LinVB - Job - 38

38:1  Ut’o kati ya ekumbaki, Yawe alobi na Yob :

38:2  Nani oyo alingi koboya mikano mya Nzambe na maloba mazangi ntina ?

38:3  Lendisa motema mpe zala na mpiko, nakotuna yo, yanola ngai.

38:4  Ozalaki wapi o ntango nasalaki mokili ? Loba, soko oyebi yango.

38:5  Nani apesaki mwango bolai na bonene ? Nani atiaka nsinga ya komeka mwango ?

38:6  Makonzi ma mwango mapikami ndenge nini ? Nani atiaki mabanga manene o nse ya mokili,

38:7  ntango minzoto minso miyembaki lisanga, mpe bana banso ba Nzambe bazalaki koganga na nsai ?

38:8  Nani akangisaki mai ma mbu o esika ya mango, ntango mabimaki o nse ya mabelé ?

38:9  Ntango natiaki mampata o likolo makangema wana, mpe nazingaki mbu na londende lokola na elamba ;

38:10  ntango nakatelaki mango ndelo, mpe natiaki bizibeli mpe mafungola,

38:11  nalobaki na mbu : « Mai makoleka awa te, makasi ma mbonge ya mai makosuka awa ! »

38:12  Uta babota yo osili otindi ntongo etinda ? Etani ntongo, okolakisaka yango esika ya mosala :

38:13  ekende kokanga mokili epai moi mokobimaka mpe koningisa mwango mpo ’te bato babe bakweya ?

38:14  Engengisa mokili mokoma motane lokola ngola, epakola mwango langi lokola o elamba ;

38:15  Ntongo ekoboma mwinda mwa bato babe, ekobuka loboko la moto alingi kobete moninga.

38:16  Okitaki o mbu tee o maziba ma yango ? Okendeki kotambola kin’o nse ya limfelo ?

38:17  Balakisaki yo minoko mya lopango la Liwa ? Omonoko bakengeli ba mboka ya Molili ?

38:18  Oyebi ata mwa moke bonene bwa mokili ? Loba, soko oyebi yango inso !

38:19  Oyebi esika mboka ya mwinda ezali, mpe esika eye molili mofandi ?

38:20  Bongo yo moto okende kotika yango kuna, yo moto olakisa yango esika ya yango !

38:21  Soko oyebi, loba ’te babotaki yo o ntango ena, mpe osili okokisi mibu mingi, solo !

38:22  Okotoki o bibombelo bya mbula ya matandala, omonoki esika mbula ya mabanga ekozalaka,

38:23  mabanga maye nabongisi o mikolo mya mpasi mpe o mikolo mya bitumba binene ?

38:24  Epai wapi mwinda mokobandaka kongenge, mpe esika nini mompepe mwa Esti mokobandaka kopepe ?

38:25  Nani atimolelaki mbula makasi miluka, mpe nani apasolaki nzela ya mampata matondi na nkake ?

38:26  Nani akonokisaka mbula o mokili mozangi bato, mpe o eliki ezali na bato te ?

38:27  Nani akopesaka mai na mabelé makauki makasi, mpe nani akokolisaka wana matiti mabesu ?

38:28  Mbula ezali nde na tata ? Nani akobotaka matanga ma mamio ?

38:29  Matandala makobimaka o libumu lya nani ? Nani akobotaka londende louti o likolo ?

38:30  O ntango ena mai makobongwana mabanga, mpe mai ma mbu makokangema makasi.

38:31  Okoki nde kokanga ‘Bangondo nsambo’ liboke, kofungola minyololo mya ‘Motó mwa Ekange’,

38:32  kobimisa ‘Mokwete’ o ntango ekoki, to kokamba ‘Motongolongo mwa nzoku’ na bana ba ye ?

38:33  Oyebi nde mibeko nini bakotosaka o likolo ? Yo moto okotindaka mibeko awa o nse ?

38:34  Okoki nde kobelela mampata mpo ’te mabima mpe manokisela yo mbula enene ?

38:35  Monkalali mokobima nde mpo ya etinda ya yo mpe mokoloba na yo : « Ngai oyo, nayei » ?

38:36  Nani apesaki nkongi bwanya ? Nani apesaki nsoso mobali mayele ?

38:37  Nani akoki kotanga motango mwa mampata, kosopa mabenga ma mai ma likolo

38:38  mpo ’te mabelé lido makangema, mpe makoma makasi lokola mabanga ?

38:39  Yo nde okolukelaka nkosi nyama ya kolia, mpe okosilisaka nzala ya bana ba ye,

38:40  baye bakotikalaka o mabulu ma bango, to bakobombamaka o kati ya mibenga ?

38:41  Nani akolambelaka yanganga biloko bya bolei, soko bana ba ye bakomi kolela epai ya Nzambe mpe koningisa mapapu mpo ya nzala ?