Kapingamarangi - Matthew - 26

26:1  Jesus ne-lawa di agoago i-nia mee aanei huogodoo, gei Mee ga-helekai gi ana dama-agoago,

26:2  “Goodou gu-iloo bolo i-muli nia laangi e-lua Tagamiami Pasoobaa gaa-hai, gei Tama-Tangada gaa-wanga gi daudau-ina gi-di loobuu.”

26:3  Di madagoaa deelaa, gei nia dagi hai-mee-dabu mo nia dagi mmaadua ne-dagabuli gi-di hale o Caiaphas, di tagi aamua hai-mee-dabu,

26:4  ga-hagataele belee kumi a Jesus hagammuni, e-daaligi gii-made.

26:5  Digaula ga-helekai, “Gidaadou hagalee hai di mee deenei i-nia laangi Hagamiami Pasoobaa, gi-dee wwaa hua hai-baahi ginai nia daangada.”

26:6  Jesus nogo i-di hale o Simon, taane nogo magi genegene i-mua, e-noho i Bethany.

26:7  Jesus nogo miami i teebele, gei di ahina ga-hanimoi mo dana loaabi-‘alabaster’ e-honu lolo-kala gei e-hui-ngadaa, gaa-llingi gi-hongo di libogo o-maa.

26:8  Ana dama-agoago ga-gidee di mee deenei, gu-hagawelewele, ga-heeu, “Ma e-hagauwwou beleimaha?

26:9  Di lolo deenaa ne-bolo ne-hui gi-daha la-gu-gila-mai teenedi damana, gu-hagamaamaa digau hagaloale!”

26:10  Jesus gu-iloo nia helekai digaula, ga-helekai, “Goodou e-haga-deaadee di ahina deenei eiaha? Ma di mee humalia huoloo dela ne-hai go mee mai gi-di-Au.

26:11  Digau hagaloale la i godou baahi i-nia madagoaa huogodoo, gei Au ga-hagalee madalia goodou gi-muli.

26:12  Di hai o-di ahina deenei ne-llingi dana lolo-kala gi dogu huaidina, ne-hagatogomaalia Au gi dogu danu.

26:13  Au e-hagi-adu bolo nia madagoaa huogodoo o-di Longo-Humalia e-dele i henuailala, di mee di ahina deenei ne-hai, e-dele labelaa, e-haga-langahia di ahina deenei.”

26:14  Tangada e-dahi i-nia dama-agoago dilongoholu maa-lua, dono ingoo go Judas Iscariot, gaa-hana gi-nia dagi hai-mee-dabu,

26:15  ga-heeu, “Maa au ga-gowadu a Jesus, gei goodou ga-gaamai di godou-aha?” Digaula gaa-wanga nia bahihadu-silber e-motolu.

26:16  I-muli di madagoaa deelaa, gei Judas ga-halahala dana madagoaa humalia e-wanga a Jesus gi digaula.

26:17  Di laangi matagidagi Tagamiami di Palaawaa-Digi-Hagatanga, gei nia dama-agoago a Jesus ga-lloomoi gi Mee, ga-heeu, “Dehee dau gowaa e-hiihai bolo gimaadou gi-hagatogomaalia-ina e-hai Tagamiami Pasoobaa?”

26:18  Gei Mee ga-helekai, “Hula gi taane i-lodo di waahale damana, helekai gi mee boloo, ‘Di-madau Dangada Agoago e-helekai boloo, Dogu madagoaa gu-dau-mai. Au mo agu dama-agoago e-hai di-madau Hagamiami Pasoobaa i doo hale.’ ”

26:19  Nia dama-agoago a-Maa gaa-hai gii-hai be nia helekai a Jesus ne-hai, ga-hagatogomaalia Tagamiami Pasoobaa.

26:20  Hiahi-ia di mee, Jesus mo ana dama-agoago dilongoholu maa-lua gaa-noho gi-lala e-miami.

26:21  Di madagoaa digaula e-miami, gei Jesus ga-helekai, “Au e-hagi-adu bolo tangada e-dahi i goodou gaa-wanga Au e-hagahuaidu.”

