Azeri - Luke - 1

1:1  عالئجناب تِعوفئلوس، چوخ آداملار چاليشيبلار کي، آراميزدا باش ورمئش حادئثه​لرئن حکايه‌سئني يازسينلار.

1:2  نجه کي، او باشلانيشدان گؤزلري ائله‌ گؤره‌نلر و کلامين خادئملري اونلاري بئزه يتئرئبلر.

1:3  منه ده مصلحت اِله گؤروندو کي، او باشلانيشدان دقئق تفتئش اتدئيئم هامي واقئعه​لري ترتئبله سئزه يازيم

1:4  اِله کي، اؤيره‌ندئيئنئز مطلبلرئن دوغرو اولماسينا يقئن تاپاسينيز.

1:5  يهودئيه پادشاهي هئرود زامانيندا، ابئيّا دسته​سئندن زکريا آدلي بئر کاهئن وار ائدي. اونون آروادي الئزابت هارون نسلئندن ائدي.

1:6  اونلارين ائکئسي ده تارينين نظرئنده صالح ائنسانلار ائدئلر و ربّئن هامي امر و احکاملارينا کامئل عمل ادئردئلر.

1:7  لاکئن اونلارين اوشاغي يوخ ائدي، چونکي الئزابت سونسوز ائدي و ائکئسي ده قوجا ائدئلر.

1:8  بئر گون زکريا، اؤز دسته​سئنئن کاهئنلئک نؤوبتي اولاندا، تارينين حوضوروندا کاهئنلئک وظئفه​سئنه مشغول ائدي.

1:9  زکريا ربّئن معبدئنه گئردي. چونکي بوخور يانديرماق پوشکو نجه کي، کاهئنلئکده عادت اولموشدو، اونون آدينا دوشموشدو.

1:10  بوخور يانديرماق ساعاتي يتئشنده، جاماعاتين هاميسي اشئکده دوعا ادئردئلر.

1:11  او زامان ربّئن بئر مله‌يي، بوخور قوربانگاهينين صاغ طرفئنده دوروب زکريايا ظاهئر اولدو.

1:12  زکريا مله‌يي گؤره‌نده دئسکئندي و قورخو اونو بورودو.

1:13  آمّا ملک اونا ددي: "زکريا، قورخما. دوعان موستجاب اولوب. آروادين الئزابت سنئن اوچون بئر اوغلان دوغاجاق. اونون آديني يحيا قوياجاقسان.

1:14  او، سنه شادليق و صفا سببي اولاجاق و اونون آنادان اولماسينا گؤره چوخ آداملار سوئنه​جکلر.

1:15  چونکي او، ربّئن نظرئنده بؤيوک اولاجاق. هچ واخت شراب و کفلندئرن بئر زاد ائچمه‌يه​جک و آناسينين قارنيندان موقدّس روحلا دولو اولاجاق.

1:16  او، ائسرايئل مئلّتئنئن چوخلاريني، اونلارين اؤز رب تاريسينا دؤنده‌ره​جک.

1:17  او، ربّئن قاباغيندا، ائليانين روحو و قووّتي​ ائله گده​جک. اله کي، آتالارين اورکلرئني اوشاقلارا و عاصئلري، صالحلرئن حئکمتئنه دؤنده‌رسئن، اله کي، رب اوچون بئر خالق حاضيرلاسين."

1:18  زکريا ملکدن سوروشدو: "من بونو نه‌دن بئلئم؟ چونکي من قوجا آدامين بئري‌يَم، آرواديم دا ياشلي‌دير."

1:19  ملک جاواب وردي: "من تارينين حوضوروندا دوران جبراييلام. گؤنده‌رئلمئشم کي، سنئنله دانيشيب، سنه بو خوش خبري يتئرئم.

1:20  باخ، ائندي دئلئن توتولاجاق و خبر وردئيئم شيلر واقع اولانا کئمي دانيشماغا قادئر اولماياجاقسان. چونکي واختيندا دوغرو چيخاجاق سؤزلرئمه ائنانمادين."

1:21  بو آرادا جاماعات زکرياني گؤزله‌يئردئلر و اونون بو قدر معبدده يوبانماسيندان تعجّوب ادئردئلر.

1:22  معبددن چيخاندا زکريا آرتيق لال اولموشدو. خالق بئلدي کي، او، معبدده بئر رؤيا گؤروب، چونکي ائشاره​ ائله اونلارا آنلاديردي، لاکئن دانيشماغا قادئر ديئلدي.

