Azeri - I Thessalonians

Chapter 1

1:1  پولوس، سئلوانوس و تئموتاعوسدان، آتا تاريدا و ربّ عئسا مسئحده اولان تسالونئکلئلرئن کئلئساسينا: سئزه فيض و باريش اولسون.

1:2  بئز همئشه سئزئن هامينيز اوچون تارييا شوکور ادئب دوعالاريميزدا سئزي ذئکر ادئرئک

1:3  و دائم آتاميز تاري حوضوروندا ائمانينيزين ائشئني، محبّتئنئزئن زحمتئني، و ربّئمئز عئسا مسئحده اولان اومئدئنئزئن مؤحکملئيئني خاطيرلاييريق.

1:4  اي تارينين سودئيي قارداشلار، سئزئن سچئلمئش اولدوغونوزو بئلئرئک.

1:5  چونکي بئزئم خوش خبرئمئز سئزه آنجاق سؤزده يوخ، قودرت و موقدّس روحدا و چوخ يقئنله گلدي، نجه کي، آرانيزدا سئزئن خاطئرئنئز اوچون نجه آداملار اولدوغوموزو دا ائثبات اتدئک.

1:6  سئز ده بئزدن و ربدن نومونه گؤتوروب، بؤيوک سيخينتي ائچئنده کلامي موقدّس روحون شادليغي ائله قبول اتدئنئز.

1:7  اِله کي، مقدونئيّه و اخايئه‌‌ده اولان بوتون ائمانلي‌لار اوچون نومونه اولدونوز.

1:8  چونکي ربّئن کلامي سئزدن آنجاق مقدونئيّه و اخايئه‌يه ياييلمادي، هر يره ده کي، سئزئن تارييا اولان ائمانينيزين شؤهرتي چاتيب. بونا گؤره ده بئر شي دمه‌يئمئزه احتئياج يوخدور.

1:9  چونکي اونلار اؤزلري خبر ورئرلر کي، سئز بئزي نجه قبول اتدئنئز و نه جور بوتلرئنئزدن تارييا دؤندونوز کي، ياشايان و حقئقي تارييا خئدمت اده​سئنئز

1:10  و اونون اؤلولردن دئرئلتدئيي اوغلونون گؤيدن گله​جيئني، يعني عئساني گؤزله‌يه​سئنئز کي، بئزي گله​جک قضبدن قورتارير.

Chapter 2

2:1  اونا گؤره قارداشلار، سئز اؤزونوز ده بئلئرسئنئز کي، بئزئم سئزئن يانينيزا گلمه‌يئمئز عبث ديئلدي.

2:2  لاکئن بئلدئيئنئز کئمي، قاباقجا فئلئپئده عذاب چکئب تحقئر اولدوغوموز حالدا، تاريميزدا جورعتئمئز وار ائدي کي، او آغير ضئدّئيّته باخماييب، تارينين خوش خبرئني سئزه دئيک.

2:3  چونکي بئزئم تشوئقئمئز نه سهودن، نه ناپاکليقدان، نه ده حئيله​دندئر.

2:4  آمّا نجه کي، تاري طرفئندن ائنجئلئن بئزه امانت ورئلمه‌سي اوچون تصدئق اولونموشوق، اله ده دانيشيريق کي، ائنسانلاري يوخ، اورکلرئمئزي ائمتاحان ادن تاريني راضي ادک.

2:5  چونکي بئلدئيئنئز کئمي، هچ بئر زامان يانينيزا به‌به‌لنمه سؤزلري ائله، يا دا طاماحکارليغي گئزله‌دن نئقابلا گلمه‌دئک، تاري شاهئددئر.

2:6  ائنسانلاردان دا عئزّت آختارماديق، نه سئزدن، نه اؤزگه​لردن. گرچي مسئحئن حوارئلري اولاراق سئزه يوک اولماغا ائقتئداريميز وار ائدي.

2:7  آمّا آرانيزدا اوشاقلاريني اَمئزدئرئب عزئزله‌ين بئر آنا کئمي، سئزئنله مولايئم رفتار اتدئک.

2:8  سئزه بله کؤنول باغلاديغيميز اوزوندن، سئزه آنجاق تارينين خوش خبرئني يوخ، اؤز جانلاريميزي ورمه‌يه ده چوخ راضي ائدئک. چونکي بئزه چوخ عزئز اولدونوز.

2:9  بئزئم چکدئيئمئز زحمت و چتئنلئک يادينيزدادير کي، هچ بئرئنئزه يوک اولماماق اوچون نجه گجه گوندوز ائشله‌دئک و تارينين خوش خبرئني سئزه اعلان اتدئک.

