CSlElizabeth - II Timothy

Chapter 1

1:1  Павел, Апостол Иисус Христов волею Божиею, по обетованию жизни, яже о Христе Иисусе,

1:2  Тимофею возлюбленному чаду: благодать, милость, мир от Бога Отца и Христа Иисуса Господа нашего.

1:3  Благодарю Бога, Емуже служу от прародителей чистою совестию, яко непрестанную имам о тебе память в молитвах моих день и нощь,

1:4  желая видети тя, поминая слезы твоя, да радости исполнюся,

1:5  воспоминание приемля о сущей в тебе нелицемерней вере, яже вселися прежде в бабу твою Лоиду и в матерь твою Евникию: известен же есмь, яко и в тебе.

1:6  Еяже ради вины воспоминаю тебе возгревати дар Божий живущий в тебе возложением руку моею:

1:7  не бо даде нам Бог духа страха, но силы и любве и целомудрия.

1:8  Не постыдися убо страстию Господа нашего Иисуса Христа, ни мною юзником Его: но спостражди благовествованию (Христову) по силе Бога,

1:9  спасшаго нас и призвавшаго званием святым, не по делом нашым, но по Своему благоволению и благодати данней нам о Христе Иисусе прежде лет вечных,

1:10  явльшейся же ныне просвещением Спасителя нашего Иисуса Христа, разрушившаго убо смерть и возсиявшаго жизнь и нетление благовествованием,

1:11  в неже поставлен бых аз проповедник и Апостол и учитель языков.

1:12  Еяже ради вины и сия стражду: но не стыждуся. Вем бо, Емуже веровах, и известихся, яко силен есть предание мое сохранити в день он.

1:13  Образ имей здравых словес, ихже от мене слышал еси, в вере и любви, яже о Христе Иисусе.

1:14  Доброе завещание соблюди Духом Святым живущим в нас.

1:15  Веси ли сие, яко отвратишася от мене вси, иже от Асии, от нихже есть Фигелл и Ермоген.

1:16  Да даст (же) милость Господь Онисифорову дому, яко многажды мя упокои и вериг моих не постыдеся,

1:17  но пришед в Рим, тощнее взыска мя и обрете:

1:18  да даст ему Господь обрести милость от Господа в день он: и елико во Ефесе послужи ми, добрее ты веси.

Chapter 2

2:1  Ты убо, чадо мое, возмогай во благодати, яже о Христе Иисусе,

2:2  и яже слышал еси от мене многими свидетели, сия предаждь верным человеком, иже доволни будут и иных научити.

2:3  Ты убо злопостражди яко добр воин Иисус Христов.

2:4  Никтоже (бо) воин бывая обязуется куплями житейскими, да воеводе угоден будет.

2:5  Аще же и постраждет кто, не венчается, аще не законно мучен будет.

2:6  Труждающемуся делателю прежде подобает от плода вкусити.

2:7  Разумей, яже глаголю: да даст убо тебе Господь разум о всем.

2:8  Поминай (Господа) Иисуса Христа воставшаго от мертвых, от семене Давидова, по благовествованию моему,

2:9  в немже злостражду даже до уз, яко злодей: но слово Божие не вяжется.

2:10  Сего ради вся терплю избранных ради, да и тии спасение улучат еже о Христе Иисусе, со славою вечною.

2:11  Верно слово: аще бо с Ним умрохом, то с Ним и оживем:

2:12  аще терпим, с Ним и воцаримся: аще отвержемся, и Той отвержется нас:

2:13  аще не веруем, Он верен пребывает: отрещися бо Себе не может.

2:14  Сия воспоминай, засвидетелствуя пред Господем, не словопретися, ни на куюже потребу, на разорение слышащих.

2:15  Потщися себе искусна поставити пред Богом, делателя непостыдна, право правяща слово истины.

2:16  Скверных же тщегласий отметайся: наипаче бо преспеют в нечестие,

2:17  и слово их яко гаггрена жир обрящет: от нихже есть Именей и Филит,

2:18  иже о истине погрешиста, глаголюща, яко воскресение уже бысть: и возмущают некоторых веру.

2:19  Твердое убо основание Божие стоит, имущее печать сию: позна Господь сущыя Своя, и: да отступит от неправды всяк именуяй имя Господне.

2:20  В велицем же дому не точию сосуди злати и сребряни суть, но и древяни и глиняни: и ови убо в честь, ови же не в честь.

2:21  Аще убо кто очистит себе от сих, будет сосуд в честь, освящен и благопотребен Владыце, на всякое дело благое уготован.

2:22  Похотей юных бегай, держися же правды, веры, любве, мира со всеми призывающими Господа от чистаго сердца.

