Kapingamarangi - II Timothy

Chapter 1

1:1  Mai baahi o Paul, tangada agoago-hagau ni Jesus Christ mai i-di hiihai o God, ne-hagau belee hagadele di mouli dela gu-hagababa-mai gi gidaadou, dela i tadau baahi i tadau buni-anga gi Jesus Christ,

1:2  ang-gi Timothy, dagu dama-daane hagalabagau. God tadau Damana mo Jesus Christ tadau Dagi, gi-dugu-adu gi di-goe tumaalia, di aloho, mo-di noho i-di aumaalia.

1:3  Au e-danggee ang-gi God dela e-hai-hegau ginai au i-di manawa madammaa, gadoo be ogu damana-mmaadua. Au e-danggee ang-gi Mee i-nia madagoaa huogodoo i dogu maanadu mai goe i-lodo agu dalodalo i-di boo mo-di aa.

1:4  Au e-langahia-eau o halidangi, gei au e-hiihai huoloo belee heetugi-adu gi-di-goe, gii-dohu dogu tene.

1:5  Au e-mamaanadu di hagadonu e-donu dela i do baahi, e-hai be-di hagadonu o do dinana-madua go Lois, mo do dinana go Eunice. Au e-donu bolo ma go di hagadonu hua dela i do baahi.

1:6  Go di mee deenei, dela e-haga-langahia ko-au adu gi-di-goe bolo goe gi-benabena-ina di wanga-dehuia dela ne-dugu-adu go God i dogu madagoaa ne-dugu ogu lima gi oo nua.

1:7  Idimaa, di Hagataalunga o God dela ne-dugu-mai gi gidaadou, la-hagalee belee hai gidaadou gi-mmaadagu. Dono Hagataalunga la-ne-haga-honu gidaadou gi-nia mogobuna, mo-di aloho, mo-di hagakono di manawa.

1:8  Goe hudee langaadia di-haga-modongoohia-aga tadau Dagi, be e-langaadia i-di-au dela e-galabudi i-di gili o Christ. Heia-hua goe gi-hagaduadua i-di gili di Longo-Humalia, gei God gaa-hai goe gi-maaloo oo lodo i-di hagaduadua deelaa.

1:9  Mee ne-haga-mouli gidaadou, ge ne-gahi-mai gidaadou gii-hai nia dama ni-aana donu, ge hagalee ne-hidi-mai nia mee ala ne-hai go gidaadou, gei mai-hua i dana hai dela gu-haga-noho mo dono dumaalia dehuia. Mee gu-dugu-mai tumaalia deenei mai i Jesus Christ i-mua taamada o-nia mee huogodoo.

1:10  Gei dolomeenei tumaalia deenei gu-gila-mai i-di hanimoi o tadau Dangada Hagamouli go Jesus Christ. Mee gu-hagalawa di mogobuna o-di made, gei gu-haga-modongoohia-mai di mouli dee-odi mai i-di Longo-Humalia.

1:11  Malaa, God ne-hilihili au belee hai tangada agoago-hagau, mo tangada agoago e-hagadele di Longo-Humalia.

1:12  Gei di-maa go di mee deenei dela e-hagaduadua-iei au, gei au e-daahi-hua go dogu hagadagadagagee, i-di-au e-iloo dagu Dangada dela e-hagadonu, gei au e-donu bolo ma go Mee dela e-mee di-benebene ana mee ala ne-haga-ingoo-mai gi-di-au, gaa-dae-loo gi-di laangi deelaa.

1:13  Haga-mau-dangihi-ina goe gi-nia helekai e-donu ala guu-lawa dagu hagi-adu gi-di-goe gi-kawe-ai. Gei gii-mau hogi ang-gi di hagadonu mo-di aloho dela gu-i gidaadou i tadau buni-anga gi Jesus Christ.

1:14  Goe benabena-ina tuhongo humalia dela gu-dugu-adu gi-di-goe mai i-di mogobuna o-di Hagataalunga-Dabu, dela e-mouli i tadau lodo.