26:22  Ana dama-agoago gu-manawa-gee huoloo gi telekai deenei, ga-daamada hagadau dagidahi ga-heheeu gi Mee, “Meenei, ma ko-au?”

26:23  Jesus ga-helekai, “Tangada dela ga-hagatiu dana palaawaa gi-lodo di ibu dalia Au, go mee dela gaa-wanga Au.

26:24  Tama-Tangada gaa-made gii-hai be nia helekai di Beebaa-Dabu, gei e-huaidu ang-gi tangada dela e-wanga Tama-Tangada. E-humalia tangada deenei hagalee belee hai gi-haanau!”

26:25  Judas dela gaa-wanga a-Mee gi ono hagadaumee, ga-helekai, “Meenei, dagu Dangada Agoago, ma ko-au?” Jesus ga-helekai, “Koe dela ne-helekai.”

26:26  I di-nadau miami, Jesus ga-dahi-aga dana palaawaa, ga-hagadabu, ga-ginigini, gaa-wanga gi ana dama-agoago, ga-helekai, “Kae-ina, geina, deenei go dogu huaidina.”

26:27  Gei Mee ga-dahi-aga dana ibu-waini, ga-danggee gi God, gaa-wanga gi digaula, ga-helekai, “Goodou huogodoo, inumia.

26:28  Deenei go ogu dodo o-di hagababa a God. Ogu dodo ne-haga-hali ang-gi digau dogologo belee wwede-ai nia huaidu.

26:29  Au e-hagi-adu gi goodou bolo Au hagalee e-inu labelaa di waini deenei, gaa-dae-loo gi-di laangi dela e-inu gidaadou ngaadahi di waini hoou i Tenua o dogu Damana.”

26:30  Digaula ga-daahili dahi daahili, nomuli gaa-hula gi-di Gonduu Olib.

26:31  Jesus ga-helekai gi digaula, “Boo-nei, goodou huogodoo gaa-llele, ga-diiagi Au, idimaa, di Beebaa-Dabu e-helekai boloo, ‘God ga-daaligi tangada hagaloohi-siibi, gei nia siibi la-ga-lellele dagidahi.’

26:32  “Gei i-muli dogu mouli-aga, Au gaa-hana i godou mua gi Galilee.”

26:33  Peter ga-helekai gi Jesus, “Meenei, ma e-aha maa digaula huogodoo ga-lellele, ga-diiagi Goe, gei au hagalee-loo e-diiagi Goe!”

26:34  Jesus ga-helekai gi mee, “Au e-hagi-adu di tonu bolo boo-nei, i-mua teduu gaa-wolo, gei goe ga-helekai haga-de-iloo Au haga-dolu.”

26:35  Peter ga-helekai gi mee, “Ma e-aha maa au gaa-made madalia Goe, gei au hagalee-loo e-haga-de-iloo Goe!” Nia dama-agoago huogodoo ala i-golo gu-helekai labelaa beenei.

26:36  Jesus ne-hana mo ana dama-agoago gi Gethsemane, ga-helekai gi digaula, “Noho i-ginei, Au e-hana, e-dalodalo i-golo.”

26:37  Mee gaa-lahi Peter mo nia dama-daane dogolua a Zebedee. Ono lodo gu-huaidu huoloo gu-dee-baba.

26:38  Gei Mee ga-helekai gi digaula, “Ogu lodo gu-daamaha huoloo, guu-honu i-di lodo-huaidu. Au guu-hai be tangada gaa-made. Goodou noho i-ginei e-haga-aala dalia Au.”

26:39  Gei Mee gaa-hana gi-daha mo digaula, ga-dogoduli gi-lala, ga-dalodalo, “Dogu Damana, be di-maa e-mee, daawaa gi-daha mo Au di ibu o-di hagaduadua deenei, gei hagalee go dogu hiihai, gei go do hiihai dela e-hai.”

26:40  Gei Mee gaa-hana gi-baahi ana dama-agoago dogodolu, ga-gidee-Ia digaula e-kii, ga-helekai gi Peter, “Ma e-hai behee? Goodou e-deemee di-haga-aala madalia Au i-di aawaa hua-e-dahi?

26:41  Goodou aala, hai-dalodalo, gi-dee too goodou gi-lodo nia hagamada. Di hagataalunga e-hiihai, gei tuaidina le e-bagege.”