2:10  هم سئز هم ده تاري شاهئددئر کي، نجه سئز ائمانلي‌لار آراسيندا موقدّس، صالح و قوصورسوز ائدئک.

2:11  بونو دا بئلئرسئنئز کي، آتا، اؤولادي ائله رفتار ادن بئري کئمي نجه سئزي اورکله‌ندئردئک، تشوئق اتدئک و يالوارديق،

2:12  اِله کي، سئز، سئزي اؤز پادشاهليق و عئزّتئنه دعوت ادن تارييا، لايئق شکئلده رفتار اده​سئنئز.

2:13  بونا گؤره ده بئز دائم تارييا شوکور ادئرئک کي، سئز تارينين بئزدن اشئتدئيئنئز کلاميني قبول اتدئکده، اونو ائنسانلارين سؤزو کئمي يوخ، اصلئنده اولدوغو کئمي تارينين کلامي اولاراق قبول اتدئنئز کي، ائمان گتئرن سئزلرده ائشئني يرئنه يتئرئر.

2:14  چونکي قاراداشلار، سئز تارينين يهودئيه​ده مسئح عئسايا عاييد اولان کئلئسالاريندان نومونه گؤتوردونوز. اونا گؤره کي، سئز ده اؤز هموطنلرئنئزدن همن عذابلاري چکدئنئز کي، اونلار يهودئلردن چکدئلر.

2:15  کي، رب عئساني و پيغمبرلري اؤلدوردولر، بئزي ده قوودولار. اونلار تاريني ناراضي ادئب بوتون ائنسانلارا دوشمن دورورلار.

2:16  بئزه مانع اولورلار کي، قيري‌​يهودئلرله دانيشماياق، مبادا بونون نتئجه​سئنده اونلار نئجات تاپسينلار. بلجه ده دائم گوناه اوستونه گوناه قويورلار. لاکئن قضب نهايت درجه​ده اونلارين اوستونه تؤکولوب.

2:17  آمّا اي قارداشلار، بئز کي، قيسا بئر مودّت اوچون-روحن يوخ، جئسمن-سئزدن محروم قالميشديق، بؤيوک آرزو ائله اوزوزو گؤرمه‌يه جان آتيرديق.

2:18  چونکي بئز-من، پولوس بئر نچه دفه-ائسته‌دئک کي، يانينيزا گلک، آمّا شيطان بئزه مانع اولدو.

2:19  چونکي ربّئمئز عئسا مسئح گلنده، اونون حوضوروندا بئزئم اومئدئمئز، شادليغيميز و تاجيميزين جلالي کئمدئر؟ مگر سئز ديئلسئنئز؟

2:20  چونکي سئز بئزئم شؤوکت و شادليغيميزسينيز.

Chapter 3

3:1  بونا گؤره ده، تاب گتئرمه‌يه داها قادئر اولماييب، آتنده تک قالماغا راضي اولدوق

3:2  و قارداشيميز و مسئحئن ائنجئلئنده همکاريميز و تارينين خئدمتکاري تئموتاعوسو يانينيزا گؤنده‌ردئک کي، ائمانينيزدا سئزه قووّت ورئب، سئزي تشوئق اتسئن

3:3  اِله کي، هچ کس بو موصئبتلردن پرئشان اولماسين؛ چونکي سئز اؤزونوز بئلئرسئنئز کي، بئز بونون اوچون تعيئن اولونموشوق.

3:4  چونکي يانينيزدا اولدوغوموز زامان دا سئزه ائره​لئدن دمئشدئک کي، باشيميزا موصئبتلر گله​جک؛ و بئلئرسئنئز کي، بله ده اولدو.

3:5  بونون اوچون من ده، آرتيق دؤزه بئلمه‌دئيئم زامان، يانينيزا آدام گؤنده‌ردئم کي، ائمانينيزدان خبردار اولوم، مبادا وسوسه​يه سالان سئزي وسوسه​يه سالسين و چکدئيئمئز زحمت هدر اولسون.

3:6  آمّا ائندي تئموتاعوس سئزئن يانينيزدان قاييديب، سئزئن ائمان و محبّتئنئزدن بئزه خوش خبرلر گتئرئب و بوندان دا کي، بئزي دائم محبّتله يادا ساليرسينيز و بئز سئزه حسرت چکدئيئمئز کئمي، سئز ده بئزه اِله حسرت چکئرسئنئز.

3:7  بو سببدن، اي قارداشلار، بوتون پرئشانليق و موصئبتئمئزده، ائمانينيزين واسئطه​‌سئله سئزئن حاقّينيزدا تسلّي تاپديق.

3:8  چونکي ائندي سئز اگر ربده ثابئت دوراسينيز، بئز ياشاياريق.

