Azeri - II Timothy

Chapter 1

1:1  تارينين ائراده‌سي ائله مسئح عئسادا اولان حياتين وعده​سئنه گؤره، مسئح عئسانين حوارئسي پولوسدان،

1:2  سوگئلي اوغلوم تئموتاعوسا: آتا تاري و ربّئمئز مسئح عئسادان فيض، رحمت، و باريش اولسون.

1:3  گجه-گوندوز سني دوعالاريمدا دائم خاطيرلاديقدا تارييا شوکور ادئرم کي، تمئز وئجدانلا، اجداديمين خئدمت اتدئيي کئمي، اونا خئدمت ادئرم.

1:4  و سنئن گؤزياشلاريني خاطيرلاديقجا سني گؤرمه‌يه حسرت چکئرم. اِله کي، شادليقدان دولوم.

1:5  سنده اولان خالئص ائماني يادا ساليرام کي، اوّلجه سنئن بؤيوک آنان لويئس و آنان يونئسده ساکئن اولدو و اَمئنم کي، سنده ده ساکئندئر.

1:6  بو سببدن سنه خاطيرلاديرام کي، منئم اَل قويماغيمين واسئطه‌سئله سنده اولان تارينين عطاسيني تزه​دن آلوولانديراسان.

1:7  دوغرودان دا کي، تاري بئزه قورخو روحونو يوخ، قودرت، محبّت و ائنضئباط روحونو ورئب.

1:8  بونا گؤره ربّئمئزئن شهادتئندن اوتانما، نه ده مندن کي، ربّئن زئندانئسي‌يَم. لاکئن ائنجئلئن عذابلاريندا تارينين قودرتئنه گؤره شرئک اول.

1:9  او تاري کي، بئزه نئجات وردي و بئزي موقدّس بئر دعوتله چاغيردي، عمل​لرئمئزه گؤره يوخ، اؤز مقصد و فيضئنه گؤره کي، ازلدن مسئح عئسادا بئزه عطا اولوندو.

1:10  لاکئن ائندي قورتاريجيميز مسئح عئسانين ظوهورو ائله آشکار اولوب کي، اؤلومو محو اتدي و ائنجئلئن واسئطه‌سئله حيات و بقاني ائشيقلانديردي.

1:11  کي، اونون اوچون من بئر واعئظ، بئر حواري و بئر موعلّئم تعيئن اولموشام.

1:12  بو سببدن ده بو عذابلاري چکئرم، آمّا اوتانميرام. چونکي کئمه ائنانديغيمي بئلئرم و يقئن گتئرمئشم ده کي، اونا امانت وردئيئمي او گونه کئمي حئفظ اتمه‌يه قادئردئر.

1:13  مندن اشئتدئکلرئني مسئح عئسادا اولان ائمان و محبّتده، صحئح تعلئمئن محکي کئمي ساخلا.

1:14  بئزده ساکئن اولان موقدّس روحون وسئله‌سئله سنه امانت ورئلن خزئنه​ني حئفظ ات.

1:15  بو مطلبدن خبرئن وار کي، بوتون آسئيادا اولانلار مندن اوز دؤنده‌رئبلر و فئگِلوس و هِرموجِنِس ده اونلارين آراسيندادير.

1:16  رب رحمتئني اونسئفوروسون اِو اهلئنه عطا اتسئن، چونکي دفه​لرله جانيمي تزه​لندئردي و منئم زنجئرلرئمدن ده اوتانميردي.

1:17  آمّا او، رومدا اولان واخت، جهدله مني آختاريب تاپدي.

1:18  ربّ اونا عطا اتسئن کي، "او گونده" ربدن رحمت تاپسين. و سن چوخ ياخشي بئلئرسن کي، اِفِسوسدا نه خئدمتلر اتدي.

Chapter 2

2:1  بونا گؤره، اوغلوم، مسئح عئسادا اولان فيضده قووّتلي اول.

2:2  چوخ شاهئدلرئن حوضوروندا مندن اشئتدئيئن شيلري او امئن آداملارا تاپشير کي، اؤزگه​لره اؤيرتمه‌يه ده قادئردئرلر.