1:23  خئدمت گونلري تامام اولاندان سونرا، زکريا اِوئنه قاييتدي.

1:24  او گونلردن سونرا آروادي الئزابت بويلو اولوب، بش آي اؤزونو گئزلتدي.

1:25  و ديئردي: "رب منه مرحمت نظرئني ساليب و بو ائشي او منه ادئب کي، ذلئل​لئيئمي ائنسانلارين آراسيندان گؤتورسون."

1:26  آلتينجي آيدا جبرايئل ملک، تاري طرفئندن، جلئل دئياريندا ناصئره شهرئنه گؤنده‌رئلدي.

1:27  مريم آدلي بئر باکئره قيزين يانينا کي، يوسئف آدلي بئر کئشئنئن آداخليسي ائدي. يوسئف داوودون نسلئندن ائدي.

1:28  ملک اونون يانينا گدئب ددي: "سالام، اي مرحمت تاپميش! رب سَنئنله‌دئر."

1:29  مريم مله‌يئن ددئيي سؤزلردن نئگاران اولوب، گئجَلمئشدي کي، بو نجه سالاملاشماقدير.

1:30  آمّا ملک اونا ددي: "اي مريم، قورخما. تاري يانيندا توفئق تاپيبسان.

1:31  باخ، بويلو اولوب بئر اوغول دوغاجاقسان، و اونون آديني عئسا قوياجاقسان.

1:32  او، بؤيوک اولاجاق و حاق-تاعالانين اوغلو چاغيريلاجاق. رب تاري اونا، آتاسي داوودون تختئني وره​جکدئر.

1:33  و او، يعقوبون اِوي اوستونه ابده کئمي سلطنت اده​جک و اونون پادشاهليغينين آخيري اولماياجاق."

1:34  مريم ملکدن سوروشدو: "بو نجه اولا بئلر، منئم کي، حله اَرئم يوخدور؟"

1:35  ملک جاواب ورئب ددي: "موقدّس روح سنئن اوستونه نازئل اولاجاق و حاق-تاعالانين قودرتي سنه کؤلگه سالاجاق. اونون اوچون ده او موقدّس مؤولودا تارينين اوغلو ديئله​جک.

1:36  باخ، سنئن قوحومون الئزابت ده بو قوجا زامانيندا بئر اوشاغا بويلودور. او کي، اونون حاقّيندا سونسوز ديئردئلر، ائندي آلتينجي آييني کچئردئر.

1:37  چونکي تارينين يانيندا قيري‌مومکون بئر شي يوخدور."

1:38  مريم ددي: "من ربّئن کنئزئيم. قوي منه ددئيئن کئمي اولسون." و ملک اونون يانيندان گتدي.

1:39  او گونلرده مريم دوروب، تله‌سئک داغليق بؤلگه​سئنده اولان يهودئيه​نئن بئر شهرئنه گتدي.

1:40  و زکريانين اِوئنه گئرئب، الئزابته سالام وردي.

1:41  الئزابت مريمئن سالاميني اشئدن زامان، اوشاغي قارنيندا ترپَشدي و موقدّس روحلا دولدو،

1:42  اوجا سَسله سَسله‌نئب ددي: "سن آروادلار آراسيندا موبارکسن، قارنيندا اولان اوشاق دا موبارکدئر!

1:43  منه هارادان بله بئر عئزّت گلئب کي، ربّئمئن آناسي گؤروشويومه گلسئن!

1:44  چونکي سنئن سالامينين سسي قولاغيما يتئشن واخت، اوشاق قارنيمدا شادليقدان ترپَشدي.

1:45  خوش او آدامين حالينا کي، ائنانيب ربّئن طرفئندن ديئلمئش سؤز يرئنه يتئشه​جک!"

1:46  و مريم ددي: "جانيم ربّي اوجالدير.

1:47  و روحوم قورتاريجيم تاريدا شادليق ادئر.

1:48  چونکي او، کنئزئنئن حقئر حالينا مرحمت نظري ساليب. بوندان سونرا هامي نسئللر منه بختور دئيه​جکلر.

1:49  چونکي او قادئر اولان، منئم اوچون بؤيوک ائشلر اتدي. اونون آدي موقدّسدئر!

1:50  او، اؤز رحمتئني، نسئل به نسئل، اوندان قورخانلارين اوستونه سالير،

1:51  قولو ائله قودرتلي ائشلر گؤرسه‌دئب. اوره‌يئنده مغرور اولانلاري داغيديبدير

1:52  پادشاهلاري تختلرئندن اِندئرئب، لاکئن باشي​آشاغي اولان آداملاري اوجالديب.