3:9  چونکي سئزئن حاقّينيزدا تارينين حوضوروندا بوتون او شادليغيميز اوچون، تاريدان نجه تشکّور اده بئلرئک؟!

3:10  نجه کي، گجه-گوندوز خالئص اورکله دوعا ادئرئک کي، اوزونوزو گؤرک و ائمانينيزين اسکئکلرئني دولدوراق.

3:11  قوي ائندي آتاميز تاري اؤزو، و ربّئمئز عئسا يولوموزو سئزئن طرفئنئزه سالسين.

3:12  و بئزئم سئزه اولان محبّتئمئز کئمي، قوي رب سئزئن محبّتئنئزي بئربئرئنئزه و بوتون ائنسانلارا آرتيريب، محبّتده سئزي باغلاسين.

3:13  اِله کي، ربّئمئز عئسا بوتون موقدّسلري ائله گلدئيئنده، آتاميز تارينين حوضوروندا، اورکلرئنئزي موقدّسلئکده قوصورسوز مؤحکم اتسئن.

Chapter 4

4:1  نهايت، قارداشلار، بئز سئزه تعلئم وردئک کي، تاريني راضي اتمک اوچون نجه ياشاياسينيز، و حقئقتن اِله ده ياشاييرسينيز. ائندي رب عئسادا سئزدن خاهئش ادئب سئزي تشوئق ادئرئک کي، بونو داها دا چوخ اده​سئنئز.

4:2  چونکي بئلئرسئنئز کي، رب عئسادا نه احکاملار وردئک.

4:3  تارينين ائراده​سي بودور: سئزئن موقدّس اولماغينيز، يعني، جئنسي عئفّتسئزلئکدن اؤزونوزو اوزاق ساخلاماغينيز.

4:4  کي، سئزدن هر کس اؤز قابيني نجه تقدّوسلوک و احتئرامدا ساخلاسين؛

4:5  تاريني تانيمايان بوتپرستلر کئمي، شهوتلي هاوا-هوسلرده يوخ.

4:6  و هچ کئم بو مسله​ده اؤز قارداشينا خاطا اتمه‌يئب ضرر يتئرمه‌سئن، چونکي رب بوتون بونلار اوچون قئصاص آلاندير، نجه کي، اوّلدن سئزه ديئب ائخطار وردئک.

4:7  چونکي تاري بئزي ناپاکليغا يوخ، موقدّس اولونماغا دعوت ادئب.

4:8  بونا گؤره ده، بونو ردّ ادن آدام ائنساني يوخ، تاريني ردّ ادئر کي، اؤز موقدّس روحونو سئزه ورئر.

4:9  ائندي قارداشليق محبّتئن باره​سئنده، احتئياجينيز يوخدور کي، بئري بو حاقدا سئزه يازسين، چونکي تارينين اؤزوندن اؤيره‌نئبسئز کي، بئربئرئنئزي سوه‌سئنئز.

4:10  دوغرودان دا سئز بونو بوتون مقدونئيه​ده اولان هامي قارداشلار حاقّيندا ادئرسئنئز. لاکئن، قارداشلار، سئزي تشوئق ادئرئک کي، بونو داها دا چوخ اده​سئنئز.

4:11  و آرام بئر حيات ياشاييب، اؤز ائشئنئزه مشغول اولاسينيز و اؤز اَللرئنئزله ائشله‌يه​سئنئز؛ نجه کي، سئزه امر اتدئک ده.

4:12  اِله کي، خارئجئلرئن حوضوروندا صحئح رفتار ادئب، هچ بئر شيه مؤحتاج اولماياسينيز.

4:13  آمّا، قارداشلار، گؤزلرئني حياتا يومموش اولانلار حاقّيندا، خبرسئز قالماغينيزي ائسته‌مئرئک، اِله کي، اومئدسئز اولان اؤزگه​لر کئمي قمگئن اولماياسينيز.

4:14  دوغرودان دا اگر ائنانيريق کي، عئسا اؤلوب گئنه دئرئلدي، اِله ده تاري عئسادا گؤزلرئني حياتا يومموش اولانلاري اونونلا گتئره​جک.

4:15  چونکي بونو سئزه ربّئن کلامي ائله ديئرئک کي، ياشايان و ربّئن گلئشئنه​جک دئري قالان بئزلر، اصلا گؤزلرئني حياتا يومموش اولانلاري اؤتمه‌يه​جه‌يئک.

4:16  چونکي ربّ اؤزو اوجا بئر نئدا ائله، باش مله‌يئن سسئله، و تارينين شيپورو ائله گؤيدن انه​جک و اوّل مسئحده اؤلنلر دئرئله​جکلر.

