Kapingamarangi - Ruth

Chapter 1

1:1  I-mua-loo, i-lodo nia laangi ala i-mua Israel ne-hai di-nadau king, tau-magamaga ne-hai i tenua deelaa. Gei taane dono ingoo go Elimelech, tangada ni-di madahaanau o Ephrath, nogo noho i Bethlehem i Judah, gaa-hula ginaadou mo dono lodo go Naomi mo ana dama-daane dogolua go Mahlon mo Chilion, belee noho haga-dulii i tenua go Moab. Di madagoaa digaula nogo noho i-golo,

1:2  I-mua-loo, i-lodo nia laangi ala i-mua Israel ne-hai di-nadau king, tau-magamaga ne-hai i tenua deelaa. Gei taane dono ingoo go Elimelech, tangada ni-di madahaanau o Ephrath, nogo noho i Bethlehem i Judah, gaa-hula ginaadou mo dono lodo go Naomi mo ana dama-daane dogolua go Mahlon mo Chilion, belee noho haga-dulii i tenua go Moab. Di madagoaa digaula nogo noho i-golo,

1:3  gei Elimelech gaa-made, gei Naomi gaa-dubu i-golo mo ana dama-daane dogolua.

1:4  Meemaa gaa-lodo gi-nia dama-ahina Moab go Orpah mo Ruth. Holongo nia ngadau e-madangaholu nomuli,

1:5  gei Mahlon mo Chilion gaa-mmade labelaa, gei Naomi guu-dubu i-golo, dono lodo ai, mo ana dama-daane ai.

1:6  Nomuli, gei Naomi ga-longono-ia bolo Dimaadua la-gu-hagahumalia ana daangada, i dana hagahumalia nia meegai o nadau gowaa. Naomi ga-hagatogomaalia belee hagatanga i Moab, ginaadou mo nia lodo o ana dama-daane dogolua.

1:7  Digaula ga-hagatanga belee hula gi Judah, gei di-nadau loo-adu hua,

1:8  gei Naomi ga-helekai gi meemaa, “Hula gi-di-gulu guongo gi-baahi gulu dinana. Dimaadua gi-hagahumalia-ina goolua be gulu hai-humalia nogo hai-mai gi-di-au mo ang-gi meemaa ala guu-mmade.

1:9  Dimaadua gaa-hai-laa goolua gii-mee di-hai gulu lodo labelaa gaa-hai gulu hale.” Naomi gaa-hongi meemaa ga-hagaaloho gi meemaa, gei meemaa ga-daamada ga-tangitangi,

1:10  mo-di helekai-adu gi Naomi, “Deeai! Gimaua e-hula-hua i oo muli gi-baahi o daangada.”

1:11  Naomi ga-helekai, “Agu dama-ahina-nei, goolua e-hai gii-hula gi-muli. Goolua e-aha ala bolo goolua e-loomoi i ogu muli? Goolua e-hagabaubau bolo au e-mee di-hai labelaa agu dama-daane e-lodo-adu gi goolua?

1:12  Hula gi-muli gi-baahi gulu gau, i-di au gu-madumadua gu-deemee di-hai labelaa dogu lodo. Gei dolomaa au gaa-hai bolo au e-mee-hua di hai dogu lodo, ge gaa-hai dogu lodo boo-nei, ga-haanau agu dama-daane,

1:13  goolua e-hiihai e-tali-loo meemaa gi-mmaadua ga-lodo-laa gi meemaa? Di hai deenei e-mee di-daahi goolua gi-hagalee lodo gi nnuai daangada? Agu dama-ahina-nei, deeai, goolua e-iloo bolo ma e-deemee di hai beenei. Dimaadua gu-hai-baahi-mai gi-di-au, gei au gu-manawa-aloho huoloo i goolua.”

1:14  Meemaa gu-tangitangi labelaa. Gei-ogo Orpah ga-hagaaloho gaa-hongi tinana dono lodo gaa-hana gi dono hale. Gei Ruth e-duu hua igolo, bolo ia hagalee tanga gi-daha mo Naomi.

1:15  Naomi ga-helekai gi mee, “Ruth, do ehoo dauaga la-guu-hana gi-muli gi-baahi ono daangada mo ono god. Hana gi-muli dalia a-mee.”

