LinVB - II Timothy

Chapter 1

1:1  Pólo, apóstolo wa Krístu Yézu, na bondimi bwa Nzambe lokola elakó ya bomoi bozalí na Krístu Yézu.

1:2  óna Timotéo, mwána wa ngáí wa bolingo, yambá ngrásya, ngolu mpé bobóto bwa Nzámbe Tatá mpé bwa Krístu Yézu Mokonzi wa bísó.

1:3  Natóndí Nzámbe óyo nakosálelaka na motéma sémba, lokóla bankóko ba ngáí basáléláká yě. Ntángo ínso, butú mói, nakokanisaka yǒ o losámbo la ngáí.

1:4  Sókó naku­ndólí o motéma mokolo moye ozalákí kolela na mái o míso, nazalí na mpósá enéne ya komóno yǒ lisúsu mpô nátónda na esengo.

1:5  Nabósání mpé té bóníbóní ozalí na boyambi bwa sôló, lokóla nkóko wa yǒ wa mwásí Loíze mpé mamá wa yǒ Eníka. Nayébí sôló ’te boyambi bôná bozalí mpé o motéma mwa yǒ.

1:6  Yangó wâná nayébísí yǒ lisúsu : óléndisa naíno ngrásya eye Nzámbe atíákí o motéma mwa yǒ o mokolo natíélákí yǒ mabóko.

1:7  Zambí Nzámbe akabélí bísó Elímo ya kobánga té, kasi Elímo ya ngúyá, ya bolingi mpé ya bwányá.

1:8  Bôngó óyóka nsóni té ntángo okosangela nkómbó ya Mokonzi ; óyóka nsóni té mpô ya ngáí, áwa nakangémí o bolóko mpô ya yě. Kasi mpô ya kosangela Nsango Elámu óndima koyóka mpási elongó na ngáí, lokóla Nzámbe akopésaka yǒ ngúyá.

1:9  Yě abíkísí bísó mpé abyángí bísó o mosálá moye mosántu. Asálákí bôngó mpô ya matómba ma bísó té, kasi mpô ya ngrásya ya yě, mpô yě mǒkó alingákí bôngó. Ut’o yambo ya bileko bínso apésí bísó o Krístu Yézu

1:10  ngrásya eye emónóní na Boyéi bwa Mobíkisi wa bísó Yézu Krístu. Yě moto asúkísí bokási bwa liwá, mpé na Nsango Elámu ya yě, azwě lí bísó bomoi bokosílaka té.

1:11  Aponí ngáí násangela yangó, názala apóstolo mpé motéyi.

1:12  Na ntína êná mpé nazalí koyóka mpási sikáwa, kasi nazalí koyóka yangó nsóni té, mpô nayébí na náni nazalí kotía motéma. Nayébí ’te Yě moko akokí kobátela makabo nazwákí ngáí kín’o mokolo akoyâ.

1:13  Landá bobélé matéya ma sôló oyókákí o monoko mwa ngáí, zalá sé na boyambi mpé na bolingi Krístu Yézu.

1:14  Obómba matéya maye ma motúya na lisálisi lya Elímo Sán­tu óyo afándí o mitéma mya bísó.

1:15  Oyébí ’te bandeko bánso ba Azía bakímí ngáí ; Figélo na Ermogene bazalí o káti ya bangó.

1:16  Mokonzi áyókela libótá lya Onesifóro mawa, mpô yě moto aléndísí ngáí motéma mbala míngi, mpé ayókákí minyolólo mya ngáí nsóni té.

1:17  Mokolo akómákí o Róma, alukákí ngáí na moléndé téé amóní ngáí.

1:18  Mokonzi áyókela yě mawa o mokolo akoyâ. Yǒ mǒkó oyébí malámu bóníbóní asálísákí ngáí o Eféze.

Chapter 2

2:1  Yǒ, mwána wa ngáí, ómíléndisa na ngrásya ya Krístu Yézu.