4:17  اوندان سونرا، ياشايان و دئري قالان بئزلر، اونلارلا بئرلئکده يوخاري گؤتورولوب، بولودلار آراسيندا ربّئن گؤروشويونه هاوادا گده​جه‌يئک و بلجه ربله دائم قالاجاغيق.

4:18  بونا گؤره، بئربئرئنئزه بو سؤزلرله تسلّي ورئن.

Chapter 5

5:1  زامانلار و واختلار حاقّيندا، قارداشلار، احتئياجينيز يوخدور کي، هچ بئر شي سئزه يازيلسين.

5:2  چونکي سئز اؤزونوز ياخشي بئلئرسئنئز کي، ربّئن گونو گجه گلن اوغرو کئمي گله​جک.

5:3  آداملار "سالامات وار، امئن-آمانليق وار" دئين واخت، هلاکت بئردن اونلارين اوستونه گله​جک، نجه کي، دوغماق آغريسي بويلو بئر آروادي توتور. و قاچا بئلمه‌يه​جکلر.

5:4  آمّا سئز، قارداشلار، قارانليقدا ديئلسئنئز کي، او گون سئزي اوغرو کئمي ياخالاسين.

5:5  چونکي سئز هامينيز ائشيغين اوغوللاري و گوندوزون اوغوللاريسينيز. بئز نه گجه​دن​ائک، نه ده قارانليقدان.

5:6  بونا گؤره ياتماياق، نجه کي، اؤزگه​لر ادئرلر. گلئن اوياق و آييق قالاق.

5:7  چونکي ياتانلار گجه ياتيرلار، کفله‌نَنلر ده گجه کفلنئرلر.

5:8  آمّا بئز، گوندوزونکو اولدوغوموزا گؤره، گلئن آييق قالاق، ائمان و محبّت زئرِهئني گِيک، باشيميزا دا نئجات اومئدئني دَبئلقه کئمي قوياق.

5:9  چونکي تاري بئزي قضب اوچون يوخ، ربّئمئز عئسا مسئحئن واسئطه‌سئله نئجاتا نايئل اولماق اوچون تعيئن ادئب.

5:10  او کي، بئزئم اوچون اؤلدو کي، ائستر اوياق اولاق، ائستر ياتميش، اونونلا بئرلئکده ياشاياق.

5:11  بونا گؤره ده بئربئرئنئزي تشوئق ادئب، بئربئرئنئزي بئنا ادئن، نجه کي، ادئرسئنئز ده.

5:12  آمّا، قارداشلار، سئزدن خاهئش ادئرئک کي، آرانيزدا زحمت چکنلره و ربده سئزه باشچي اولانلارا و سئزه نصئحت ورنلره حؤرمت ادئن.

5:13  و ائشلري اوچون اونلارا محبّتده چوخ بؤيوک احتئرام گؤرسه‌دئن. بئربئرئنئزله باريش ائچئنده ياشايين.

5:14  قارداشلار، سئزه يالواريريق کي، نئظامسيز اولانلارا نصئحت ورئن، جورعتسئزلري تشوئق ادئن، ضعئفلره کؤمک ادئن، هامييا نئسبت صبئرلي اولون.

5:15  دئقّتلي اولون کي، هچ کئم يامانليق عوضئنه يامانليق اتمه‌سئن، لاکئن همئشه بئربئرئنئزئن و بوتون ائنسانلارين ياخشيليغيني آختارين.

5:16  همئشه سوئنئن.

5:17  دائم دوعا ادئن.

5:18  هر شي اوچون شوکور ادئن. چونکي بو، مسئح عئسادا اولان سئزلر اوچون تارينين ائراده​سي‌دئر.

5:19  روحو سؤندورمه‌يئن.

5:20  نبئلئک سؤزلرئنه حقارتله باخمايين.

5:21  هر شيي ائمتاحانا چکئن؛ ياخشي اولاني برک توتون.

5:22  هر جور شردن اوزاق دورون.

5:23  قوي باريش تارينين اؤزو سئزي تامامن تقدئس اتسئن و ربّئمئز عئسا مسئحئن گلئشئنده روحونوز، جانينيز، و بدنئنئز قوصورسوز حئفظ اولونسون.

5:24  سئزي دعوت ادن وفالي‌دير و بونو اده​جک ده.

5:25  قارداشلار، بئزئم اوچون دوعا ادئن.

5:26  بوتون قارداشلاري موقدّس اؤپوشله سالاملايين.

5:27  ربّ حاقّي اوچون سئزه آند ورئرم کي، بو مکتوبو بوتون قارداشلارا اوخوياسينيز.

5:28  ربّئمئز عئسا مسئحئن فيضي سئزئنله اولسون.