Site uses cookies to provide basic functionality.

OK
I MACCABEES
1 2 3 4 5 6 7 8 9 10 11 12 13 14 15 16
Prev Up Next
Chapter 5
I Ma CSlEliza 5:1  И бысть егда услышаша языцы окрест, яко создася олтарь и обновися святыня якоже прежде, и разгневашася зело:
I Ma CSlEliza 5:2  и совещашася погубити род Иаковль, иже беху посреде их, и начаша убивати в людех и истребляти.
I Ma CSlEliza 5:3  И ратоваше Иуда на сыны Исавовы во Идумеи, яже во Акраватине, понеже обседяху Израиля: и порази их язвою великою, и утесни их, и взя корысти их.
I Ma CSlEliza 5:4  И помяну злобу сынов Веаних, иже беху людем в сеть и в соблазн, во еже ловити им на путех.
I Ma CSlEliza 5:5  И затворишася от него в пиргех, и наступи на них, и прокля их, и зажже пирги их огнем, со всеми яже в них бяху.
I Ma CSlEliza 5:6  И пройде на сыны Аммони, и обрете руку крепку и люди многи, и Тимофеа вожда их.
I Ma CSlEliza 5:7  И состави на них брани многи, и сотрени суть пред лицем его, и поби их,
I Ma CSlEliza 5:8  и взя Иазира и дщери его, и возвратися во Иудею.
I Ma CSlEliza 5:9  И собрашася языцы иже в Галаадитиде противу Израилтяном сущым в пределех их, да избиют их. И побегоша в Дафему твердыню.
I Ma CSlEliza 5:10  И послаша писание ко Иуде и братии его, рекуще: собрашася на ны языцы, иже окрест нас, избити нас,
I Ma CSlEliza 5:11  и готовятся приити и взяти твердыню, в нюже вбегохом, и Тимофей есть воевода сил их:
I Ma CSlEliza 5:12  ныне убо пришед избави нас от руки их, яко паде множество от нас:
I Ma CSlEliza 5:13  и вси братия наша сущии в местех Тувииних убиени суть, и плениша жен их и чад их и имения их, и погубиша тамо яко тысящу мужей.
I Ma CSlEliza 5:14  И еще писания чтяхуся, и се, инии вестницы приидоша от Галилеи в раздраных ризах, возвещающе по словесем сим, рекуще:
I Ma CSlEliza 5:15  собрашася на нас от Птолемаиды и Тира, и Сидона и всея Галилеи иноплеменник, еже искоренити нас.
I Ma CSlEliza 5:16  Егда же услыша Иуда и людие словеса сия, собрася собор велик усоветовати, что сотворят братиям своим сущым в скорби и воюемым от них.
I Ma CSlEliza 5:17  И рече Иуда Симону и брату своему: избери себе мужы и иди, и избави братию твою сущую в Галилеи: аз же и брат мой Ионафан пойдем в Галаадит.
I Ma CSlEliza 5:18  И остави Иосифа сына Захариина и Азарию воеводы людем с прочими воины во Иудеи на хранение,
I Ma CSlEliza 5:19  и заповеда им, глаголя: прилежите людем сим и не сотворите брани на языки, дондеже мы возвратимся.
I Ma CSlEliza 5:20  И отделиша Симону мужей три тысящы, да идет в Галилею, Иуде же осмь тысящ мужей в Галаадит.
I Ma CSlEliza 5:21  И иде Симон в Галилею и состави брани многи на языки, и сотрошася языцы от лица его,
I Ma CSlEliza 5:22  и погна вслед их даже до врат Птолемаиды: и падоша от язык яко три тысящы мужей, и взя корысти их,
I Ma CSlEliza 5:23  и поят сущих в Галилеи и во Арваттисех с женами и чады, и вся елика бяху им, и приведе во Иудею с веселием велиим.
I Ma CSlEliza 5:24  И Иуда Маккавей и Ионафан брат его преидоша Иордан, и идоша путь триех дний в пустыни,
I Ma CSlEliza 5:25  и сретоша Наватеев, и прияша их мирно, и поведаша им вся, яже случишася братии их в Галаадитиде,
I Ma CSlEliza 5:26  и яко мнози от них заключени суть в Восоре и Восор, во Алемисех, Хасфоре, Македе и Карнаине: сии вси гради тверди и велицы:
I Ma CSlEliza 5:27  и в прочиих градех Галаадитиды суть затворени, и во утрие строятся ополчитися на твердыни и яти и избити всех сих во един день.
I Ma CSlEliza 5:28  И возвратися Иуда и вои его в путь в пустыню в Восор внезапу: и взя град, и уби всяк мужеск пол усты меча, и взя вся корысти их, и сожже его огнем:
I Ma CSlEliza 5:29  и воста оттуду нощию и иде даже до твердыни.
I Ma CSlEliza 5:30  И бысть пред зарею, и воздвигоша очи свои, и се, людие мнози, имже не бе числа, несуще лествицы и миханы взяти твердыню, и ратоваху их.
I Ma CSlEliza 5:31  И виде Иуда, яко начася брань, и вопль града взыде даже до небесе трубами и гласом велиим,
I Ma CSlEliza 5:32  и рече мужем силы: бийтеся днесь за братию вашу.
I Ma CSlEliza 5:33  И изыде тремя началы созади их: и вострубиша трубами и возопиша в молитве.
I Ma CSlEliza 5:34  И позна полк Тимофеов, яко Маккавей есть, и отбежа от лица его, и поби их язвою велиею, и падоша от них в день он яко осмь тысящ мужей.