2:3  مسئح عئسانين ياخشي بئر عسگري کئمي عذابلارا دؤز.

2:4  خئدمتده اولان هچ بئر عسگر اؤزونو بو حياتين گونده​لئک مشغولئيّتلرئنه قاتماز، اِله کي، اونو عسگرلئيه آلاني خوشنود اتسئن.

2:5  ورزئشکار بئري ده موسابئقه​ده جايئزه​ني قازانماز، مگر قانونلارا گؤره رقابت اتمئش اولسون.

2:6  زحمت چکن اکئنچي گرک هاميدان اوّل اؤزو اَکئندن پاي آلسين.

2:7  ددئيمي دوشون، چونکي رب هر شيده سنه فهم وره​جک.

2:8  داوودون نسلئندن اولان و اؤلولردن دئرئلن عئسا مسئحي خاطيرلا کي، بو، منئم خوش خبرئمدئر

2:9  و اونون اوچون ده عذاب چکئرم، حتّا بئر جاني کئمي زنجئرلره باغلانميشام؛ آمّا تارينين سؤزو زنجئرلره باغلانماييب.

2:10  بو سببدن سچئلمئش اولانلارين خاطئري اوچون بوتون بو شيلره دؤزورم، اِله کي، ابدي شؤوکتله مسئح عئسادا اولان نئجاتا يتئشسئنلر.

2:11  بو، اعتئماد اتمه‌لي بئر کلامدير: اگر اونونلا اؤلدوک، اونونلا ياشاياريق دا.

2:12  اگر تاب گتئرک، اونونلا سلطنت اده​جه‌يئک ده. اگر اونو داناق، او دا بئزي دانار.

2:13  اگر وفاسيز اولاق، او وفالي قالار. چونکي اؤزونو دانا بئلمز.

2:14  بو شيلري اونلارا خاطيرلا و تارينين حوضوروندا اونلارا ائخطار ور کي، فايداسيز و اشئدنلري خاراب ادن سؤزلر باره​سئنده چکئشمه‌سئنلر.

2:15  جهد ات کي، اؤزونو تارييا، اوتانماغا مؤحتاج اولمايان و حقئقتئن کلاميني دوزلوکله ائشه سالان بئر ائشچي کئمي مقبول اده​سن.

2:16  آمّا دونيه‌وي و باطئل دانيشاندان پرهئز ات، چونکي آدامي داها چوخ دئنسئزلئيه چکر

2:17  و اونلارين کلامي قانقارين کئمي ياييلار. هئمنايوس و فئلتوس اونلاردانديرلار

2:18  کي، حقئقتدن آزيب ديئرلر: "اؤلولرئن دئرئلئشي باش ورئب" و بعضئلرئن ائمانيني آزديريرلار.

2:19  لاکئن حله ده تارينين مؤحکم بونؤوره​سي دورور و اوستونده بو مؤهورو وار: "رب اؤزونونکو اولانلاري تاني‌يير" و "ربّئن آديني چاغيران هرکس گرک اؤزونو پئسلئکدن اوزاق ساخلاسين."

2:20  بؤيوک بئر اِوده آنجاق قيزيل و يا گوموش قابلار يوخدور، تاختادان و پالچيقدان اولان قابلار دا وار، بعضئلري حؤرمت اتمک اوچون، بعضئلري حؤرمتسئزلئک اتمک اوچون.

2:21  بلجه، اگر کئمسه اؤزونو بونلاردان تمئز اتسه، حؤرمتلي بئر قاب اولاجاق، تقدئس اولونموش، آغاسينا فايدالي و هر ياخشي ائشه حاضير.

2:22  جاوانليق شهوتلرئندن قاچ و ربّي تمئز اورکله چاغيرانلارلا، صالحلئک، ائمان، محبّت و باريش دالينجا گت.

2:23  عاغيلسيزليق و جاهئل‌لئکدن چيخان سؤزلري ردّ ات و بئل کي، اونلار داعوا قالديرارلار.