26:42  Jesus gaa-hana haga-lua ga-dalodalo, “Tamana, maa di ibu o-di hagaduadua deenei e-deemee di daa gi-daha, e-hai loo gi-inu ko-Au, gei deeai, go do hiihai la-hua gii-gila.”

26:43  Mee ga-hanimoi labelaa, ga-gidee-Ia ana dama-agoago e-kii. Digaula gu-molemoe huoloo, gu-deemee di-haga-aala.

26:44  Jesus gaa-hana labelaa e-dalodalo i tolu holongo go talodalo la-hua.

26:45  Mee ga-hanimoi gi ana dama-agoago, ga-helekai, “Goodou e-kii baba hua? Mmada! Gu-dae-mai di madagoaa Tama-Tangada gaa-wanga gi-lodo nia lima o digau huaidu!

26:46  Tuu-i-nua, gaa-hula. Mmada, deenei taane dela gaa-wanga Au!”

26:47  Jesus nogo helehelekai hua igolo, gei Judas, tangada e-dahi i-nia dama-agoago a-Maa gu-dau-mai mo digau dogologo dalia a-mee. Digaula ne-lloomoi mo nadau hulumanu-dauwa, mono mee haga-mamaawa-dangada. Digaula ne-hagau-mai go nia dagi hai-mee-dabu mo nia dagi mmaadua.

26:48  Judas ne-helekai gi digaula boloo, ‘Tangada dela gaa-hongi ko-au, deelaa go Mee. Kumidia!’

26:49  Gei mee ga-hanadu haga-huudonu gi Jesus, ga-helekai, “Meenei dagu dangada agoago. Di aumaalia gi-madalia Goe,” ga-hongi-adu a-Mee.

26:50  Jesus ga-helekai, “Dogu ihoo hagaaloho, heia gi-limalima dau mee dela belee hai.” Nomuli, gei digaula ga-lloomoi gaa-kumi Jesus, ga-lawalawa.

26:51  Tangada e-dahi i digau ala nogo madalia a Jesus ne-dahi-aga dana hulumanu-dauwa, gaa-tuu talinga di hege o tagi aamua hai-mee-dabu.

26:52  Jesus ga-helekai, “Dugua dau hulumanu-dauwa gi dono lohongo. Digau huogodoo ala e-hai-hegau gi nadau hulumanu-dauwa, le e-mmade i tulumanu-dauwa.

26:53  Goe e-de-iloo bolo Au e-mee di-gahigahi dogu Damana gi-hagamaamaa, gei Mee ga-hagau-mai gi-baahi i-nua nia buini-dauwa e-madangaholu maa-lua gau di-langi?

26:54  Malaa, ma-gaa-hai beenei, dehee di hai gaa-mee di-kila nia helekai o-di Beebaa-Dabu ala e-helekai bolo deenei le e-hai-loo gii-gila?”

26:55  Nomuli, gei Jesus ga-helekai gi digau dogologo, “E-hai behee? Au tangada dagahi haganoho dela goodou e-lloomoi e-kumi Au, ge gaamai godou hulumanu-dauwa, mono mee haga-mamaawa-dangada? Nia laangi huogodoo Au nogo noho i-lodo di Hale Daumaha, e-haihai agu agoago, gei goodou digi kumidia Au.

26:56  Malaa, nia mee huogodoo aanei ne-hai gii-gila e-hagahonu nia helekai soukohp gii-donu i-lodo di Beebaa-Dabu.” Nomuli, gei nia dama-agoago a-Maa ga-diiagi a Jesus, gaa-llele gi-daha.

26:57  Digaula ne-kumi a Jesus, gaa-lahi a-Mee gi-di hale Caiaphas, di tagi aamua hai-mee-dabu, di gowaa dela e-dagabuli-ai digau haga-donudonu haganoho mo nia dagi mmaadua.

26:58  Peter ga-daudali a Jesus, gei e-mada-tanga i-daha, ga-ulu-adu gi-lodo di abaaba di hale tagi aamua hai-mee-dabu, gaa-noho i-baahi nia daangada hagaloohi, bolo gi-gidee-ia di hagaodi gi-muli o-nia mee aanei huogodoo.

