤሉ ፡ ኵሉ ፡ ሕዝብ ፡ በኀበ ፡ አንቀጽ ፡ ስምዕከ ፡ ንሕነ ፡ ወሊቃናትኒ ፡ ይቤልዎ ፡ ይረስያ ፡ ለከ ፡ እግዚአብሔር ፡ ለብእሲትከ ፡ እንተ ፡ ትበውእ ፡ ውስተ ፡ ቤትከ ፡ ከመ ፡ ራሔል ፡ ወከመ ፡ ልያ ፡ እለ ፡ ሐነጻሁ ፡ ለቤተ ፡ እስራኤል ፡ ክልኤሆን ፡ ወግበር ፡ ኀይለ ፡ ውስተ ፡ ኤፍራታ ፡ ወይኩንከ ፡ ስም ፡ ውስተ ፡ ቤተ ፡ ልሔም ።

4:12  ወይኩን ፡ ቤትከ ፡ ከመ ፡ ቤተ ፡ ፋሬስ ፡ ዘወለደት ፡ ትዕማር ፡ ለይሁዳ ፡ ወእምነ ፡ ዘርእከ ፡ የሀብከ ፡ እግዚአብሔር ፡ በላዕለ ፡ ዛቲ ፡ ወለት ።

4:13  ወነሥኣ ፡ ቦዖስ ፡ ለሩት ፡ [ወኮነቶ ፡ ብእሲተ ፡] ወወሀባ ፡ እግዚአብሔር ፡ ወፀንሰት ፡ ወወለደት ፡ ወልደ ።

4:14  ወይቤላሃ ፡ አንስት ፡ ለኖሔሚን ፡ ይትባረክ ፡ እግዚአብሔር ፡ ዘኢያኅጥአኪ ፡ ዮም ፡ መስተሐምወ ፡ በዘ ፡ ይሰመይ ፡ ስምኪ ፡ በውስተ ፡ እስራኤል ።

4:15  ወይከውነኪ ፡ በዘ ፡ ታገብኢ ፡ ነፍሰኪ ፡ ወዘየሐፅኖ ፡ ለሢበትኪ ፡ እስመ ፡ አፍቀረተኪ ፡ መርዓትኪ ፡ እንተ ፡ ወለደቶ ፡ ለኪ ፡ እንተ ፡ ትኄይሰኪ ፡ እምነ ፡ ሰብዐቱ ፡ ደቂቅ ።

4:16  ወነሥአቶ ፡ ኖሔሚን ፡ ለውእቱ ፡ ሕፃን ፡ ወአንበረቶ ፡ ውስተ ፡ ሕፅና ፡ ወኮነቶ ፡ ሐፃኒቶ ።

4:17  ወሰመያሁ ፡ አግዋሪሃ ፡ ስሞ ፡ እንዘ ፡ ይብላ ፡ እስመ ፡ ተወልደ ፡ ወልድ ፡ ለኖሔሚን ፡ ወሰመዩ ፡ [ስሞ ፡] ኢዮቤድ ፡ ውእቱ ፡ አቡሁ ፡ ለእሴይ ፡ አበ