2:2  Maye oyókákí o monoko mwa ngáí o míso ma bato baíké, ótéya mangó na bato ba sôló, baye bakokí mpé kotéya bato basúsu nsima.

2:3  Oyéba kondima mpási lokóla sodá malámu wa Krístu Yézu.

2:4  Moto akosálaka mosálá mwa sodá, akopangana té na makambo ma baye bazalí basodá té, sókó alingí kosepelisa mokonzi wa yě.

2:5  Sé bôngó bato bakomekanaka o libándá lya masano : bobélé moto atósí mibéko akokí kolónga.

2:6  Moto wa bilanga óyo ayókí mpási o mosálá, yě moto wa libosó akokí kolía mbuma ya mosálá mwa yě.

2:7  Kanisá maye nayébísí yǒ : Mokonzi akolakisa yǒ ntína ya maye mánso.

2:8  Okundola o motéma ’te Yézu Krístu, mwána wa Davídi, asékwí o bawá, lokóla eyébání o Nsango Elámu nakosangelaka.

2:9  Nazalí koyóka malózí mpô ya yě, kútu bakangí ngáí na minyolólo lokóla moto asálákí mabé. Kasi bakokí kokanga Liloba lya Nzambe na minyolólo té.

2:10  Yangó wâná nakoka­ngaka motéma o makambo mánso mpô ya baye Nzámbe aponí, mpô ’te Krístu Yézu ábíkisa bangó mpé bázwa nkémbo ya sékô.

2:11  Liloba liye lizalí lya sôló : sókó tokúfí na yě elongó, tokozwa bomoi na yě elongó ;

2:12  sókó tokotía moléndé, tokozwa bokonzi na yě elongó ; kasi sókó tokowángana yě, yě mpé akowángana bísó.

2:13  Atâ bísó tobóyí yě, yě akotíka bísó té, zambí akokí komíbóya té.

2:14  Kokundolela mâná mánso na bato ; bóndélá bangó o míso ma Nzámbe ’te báwéla ntembe na maloba ma mpámba té ; yangó ekokí bobélé kokwêisa baye bakoyóka bangó.

2:15  Tíá moléndé mpô ’te Nzámbe ámóno yǒ moto malámu, lokóla mosáli óyo asengélí koyóka nsóni té. Sakólá maloba ma bosôló polélé.

2:16  Kímá bilobáloba mpé maloba maye matálí boyambi té ; baye bakosololaka mangó bakokóba kobóya Nzámbe.

2:17  Matéya ma bangó mazalí lokóla mpótá ekolíaka misuni malémbe malé­mbe. Imenéo na Filéto bakosálaka mpé bôngó :

2:18  batíkí matéya ma sôló, bakómí koloba ’te nsékwa esílí esálémí. Babébísí bôngó boyambi bwa bato basúsu.

2:19  Kasi Nzámbe atíákí mabángá ma nsé makási ; o mabángá maye ekomámí boye : Mokonzi ayébí bato ba yě mpé : Moto nyónso atá­ngí nkómbó ya Mokonzi ákíma makambo mazángí bosémbo.

2:20  O ndáko inéne mbéki izalí ndé-ngé na ndéngé : ya wólo, ya paláta, ya mabáyá, ya libází. Mbéki isúsu izalí na mosálá mwa bokémbisi ndáko, isúsu mpô ya misálá mya mikolo mínso.

2:21  Moto abóyí makambo mazángí bosémbo azalí lokóla mbéki ya lokúmu : apétwámí, azalí moto wa ntína, akokí na misálá milámu mínso.

2:22  Tíká kolanda mpósá eye bile­ngé bakoyókaka. Luká bosémbo, boyambi, bolingi na bobóto, elo­ngó na baye bakosámbelaka Mokonzi na motéma péto.

2:23  Tíká mpé kowéla makambo ma mpámba, ma bozóba. Oyébí ’te yangó ekobimisaka boswâni.