1:16  Gei Ruth ga-helekai, “Hudee hai-mai bolo au gi-diagia goe! Dugua au gii-hana dalia goe. Au e-hana gi-di-ingoo-hua di gowaa dela e-hana ginai goe. Di gowaa dela ga-noho-iei goe, e-noho-iei au. O daangada e-hai ogu daangada, doo God e-hai dogu God.

1:17  Di-ingoo-hua di gowaa dela e-made-iei goe, e-made hogi-iei au, ge deelaa di gowaa hogi e-danu-iei au. Di hagaduadua Dimaadua dela e-kaedahi e-huaidu la-gi-heia-mai gi-di-au, be au e-dumaalia gi tei mee la-gii-wwae gidaua! Deai di mee e-mee di-wwae gidaua ai, deelaa-hua go di made!”

1:18  Di madagoaa Naomi ne-iloo-ia bolo Ruth la-gu-hagamodudahi bolo ia e-hana-hua i ono muli, geia gu-hagalongo-hua.

1:19  Meemaa ga-lloo-adu-loo gi Bethlehem, gei di madagoaa meemaa ne-dau i-golo, nia daangada huogodoo o-di waahale gu-gologolo, gei nia ahina ala nogo i-golo la-ga-helekai boloo, “Ma go Naomi donu hua deenei?”

1:20  Naomi ga-helekai, “Hudee gahia au bolo Naomi, gahia-hua au bolo Marah, idimaa di God Koia e-Aamua la-guu-hai dogu mouli gi-haingadaa.

1:21  Dogu madagoaa ne-hagatanga i ginei, gei au nogo-hai-mee gi-nia mee e-logo, gei Dimaadua ga-laha-mai au gi-muli, agu mee ai. Hudee gahia au bolo Naomi, idimaa, Dimaadua di Gowaa Aamua la-gu-hagahuaidu au, gu-gaamai ogu haingadaa.”

1:22  Deenei di hai ne-hanimoi Naomi i Moab, ginaua mo Ruth, di ahina o Moab, go di lodo o dana dama-daane. Di madagoaa meemaa ne-dau i Bethlehem, gei tau-gai o-nia huwa-laagau ‘barley’ la dela-hua dogo daamada.

Chapter 2

2:1  Naomi la dono dangada e-dau gi-di hale o dono lodo go Elimelech i-golo, tangada maluagina ge aamua, dono ingoo go Boaz.

2:2  Di laangi e-dahi, gei Ruth ga-helekai gi Naomi, “Dugua-mai au e-hana gi lodo nia hadagee e-ogo nia golee-‘barley’ ala ne-diiagi go digau ngalua. Au bolo au e-mee-hua di gida tangada dela gaa-hai au gi-ngalua i dono baahi.” Naomi ga-helekai, “Dagu dama-ahina-nei, hana.”

2:3  Ruth gaa-hana gi lodo di hadagee, ga-haele i-muli digau ngalua mo-di ogoogo ana golee-‘barley’ ala e-didiiagi go digau ngalua. Di hadagee dela nogo iei mee i-no-lodo, la di hadagee ni Boaz.

2:4  Muli-mai hua, gei Boaz ga-hanimoi i Bethlehem gaa-dau i-golo ga-hagaaloho gi digau ngalua, ga-helekai, “Dimaadua gi madalia goodou.” Digaula ga-helekai, “Dimaadua gi-hagahumalia-laa goe!”

2:5  Boaz ga-heeu gi-di tagi digaula, “Tama-ahina deelaa la koai?”

2:6  Taane deelaa ga-helekai, “Mee tama-ahina mai i-daha, dela ne-hanimoi i Moab dalia Naomi.

2:7  Mee ne-madau-mai bolo ia e-daudali mai i-muli digau ngalua, e-ogo ana golee. Mee gu-ngalua-hua mai luada, gei dolomeenei guu-noho gu-hagamolooloo haga-dulii i-lala di gowaa e-malu.”

2:8  Boaz ga-helekai gi Ruth, “Au e-hai-adu dagu helekai hagamaamaa. Hudee ogo golee i tuai gowaa, dela-hua i ginei. Ngalua dalia nia ahina i ginei.