I Ma CSlEliza 5:35  И обратися (Иуда) в Масфу и повоева ю и взя ю, и уби весь мужеск пол ея и взя корысти ея, и сожже ю огнем:
I Ma CSlEliza 5:36  оттуду пойде и взя Хасфор, Макед и Восор и прочыя грады Галаадитиды.
I Ma CSlEliza 5:37  И по сих словесех собра Тимофей полк ин и ополчися к лицу Рафона об ону страну потока.
I Ma CSlEliza 5:38  И посла Иуда соглядати полк. И возвестиша ему глаголюще: собрани суть к нему вси языцы, иже окрест нас, сила велия зело:
I Ma CSlEliza 5:39  и Аравлян наяша в помощь себе, и ополчаются об ону страну потока, готови приити на тя на брань. И иде Иуда во сретение их.
I Ma CSlEliza 5:40  И рече Тимофей началником воев своих: егда приближится Иуда и полк его к потоку водному, аще приидет к нам прежде, не можем постояти противу его, яко могий возможет противу нас:
I Ma CSlEliza 5:41  аще же устрашится и ополчится об ону страну реки, прейдем к нему и возможем противу его.
I Ma CSlEliza 5:42  Егда же приближися Иуда к потоку водному, постави книжники людий при потоце и повеле им глаголя: не оставляйте всякаго человека остатися в полце, но да грядут вси на брань.
I Ma CSlEliza 5:43  И прейде на них прежде, и вси людие вслед его. И сотрени суть вси языцы пред лицем его, и повергоша оружия своя, и бежаша в капище, еже к Карнаине.
I Ma CSlEliza 5:44  И взяша град, и капище сожгоша огнем со всеми, яже в нем: и побежден бысть Карнаин и не возможе ктому стати противу лица Иудина.
I Ma CSlEliza 5:45  И собра Иуда всех Израилтян, иже беху в Галаадитиде, от мала даже до велика, и жены их и чада их и имения, полк велик зело, приити в землю Иудину.
I Ma CSlEliza 5:46  И приидоша даже до Ефрона, и сей град велий на входе тверд зело: и не бе уклонитися от него на десно или шуее, но токмо сквозе его проити.
I Ma CSlEliza 5:47  И заключишася, иже бяху в граде, и заградиша врата камением. И посла к ним Иуда со словесы мирными, глаголя:
I Ma CSlEliza 5:48  пройдем по земли вашей, еже отити в землю нашу, и никтоже вас изобидит, токмо ногами пройдем. И не восхотеша отверсти ему.
I Ma CSlEliza 5:49  И повеле Иуда проповедати в полце ополчитися коемуждо, в немже кто есть месте.
I Ma CSlEliza 5:50  И ополчишася мужие силы и ратоваша град той весь день и всю нощь. И предадеся град в руки его.
I Ma CSlEliza 5:51  И поби всяк мужеск пол усты меча и искорени его, и взя корысти его и пройде сквозе град по убиеным.
I Ma CSlEliza 5:52  И преидоша Иордан в поле великое противу лицу Вефсана.
I Ma CSlEliza 5:53  И бе Иуда собирая дальнейших и увещаваше людий по всему пути, дондеже приидут в землю Иудину.
I Ma CSlEliza 5:54  И взыдоша на гору Сион с веселием и радостию и принесоша всесожжения, яко не паде от них ни един, дондеже возвратишася в мире.
I Ma CSlEliza 5:55  И во дни, в няже бысть Иуда и Ионафан в Галааде, и Симон брат его в Галилеи противу лицу Птолемаиды,
I Ma CSlEliza 5:56  слыша Иосиф Захариин сын и Азариа, началницы силы, о вещех благосодеянных и о бранех, яже сотвориша,
I Ma CSlEliza 5:57  и реша: сотворим и мы себе имя и пойдем ратовати на языки, иже окрест нас.
I Ma CSlEliza 5:58  И возвестиша сущым от силы яже с ними и идоша на Иамнию.
I Ma CSlEliza 5:59  И изыде Горгиа из града и мужие его во сретение им на брань.
I Ma CSlEliza 5:60  И побежден бысть Иосиф и Азариа, и гнани быша даже до предел Иудиных: и падоша в день он от людий Израилевых яко две тысящы мужей. И бысть язва велика в людех Израилевых,
I Ma CSlEliza 5:61  понеже не послушаша Иуды и братий его, мнящеся храбри быти:
I Ma CSlEliza 5:62  тии же не бяху от семене мужей онех, имиже дадеся спасение Израилю рукою их.
I Ma CSlEliza 5:63  И муж Иуда и братия его прославишася зело пред всем Израилем и языки всеми, идеже слышашеся имя их.
I Ma CSlEliza 5:64  И совокупишася к ним благо глаголющии.
I Ma CSlEliza 5:65  И изыде Иуда и братия его, и ратоваху сынов Исавлих в земли яже к югу, и порази Хеврона и дщери его, и разори твердыни его, и столпы его пожже окрест.
I Ma CSlEliza 5:66  И воздвижеся ити в землю иноплеменников и прохождаше Самарию.
I Ma CSlEliza 5:67  В день он падоша священницы на брани, хотящии храбрее быти, внегда изыти им на брань без совета (его).
I Ma CSlEliza 5:68  И уклонися Иуда во Азот в землю иноплеменников, и разори капища их, и изваяния богов их сожже огнем, и взя корысти от градов, и возвратися в землю Иудину.