1:53  آجلاري ياخشي شيلرله دويوروب، آمّا وارلي آداملاري الي-بوش قايتاريب.

1:54  او، اؤز قولو ائسرايئله ائمداد ادئب، ياديندادير کي،

1:55  ائبراهئم و اونون نسلئنه ابده کئمي رحمت گؤرسدسئن. نجه کي، آتالاريميزا دا دمئشدي."

1:56  و مريم اوچ آيا قدر الئزابتئن يانيندا قالدي و سونرا اوئنه قاييتدي.

1:57  الئزابتئن دوغوم واختي يتئشدي و او، بئر اوغلان دوغدو.

1:58  اونون قونشولار و قوحوملاري اشئتدئلر کي، رب اونا بؤيوک بئر مرحمت گؤرسه‌دئب و اونونلا شادليق اتدئلر.

1:59  سکّئزئنجي گون گلدئلر کي، اوشاغي ختنه اتسئنلر و ائسته‌يئردئلر اونون آديني، آتاسينين آدينا گؤره، زکريا قويسونلار.

1:60  لاکئن آناسي جاواب ورئب ددي: "يوخ! اونون آدي يحيا اولاجاق!"

1:61  اونا ددئلر: "قوحوملارينين آراسيندا بو آدلا آدلانميش هچ کس يوخدور."

1:62  سونراسي آتاسيندان ائشاره​ ائله سوروشدولار کي، اوغولون آديني نه قويماق ائسته‌يئر.

1:63  زکريا بئر يازي تخته​سي ائسته‌دي و تخته​نئن اوستونده يازدي: "اونون آدي يحيادير." هامي مات قالدي.

1:64  او آندا زکريانين دئلي آچيلدي و تارييا حمد ادئب دانيشماغا باشلادي.

1:65  اونلارين اطرافيندا ياشايان هامي قونشولاري قورخو باسدي و يهودئيه​نئن هامي داغليق بؤلگه‌سئنده، هر کس بو واقئعه​دن دانيشيردي.

1:66  و بونو اشئدنلر، اشئتدئکلرئنئن هاميسيني يادلاريندا ساخلاييب، حيران قالميشديلار و ديئردئلر: "بو اوشاق نه اولاجاق!" چونکي ربّئن الي اونونلا ائدي.

1:67  اوشاغين آتاسي زکريا، موقدّس روحلا دولدو و نبئلئک ادئب ددي:

1:68  "ائسرايئلئن تاريسي رب، موبارک اولسون. چونکي گلئب و اؤز خالقيني خئلاص ادئب،

1:69  و داوودون اِوئندن بئزئم اوچون قودرتلي بئر قورتاريجي ميدانا گؤنده‌رئب.

1:70  نجه کي، چوخ زامانلاردان قاباق اؤز موقدّس پيغمبرلرئنئن آغيزي​ ائله دمئشدئر کي،

1:71  دوشمنلرئمئزئن ​و ​بئزدن نئفرت​ادنلرئن هاميسينين الئندن بئزي قورتاراجاق.

1:72  اونون اوچون کي، آتالاريميزا رحمت گؤرسدسئن و اؤز موقدّس عهدئني خاطيرلاسين.

1:73  آتاميز ائبراهئمه ائچدئيي او آند کي،

1:74  بئزي دوشمنلرئمئزئن الئندن نئجات ورسئن و قادئر اتسئن کي، قورخوسوز خئدمت ادک؛

1:75  بوتون عؤمروموزو اونون حوضوروندا قودسئيّت و صالحلئکله!

1:76  و سن اي اوشاق، حاق-تاعالانين پيغمبري چاغيريلاجاقسان. چونکي ربّئن قاباغيندا گدئب، اونون يولونو حاضيرلاياجاقسان.

1:77  اِله کي، اونون خالقينا نئجات معرئفتئني وره​سن کي، اونلارين گوناهلارينين باغيشلانماسيندادير.

1:78  تاريميزين مرحمتئنه گؤره، طولوع ادن گونش گؤيدن بئزه گله​جک.

1:79  اله کي، قارانليقدا و اؤلوم کؤلگه سئنده اوتورانلارا ائشيق ورسئن و بئزئم قدملرئمئزي صولح يولونا هئدايت اتسئن."

1:80  و اوشاق بؤيويوب، روحدا قووّتله‌نئردي و ائسرايئل خالقينين آراسيندا ظوهور اده‌نه قدر چؤللرده ياشاييردي.