Kapingamarangi - I Thessalonians

Chapter 1

1:1  Mai baahi o Paul, Silas mo Timothy, ang-gi di nohongo-dabu i Thessalonica dela gu-hai-mee ginai God Tamana mo Tagi go Jesus Christ. Tumaalia mo-di noho i-di aumaalia gi-madalia goodou.

1:2  Gimaadou e-danggee hagaamu tumaalia ang-gi God i-nia madagoaa huogodoo, ge dee-modu di-madau haga-langahia labelaa goodou i-lodo madau dalodalo.

1:3  Gimaadou e-langahia i-mua nnadumada o tadau Damana go God i-di godou hai-hegau gi godou hagadonu, mo di aloho dela gaa-hidi-ai goodou ga-ngalua damana, mo di-godou hagamau-dangihi i-lodo di-godou hagadagadagagee gi tadau Dagi go Jesus Christ.

1:4  Madau duaahina-nei, gimaadou gu-iloo bolo God e-aloho i goodou, gei gu-hilihili goodou e-hai nia dama ni-aana.

1:5  Gimaadou gu-hagadele-adu gi goodou di Longo-Humalia, hagalee go nnelekai la-hua, mo nia mogobuna o-di Hagataalunga-Dabu, mo di-madau hagadonu dela guu-donu humalia. Goodou gu-iloo madau mouli i-di madau madagoaa nogo noho i godou baahi belee hagahumalia goodou.

1:6  Goodou gu-daudali-hua gimaadou mo Tagi. Ma e-aha maa goodou guu-tale ang-gi di hagaduadua damana, gei goodou guu-kae nnelekai aalaa, mo-di tene mai baahi di Hagataalunga-Dabu.

1:7  Gei goodou guu-hai di ada hagamodongoohia ang-gi digau hagadonu huogodoo o Macedonia mo Achaia.

1:8  Hagalee go nnelekai di Longo Humalia lahua ala ne-agoago go goodou gi-lodo Macedonia mo Achaia, gei di longo o di-godou hagadonu a God guu-dele labelaa gi-nia gowaa huogodoo. Malaa, gimaadou gu-dei madau mee e-helekai ai.

1:9  Nia daangada huogodoo gu-hagabooboo i-di godou hagalaamua gimaadou i-di madau lloo-adu gi godou baahi, mo di-godou huli gi-daha mo nia balu-god ang-gi God, bolo goodou e-daumaha-hua gi God Mouli dela e-donu,

1:10  mo di-godou talitali di hanimoi o dana Dama-madua i-di langi. Dana Dama-madua go Jesus dela ne-haga-mouli-aga go Mee mai i dono made, gei dela e-haga-dagaloaha gidaadou gi-daha mo-di hagawelewele a God dela ga-dau-mai.

Chapter 2

2:1  Madau duaahina-nei, goodou gu-iloo di-madau lloo-adu gi godou baahi guu-gila humalia huoloo.

2:2  Gei goodou gu-iloo di-madau hagahuaidu mo haga-balumee i-lodo Philippi, i-mua di-madau lloo-adu gi godou baahi i Thessalonica. Ma e-aha maa gimaadou guu-dau gi-lodo di hai-baahi damana, gei tadau God gu-hagamaaloo-aga gimaadou bolo gi-agoago-adu gi goodou di Longo-Humalia dela mai dono baahi.

2:3  Gei madau agoago-adu gi goodou, la-hagalee ne-gaamai i-nia kai-tilikai, be-di maanadu huaidu, be di halahalau-dangada.

2:4  Gei gimaadou e-agoago i-nia madagoaa huogodoo be-di hiihai a God, idimaa, Mee gu-dugu-mai gi gimaadou gi-hagadele di Longo Humalia. Gimaadou hagalee hagamada bolo e-haga-manawa lamalia nia daangada, gei e-haga-manawa-lamalia a God dela e-hagadina tadau hagabaubau.

2:5  Goodou gu-iloo humalia bolo gimaadou hagalee ne-lloo-adu mo madau helekai halahalau, be gimaadou ne-helekai i-nia helekai ala e-hagammuni di hagagailaa. God go di-madau haga-dootonu.