2:24  Mosáleli wa Mokonzi akokí kozala moto wa bo­swâni té, kasi ázala na bobóto na bato bánso ; áyéba kotéya malámu bato mpé kokanga motéma.

2:25  Apálela na bobóto bato ba motó makási, mbele Nzámbe akopésa bangó ngrásya ’te bábóngola mitéma mpé bákóma koyéba matéya ma sôló ;

2:26  bázwa bôngó lisúsu mayéle mpé bakobíka o mitámbo mya zábolo, óyo alingí kokanga bangó mpô ’te bázala baómbo ba yě.

Chapter 3

3:1  Osengélí koyéba ’te o mikolo mya nsúka makambo ma kwókósó makozánga té.

3:2  O ntángo êná bato bakoluka bobélé bolámu bwa bangó mǒkó, bakozala na lokósó la mbóngo, na lofúndo mpé na loléndo, bakotúka Nzámbe, bakoto­mbokela babóti, bakoyéba kotó­ndo báníngá té, bakosántola bilóko bisántu,

3:3  bakozala motéma libángá, bakoyókela bato basúsu ngolu té, bakokósela báníngá makambo, bakotomboko mpé bakongala, bakoyina makambo malámu ;

3:4  bakotéke báníngá, bakobóya koyéba makáma, bakotónda na loléndo, bakolanda bisengo bya mokili, bakobóya Nzámbe.

3:5  Bakolinga komílakisa bǒ bato ba Nzámbe, kasi bakobóya ngúyá ya yě ya sôló. Bangó bánso, ókíma bangó.

3:6  Basúsu o káti ya bangó bako­kótoko o ndáko ya bato mpô ya kokósa básí bazángí mayélé, baye bazalí komeme mókúmbá mwa masúmu ma bangó mpé bakolandaka mpósá ya kosála mabé ndéngé na ndéngé.

3:7  Atâ bakoyékolaka ntángo ínso, bakoyéba matéya ma sôló mokolo mǒkó té.

3:8  Lokóla Yanes na Yambres batombókéláká Móze, bangó mpé bakobóya matéya ma sôló ; mitéma mya bangó mibébá, mpé boyambi bwa bangó bokómí mpámba.

3:9  Nzókandé bakoke­nde mosíká té, bozóba bwa bangó ndébomónóní o míso ma bato bánso, lokóla esálémákí na bato baye bábalé natángákí.

3:10  Kasi yǒ olandí matéya, ezalela, mikáno, boyambi mpé bolingi bwa ngáí, ndéngé nakokangaka motéma mpé nakotíaka moléndé,

3:11  o ntángo ya minyóko mpé ya mpási, lokóla ikwêlákí ngáí o Antiókia, o Ikónio mpé o Lístra. Kúná banyókólí ngáí míngi ! Kasi Mokonzi abíkísí ngáí o mpási îná ínso.

3:12  Sé bôngó, bato bánso bandimí kosálela Nzámbe mpô ya Yézu Krístu bako­nyókwama.

3:13  Kasi basúmuki mpé bato ba lokutá bakokólisa sé mabé ma bangó, áwa bakokósa bato basúsu mpé bakomíkósa.

3:14  Kasi yǒ, landá matéya nalakísí yǒ ; oyébí ’te mazalí matéya ma sôló, oyébí mpé banáni batéyákí yǒ mangó.

3:15  Ut’o bomwána oyébí Minkandá Misántu mikokí kopésa bwányá mpô ’te óbíka sókó oya­mbí Krístu Yézu.

3:16  Minkandá mîná mínso mikomámí na lisálisi lya Nzámbe mikokí kotéya, kopálela, kobongisa mpé kokólisa moto o bosémbo :

3:17  bôngó moto wa Nzámbe akobongo mpenzá mpé akokoka kosála mánso malámu.

