Afr1953 - Psalms - 83

83:1  'n Lied. 'n Psalm van Asaf.

83:2  o God, hou U nie stil nie, swyg nie en rus nie, o God!

83:3  Want kyk, u vyande maak rumoer, en u haters steek die hoof op.

83:4  Teen u volk smee hulle listig 'n plan en hou onder mekaar raad teen u verborgenes.

83:5  Hulle sê: Kom, laat ons hulle vernietig, dat hulle geen volk meer is nie, sodat aan die naam van Israel nie meer gedink word nie.

83:6  Want hulle het van harte saam raad gehou; teen U sluit hulle 'n verbond:

83:7  die tente van Edom en die Ismaeliete, Moab en die Hagareners,

83:8  Gebal en Ammon, en Amalek, Filistéa saam met die inwoners van Tirus.

83:9  Ook het Assur by hulle aangesluit; hulle is 'n arm vir die kinders van Lot. Sela.

83:10  Maak met hulle soos met Mídian, soos met Sísera, soos met Jabin by die spruit Kison:

83:11  hulle is verdelg by Endor, hulle het mis geword vir die grond.

83:12  Maak hulle, hul edeles, soos Oreb en Seëb, en al hulle vorste soos Seba en Salmúna,

83:13  wat sê: Laat ons die woninge van God vir ons in besit neem!

83:14  My God, maak hulle soos strooi, soos stoppels voor die wind.

83:15  Soos vuur wat 'n bos verbrand, en soos die vlam wat berge aan die brand steek —

83:16  vervolg hulle só met u storm en verskrik hulle met u stormwind.

83:17  Oordek hulle aangesig met skande, dat hulle u Naam kan soek, o HERE!

83:18  Laat hulle beskaamd staan en verskrik wees vir ewig, en laat hulle rooi van skaamte word en omkom; sodat hulle kan weet dat U, wie se Naam HERE is, alleen die Allerhoogste is oor die hele aarde.