Afr1953 - Psalms - 119

119:1  Alef. Welgeluksalig is die opregtes van weg, wat in die wet van die HERE wandel.

119:2  Welgeluksalig is die wat sy getuienisse bewaar, Hom van ganser harte soek;

119:3  ook geen ongeregtigheid doen nie, maar in sy weë wandel.

119:4  U het u bevele gegee om dit trou te onderhou.

119:5  Ag, was my weë maar vas om u insettinge te onderhou!

119:6  Dan sal ek nie beskaamd staan as ek op al u gebooie let nie.

119:7  Ek sal U loof in opregtheid van hart as ek u regverdige verordeninge leer.

119:8  Ek sal u insettinge onderhou; verlaat my nie geheel en al nie.

119:9  Bet. Waarmee sal die jongeling sy pad suiwer hou? Deur dit te hou na u woord.

119:10  Ek soek U met my hele hart; laat my nie afdwaal van u gebooie nie.

119:11  Ek het u woord in my hart gebêre, dat ek teen U nie sal sondig nie.

119:12  Lofwaardig is U, o HERE! Leer my u insettinge!

119:13  Ek het met my lippe vertel al die verordeninge van u mond.

119:14  Ek is vrolik in die weg van u getuienisse soos oor allerhande rykdom.

119:15  Ek wil u bevele oordink en op u paaie let.

119:16  Ek sal my verlustig in u insettinge, u woord sal ek nie vergeet nie.

119:17  Gimel. Doen goed aan u kneg, sodat ek kan lewe; dan wil ek u woord bewaar.

119:18  Open my oë, dat ek kan sien die wonders uit u wet.

119:19  Ek is 'n vreemdeling op die aarde; verberg u gebooie nie vir my nie.

119:20  My siel vergaan van verlange na u verordeninge altyddeur.

119:21  U dreig die vermeteles as gevloektes wat van u gebooie afdwaal.

119:22  Wentel smaad en veragting van my af, want u getuienisse het ek bewaar.

119:23  Al sit vorste en beraadslaag teen my — u kneg oordink u insettinge.

119:24  Ja, u getuienisse is my verlustiging, my raadsmanne.

119:25  Dalet. My siel kleef aan die stof; maak my lewend na u woord.

119:26  My weë het ek vertel, en U het my verhoor; leer my u insettinge!

119:27  Laat my die weg van u bevele verstaan, dat ek u wonders kan oordink.

119:28  My siel drup weg van kommer; rig my op na u woord.

119:29  Verwyder van my die weg van leuens, en verleen my genadiglik u wet.

119:30  Ek het die weg van waarheid verkies; u verordeninge het ek voor my gestel.

119:31  Ek kleef u getuienisse aan; o HERE, maak my nie beskaamd nie!

119:32  Ek sal op die weg van u gebooie wandel, want U verruim my hart.

119:33  He. HERE, leer my die weg van u insettinge, sodat ek dit tot die einde toe kan bewaar.

119:34  Gee my verstand, dat ek u wet kan bewaar, ja, dit kan onderhou van ganser harte.

119:35  Laat my wandel op die pad van u gebooie, want daarin het ek 'n behae.

119:36  Neig my hart tot u getuienisse en nie tot winsbejag nie.

119:37  Wend my oë af, dat hulle geen nietigheid sien nie; maak my lewend in u weë.

119:38  Vervul aan u kneg u belofte wat pas by u vrees.

119:39  Wend my smaadheid af wat ek vrees, want u verordeninge is goed.

119:40  Gewis, ek het 'n begeerte tot u bevele; maak my lewend deur u geregtigheid.

119:41  Wau. En laat u goedertierenhede oor my kom, o HERE, u heil volgens u belofte,

119:42  sodat ek my smader iets kan antwoord, want ek vertrou op u woord.

119:43  En onttrek die woord van waarheid nie geheel en al aan my mond nie, want op u verordeninge wag ek.

119:44  Dan wil ek u wet altyddeur onderhou, vir ewig en altyd,

119:45  en in die ruimte wandel, want ek soek u bevele.

119:46  Ook wil ek voor konings van u getuienisse spreek en my nie skaam nie.