2:24  اؤزونو ربّه قول ادن، داعواکار بئري اولماز. هامييا مهرئبان اولار، تعلئم وره بئلر، سهو ائشلر گؤرولنده صبئرلي اولار،

2:25  ضئدّ دورانلاري حلئملئکله ائصلاح اِدَر، اِله کي، بلکه تاري اونلاري تؤوبه​يه چکسئن و حقئقتي آنلاسينلار

2:26  و عاغيل‌لاري باشلارينا گلسئن و ائبلئسئن توروندان کي، اونلاري اؤز ائراده​سئني يرئنه يتئرمک اوچون اسئر ساخلاييب، قاچسينلار.

Chapter 3

3:1  لاکئن بونو بئل کي، آخير گونلرده چتئن زامانلار گله​جک.

3:2  چونکي ائنسانلار اؤزلرئني‌سِوَن، پول‌پرست، لافچي، کئبئرلي، سؤين، والئدينلره ناموطئع، ناسئپاس، ناپاک،

3:3  سِومه‌ين، باريشمايان، قيبتچي، پرهئزسئز، مورووّتسئز، ياخشيليقدان نئفرت ادن،

3:4  حؤقّه​باز، مولاحئظه اتمه‌ين، تکبّورلو، عيّاشليغي تاريدان داها چوخ سون،

3:5  دئندارليغين ظاهئرئني ساخلايان آمّا اونون قووّتئني دانان اولاجاقلار؛ بله آداملاردان اؤزونو اوزاق ساخلا.

3:6  چونکي بونلارين آراسيندا او آداملار دا وار کي، اِولره گئرئب، جوربه​جور هوسلرئن دالينجا قاچان و گوناه يوکونون آلتيندا اولان ضعئف آروادلاري اسئر ادئرلر.

3:7  اونلاري کي، دائم اؤيره‌نئرلر، لاکئن هچ واخت حقئقتي آنلايا بئلمئرلر.

3:8  يانّئس و يَمبه‌رئس نجه موسايا ضئدّ دوردولار، بو آداملار دا حقئقته ضئدّ دورورلار کي، عاغيلدا فاسئد، ائماندا دا مردوددورلار.

3:9  آمّا بوندان آرتيق ترقّي اتمه‌يه​جکلر؛ چونکي اونلارين آخماقليغي هامييا آيدين اولاجاق، نجه کي، يانّئس و يَمبه‌رئسئن آخماقليغي اولدو.

3:10  آمّا سن منئم تعلئمئمي، رفتاريمي، مقصدئمي، ائمانيمي، صبرئمي، محبّتئمي، تحمّولومو،

3:11  ائشکنجه​لرئمي و عذابلاريمي ياخيندان گؤروبسن؛ انطاکئيه​ده، ائقونئيه​ده و لئستره‌ده باشيما گلنلر کئمئدن. نه ائشکنجه​لر باشيما گلدي و نجه رب اونلارين هاميسيندان مني قورتاردي!

3:12  دوغرودان دا مسئح عئسادا دئندارليقلا ياشاماق ائسته‌ين بوتون آداملار عذاب چکه​جکلر.

3:13  لاکئن پئس و حؤقّه​باز آداملار آلداديب، آلدانماقلا پئسلئکده ترقّي اده​جکلر.

3:14  آمّا سن، اؤيره‌ندئيئن و يقئن تاپديغين شيلرده داوام ات، چونکي بئلئرسن کي، کئمدن اؤيره‌ندئن.

3:15  و اوشاقليغيندان دا موقدّس يازيلاري بئلئبسن کي، قادئردئلر سنه حئکمت ورسئنلر و سني ائمان واسئطه‌سئله مسئح عئسادا اولان نئجاتا چاتديرسينلار.

3:16  بوتون موقدّس يازيلار تارينين ائلهاملاماسي‌دير و تعلئم، توبئخ، يولا گتئرمک، و صالحلئکده تربئيه تاپماق اوچون فايدالي‌دير،

3:17  اِله کي، تارينين آدامي کامئل و هر ياخشي ائش اوچون تجهئز اولسون.

