PohnOld - II Timothy

Chapter 1

1:1  PAULUS, wanporon en Iesus Kristus pan kupur en Kot, duen inau en maur ren Kristus Iesus.

1:2  Ong Timoteus nai seri kompoke pai: Mak o kapunglol, o popol sang ren Kot Sam, o Kristus Iesus atail Kaun en mi re om.

1:3  I danke Kot, me i kin papaki insen ai min sang ren sam ai ko mas due i kin poden lamelame uk ni ai kapakap akan ni pong o nin ran.

1:4  O inong iong kilang uk ni ai tamatamanta duen om sangesang, pwe i en direki peren.

1:5  O ni ai tamanda poson melel, me mi re om, me mi mas ren in om liakalap Lois o in om Oinike o i asa, me a pil mi lol om.

1:6  Ari, i me i men kataman kin uk, koe en kamakamaur pai en Kot, me mi lol om ki pwil pa i kat po om,

1:7  Pwe Kot sota kotiki ong kitail ngen en masak, a en manaman, o limpok o lelapok.

1:8  Koe ari der namenokki om kadedeki atail Kaun, de ngai sapwilim a salidi men, a koe en iang ia kamekameki rongamau duen manaman en Kot.

1:9  Me kotin kamaur kitail da o woronge kin kitail worong saraui, kaidin iran atail wiawia kan, a pweki pein a kupur o mak me a kotin kupura ong kitail ren Kristus Iesus mon tapin kaua.

1:10  A masan wet a sansaleda ni en atail Saunkamaur Iesus Kristus, me kotin kapuiala mana en mela, ap kapwareda maur o so mor pasang ki rongamau.

1:11  I me i kasapwiladang, pwen saunkair o wanporon, o saunpadak en men liki kan.

1:12  I me i pil kin kalokolok ki. A i sota kin namenok kila, pwe i asa me i kin kamelele; o i asa, me a kak nekinekid ai pai, me i aleer, lao lei ran o.

1:13  Dadaurata song en padak en kamaur, me koe rong sang ia er, o poson o limpok ren Kristus Iesus.

1:14  Pai mau o me pwilidier re om, pera ki Ngen saraui, me kotikot lol atail.

1:15  Koe asa, me irail karos, me mi Asien, wuki sang ia; kisan ir Pikelus o Ermokenes.

1:16  Kaun o en kotin maki ong toun im en Onesiporus, pwe pan pak toto a kadek ong ia, o a sota namenok ki ai sal mata.

1:17  Pwe ni a mi Rom, a nantiong rapa kin ia, ap diar ia da.

1:18  Kaun o en kotin kupura ong i kalangan en Kaun o ni ran kokodo. A koe asa mau, duen a papa nan Episus.

Chapter 2

2:1  ARI nai seri keleki mak o, me mi ren Kristus Iesus.

2:2  O me koe ronger sang ia impan saunkadede toto, koe en usai ong aramas lelapok kan, me koiok ong padaki me tei kan.

2:3  Koe iang ia kamekam duen saunpei en Kristus Iesus mau amen.

2:4  Saunpei amen sota kin kadoki pein kan a manga, pwen kon ong me ale i.

2:5  O ma amen pan weir, a sota pan ale kating, ma a sota weir mau.

2:6  A saumat amen, me kin sapasap en tungole mas wa kan.

2:7  Madamadaue duen me i inda, pwe Kaun o pan kotin kalolekong kin uk ni meakaros.

2:8  Tamataman Iesus Kristus, me iasada sang ren me melar akan, kadaudok en Dawid duen ai rongamau,

2:9  Me i kamekameki o salikidi dueta me sued amen, a masan en Kot me so salidier.

2:10  Mepukat karos i kin kamekameki me piladar akan, pwe ren pil konodi maur soutuk ren Kristus Iesus iangaki a lingan soutuk

2:11  Meid melel, ma kitail iang matala, kitail pil pan iang ieiasata;

2:12  Ma kitail dadaurata, kitail pan iang kaunda; ma kitail ponsasa, a pil pan ponsasa kitail;

2:13  Ma kitail sota pan dadaurata, a pan kotin melel weita, pwe a so kak kalikame pein i.

2:14  Kataman kin irail mepukat, kadede ong irail mon Kaun o, ren der akamai ki sip en lokaia kan, me sota pan katepai ong meakot, pwe a pan kasapunge ir ala, me karong akan.

2:15  Nantiong konekonela ren Kot dueta toun dodok amen, me so karepen namenokala mia, me kin padak weita pung masan melel.

2:16  A koe en kang poupou mal akan, pwe ar sapung pan lapalapala.

2:17  Arail padak me pan paraparada due kins. Kisan irail Imenäus o Piletus,

2:18  Me pirok sang melel ni a inda me dene mauredan aramas wiauier, rap kawela poson en akai.

2:19  A pason en Kot pan duedueta, a iet kilel: Kaun o kotin mangi sapwilim a kan, o: Karos, me asa mar en Kaun o, en muei sang me sapung.

2:20  Nan im lapalap kaidin dal kold o silper eta me mia, pwe pil dal tuka o dal pwel, akai men kalingan, o akai kaidin men kalingan.

2:21  A ma amen pan muei sang song en aramas due met, a pan rasong dal men kalingan me kasarauiala, o katepa ong Kaun o mau ong song en wiawia mau karos.

2:22  Tang wei sang inong sued en manakap, ap tang wong pung, o poson o limpok, o popol iangaki karos, me kin kapakapaki ong Kaun o sang nan mongiong ar makelekel;

2:23  A padak mal o likam kan kang, pwe koe asa, me re pan naitikada akamai.