26:59  Nia dagi hai-mee-dabu mo digau hai-gabunga-aamua huogodoo gu-hagamahi, e-hagataele di-nadau haga-modongoohia dilikai, belee hagahuaidu a Jesus gi-daaligi a-Mee gii-made.

26:60  Gei digaula digi gida di-nadau hai, digau dogologo ne-lloomoi gi-mua digaula, ga-helekai tilikai i Jesus. Muliagi, gei nia daane dogolua ga-tuu-aga,

26:61  ga-helekai, “Taane deenei guu-hai bolo Ia e-mee di-oho di Hale Daumaha o God, gei i-muli nia laangi e-dolu, ge-Ia ga-haga-duu-aga labelaa.”

26:62  Tagi aamua hai-mee-dabu ga-duu-i-nua, ga-helekai gi Jesus, “Dau helekai gi-di hagahuaidu deenei adu gi-di-goe ai?”

26:63  Gei Jesus digi helekai. Tagi aamua hai-mee-dabu ga-helekai labelaa gi Mee, “I-di ingoo o-di God Mouli, au ga-dugu-adu gi-helekai hagamodu: Hagia-mai gi gimaadou be maa Koe go di Mesaia, go Tama a God?”

26:64  Jesus ga-helekai gi mee, “Deenaa gu-helekai-iei-goe. Gei-Au e-hagi-adu gi goodou bolo di madagoaa e-dau-mai maalia, gei goodou ga-gidee Tama-Tangada e-noho i-di baahi gau-donu o God Mogobuna, e-hanimoi i-hongo nia gololangi!”

26:65  Dana hagalongo gi-di mee deenei, tagi aamua hai-mee-dabu gu-hahaahi dono gahu, ga-helekai, “Mee e-helekai e-hagahuaidu a God! Gidaadou hagalee hiihai gi tuai dangada haga-modongoohia! Goodou gu-longono hua ana helekai hagahuaidu a God!

26:66  Goodou e-hagamaanadu bolo-aha?” Digaula ga-helekai, “Mee gu-ihala e-hai-loo gii-made!”

26:67  Digaula ga-buibui nadau haawale gi-nia golomada o-maa, ga-dadaaligi a-Mee, gei digau ala ne-paapaa a-Mee

26:68  ga-helekai, “Mesaia, hagia-mai be di-maa koai dela ne-paapaa Goe!”

26:69  Peter e-noho i-lodo di abaaba o-di hale, gei tama-ahina hai-hegau o tagi aamua hai-mee-dabu ga-hanimoi gi mee, ga-helekai, “Goe nogo madalia labelaa a Jesus o Nazareth!”

26:70  Gei mee ga-haga-de-iloo-ia i-mua digau huogodoo aalaa boloo, “Au e-de-iloo-eau di-mee deenaa e-helekai-iei goe!”

26:71  Gei mee gaa-hana gi-di ngudu di bontai, gei tuai dama-ahina ga-gidee-ia a-mee, ga-helekai gi-nia daane ala i-golo, “Taane deenei nogo madalia a Jesus o Nazareth!”

26:72  Peter ga-haga-de-iloo-ia ga-helekai, “Au e-helekai hagamodu bolo au e-de-iloo taane deenaa!”

26:73  Nomuli, nia daane nogo tuu i-golo, ga-lloomoi gi Peter, ga-helekai, “Ma e-donu-hua bolo goe tangada i digaula, idimaa, o hanga-leelee la-ne-hagi-aga goe!”

26:74  Gei Peter ga-helekai, “Au e-hai dagu hagamodu bolo au ga-hagi-aga di tonu! God gi-hagaduadua-ina au maa au ga-helekai hai-gee! Au e-de-iloo taane deenaa!” Di madagoaa-hua deelaa, gei teduu gaa-wolo.

26:75  Peter gu-langahia nia helekai a Jesus ne-hai ang-gi deia boloo, “I-mua teduu ma-gaa-wolo, gei goe ga-haga-de-iloo Au haga-dolu.” Gei mee gaa-hana gi-daha ge dangi-wawwawe aga i ono lodo.