2:6  Gimaadou digi hagamada bolo e-halahala di-madau hagaamu mai baahi digau ala i-golo, be mai godou baahi,

2:7  ma e-aha maa gimaadou e-mee di hai goodou gi-heia madau hiihai, idimaa gimaadou la nia dama agoago-hagau ni Christ. Gei gimaadou nogo manawa balabala i-di madau madagoaa nogo noho i godou baahi, nogo hai gadoo be tinana e-benebene ana dama.

2:8  Idimaa i-di madau aaloho i goodou, gimaadou gu-togomaalia e-gowadu gi goodou di Longo-Humalia mai baahi o God, gei hagalee go di Longo-Humalia la-hua, mo madau mouli labelaa, idimaa, goodou guu-hai nia hoo hagaaloho ni gimaadou.

2:9  Madau duaahina-nei, goodou e-langahia di-madau ngalua duadua. Gimaadou nogo ngalua boo mo aa bolo gi-aadee gimaadou, i-di-madau hagi-adu di Longo-Humalia mai baahi o God.

2:10  Madau gau hagadootonu la-go goodou mo God, bolo madau hangaahai-adu gi goodou ala gu-hagadonu, la-nogo madammaa ge donu, hagalee hala.

2:11  Goodou e-iloo bolo di-madau benebene tangada-nei mo tangada-nei i goodou, le e-hai be nia maadua e-benebene nau dama donu.

2:12  Gimaadou gu-hagamaaloo-aga goodou ge e-haga-tenetene goodou, gu-hagamahi-adu gi goodou bolo gi-mouli i-di mouli dela e-manawa-tene ginai a God, dela e-gahigahi-mai goodou gi-hai-mee goodou gi dono henua mo ono madamada.

2:13  Tadinga labelaa i-golo dela e-danggee-ai gimaadou gi God i-nia madagoaa huogodoo. Di-madau madagoaa ne-gowadu gi goodou nia helekai a God, gei goodou gu-longono guu-kae nia maa, hagalee ne-kae bolo nia helekai mai baahi nia daangada, gei ne-kae bolo nia helekai mai baahi o God, gei di-maa e-donu. Idimaa, God le e-hai-hegau i-baahi goodou ala gu-hagadonu.

2:14  Madau duaahina-nei, nia mee ala ne-hai-adu gi goodou, la-guu-hai labelaa gi-nia nohongo-dabu a God ala i-lodo Judea, gi-nia daangada ala gu-hai-mee ginai Jesus Christ. Goodou guu-kae di hagaduadua mai baahi godou daangada donu, dela ne-kae go digaula mai baahi digau o Jew.

2:15  Aalaa go ginaadou ala ne-daaligi Tagi Jesus mo nia soukohp, guu-hai hagahuaidu gimaadou. Digaula gu-haga-manawa-gee huoloo a God, mo-di hai-baahi gi-nia daangada huogodoo!

2:16  Digaula gu-hagamada e-bule gimaadou gi-hudee agoago gi digau tuadimee i nnelekai ala e-mee di haga-mouli digaula. Deenei tamanaiee o nadau huaidu ala nogo haihai i-nia madagoaa huogodoo. Dolomeenei gei di hagawelewele o God la-guu-dau i digaula!

2:17  Madau duaahina-nei, gimaadou nogo mogowaa i goodou i-di madagoaa bodobodo, hagalee mogowaa i-baahi tadau hagamamaanadu, gei e-mogowaa-hua i-tadau huaidina. Gimaadou gu-hidihidi huoloo i goodou, gu-hagamahi belee haga-heetugi adu gi goodou!

2:18  Gimaadou gu-hiihai e-lloo-adu labelaa. Au go Paul gu-hagamada belee hanadu labelaa gi godou baahi hagalee hagadahi hua, gei Setan digi diagia gimaadou gi-lloo-adu.

2:19  Go goodou hua go di-madau hagadagadagagee mo di-madau tene, mo di-madau hadinga e-hagaamu-ai madau aali i-mua tadau Dagi go Jesus i dono madagoaa ma-ga-hanimoi-ai.

2:20  E-donu, ma go goodou ala go madau hagaamu mo madau tene!