2:9  Mmada be digaula e-duuduu nadau mee i-hee, noho i-baahi digaula. Au gu-boloagi gi agu daane bolo gi-hudee hagahuaidu-ina goe. Goe ma-ga-hieinu, hana inu i-nia loaabi ala ne-haga-hau go digaula.”

2:10  Ruth ga-bala gi-lala, gei ono hadumada guu-tale gi-di gelegele, mo-di helekai gi Boaz, “Goe e-aha dela e-haamanawa huoloo i-di-au? Gei goe e-aha dela koia e-humalia huoloo ang-gi tangada mai i-daha?”

2:11  Boaz ga-helekai “Au gu-longono-eau au mee huogodoo ala ne-hai gi do dinana dela ne-dauaga ginai i-muli doo lodo ne-made. Au e-iloo dau hai dela ne-dugu do damana mo do dinana mo do henua, mo doo hai dela ne-hanimoi, gaa-noho i-mehanga nia daangada digi iloo-e-goe mai i-mua.

2:12  Dimaadua gi-gowadu doo hui i au mee ala ne-hai. Goe gii-kae doo hui honu mai baahi Dimaadua, go di God o Israel dela ne-hilihili kooe belee hai dau abaaba.”

2:13  Ruth ga-helekai, “Meenei, goe e-humalia huoloo-mai gi-di-au. Goe guu-hai au gi-manawa lamalia gi au helehelekai humalia mai gi-di-au, ma e-aha maa au hagalee tangada e-dahi i au ahina hai-hegau.”

2:14  Di madagoaa miami, gei Boaz ga-helekai ang-gi Ruth, “Hanimoi, kae-ina dau palaawaa e-haga-tiu gi-lodo nia waini.” Malaa, Ruth gaa-noho gi-lala dalia digau ngalua, gei Boaz gaa-wanga gi mee ana golee i-nia golee-‘barley’ ala ne-dunu. Ruth gu-miami gu-maaluu, gei hunu ana meegai la-guu-dubu.

2:15  I-muli dono hagatanga ne-hana belee ogo ana golee-‘barley’, Boaz ga-helekai gi ana gau ngalua, “Dugua ang-gi mee labelaa gi-ogo ana lii i-nia gowaa ala e-dugu-ai nia uu-‘barley’. Hudee bule-ina a-mee. Haga-nonnono-ina hunu manga-‘barley’ mai i-nia uu-mee gi-ogo go mee.”

2:16  I-muli dono hagatanga ne-hana belee ogo ana golee-‘barley’, Boaz ga-helekai gi ana gau ngalua, “Dugua ang-gi mee labelaa gi-ogo ana lii i-nia gowaa ala e-dugu-ai nia uu-‘barley’. Hudee bule-ina a-mee. Haga-nonnono-ina hunu manga-‘barley’ mai i-nia uu-mee gi-ogo go mee.”

2:17  Ruth ga-ogo ana lii, gaa-dae-loo gi-di hiahi. Dono madagoaa ne-haga-madammaa nia maa, geia ga-iloo bolo ia guu-hai ana pauna e-hoohoo gi-nia pauna e-madalua maa-lima.

2:18  Mee gaa-kae nia golee-‘barley’, gaa-hana gi lodo di waahale ga-hagi-anga gi dono dinana ne-dauaga ginai, di logo o ana mee ala ne-ogo. Ruth guu-wanga labelaa ana meegai ala ne-dubu i-di miami oodee.

2:19  Naomi ga-heeu gi mee, “Goe ne-ogo nia lii aanei i-hee dangi-nei? Goe nogo ngalua i-lodo di hadagee ni-aai? Dimaadua gi-hagahumalia-ina taane dela ne-hai dana humalia adu gi-di-goe!” Ruth ga-hagi-anga gi Naomi bolo ia nogo ngalua i-lodo di hadagee a taane dono ingoo go Boaz.

2:20  Naomi ga-helekai gi-nua, “Dimaadua gi hagahumalia-ina Boaz! Dimaadua e-daahi ana hagababa ang-gi digau mouli mo digau mmade i-nia madagoaa huogodoo. Taane deelaa la tuaahina hoohoo ni gidaua, tangada e-dahi i digau ala belee madamada humalia i gidaua.”