1:15  Goe gu-iloo bolo digau ala e-noho i Asia, digau huogodoo mo Phygelus mo Hermogenes, la-gu-diiagi au.

1:16  Dimaadua gi-dumaalia ang-gi digau di hale o Onesiphorus, i mee e-logo ono madagoaa nogo haga-tenetene au. Mee hagalee langaadia i dogu noho i-lodo di hale-galabudi.

1:17  Dono dau i Rome, geia ga-daamada ga-halahala au, gaa-dae-loo gi dono gidee-Ia au.

1:18  Dimaadua gi-dumaalia ang-gi mee i-di Laangi Aamua deelaa. Goe hogi gu-iloo-hua nia hai humalia huoloo a-mee nogo hai-mai gi-di-au i Ephesus.

Chapter 2

2:1  Gei adu gi-di-goe dagu dama-daane, hagamahi i-lodo tumaalia dela gu-hai-mee ngaadahi ginai gidaadou i tadau buni-anga gi Jesus Christ.

2:2  Kae-ina nia helekai ala ne-hagalongo ginai goe, ala nogo hagadele ko-au i-mua digau haga-modongoohia dogologo, wanga-ina gi-nia daangada ala e-hagadagadagagee ginai goe, ala e-mee di-agoago digau ala i-golo.

2:3  Kae-ina do duhongo hagaduadua, be-di hai o tangada-dauwa humalia ni Jesus Christ.

2:4  Tangada-dauwa le e-hiihai e-haga-tenetene dono dagi-dauwa, ge hagalee e-unihagi ana hegau gi-nia hegau digau ala hagalee digau-dauwa.

2:5  Tangada dela ma-gaa-lele i-di hoiaa, la-hagalee kae di hui o-di aali maa ia ga-hagalee daudali nnaganoho o-di hoiaa.

2:6  Tangada hai-hadagee dela koia e-ngalua damana, le e-kae dono duhongo matagidagi i-di madagoaa e-hadi-ai nia huwa o-di hadagee.

2:7  Goe hagabaubau-ina agu mee ala e-helekai-ai, idimaa, Dimaadua ga-hagamaamaa goe gii-donu gi-nia mee aanei huogodoo.

2:8  Gi-langahia-egoe Jesus Christ dela ne-mouli-aga mai i-di made, Mee tangada mai di madawaawa o David, gadoo be-di haga-modongoohia i-lodo di Longo-Humalia dela e-hagadele ko-au.

2:9  Au e-dadaaligi i dogu hagadele di Longo-Humalia deenei, gei au e-lawalawa gi taula-baalanga be tangada guu-hai dana mee huaidu, e-galabudi. Gei nia helekai a God le e-deemee di-lawalawa.

2:10  Deenei-laa au e-hagamahi-adu hua beelaa i-nia mee aanei huogodoo, i-di gili nia daangada a God ne-hilihili-aga, bolo gii-kae nadau haga-mouli i-di mouli dee-odi mai Jesus Christ mo-di madamada dee-odi.

2:11  Telekai e-donu deenei boloo, “Gidaadou ma-gaa-mmade madalia a Christ, gei gidaadou e-mouli-aga labelaa madalia a-Mee.

2:12  Maa gidaadou ga-hagamahi-adu hua beelaa, gei gidaadou gaa-dagi madalia a-Mee. Gei gidaadou ma-ga-haga-de-iloo a-Mee, gei Mee ga-haga-de-iloo-ia labelaa gidaadou.

2:13  Maa gidaadou ga-hagalee manawa-dahi gi Mee, gei Mee e-manawa-dahi-hua mai gi gidaadou, i Mee e-deemee di-hai-hala i-ana helekai.”

2:14  Haga-langahia-ina nia mee aanei gi au daangada. Hagi-anga-ina gi-maaloo digaula i-mua o God bolo gi-hudee lagalagamaaloo i nadau mehanga i-di hai o-nia bida-helekai, idimaa, nia lagamaaloo la-deai ono humalia ai, e-hagahuaidu-hua digau ala e-hagalongo.