119:47  En ek wil my verlustig in u gebooie wat ek liefhet,

119:48  en my hande ophef na u gebooie wat ek liefhet, en u insettinge oordink.

119:49  Sajin. Gedenk die woord aan u kneg, omdat U my laat hoop het.

119:50  Dit is my troos in my ellende, dat u belofte my lewend maak.

119:51  Vermeteles het baie met my gespot; van u wet het ek nie afgewyk nie.

119:52  Ek het gedink, o HERE, aan u oordele van ouds, en ek het my getroos.

119:53  Toorngloed het my aangegryp vanweë die goddelose wat u wet verlaat.

119:54  U insettinge was gesange vir my in die huis van my vreemdelingskap.

119:55  HERE, in die nag het ek gedink aan u Naam, en ek het u wet onderhou.

119:56  Dit het my deel geword, omdat ek u bevele bewaar het.

119:57  Get. Die HERE is my deel; ek het gesê dat ek u woorde sal bewaar.

119:58  Ek het U van ganser harte om genade gesmeek; wees my genadig volgens u belofte.

119:59  Ek het my weë oordink en my voete laat teruggaan na u getuienisse.

119:60  Ek het my gehaas, en nie getalm nie, om u gebooie te onderhou.

119:61  Die strikke van die goddelose het my omring; u wet het ek nie vergeet nie.

119:62  Middernag staan ek op om U te loof vir u regverdige verordeninge.

119:63  Ek is 'n metgesel van almal wat U vrees, en van die wat u bevele onderhou.

119:64  HERE, die aarde is vol van u goedertierenheid; leer my u insettinge.

119:65  Tet. U het goed gedoen aan u kneg, HERE, na u woord.

119:66  Leer my 'n goeie insig en kennis, want ek glo aan u gebooie.

119:67  Voordat ek verdruk was, het ek gedwaal; maar nou onderhou ek u woord.

119:68  U is goed en doen goed; leer my u insettinge.

119:69  Vermeteles het my leuens toegedig; maar ék bewaar van ganser harte u bevele.

119:70  Hulle hart is ongevoelig soos vet; maar ék verlustig my in u wet.

119:71  Dit is goed vir my dat ek verdruk was, sodat ek u insettinge sou leer.

119:72  Die wet van u mond is vir my beter as duisende stukke goud en silwer.

119:73  Jod. U hande het my gemaak en my toeberei; maak my verstandig, dat ek u gebooie kan leer.

119:74  Die wat U vrees, sien my, en hulle is bly; want op u woord wag ek.

119:75  Ek weet, HERE, dat u oordele regverdig is en dat U my uit getrouheid verdruk het.

119:76  Laat tog u goedertierenheid wees om my te troos volgens u belofte aan u kneg.

119:77  Laat u barmhartighede oor my kom, dat ek kan lewe; want u wet is my verlustiging.

119:78  Laat die vermeteles beskaamd staan, omdat hulle sonder oorsaak my onregverdig behandel het; maar ék oordink u bevele.

119:79  Laat die wat U vrees, na my terugkeer, en die wat u getuienisse ken.

119:80  Laat my hart opreg wees in u insettinge, sodat ek nie beskaamd hoef te staan nie.

119:81  Kaf. My siel smag na u heil; op u woord wag ek.

119:82  My oë smag na u belofte en sê: Wanneer sal U my vertroos?

119:83  Want ek het geword soos 'n leersak in die rook; u insettinge het ek nie vergeet nie.

119:84  Hoeveel sal die dae van u kneg wees? Wanneer sal U gerig oefen onder my vervolgers?

119:85  Vermeteles het vir my kuile gegrawe, hulle wat nie lewe na u wet nie.

119:86  Al u gebooie is waarheid; hulle vervolg my sonder oorsaak; help my!

119:87  Hulle het my amper vernietig op die aarde; maar ék het u bevele nie verlaat nie.

119:88  Maak my lewend na u goedertierenheid, dat ek die getuienis van u mond kan onderhou.

119:89  Lamed. Vir ewig, o HERE, staan u woord vas in die hemele.