2:21  Gei Ruth ga-helekai, “Di mee humalia huoloo la-go mee dela ne-hai-mai gi-di-au bolo au gi-ogoogo-ina agu lii dalia ana gau ngalua gaa-dae-loo gi-di lawa o tau-hagi-mee deenei.”

2:22  Naomi ga-helekai gi Ruth, “Uaa, dagu dama-ahina-nei, ma e-humalia bolo goe e-ngalua hua dalia nia ahina i-lodo di hadagee a Boaz. Maa nei bolo goe gaa-hana gi tuai hadagee, gei di huaidu e-mee-hua di-hai-adu gi-di-goe.”

2:23  Malaa, Ruth ga-ngalua dalia digaula e-ogo nia golee-‘barley’ gaa-dae-loo gi-di lawa di-hadi nia huwa laagau huogodoo. Gei mee e-noho-hua i-baahi tinana o dono lodo.

Chapter 3

3:1  Nomuli-mai, gei Naomi ga-helekai gi Ruth, “Au e-hai gi-halahala-adu doo lodo, gi-iai doo hale donu ni-oou ge gii-hai do hagadili.

3:2  Goe e-langahia bolo taane go Boaz, dela ana ahina nogo-ngalua-ei goe i nadau baahi, la tangada ni gidaua. Hagalongo-laa. Hiahi-nei gei Boaz la-ga-haga-madammaa gi-daha nia gili o-nia golee-‘barley’.

3:3  Malaa, gaugau-ina goe, haga-kala-ina goe gi-di lolo-kala, gei gi-ulu gi oo gahu ala e-kaedahi e-humalia. Gei goe gaa-hana gi-di gowaa a-mee dela e-haga-madammaa ana golee-‘barley’, malaa, hudee heia a-mee gi-iloo bolo goe i golo, gaa-dae-loo gi-di lawa o dono miami mo dono inu.

3:4  Heia gi-iloo-e-goe di gowaa dela e-kii-iei mee, mee ma-gaa-kii, gei goe hana dahi-aga-ina di tei o-maa, gaa-moe gi-lala i-baahi nia wae o-maa. Mee ga-hagi-adu-laa au mee ala belee hai.”

3:5  Ruth ga-helekai, “Au gaa-hai nia mee huogodoo ala e-helekai-iei goe.”

3:6  Malaa, Ruth gaa-hana gi-di gowaa haga-madammaa golee-‘barley’, gaa-hai huogodoo gii-hai be nnelekai o tinana dono lodo ala ne-hai-anga.

3:7  Di madagoaa Boaz ne-lawa dono miami mo dono inu, gei mee gu-manawa lamalia. Mee gaa-hana gi-di hagabae laagau-‘barley’ gaa-moe gi lala belee kii. Ruth ga-higihigi-adu ga-dahi-aga di tei gaa-moe gi-lala i-baahi nia wae o-maa.

3:8  Di boo hua deelaa, gei Boaz ga-ala-aga, gaa-huli, ga-homouli i dana gidee-ia di ahina e-moe i-baahi ono wae.

3:9  Boaz ga-heeu, “Goe koai?” Gei mee ga-helekai, “Ko-au go Ruth. Idimaa goe dela tuaahina hoohoo ni-oogu, ge di-maa kooe dela belee madamada humalia i-di-au, gei au bolo goe belee lodo mai gi-di-au.”

3:10  Boaz ga-helekai, “Dagu dama-ahina-nei, Dimaadua gi-hagahumalia-ina goe. Do haihai humalia dolomeenei e-koia e-humalia i dau hai dela ne-hai-anga gi do dinana dauaga, idimaa, goe digi hana i-muli tama-daane maluagina be hagaloale.

3:11  Dagu dama-ahina-nei, goe hudee hei-e-goe. Au gaa-hai nia mee huogodoo ala e-helekai-iei goe. Nia daangada huogodoo i-lodo di waahale le e-hai bolo goe di ahina humalia.

3:12  Ma e-donu bolo au tuaahina hoohoo ni-oou belee madamada humalia i-di-goe, gei di-maa taane i-golo e-mada hoohoo-adu i-di-au.