2:15  Heia au hegau gi-humalia i-mua o God, gii-hai be tangada ngalua, e-ngalua hagalee langaadia, dela e-agoago nia daangada nia helekai donu a God.

2:16  Haga-paa gi-daha mo nia balu-kai ala e-hai-baahi gi God, ala hogi e-haga-mogowaa nia daangada gi-daha mo God.

2:17  Nia agoago aalaa, le e-hai gadoo be-di magibala dela e-gai nia goneiga. Nia agoago aanei le e-hai go nia daane dogolua go Hymenaeus mo Philetus.

2:18  Meemaa gu-diiagi di ala dela e-donu, gei gu-haga-hala nia hagadonu digau ala gu-hagadonu, i nau helekai bolo di haga-mouli-aga o digau mmade la-guu-lawa di-hai.

2:19  Di hagamau dela ne-haga-noho go God, la e-deemee di-ngalungalua, gei guu-hihi i-hongo di-maa boloo, “God e-iloo-Ia ana dama” ge guu-hihi labelaa boloo, “Maa iai tangada e-hai bolo ia tama ni Dimaadua, geia gi diagia ana haihai huaidu.”

2:20  I-lodo di hale damana iai nia hagadilinga pileedi miami i-no-lodo: hunu maa ne-hai gi-nia silber mono goolo, hunu maa ne-hai gi-nia laagau mono gelegele. Hunu maa e-hai-hegau anga-hua i-nia madagoaa hagalabagau, gei hunu maa e-hai-hegau i-nia laangi huogodoo.

2:21  Tangada dela ma-ga-haga-madammaa ia gi-daha mo nia huaidu huogodoo, geia ga-hai-hegau i-nia mee ala koia e-hagalabagau, idimaa, mee guu-dugu eia gi-nia hegau o dono Dagi, ge gu-togomaalia ang-gi nia hegau humalia huogodoo.

2:22  Hudee heia goe gi-hiihai gi-nia hiihai o-nia mouli o-nia dama-daane mo dama-ahina. Haga-mahi heia goe gii-donu, gi-hagadonu, gi-aloho, ge gi-noho tenetene, goodou mo digau ala e-manawa-madammaa, ala e-gahigahi Dimaadua i-di hagamaamaa.

2:23  Hagapaa gi-daha mo nia daangada ala e-lagamaaloo boiboi ge hagalee donu nadau mehanga, idimaa, goe e-iloo-hua bolo digaula e-hagaodi gi-di hagadau heebagi.

2:24  Tama hai-hegau a Tagi gi-hudee lagamaaloo. Mee e-dumaalia gi digau huogodoo, tangada agoago humalia ge hila-gi-lala.

2:25  Mee e-daudonu dana agoago digau ala e-hai-baahi gi ana agoago, gei God gaa-dugu-anga di madagoaa e-huli-ai digaula gi-daha mo-di huaidu, ga-iloo-ginaadou di tonu.

2:26  Gei digaula gaa-donu ang-gi ginaadou, gaa-llele gi-daha mo-di hele a Setan dela ne-kumi digaula bolo gi-hagalongo gi-deia.

Chapter 3

3:1  Goe gi-langahia bolo nia haingadaa ga-i-golo i-lodo nia laangi muliagi.

3:2  Nia daangada gaa-hai bolo ma go ginaadou lahua, ga-dumaanga, bida hagaamu-hua ginaadou, halahalau dangada. Digaula gaa-hai nia mee hagawelewele-dangada, ga-de-hagalongo gi nadau maadua, digaula hagalee hai nadau danggee, ge hagalee hai digau daumaha.

3:3  Digaula ga-hagalee aloho, ga-hagalee dumaalia, hagahuaidu dangada, ge llamu-dauwa, hagamuamua, de-hiihai gi-nia mee ala e-humalia.

3:4  Digaula gaa-wanga nadau ihoo gi-nia gabunga, haga-balumee, ge haga-llauehaa nadau hagaamu ginaadou, digaula ga-hiihai di-hai go nadau mee ala e-tene ginai laa-hongo di manawa o God.