2:24  Ladu en Kaun men ender akamai, a en kadek ong karos, o koiok ong padak o kanongama ong me sued akan.

2:25  O opampap ni a kapung ong me katiwo kan, pwe ele Kot pan kotin sauasa ir, pwe ren wukilang lolekong en melel.

2:26  O ren pil piti sang ni insar en tewil, me a insara kin ir di ong insen a.

Chapter 3

3:1  A IET me koe en asa, ni imwi en ran akan ansau apwal pan pwaida.

3:2  Pwe aramas akan pan kasampwaleki pein irail, o norok moni, o ponmasu, o aklapalap, o lalaue, o sota peiki ong me wia ir adar, o so danke, o me sued.

3:3  O sempok, o sasa mak, o likinekine, o weit, o so kadek, so pok ong me mau kan,

3:4  O me kin pangala me saraui, o me katil la, o kala, o inong iong me sued mon Kot.

3:5  Me sansalki lelapok ap sasa a manaman; muei wei sang mepukat.

3:6  Pwe akai irail kin wailong ong nan im akan o kaloedi li akai, me toutouki dip, o me inong sued kin kaua ir sili.

3:7  Me kin sukusukul ansau karos, ap sota lolekong kila melel.

3:8  A duen Ianes o Iampres palian Moses, iduen mepukat kin palian melel, i song en aramas akan me suedelar ni lol arail, o me sota mau ong poson.

3:9  A re sota pan pwaida, pwe ar lolepon pan sansal ong karos dueta a wiauier ren irail.

3:10  A koe ale sang ai padak o ai tiak, o ai lamalam o poson, o dadaurata, o limpok, o kanongama,

3:11  O kamekam akan, o kalokolok kan, me lel ong ia nan Antiokien, o Ikonien, o Listra; song en kalokolok toto, me lel ong ia. A Kaun o kotin dore ia lar sang ir karos.

3:12  A karos me men dadaurata duen me kon ong Kot ren Kristus Iesus, pan kamekameki.

3:13  A aramas sued o malaun akan pan kakairida ni ar sued, irail pan kotaue aramas akan o re pan kotaue irail.

3:14  A koe dadaurata, me koe padakkier pwe koe asaer, me koe padakki sang er.

3:15  O koe asa kisin likau saraui kan sang ni om seri, me kak kalolekongi uk ong maur potopot ki poson me mi ren Kristus Iesus.

3:16  Pwe masan en kisin likau kan karos tapi sang ren Ngen en Kot, me mau ong padak, o kapung, o kamau, o kainene ong me pung.

3:17  Pwe aramas en Kot en unsokela o koiok ong wiawia mau karos.

Chapter 4

4:1  I KAKALIKI ong uk melel mon Kot o Kristus Iesus, me pan kadeikada me maur o me melar akan ni a pan kotido ni a wei,

4:2  Padaki masan nantiong eta ni ansau mau o ni ansau me sued kasaleda dip, o kapungada, o panaui ni kanongama, o kaukawewe.

4:3  Pwe eu ansau kokodo re sota pan mauki padak en kamaur, a duen pein arail inong kasapwilada saunpadak kai, me pan wiada padak duen me re mauki.

4:4  O re pan kawuki sang melel salong arail, ap kawuki ong kasoi mal akan.

4:5  A koe en masamasan ni meakaros. Peren ki kamekam, kapwaiada wiawia en wanporon amen. Kapwaiada mau om koa.

4:6  Metet ngai kamekamela o ansau en ai mela leler.

4:7  I wiadar pei mau eu, i kanikielar ai weir en tang, i dadaurata poson.

4:8  Ari, nin en me pung nekinek ong ia, me Kaun o pan kotiki ong ia ni ran o, iei saunkapung pung, a kaidin ong ngai ta, pwe ong karos, me anane a pwarado.

4:9  Kaporisokki uk, pwen madang kodo re i.

4:10  Pwe Demas me kase ia lar pwe a pok ong sappa et, ap samalanger Tesalonik, Kresens Kalesia, Titus Dalmatien,

4:11  Lukas eta mi re i, ukada Markus, pwen iang kodo met, pwe a katepa ong ia ni ai dodok.

4:12  A Tikikus i kadaralang Episus.

4:13  Likau pup, me i pwilikidier Troas ren Karpus, wado ni om pan pwarado, o puk kan o kisin likau kan.

4:14  Aleksander saunmata wia ong ia me sued toto, Kaun o en kotin depuk ong i duen a wiawia kan!

4:15  Koe pil kalaka i, pwe a kin nantiong palian at padak.

4:16  Ni tapin ai pan pakadeikada, sota amen me sauasa, pwe karos tang sang ia, mepukat ender pwaipwai ong irail.

4:17  A Kaun o kotin ieiang ia o kamana ia da, pwe i en kak kanikiela ai padapadak o men liki kan karos en rong. I dorelar sang au en laien.

4:18  A Kaun o pan kotin kapit ia la sang ni wiawia sued karos, o kotin kalua wong ia wein nanlang, i en lingan kokolata! Amen.

4:19  Ranamau, wong Priska o Akwila o toun im en Onesiporus.

4:20  Erastus mondi Korint, a Tropimus somaudar, i ap pwilikidi Miletus.

4:21  Kaporisokki uk, pwen kodo mon ansaun kapau. En Eupulus a ranamau wong uk, o pil en Pudens, o Linus, o Klaudia, o ri atail karos.

4:22  Kaun o en kotikot ni ngen om! Mak en mi re omail!