2:23  Буих же и ненаказанных стязаний отрицайся, ведый, яко раждают свары:

2:24  рабу же Господню не подобает сваритися, но тиху быти ко всем, учителну, незлобиву,

2:25  с кротостию наказующу противныя, еда како даст им Бог покаяние в разум истины,

2:26  и возникнут от диаволския сети, живи уловлени от него в свою его волю.

Chapter 3

3:1  Сие же веждь, яко в последния дни настанут времена люта.

3:2  Будут бо человецы самолюбцы, сребролюбцы, величави, горди, хулницы, родителем противящиися, неблагодарни, неправедни, нелюбовни,

3:3  непримирителни, (продерзиви, возносливи, прелагатае,) клеветницы, невоздержницы, некротцы, неблаголюбцы,

3:4  предателе, нагли, напыщени, сластолюбцы паче нежели боголюбцы,

3:5  имущии образ благочестия, силы же его отвергшиися. И сих отвращайся.

3:6  От сих бо суть поныряющии в домы и пленяющии женишца отягощенныя грехами, водимыя похотьми различными,

3:7  всегда учащяся и николиже в разум истины приити могущыя.

3:8  Якоже Ианний и Иамврий противистася Моисею, такожде и сии противляются истине, человецы растленни умом (и) неискусни о вере.

3:9  Но не преуспеют более: безумие бо их явлено будет всем, якоже и онех бысть.

3:10  Ты же последовал еси моему учению, житию, привету, вере, долготерпению, любви, терпению,

3:11  изгнанием, страданием, якова ми быша во Антиохии, (и) во Иконии, (и) в Листрех: якова изгнания приях, и от всех мя избавил есть Господь.

3:12  И вси же хотящии благочестно жити о Христе Иисусе, гоними будут:

3:13  лукавии же человецы и чародее преупеют на горшее, прельщающе и прельщаеми.

3:14  Ты же пребывай в нихже научен еси и яже вверена суть тебе, ведый, от кого научился еси:

3:15  и яко измлада священная писания умееши, могущая тя умудрити во спасение верою, яже о Христе Иисусе.

3:16  Всяко Писание богодухновенно и полезно (есть) ко учению, ко обличению, ко исправлению, к наказанию еже в правде,

3:17  да совершен будет Божий человек, на всякое дело благое уготован.

Chapter 4

4:1  Засвидетелствую убо аз пред Богом и Господем нашим Иисус Христом, хотящим судити живым и мертвым в явлении Его и Царствии Его:

4:2  проповедуй слово, настой благовременне и безвременне, обличи, запрети, умоли со всяким долготерпением и учением.

4:3  Будет бо время, егда здраваго учения не послушают, но по своих похотех изберут себе учители, чешеми слухом:

4:4  и от истины слух отвратят, и к баснем уклонятся.

4:5  Ты же трезвися о всем, злопостражди, дело сотвори благовестника, служение твое известно сотвори.

4:6  Аз бо уже жрен бываю, и время моего отшествия наста:

4:7  подвигом добрым подвизахся, течение скончах, веру соблюдох:

4:8  прочее убо соблюдается мне венец правды, егоже воздаст ми Господь в день он, праведный Судия: не токмо же мне, но и всем возлюбльшым явление Его.

4:9  Потщися скоро приити ко мне.

4:10  Димас бо мене остави, возлюбив нынешний век, и иде в Солунь: Крискент в Галатию, Тит в Далматию: Лука един есть со мною.

4:11  Марка поемь приведи с собою, есть бо ми благопотребен в службу.

4:12  Тихика же послах во Ефес.

4:13  Фелон, егоже оставих в Троаде у Карпа, грядый принеси, и книги, паче же кожаныя.

4:14  Александр ковачь многа ми зла сотвори: да воздаст ему Господь по делом его:

4:15  от негоже и ты себе блюди, зело бо противится словесем нашым.

4:16  В первый мой ответ никтоже бысть со мною, но вси мя оставиша: да не вменится им.

4:17  Господь же мне предста и укрепи мя, да мною проповедание известно будет, и услышат вси языцы: и избавлен бых от уст львов.

4:18  И избавит мя Господь от всякаго дела лукава и спасет во Царствие Свое Небесное: Емуже слава во веки веков. Аминь.

4:19  Целуй Прискиллу и Акилу и Онисифоров дом.

4:20  Ераст оста в Коринфе: Трофима же оставих в Милите боляща.

4:21  Потщися прежде зимы приити. Целует тя Еввул и Пуд, и Лин и Клавдиа и братия вся.

4:22  Господь Иисус Христос со духом твоим. Благодать с вами. Аминь.