VulgClementine - Lamentations - 3

3:1  Ego vir videns paupertatem meam in virga indignationis ejus.

3:2  Me minavit, et adduxit in tenebras, et non in lucem.

3:3  Tantum in me vertit et convertit manum suam tota die.

3:4  Vetustam fecit pellem meam et carnem meam ; contrivit ossa mea.

3:5  Ædificavit in gyro meo, et circumdedit me felle et labore.

3:6  In tenebrosis collocavit me, quasi mortuos sempiternos.

3:7  Circumædificavit adversum me, ut non egrediar ; aggravavit compedem meum.

3:8  Sed et cum clamavero, et rogavero, exclusit orationem meam.

3:9  Conclusit vias meas lapidibus quadris ; semitas meas subvertit.

3:10  Ursus insidians factus est mihi, leo in absconditis.

3:11  Semitas meas subvertit, et confregit me ; posuit me desolatam.

3:12  Tetendit arcum suum, et posuit me quasi signum ad sagittam.

3:13  Misit in renibus meis filias pharetræ suæ.

3:14  Factus sum in derisum omni populo meo, canticum eorum tota die.

3:15  Replevit me amaritudinibus ; inebriavit me absinthio.

3:16  Et fregit ad numerum dentes meos ; cibavit me cinere.

3:17  Et repulsa est a pace anima mea ; oblitus sum bonorum.

3:18  Et dixi : Periit finis meus, et spes mea a Domino.

3:19  Recordare paupertatis, et transgressionis meæ, absinthii et fellis.

3:20  Memoria memor ero, et tabescet in me anima mea.

3:21  Hæc recolens in corde meo, ideo sperabo.

3:22  Misericordiæ Domini, quia non sumus consumpti ; quia non defecerunt miserationes ejus.

3:23  Novi diluculo, multa est fides tua.

3:24  Pars mea Dominus, dixit anima mea ; propterea exspectabo eum.

3:25  Bonus est Dominus sperantibus in eum, animæ quærenti illum.

3:26  Bonum est præstolari cum silentio salutare Dei.

3:27  Bonum est viro cum portaverit jugum ab adolescentia sua.

3:28  Sedebit solitarius, et tacebit, quia levavit super se.

3:29  Ponet in pulvere os suum, si forte sit spes.

3:30  Dabit percutienti se maxillam : saturabitur opprobriis.

3:31  Quia non repellet in sempiternum Dominus.

3:32  Quia si abjecit, et miserebitur, secundum multitudinem misericordiarum suarum.

3:33  Non enim humiliavit ex corde suo et abjecit filios hominum.

3:34  Ut conteret sub pedibus suis omnes vinctos terræ.

3:35  Ut declinaret judicium viri in conspectu vultus Altissimi.

3:36  Ut perverteret hominem in judicio suo ; Dominus ignoravit.

3:37  Quis est iste qui dixit ut fieret, Domino non jubente ?

3:38  Ex ore Altissimi non egredientur nec mala nec bona ?

3:39  Quid murmuravit homo vivens, vir pro peccatis suis ?

3:40  Scrutemur vias nostras, et quæramus, et revertamur ad Dominum.

3:41  Levemus corda nostra cum manibus ad Dominum in cælos.

3:42  Nos inique egimus, et ad iracundiam provocavimus ; idcirco tu inexorabilis es.

3:43  Operuisti in furore, et percussisti nos ; occidisti, nec pepercisti.

3:44  Opposuisti nubem tibi, ne transeat oratio.

3:45  Eradicationem et abjectionem posuisti me in medio populorum.

3:46  Aperuerunt super nos os suum omnes inimici.

3:47  Formido et laqueus facta est nobis vaticinatio, et contritio.

3:48  Divisiones aquarum deduxit oculus meus, in contritione filiæ populi mei.

3:49  Oculus meus afflictus est, nec tacuit, eo quod non esset requies.

3:50  Donec respiceret et videret Dominus de cælis.

3:51  Oculus meus deprædatus est animam meam in cunctis filiabus urbis meæ.

3:52  Venatione ceperunt me quasi avem inimici mei gratis.

3:53  Lapsa est in lacum vita mea, et posuerunt lapidem super me.

3:54  Inundaverunt aquæ super caput meum ; dixi : Perii.

3:55  Invocavi nomen tuum, Domine, de lacu novissimo.

3:56  Vocem meam audisti ; ne avertas aurem tuam a singultu meo et clamoribus.

3:57  Appropinquasti in die quando invocavi te ; dixisti : Ne timeas.

3:58  Judicasti, Domine, causam animæ meæ, redemptor vitæ meæ.

3:59  Vidisti, Domine, iniquitatem illorum adversum me : judica judicium meum.

3:60  Vidisti omnem furorem, universas cogitationes eorum adversum me.

3:61  Audisti opprobrium eorum, Domine, omnes cogitationes eorum adversum me.

3:62  Labia insurgentium mihi, et meditationes eorum adversum me tota die.

3:63  Sessionem eorum et resurrectionem eorum vide ; ego sum psalmus eorum.

3:64  Redes eis vicem, Domine, juxta opera manuum suarum.

3:65  Dabis eis scutum cordis, laborem tuum.

3:66  Persequeris in furore, et conteres eos sub cælis, Domine.