3:13  Noho i ginei boo-nei, gei luada daiaa gidaua gaa-mmada be taane deelaa la-ga-benebene goe. Maa ia guu-hai beelaa la-gu-humalia, gei di-maa ga-hagalee hai beelaa, gei au e-hagamodu adu gi-di-goe i-di ingoo o Dimaadua dela e-mouli, bolo au gaa-kae di waawa deenei. Dolomeenei gei goe gaa-moe gi-lala gaa-noho i ginei gaa-dae-loo gi-di luada.”

3:14  Ruth gaa-moe i-baahi nia wae o-maa, gei mee guu-ala-aga hua i-mua di maalama, bolo gi-dee-mmada nia daangada ang-gi deia, idimaa, Boaz guu-hai bolo hudee heia tangada gi-iloo bolo ia nogo i-golo.

3:15  Boaz ga-helekai gi mee, “Daawa gi-daha doo gahu laa-daha, holohia gi-daha i ginei.” Gei mee guu-hai gii-hai beelaa, gei Boaz guu-dui ana golee-‘barley’ gi-hongo di gahu, holongo nia pauna e-madalima, ga-dahi-aga gaa-wanga gi-hongo di bakau o-maa. Gei Ruth gaa-hana gi-di waahale.

3:16  Di madagoaa o mee ne-dau i dono hale, tinana di lodo o-maa ga-heeu gi mee, “Dagu dama-ahina-nei, goe guu-hai behee?” Ruth ga-hagi-anga gi mee nia mee a Boaz huogodoo ala ne-hai ang-gi deia.

3:17  Ruth ga-helekai labelaa, “Boaz ne-helekai-mai labelaa bolo au hagalee hanimoi gi-di-goe beelaa, deai agu mee e-gaamai ai, gei mee ga-gaamai nia golee-‘barley’ aanei.”

3:18  Naomi ga-helekai gi mee, “Dagu dama-ahina-nei, taalia maalia gii-lawa di mee deenei. Boaz la hagalee noho-loo dangi-nei, gaa-dae-loo gi dana hai di mee deenei la-gii-lawa.”

Chapter 4

4:1  Boaz gaa-hana gi-di gowaa hai dagabuli i-di bontai di abaaba di waahale, gaa-noho gi-lala i-golo, gei tuaahina hoohoo a Elimelech, go taane dela nogo helekai-ai Boaz, ga-hanimoi-laalaa, gei Boaz gaa-gahi a-mee, “Haele-mai, noho gi-lala, dogu ihoo haga-tenetene.” Gei taane deelaa gaa-hana, gaa-noho gi-lala.

4:2  Boaz ga-hagadagabuli-mai nia dagi dilongoholu o-di waahale deelaa, gaa-hai digaula gii-noho gi-lala. Di madagoaa digaula ne-noho gi lala,

4:3  gei Boaz ga-helekai gi dono duaahina, “Naomi dela gu-hanimoi i Moab e-hiihai e-hui gi-daha di gowaa o tau duaahina go Elimelech,

4:4  gei au e-hagabau bolo ma e-humalia goe e-hai gi-iloo di-maa. Goe e-hiihai e-hui di-maa, huia di-maa i-mua digau aanei e-noho. Goe e-de-hiihai, gei goe ga-helekai, idimaa ma kooe dela e-donu belee hui di-maa, ga-nomuli ko-au.” Taane deelaa ga-helekai, “Au e-hui di-maa.”

4:5  Boaz ga-helekai, “E-humalia, maa goe gaa-hui di gowaa deelaa mai i Naomi, gei goe e-hui labelaa a Ruth, go di ahina o Moab dela guu-made dono lodo, bolo gi-noho-hua di gowaa deelaa la i-baahi di hale o taane dela ne-made.”

4:6  Taane deelaa ga-helekai, “Ma e-hai beenaa, gei au ga-hagalee hai-hegau gi ogu donu dela belee hui di gowaa, idimaa ma gaa-hai dono hadinga bolo agu dama donu la-ga-deemee di boloagi ginai mo-di hai-mee gi-di gowaa deelaa. Goe huia di-maa, au hagalee hui di-maa.”