Chapter 3

3:1  Gimaadou gu-deemee di-hagakono di noho mogowaa i-goodou, gei gimaadou ga-hagamaanadu bolo gimaadou gaa-noho-hua mada-gimaadou i Athens

3:2  i-di madagoaa gimaadou ne-hagau-adu tadau duaahina go Timothy dela nogo hai-hegau dalia gimaadou gi God e-agoago di Longo-Humalia di hai o Christ. Gimaadou ne-hagau-adu a-mee belee hagamaaloo-aga goodou, ge e-hagamaamaa godou hagadonu,

3:3  bolo tangada e-dahi i-goodou gi-dee huli gi-muli idimaa go nia hagaduadua aanei. Goodou gu-iloo-hua bolo nia hagaduadua aanei la di mee ni God mai gi gidaadou.

3:4  Di-madau madagoaa nogo i-godou baahi, gimaadou gu-hagi-adu i-mua di madagoaa bolo gidaadou gaa-tale gi-nia hagaduadua, gei goodou gu-modongoohia bolo guu-hai.

3:5  Deelaa tadinga dagu hagau-adu Timothy. Au gu-deemee di-talitali, ga-hagau-adu laa a-mee, bolo gi-iloo-eau di-godou hagadonu. E-deemee di-hai bolo Setan gu-hagamada goodou, gei madau hegau ala nogo hai i godou baahi, la-gu-balumee hua.

3:6  Dolomeenei, gei Timothy gu-gaamai di longo haga-tenetene o godou hagadonu mo aaloho. Mee gu-helekai bolo goodou e-mamaanadu huoloo i gimaadou, gei goodou e-hiihai huoloo bolo goodou e-heetugi mai gi gimaadou, gadoo be di-madau hiihai.

3:7  Malaa, madau duaahina-nei, i-lodo madau haingadaa mo madau hagaduadua huogodoo, gimaadou e-maaloo huoloo, idimaa, ma go godou hagadonu ne-hagamaaloo-aga gimaadou.

3:8  Dolomeenei gimaadou e-mouli, idimaa goodou e-hagamau-dangihi godou mouli buni-anga gi tadau Dagi.

3:9  Dolomeenei gimaadou guu-mee di-danggee ang-gi God i goodou. Gimaadou e-danggee gi Mee, idimaa gimaadou gu-tenetene i-mua o God, idimaa go goodou.

3:10  Boo mo aa, gei gimaadou e-dangidangi ang-gi Mee gi-dugu-mai tadau madagoaa e-heetugi, gei e-hagamaamaa goodou i-nia mee ala e-dee-dohu i godou hagadonu.

3:11  Tadau Damana go God mo tadau Dagi go Jesus gi-hagatogomaalia-ina di ala dela e-lloo-adu-ai gimaadou gi goodou!

3:12  Tagi gi-hagatomo-aga-ina di-godou aloho i godou mehanga gi-honutulu be madau aloho i goodou.

3:13  I-di ala deenei, Mee ga-hagamaaloo-aga godou manawa gii-dohu dogomaalia ge e-dabuaahia i-baahi tadau Damana go God, i-di madagoaa tadau Dagi Jesus ma-ga-hanimoi mo ana daangada huogodoo.

Chapter 4

4:1  Madau duaahina-nei, goodou gu-iloo mai madau baahi di mouli dela e-haga-tenetene-ai a God. E-donu, deenei di-godou mouli e-mouli-ai, gei dolomeenei gimaadou e-tangi-adu hagamahi i-di ingoo o tadau Dagi go Jesus, bolo goodou gi-heia-hua beelaa gi-tomo-aga i-lodo di mouli deenei.

4:2  Goodou gu-iloo nia agoago ala gu-hagi-adu go gimaadou mai di mogobuna o tadau Dagi go Jesus.

4:3  Malaa, deenei di manawa o God adu gi goodou, bolo gi-heia goodou gii-dabu, gei gi-lawa-mai gi-daha mo-di hai be-di manu.

4:4  Tangada-nei mo tangada-nei gi-iloo-ia di noho i-baahi dono lodo i tabuaahia mo-di hagalaamua.

4:5  Hudee hiihai gi-di manawa hai be-di manu, gadoo be nia daangada ala e-noho i-lodo di bouli ala e-de-iloo-ginaadou a God.