3:5  Digaula la-gaa-hai digau daumaha hua laa-daha, ga-de-hiihai gi taumaha dono mogobuna i-golo. Hagaligaliga i-daha mo digau beenei.

3:6  Hunu ginaadou e-ulu gi-lodo nia hale, ga-dagi nia ahina paagege ala e-noho daamaha i nadau huaidu ala ne-hai i-mua gei e-daudali-hua nadau hagadilinga hiihai huaidu.

3:7  Aalaa go nia ahina ala bolo ginaadou e-kabe nadau mee, ge deemee di-iloo nia mee donu.

3:8  Nia daane aanei le e-hai-baahi gi-nia mee donu, gadoo be Jannes mo Jambres ala ne-hai-baahi gi Moses. Nia maanadu digaula la-deai ono humalia i-no-lodo ai, ge hagalee kila go nadau hagadonu.

3:9  Nadau hegau hagalee kila, idimaa, nia daangada huogodoo la-ga-gidee nadau dadaulia, gadoo be-di hai ne-hai gi Jannes mo Jambres.

3:10  Malaa, goe gu-daudali agu agoago, mo agu hegau, mo tadinga dogu mouli dela e-mouli-iei au dolomeenei. Goe dela-hua gu-gidee dogu hagadonu, mo dogu hagakono di manawa, mo dogu aloho, mo dogu duu maaloo i-lodo nia haingadaa,

3:11  mo ogu dadaaligi, mo ogu hagaduadua. Goe e-iloo nia mee aanei ala guu-hai mai gi-di-au i Antioch, Iconium, mo Lystra, mo nia dadaaligi llauehe ala ne-hai-mai gi-di-au, gei Tagi guu-daa au gi-daha mo nia mee huogodoo aanei.

3:12  Nia daangada huogodoo ala e-hiihai e-mouli humalia i-di nadau buni-anga gi Jesus Christ, le e-hai gi-dadaaligi ge hagahuaidu.

3:13  Digau huaidu mo digau hagadele tilikai, le e-hula-hua gi-mua i-lodo di huaidu gi-di mee koia e-huaidu huoloo. Digaula e-halahalau nia daangada ala i-golo ge e-bida halahalau-hua ginaadou.

3:14  Gei goe la-gi-mua-hua i-nia mee ala e-donu ala gu-iloo-e-goe, ge gu-hagadonu kooe. Goe guu-bida iloo-hua be o dangada agoago la-koai.

3:15  Gei goe e-iloo labelaa bolo goe nogo iloo di Beebaa-Dabu, daamada do madagoaa nogo dulii, di Beebaa-Dabu dela ne-hagi-adu di kabemee o God, dela e-dagi goe gi-di mouli dee-odi mai di hagadonu a Jesus Christ.

3:16  Nia helekai huogodoo ala i-lodo di Beebaa-Dabu, la mai baahi o God, e-dahidamee dono hagi ang-gi nia daangada di tonu, mo-di bule di haihai-hala, mo-di hai gii-donu nia mee ala e-hai-gee, mo-di aago di hai o-di mouli dela e-donu,

3:17  belee hai digau ala e-hai nia hegau a God gii-honu di iloo di hai nnagadilinga hegau humalia huogodoo.

Chapter 4

4:1  I-mua nnadumada o God mo Jesus Christ dela ga-hagi-aga digau ala e-mouli mo digau mmade, idimaa Mee e-hanimoi e-dagi be-di king, gei au e-gowadu do duhongo-hegau bolo

4:2  gi-hagadele-ina nnelekai a God. Hagamahi agoago, ma e-aha ma-gaa-hai i-lodo nia madagoaa haingoohia be haingadaa. Agoago-ina hagamahi gi digaula i-nia helekai aalaa, bule-ina nia agoago hai-gee, hagamaaloo-ina-aga digaula gi au agoago haga-balabala.