Chapter 4

4:1  O míso ma Nzámbe mpé ma Krístu Yézu óyo akokáta makambo ma bato bazalí na bomoi mpé ma baye bawá, nabóndélí yǒ o nkómbó ya óyo akoyâ mpé akozwa bokonzi :

4:2  sakólá Liloba lya Nzámbe, téyá lyangó na molé­ndé, bándima tǒ bándima té ; súkísá bato ba lokutá, pálélá mpé léndísá na motéma molaí mpenzá, sé na makanisi ma kotéya bangó.

4:3  Zambí o eleko ekoyâ bato bakokoka na matéya ma sôló lisúsu té, bakola­nda makanisi ma bangó mǒkó mpé bakopono batéyi baíké, baye bakotéya bangó maye makosepelisa bangó.

4:4  Bakobóya koyóka matéya ma sôló mpé bakotía matói na masapo ma mpámba.

4:5  Kasi yǒ, zalá na bokébi o makambo maye, ndimá koyóka mpási, sakólá Nsango Elámu, ómípésa mobimba na mosálá bapésí yǒ.

4:6  Makilá ma ngáí malingí másopana bǒ libonza ; ntángo ya liwá lya ngáí ekokí.

4:7  Nabundí etumba malámu téé nsúka, nasúkísí mosálá batíndí ngáí, natíkí boyambi té.

4:8  Sikáwa basílí babongísélí ngáí ekoti ya bosémbo ; Mokonzi, yě Zúzi ntá bosémbo, akolátisa ngáí yangó o Mokolo akoyâ ; akolátisa yangó bobélé ngáí té, kasi bato bánso bazalí kozila boyéi bwa yě na motéma bolingi.

4:9  Sálá makási, bôngó óyâ nokí epái ya ngáí,

4:10  mpô Démas atíkí ngáí mpé alandí mambí ma nsé ; akeí o Tesaloníki, Krésens akeí o Galáta mpé Títo akeí o Dalmásia.

4:11  Bobélé Lúka azalí na ngáí áwa. Kamátá Márko, yáká na yě nzelá yǒ kó, zambí akokí kosálisa ngáí malámu áwa.

4:12  Nasílí natíndí Tisíko o Eféze.

4:13  Ntángo okoyâ, kamátá monkóto moye natíkákí o ndáko ya Kárpo o Tróas ; yáká mpé na búku, kasi libosó mpenzá minkandá miye mikomámí o mposo ya nyama.

4:14  Alesándro, monyángwisi wa mbengi asálí ngáí mabé mpenzá. Mokonzi akozóngisela yě engébéné na maye asálákí.

4:15  Yǒ mpé kébá na yě, mpámba té, abóyákí matéya ma bísó na motéma mǒkó.

4:16  Mbala ya yambo nasámbákí likambo lya ngáí, moto mǒkó asálísákí ngáí té, bánso bakímákí ngáí ! Nzámbe álímbisa bangó.

4:17  Kasi Mokonzi yě mǒkó asálísí ngáí mpé aléndísí ngáí mpô ’te, na monoko mwa ngáí, Nsango Elámu épala­ngana mpé bato ba bikólo bisúsu báyóka yangó. Nabíkákí o monoko mwa nkósi.

4:18  Mokonzi akolongola ngáí o mabé mánso, akobíkisa ngáí mpé akokótisa ngáí o Bokonzi bwa yě o likoló. Bákúmisa yě o bileko bínso sékô ! Amen.

4:19  Pésá mbóte na Príska, na Akwíla mpé na bato ba libótá lya Onezifóro.

4:20  Erásto atíkálí o Korínti. Ntángo natíkákí Trofímo o Miléte azalákí kobéle.

4:21  Sálá makási mpô ’te ókóma áwa libosó lya eleko ya mpío. Ebúlo, Pudénso, Líno, Klódia na bandeko bánso batíndélí yǒ mbóte.

4:22  Mokonzi ázala na yǒ ! Ngrásya ézala na bínó !