4:7  Malaa, di madagoaa deelaa, gei di hai e-hai-ai nia hui-mee be e-waahei nia mee, tangada dela belee hui gi-daha dana mee le e-daa gi-daha dono suudi, e-wanga gi tangada dela e-hui di-maa. Di hai deenei e-hai go digau Israel e-haga-modongoohia bolo di hai deelaa la-gu-haga-noho guu-lawa.

4:8  Di madagoaa taane deelaa ne-helekai gi Boaz boloo, “Goe huia di-maa,” mee e-daa gi-daha dono suudi e-wanga gi Boaz.

4:9  Boaz ga-helekai ang-gi nia dagi o-di waahale mo nia daangada huogodoo ala nogo i golo, “Goodou huogodoo e-hai digau hagadootonu, bolo au guu-hui mai baahi Naomi nia mee huogodoo a Elimelech mo ana dama go Chilion mo Mahlon.

4:10  Ruth, tama-ahina o Moab, go di lodo o Mahlon, gaa-hai dogu lodo, belee daahi nia mee huogodoo o-di hale o taane dela guu-made, bolo di ingoo o-maa gaa-noho hua igolo i-mehanga ono daangada mo dono guongo. Dangi-nei gei goodou guu-hai digau hagadootonu o-di mee deenei.”

4:11  Nia dagi mo digau huogodoo ala i-golo ga-helekai, “Uaa, gimaadou go au gau hagadootonu. Dimaadua gi-heia-laa doo lodo gii-hai be Rachel mo Leah, ala ne-hai nau dama dogologo gi Jacob. Goe gii-hai tangada maluagina i-lodo di madahaanau o Ephrath, gei taane dau i Bethlehem.

4:12  Au dama ala ga-gowadu go Dimaadua mai tama-ahina deenei gi-heia digau o doo hale gii-hai be-di hale o Perez, go tama-daane a Judah mo Tamar.”

4:13  Malaa, Boaz gaa-lahi dono lodo go Ruth gi dono hale. Dimaadua ga-hagahumalia a Ruth, gei mee ga-hai-dama ga-haanau dana dama-daane.

4:14  Nia ahina ga-helekai gi Naomi, “Hagaamuina Dimaadua! Mee guu-wanga dana dama-daane gi dau dama-ahina dangi-nei belee hagamaamaa goe. Tama-daane deelaa la-gii-hai tangada dau i Israel!

4:15  Dau dama-ahina dau-aga le e-aloho i-di-goe, gei koia gu-hai-adu ana mee e-logo i-hongo nia mee o-nia dama-daane dogohidu ma-gaa-hai-adu gi-di-goe. Gei dolomeenei gei mee gu-dugu-adu dau dama-daane, e-gowadu gi-di-goe do mouli hoou, ge benebene goe i-lodo do madagoaa dela gu-madua.”

4:16  Naomi gaa-lahi di tama, ga-bulubulu a-mee, ga-madamada humalia-ai.

4:17  Nia ahina o-di gowaa deelaa gaa-gahi di ingoo tama-daane deelaa bolo Obed. Digaula guu-hai gi-nia daangada huogodoo boloo, “Tama-daane gu-haanau gi Naomi!” Obed gaa-hai tamana ni Jesse go tamana o David.

4:18  Deenei di hagadili mai Perez gaa-tugi i David: Perez, Hezron, Ram, Amminadab, Nahshon, Salmon, Boaz, Obed, Jesse, David.

4:19  Deenei di hagadili mai Perez gaa-tugi i David: Perez, Hezron, Ram, Amminadab, Nahshon, Salmon, Boaz, Obed, Jesse, David.

4:20  Deenei di hagadili mai Perez gaa-tugi i David: Perez, Hezron, Ram, Amminadab, Nahshon, Salmon, Boaz, Obed, Jesse, David.

4:21  Deenei di hagadili mai Perez gaa-tugi i David: Perez, Hezron, Ram, Amminadab, Nahshon, Salmon, Boaz, Obed, Jesse, David.

4:22  Deenei di hagadili mai Perez gaa-tugi i David: Perez, Hezron, Ram, Amminadab, Nahshon, Salmon, Boaz, Obed, Jesse, David.