4:6  Malaa, di mee deenei, gi-dee hai-hala go tangada gi dono duaahina daumaha, be e-hagahuaidu nia donu o-maa. Gimaadou gu-hagi-adu nia mee aanei i-mua, gei gimaadou gu-haga-modongoohia-adu gi goodou di hai a God dela e-hagaduadua digau ala e-hai nadau mee hala beenei.

4:7  God hagalee ne-gahigahi-mai gidaadou gi-lodo di mouli milimilia, gei ne-gahigahi-mai gi-lodo di mouli dabuaahia.

4:8  Maa tangada ga-haga-balumee nia agoago aanei, la-hagalee ne-haga-balumee tangada, ne-haga-balumee-hua a God dela ne-gowadu gi goodou dana Hagataalunga-Dabu.

4:9  Au hagalee bolo e-hai-loo gi-hihi-adu gi goodou di-godou hai dela e-aloho i godou duaahina hagadonu aalaa, idimaa, God guu-lawa dana hagi-adu di hai o-di hagadau-aaloho i godou mehanga.

4:10  Goodou guu-hai nia mee aanei gi godou duaahina ala i-lodo Macedonia hagatau. Malaa, madau duaahina-nei, gimaadou e-tangi-adu bolo gi-hagamahi gi-haga-damana-ina-aga di aloho deenei.

4:11  Goodou hagamahi gi-di mouli dela e-noho i-di aumaalia gii-bida madamada humalia i goodou. Gi-ngalua gi godou mouli, be di-madau hai ne-hagi-adu i-mua.

4:12  Goodou ma-gaa-hai beenei, gei goodou ga-hagalaamua go digau ala e-de-hagadonu, gei goodou ga-hagalee gana gi digau ala i-golo.

4:13  Madau duaahina-nei, gimaadou e-hiihai bolo goodou gi-iloo di tonu di hai o digau mmade, bolo gi-de-lodo-huaidu goodou gadoo be digau ala nadau hagadagadagagee ai.

4:14  Gidaadou gu-hagadonu bolo Jesus guu-made, gu-mouli-aga, malaa, gidaadou gu-hagadonu bolo God ga-laha-mai dalia a Jesus digau ala guu-mmade i-lodo nadau hagadonu a-Mee.

4:15  Malaa, aanei nia agoago a Tagi ala e-agoago go gimaadou adu gi goodou bolo gidaadou ala e-mouli i-di laangi o Tagi ma-ga-hanimoi-ai, gidaadou hagalee bolo gaa-hula i-mua digau ala guu-mmade.

4:16  Tagi ga-haneia i-di langi, gei di lee hagadaba gaa-hai, deenei di lee o tangada di-langi aamua, mo-di lee o-di buu a God ga-ili, gei digau ala ne-mmade i-lodo nadau hagadonu a Christ ga-mouli-aga matagidagi.

4:17  Nomuli, gei gidaadou huogodoo ala e-mouli i-di madagoaa deelaa, ga-haga-puni gi digaula i-lodo nia gololangi e-heetugi gi Tagi i-lodo di ahiaalangi. Deelaa di hai o tadau noho madalia a Tagi gaa-hana-hua beelaa.

4:18  Malaa, hagadau hagamaaloo-aga-ina goodou gi nnelekai aanei.

Chapter 5

5:1  Madau duaahina-nei, nia madagoaa mo nia laangi nia mee aanei ma-ga-kila-aga e-hagalee e-hai-loo gi-hihi-adu gi goodou.

5:2  Idimaa, goodou gu-iloo humalia di Laangi o Tagi dela e-hanimoi-ai le e-hai be tangada gaiaa dela e-hanimoi i-di boo.

5:3  Deelaa di madagoaa nia daangada ga-helekai boloo, “Nia mee huogodoo gu-humalia, guu-noho-baba,” gei dela hogi di madagoaa di mooho damana ga-limalima gaa-tale ang-gi digaula, gadoo be-di mmae o-di ahina ma-ga-haanau, gei nia daangada huogodoo ga-deemee di-llele gi-daha.

5:4  Madau duaahina, goodou hagalee e-noho i-lodo di bouli, malaa, di laangi deelaa gi-hudee haga-homouli-ina goodou be tangada gaiaa.