Chapter 4

4:1  تاري و مسئح عئسانين حوضوروندا کي، اؤلولر و دئرئلري موحاکئمه اده​جک، سني اونون ظوهور و پادشاهليغينا آند ورئرم:

4:2  کلامي وعظ ات، واخت-بِواخت حاضير اول، بؤيوک صبر و نصئحتله ائصلاح ات، توبئخ ات، تشوئق ات.

4:3  چونکي اِله بئر زامان گله​جک کي، اونلار آرتيق صحئح تعلئمه دؤزمه‌يه​جکلر؛ لاکئن قولاقلاري قاشيناراق، اؤز هوسلرئنه موطابئق موعلّئملر ييغاجاقلار

4:4  و قولاقلاريني حقئقتدن دؤنده‌رئب، افسانه​لره اوز گتئره​جکلر.

4:5  لاکئن سن هر شيده آييق اول، چتئنلئيه دؤز، بئر موبشّئرئن ائشئني گؤر، خئدمتئني يرئنه يتئر.

4:6  چونکي من آرتيق ائچمه قورباني کئمي تؤکولموشم و منئم رحلت زامانيم يتئشئب.

4:7  ياخشي ساواشي ساواشميشام، دؤورو آخيرينا يتئرمئشم، ائماني حئفظ اتمئشم.

4:8  گله​جکده منئم اوچون صالحلئک تاجي حاضيرلانيب کي، رب، او صالح داور او گونده اونو منه جايئزه وره​جک؛ آنجاق تک منه يوخ، اونون ظوهورونو سِوَن هامييا.

4:9  چاليش کي، منئم يانيما تز گله​سن.

4:10  چونکي دئماس بو حاضير دونيانين سوگئسي اوچون مني ترک ادئب و تسالونئکئه گدئب؛ کرئسکئس قالاتئيايا، تئطوس دا دالماتئيايا گدئب.

4:11  آنجاق لوقا يانيمدادير. مرقوسو گؤتور و اؤزونله گتئر، چونکي منه خئدمت اوچون فايدالي‌دير.

4:12  تئخئکوسو اِفِسوسا گؤنده‌رمئشم.

4:13  گلنده تروآسدا کرپوسون يانيندا قويدوغوم رداني، کئتابلاري، خوصوصن ده طومارلاري گتئر.

4:14  مئسگر ائسکندر منه چوخ يامانليق اتدي؛ رب اونا عمل‌لرئنه گؤره عوض وره​جکدئر.

4:15  شخصن اوندان موواظئب اول، چونکي بئزئم تعلئمه شئدّتله ضئدّ دوردو.

4:16  بئرئنجي دئفاعيمدا هچ کس منه آرخا اولمادي؛ هامي مني ترک اتدي. اولسون کي، بو اونلارين ضئدّئنه ساييلماسين.

4:17  لاکئن رب منئمله دوروب، منه قووّت وردي، اِله کي، منئم واسئطمله ائنجئلئن اعلاني کامئل بئر شکئلده يرئنه يتئشسئن و بوتون قيري‌​يهودئلر اونو اشئتسئنلر. و من آصلانين آغزيندان قورتولدوم.

4:18  رب مني هر پئس عملدن قورتاريب، امئن-آمانليقدا اؤز گؤيده‌کي پادشاهليغينا گتئره​جک. اونا ازلدن ابده​جک شؤوکت اولسون. آمئن.

4:19  پرئسکا و اکئلايا، و اونسئفوروسون اِو اهلئنه سالام يتئر.

4:20  اِراستوس قورئنتده قالدي، لاکئن تروفئموسو مئلئتوسدا ناخوش بوراخديم.

4:21  چاليش کي، قيشدان قاباق گله​سن. يوبولوس سنه سالام گؤنده‌رئر، هم ده پودِنس، لئنوس، کلودئيا و بوتون قارداشلار.

4:22  رب سنئن روحونلا اولسون. فيض سئزئنله اولسون.