119:90  U trou is van geslag tot geslag; U het die aarde bevestig, en dit bly staan.

119:91  Volgens u verordeninge bly hulle vandag nog staan, want alle dinge is u knegte.

119:92  As u wet nie my verlustiging was nie, dan het ek omgekom in my ellende.

119:93  Ek sal u bevele tot in ewigheid nie vergeet nie, want deur hulle het U my lewend gemaak.

119:94  Aan U behoort ek: verlos my, want ek soek u bevele.

119:95  Die goddelose lê en wag op my, om my om te bring; ek gee ag op u getuienisse.

119:96  Aan alle volmaaktheid het ek 'n einde gesien, maar u gebod is baie wyd.

119:97  Mem. Hoe lief het ek u wet; dit is my bepeinsing die hele dag.

119:98  U gebooie maak my wyser as my vyande, want hulle is myne vir ewig.

119:99  Ek is verstandiger as al my leermeesters, want u getuienisse is my bepeinsing.

119:100  Ek het meer verstand as die ou mense, want ek bewaar u bevele.

119:101  Ek het my voete teruggehou van elke verkeerde pad, dat ek u woord kan bewaar.

119:102  Ek het van u verordeninge nie afgewyk nie, want U het my geleer.

119:103  Hoe soet is u beloftes vir my verhemelte, meer as heuning vir my mond.

119:104  Uit u bevele kry ek verstand; daarom haat ek elke leuenpad.

119:105  Noen. U woord is 'n lamp vir my voet en 'n lig vir my pad.

119:106  Ek het gesweer, en dit gehou, om u regverdige verordeninge te onderhou.

119:107  Ek is baie diep neergedruk; HERE, maak my lewend na u woord!

119:108  Laat tog die vrywillige offerandes van my mond U behaag, o HERE, en leer my u verordeninge.

119:109  My lewe is altyddeur in my hand; nogtans vergeet ek u wet nie.

119:110  Die goddelose het vir my 'n vangnet gespan; nogtans het ek van u bevele nie afgedwaal nie.

119:111  Ek het u getuienisse vir ewig as erfdeel ontvang, want hulle is die vreugde van my hart.

119:112  Ek het my hart geneig, om u insettinge te betrag, vir ewig, tot die einde toe.

119:113  Samek. Twyfelaars haat ek, maar u wet het ek lief.

119:114  U is my skuilplek en my skild; op u woord wag ek.

119:115  Gaan weg van my, kwaaddoeners, dat ek die gebooie van my God kan bewaar!

119:116  Ondersteun my volgens u belofte, dat ek kan lewe; en maak my nie beskaamd vanweë my hoop nie.

119:117  Steun my, dat ek verlos word; dan sal ek altyddeur op u insettinge let.

119:118  U verag almal wat van u insettinge afdwaal, want hulle bedrieëry is leuens.

119:119  U ruim al die goddelose van die aarde weg soos skuim; daarom het ek u getuienisse lief.

119:120  My vlees sidder van skrik vir U, en ek vrees vir u oordele.

119:121  Ajin. Ek het reg en geregtigheid gedoen: gee my nie oor aan my verdrukkers nie.

119:122  Wees borg vir u kneg ten goede; laat vermeteles my nie verdruk nie.

119:123  My oë smag na u heil en na die belofte van u geregtigheid.

119:124  Handel met u kneg na u goedertierenheid, en leer my u insettinge.

119:125  Ek is u kneg; maak my verstandig, dat ek u getuienisse kan ken.

119:126  Dit is tyd vir die HERE om te handel: hulle het u wet verbreek.

119:127  Daarom het ek u gebooie lief, meer as goud, ja, as baie fyn goud.

119:128  Daarom hou ek al die bevele aangaande alles vir reg; elke leuenpad haat ek.

119:129  Pe. U getuienisse is wonderbaar; daarom bewaar my siel hulle.

119:130  Die opening van u woorde gee lig; dit maak die eenvoudiges verstandig.

119:131  Ek maak my mond wyd oop en hyg, want na u gebooie verlang ek.

119:132  Wend U tot my en wees my genadig volgens die reg van die wat u Naam liefhet.