5:5  Goodou huogodoo la nia daangada ni-di maalama, nia daangada ni-di aa. Gidaadou hagalee ni-di boo be ni-di bouli.

5:6  Malaa, gidaadou hudee kii be digau ala i-golo, gi-aala, gi-madammaa.

5:7  Digau ala e-kii, le e-kii i-di boo, gei digau ala e-libaliba, le e-libaliba i-di boo.

5:8  Malaa, gidaadou la nia daangada ni-di laangi, gidaadou gi-madammaa, gi-ulu di hagadonu mo-di aloho, e-hai tuuli o tadau hadahada, gi-ulu di goobai-dauwa, dela go di hagadagadagagee o-di mouli dee-odi.

5:9  God hagalee ne-hilihili gidaadou bolo gi-duadua i dono hagawelewele, gei gi-hai-mee gi-di mouli dee-odi mai i tadau Dagi go Jesus Christ,

5:10  dela ne-made-mai gi gidaadou bolo gi-mouli gidaadou dalia a-Mee, ma e-aha maa gidaadou e-mouli be e-mmade i dono madagoaa ma-ga-hanimoi-ai.

5:11  Deenei-laa, goodou hagadau hagamaaloo-ina-aga goodou, hagadau hagamaamaa i goodou be di-godou hai dela e-hai dolomeenei.

5:12  Madau duaahina-nei, gimaadou e-tangi-adu gi-hagalabagau-ina digau ala e-hai nadau hegau i godou baahi, ala e-dagi ge aago goodou gi-di mouli o Christ.

5:13  Gi-hagalaamua-ina, aaloho i digaula, idimaa go nadau hegau ala e-hai. Goodou gii-noho i-lodo di aumaalia.

5:14  Madau duaahina-nei, gimaadou e-helekai hagamahi adu gi goodou, gi-hagailoo gi digau ala e-hagatoo, gei gi-hagamaaloo-aga-ina digau ala e-lligi nadau hagadonu, mo-di hagamaamaa digau ala e-paagege, mo-di hagakono di manawa ang-gi nia daangada huogodoo.

5:15  Goodou mmada gi-humalia gi-dee hui di huaidu gi-di huaidu, gei nia madagoaa huogodoo goodou gi-dugu-anga gi-heia nia mee humalia i godou mehanga mo i-baahi nia daangada huogodoo.

5:16  Goodou gi-tenetene i-nia madagoaa huogodoo,

5:17  gii-hai dalodalo i-nia madagoaa huogodoo.

5:18  Goodou gi-danggee ang-gi God i-nia mee huogodoo, deenei di mee a God e-haa-manawa-ai bolo goodou gi-heia i-lodo godou mouli buni-anga gi Jesus Christ.

5:19  Goodou hudee dugua di moomee o-di Hagataalunga-Dabu dela i godou baahi,

5:20  gei goodou hudee haga-balumee-ina nia helekai mai baahi o God.

5:21  Hagadina-ina nia mee huogodoo, daahia go nia mee ala e-humalia,

5:22  gei gi-hagapaa gi-daha mo nia mee huaidu huogodoo.

5:23  God dela ne-gaamai gi gidaadou di aumaalia, gi-heia goodou gi-dabuaahia i-nia ala huogodoo, ge gi-benebene-ina goodou hagatau, godou hagataalunga, godou mouli, mo godou huaidina, gi-daha mo nia mee hai-hala huogodoo i-di madagoaa o tadau Dagi Jesus Christ ma-ga-hanimoi.

5:24  Mee dela e-gahigahi goodou, ga-haga-gila-aga di mee deenei, idimaa, Mee e-manawa-dahi.

5:25  Madau duaahina-nei, goodou dalodalo i gimaadou.

5:26  Goodou gi-hagaaloho gi digau hagadonu huogodoo gi-di hagaaloho o-nia dama a Christ.

5:27  Au e-hagamaaloo goodou i-di mogobuna o Tagi bolo goodou gi-daulia di lede deenei gi tadau duaahina-daumaha huogodoo.

5:28  Tumaalia o tadau Dagi go Jesus Christ gi-madalia goodou.