4:3  Idimaa, di madagoaa i-golo gaa-dae-mai, gei nia daangada la-ga-de-hiihai di-hagalongo gi-nia agoago humalia, ga-daudali-hua go nadau hiihai. Digaula gaa-bida haga-kila-aga nadau gau agoago ala e-hai nadau agoago ala e-hiihai ginai digaula.

4:4  Digaula gaa-huli gi-daha, ga-hagalee hiihai e-hagalongo gi-di mee dela e-donu, ga-haga-dahidamee nia kai balumee namua.

4:5  Gei goe gi-maaloo di-dagi goe i-lodo nia madagoaa huogodoo, hagamahi i-lodo o hagaduadua, heia do waawa hagadele di Longo-Humalia, ge gi-heia au hegau huogodoo be tangada hai-hegau ni God.

4:6  Gei mai gi-di-au, dogu madagoaa dela e-tigidaumaha-iei au la-gu-hoohoo-mai, go di madagoaa dela ga-hagatanga-iei au gi-daha mo-di mouli-nei.

4:7  Au guu-hai agu mee ala e-mee i-lodo di hoiaa, ge guu-lele-loo gu-haga-lawa di hoiaa, gei au gu-daahi hua igolo dogu hagadonu.

4:8  Dolomeenei di hui o-di aali o-di tonu o dogu mouli e-talitali au. Di hui deelaa la-ga-gaamai go Tagi, Tangada hai-gabunga e-donu i-di Laangi deelaa, ge hagalee koau hua dela e-gaamai ginai di-maa, gei anga labelaa gi digau huogodoo ala e-noho talitali i-di aloho ang-gi di gila-mai o-Maa.

4:9  Haga-mahi gi limalima goe do hanimoi gi-di-au.

4:10  Demas gu-aloho i henuailala-nei, gu-diiagi au guu-hana gi Thessalonica, gei Crescens guu-hana gi Galatia, Titus ne-hana gi Dalmatia.

4:11  Go Luke la-hua deenei i dogu baahi. Mark gi-lloomoi goolua. Go mee dela e-mee di-hagamaamaa au i-nia hegau aanei.

4:12  Au gu-hagau a Tychicus gi Ephesus.

4:13  Do madagoaa ma-ga-hanimoi, gaamai-laa dogu gahu-laa-daha dela ne-dugu ko-au i-baahi o Carpus i Troas, mo nia beebaa, gei kaedahi go nia beebaa ala ne-hai gi-nia gili-manu.

4:14  Alexander tangada tugi-baalanga, gu-hagahuaidu huoloo au, Dimaadua gaa-hui-laa gi-mee ana hegau ala ne-hai.

4:15  Goe pula i-di-goe i taane deelaa, i mee e-hudi dono wou huoloo gi tadau agoago.

4:16  Deai tangada ne-hagamaamaa au i dogu duuli au matagidagi ai. Digaula huogodoo gu-diiagi au. God gi-hudee haga-huaidu-ina digaula i-di mee deenei!

4:17  Gei Tagi la-nogo i dogu baahi, nogo hagamaaloo au, deelaa gaa-mee-iei au di-hagadele di Longo-Humalia ang-gi digau tuadimee gi-longono-ginaadou huogodoo, gei au gu-dagaloaha-mai gi-daha mo-di hagaduadua o-di made.

4:18  Gei Tagi gaa-daa au gi-daha mo nia mee huaidu huogodoo, gaa-lahi au gi dono Heenua King di langi. Nia madamada gi-wanga gi Mee, gaa-hana-hua beelaa! Amen.

4:19  Au e-hagau dagu hagaaloho gi Priscilla mo Aquila mo digau di hale o Onesiphorus.

4:20  Erastus nogo noho hua igolo i Corinth, gei au ne-dugu a Trophimus i Miletus, i mee nogo magi.

4:21  Haga-mahi gii-dae-mai goe i-mua di madagoaa magalillili. Eubulus, Pudens, Linus mo Claudia e-hagau-adu labelaa nadau hagaaloho, mo nia duaahina dama a Christ huogodoo ala i-golo.

4:22  Dimaadua gi-madalia do hagataalunga. Tumaalia o God gi-madalia goodou.