119:133  Maak my voetstappe vas in u woord, en laat geen ongeregtigheid oor my heers nie.

119:134  Verlos my van die mens se verdrukking, sodat ek u bevele kan onderhou.

119:135  Laat u aangesig skyn oor u kneg, en leer my u insettinge.

119:136  My oë loop af in strome van water, omdat hulle u wet nie onderhou nie.

119:137  Sade. HERE, U is regverdig, en reg is u verordeninge.

119:138  In geregtigheid het U u getuienisse beveel en in louter trou.

119:139  My ywer verteer my, omdat my teëstanders u woorde vergeet het.

119:140  U woord is deur en deur gelouter, en u kneg het dit lief.

119:141  Ek is klein en verag, maar u bevele vergeet ek nie.

119:142  U geregtigheid is geregtigheid tot in ewigheid, en u wet is waarheid.

119:143  Benoudheid en angs het my getref, maar u gebooie is my verlustiging.

119:144  U getuienisse is geregtigheid tot in ewigheid; maak my verstandig, dat ek kan lewe.

119:145  Kof. Ek het geroep van ganser harte; verhoor my, o HERE! Ek wil u insettinge bewaar.

119:146  Ek het U aangeroep; verlos my, dat ek u getuienisse kan onderhou.

119:147  Voor die môreskemering roep ek om hulp; op u woord wag ek.

119:148  My oë is die nagwake voor om u woord te oordink.

119:149  Hoor my stem na u goedertierenheid; o HERE, maak my lewend volgens u verordeninge.

119:150  Hulle kom nader wat skandelike dade najaag, hulle wat ver van u wet af is.

119:151  U, o HERE, is naby, en al u gebooie is waarheid.

119:152  Lankal het ek geweet uit u getuienisse dat U hulle vir ewig gegrond het.

119:153  Resj. Sien my ellende aan en red my, want u wet vergeet ek nie.

119:154  Verdedig my regsaak en verlos my; maak my lewend volgens u belofte.

119:155  Die heil is ver van die goddelose, want hulle soek u insettinge nie.

119:156  HERE, u barmhartighede is menigvuldig; maak my lewend volgens u verordeninge.

119:157  My vervolgers en my teëstanders is talryk; van u getuienisse wyk ek nie af nie.

119:158  Ek het diegene gesien wat troueloos handel, en dit het my gewalg dat hulle u woord nie onderhou nie.

119:159  Aanskou dat ek u bevele liefhet; o HERE, maak my lewend na u goedertierenheid.

119:160  Die hele inhoud van u woord is waarheid, en al u regverdige verordeninge is tot in ewigheid.

119:161  Sin, Sjin. Vorste het my sonder oorsaak vervolg, maar my hart vrees vir u woord.

119:162  Ek is vrolik oor u belofte soos een wat 'n groot buit vind.

119:163  Leuens haat ek en het daar 'n afsku van; u wet het ek lief.

119:164  Ek loof u sewe maal elke dag oor u regverdige verordeninge.

119:165  Die wat u wet liefhet, het groot vrede, en vir hulle is daar geen struikelblok nie.

119:166  o HERE, ek hoop op u heil, en ek hou u gebooie.

119:167  My siel onderhou u getuienisse, en ek het hulle baie lief.

119:168  Ek onderhou u bevele en u getuienisse, want al my weë is voor U.

119:169  Tau. o HERE, laat my smeking nader kom voor u aangesig; maak my verstandig volgens u woord.

119:170  Laat my smeking voor u aangesig kom; red my volgens u belofte.

119:171  My lippe sal lofsange laat uitstroom, want U leer my u insettinge.

119:172  My tong sal u woord besing, want al u gebooie is geregtigheid.

119:173  Laat u hand my tot hulp wees, want ek het u bevele verkies.

119:174  o HERE, ek verlang na u heil, en u wet is my verlustiging.

119:175  Laat my siel lewe, dat dit U kan loof; en laat u gerigte my help.

119:176  Ek het gedwaal soos 'n verlore skaap; soek u kneg, want u gebooie vergeet ek nie.