Azeri - I Peter

Chapter 1

1:1  عئسا مسئحئن حوارئسي پطروسدان، پونطوس، قالاتئيا، کاپادوسئيا، آسئيا (ايالتي) و بئتئنئيايا داغيلميش قرئبلره کي،

1:2  آتا تارينين ائره​لئدن بئلدئيئنه موطابئق، موقدّس روحون تقدئس ائشئنئن واسئطه​سئله عئسا مسئحدن ائطاعت اتمکلري اوچون و اوستلرئنه اونون قانينين سپئلمه‌سي اوچون سچئلئبلر. فيض و باريش لاپ دولو اؤلچوده سئزئن اولسون.

1:3  تاري و ربّئمئز عئسا مسئحئن آتاسي موتبارک اولسون کي، اؤز بؤيوک فيضئنه گؤره، عئسا مسئحئن اؤلولردن دئرئلمه‌سي ائله باعئث اولدو کي، بئز ياشايان بئر اومئده تزه​دن دوغولاق.

1:4  اِله کي، گؤيلرده سئزئن اوچون ساخلانميش، آرادان گتمه‌ين، لکه​سئز و سولماز بئر مئراثي اَله گتئرک.

1:5  سئز تارينين قودرتي ائله، آخير زاماندا ظاهئر اولونماغا حاضير بئر نئجات اوچون، ائمان واسئطه​سئله موحافئظت اولورسونوز.

1:6  بوندا سئز چوخ سوئنئرسئنئز، گرچي ائندي آز بئر مودّت اوچون، لازيم اولسا، جوربه​جور ائمتاحانلارلا پرئشان اولورسونوز،

1:7  اِله کي، عئسا مسئحئن نئجاتينين ظوهوروندا، ائمانينيزين ثوبوتو، فاني اولان قيزيلدان داها دَيَرلي اولوب، اودلا بله ائمتاحان اولسا دا، تعرئف، عئزّت و حؤرمت گتئرسئن.

1:8  سئز گرچي اونو گؤرمه‌يئبسئنئز، آمّا اونو سوئرسئنئز. گرچي ده ائندي اونو گؤرمه‌يئرسئنئز، لاکئن اونا ائنانيرسينيز و وصفه گلمه‌ين شادليقلا، شؤوکت دولو چوخ شادليق ادئرسئنئز

1:9  و ائمانينيزين نتئجه​سئنه کي، جانلارينيزين نئجاتي اولسون، نايئل اولورسونوز.

1:10  بو نئجاتا گلئنجه، پيغمبرلر او فيض باره‌ده کي، سئزه گله‌جک، قاباقجادان جهدله آختاريب تجسّوس اتدئلر

1:11  و آراشديريرديلار کي، بئلسئنلر، اونلاردا اولان موقدّس روح، کئمه و هانسي زامانا ائشاره ادئر، او زامان کي، مسئحئن عذابلاريني و اوندان سونرا گلن شووکتلرئني قاباقجادان خبر ورئر.

1:12  اونلارا آشکار اولدو کي، بو شيلرده اونلار اؤزلرئنه يوخ، سئزه خئدمت ادئردئلر کي، ائندي ائنجئلي وعظ ادنلر طرفئندن گؤيدن گؤنده‌رئلمئش موقدّس روح واسئطه​سئله سئزه اعلان اولونوب؛ او شيلر کي، اونلاري گؤرمه‌يه ملکلر ده حسرت چکئرلر.

1:13  بونون اوچون، فئکئرلرئنئزي عمل اوچون حاضيرلايين، آييق اولون، اومئدئنئزي کامئل بئر شکئلده او فيضه باغلايين کي، عئسا مسئحئن ظوهوروندا سئزه گتئرئله​جک.

1:14  سؤزه باخان اوشاقلار کئمي، جاهئل زامانلارينيزدا اولان او اوّلکي شهوتلره اؤزونوزو اوخشاتمايين.

1:15  لاکئن سئزي دعوت ادن او موقدّس اولان کئمي، سئز ده اؤزونوزو هر رفتاردا موقدّس ساخلايين.

1:16  چونکي يازيليب: "سئز گرک موقدّس اولاسينيز، چونکي من موقدّسم."

1:17  اگر "آتا" چاغيرديغينيز اودور کي، طرفدارليق اتمه‌دن هر کسي ائشئنه گؤره موحاکئمه ادئر، اوندا ير اوزونده اولان بو قوربت زامانينيزي قورخو ائله کچئردئن.

1:18  بئلئرسئنئز ده کي، اجدادلارينيزدان مئراث آلديغينيز باطئل حيات يوللارينيزدان، گوموش و يا قيزيل کئمي فاني شيلرله تزه​دن آلينماييبسينيز،

1:19  لاکئن باهالي قانلا، عيبسئز و لکه​سئز بئر قوزونونکو کئمي، مسئحئن قاني ائله.

1:20  چونکي او، دونيانين يارانماسيندان اوّل تانينميشدي، آمّا سئزئن خاطئرئنئز اوچون بو آخير زامانلاردا ظاهئر اولوب.

1:21  سئز کي، اونون واسئطه​سئله، اونو اؤلولردن دئرئلدن و اونا عئزّت ورن تارييا ائنانانلارسينيز، اِله کي، ائمان و اومئدئنئز تاريدادير.

1:22  ائندي کي، حقئقتدن ائطاعت ادئب جانلارينيزي قارداشلارا خالئص محبّت اتمک اوچون تمئزله‌يئبسئنئز، جهدله بئربئرئنئزي اورکدن سوئن.

1:23  چونکي سئز فاني توخومدان يوخ، فاني اولماياندان، تارينين ياشايان و باقي اولان کلامينين واسئطه​سئله تزه​دن دوغولوبسونوز.

1:24  چونکي "بوتون بشر اوت کئمي‌دئر، بوتون شؤوکتي ده اوتون چئچه‌يي کئمي‌دئر. اوت سولور، چئچک ده دوشور.

1:25  لاکئن ربّئن کلامي ابده کئمي قالير." سئزه وعظ ادئلن کلام دا اله بودور.

Chapter 2

2:1  بلجه بوتون پئسلئيي، هر جور حئيله​ني، رئياکارليق و پاخيلّيغي و هر جور ائفتئراني قيراغا قويوب،

2:2  آنادان تزه دوغولموش کؤرپه​لر کئمي، کلامين خالئص سودونه جان آتين، اِله کي، نئجاتينيزدا بؤيويه​سئنئز،

2:3  اگر ربّئن مهرئبانليغيني داديبسينيز.

2:4  و اونون يانينا، ائنسانلار طرفئندن ردّ اولونموش، لاکئن تارينين نظرئنده سچئلمئش و قئيمتلي بئر جانلي داش کئمي گلئبسئنئز.

2:5  سئز ده، جانلي داشلار اولاراق، روحاني بئر عئمارت کئمي موقدّس بئر کاهئنلئک اوچون تئکئلئرسئنئز کي، عئسا مسئحئن واسئطه​سئله تارييا، مقبول روحاني قوربانلار تقدئم اده​سئنئز.

2:6  چونکي موقدّس يازيلاردا بله گلئب: "باخين، صحيوندا سچئلمئش بئر داش قويورام، قئيمتلي بئر گوشه داشي. و اونا ائنانان اصلا اوتانديريلماياجاق."

2:7  بلجه بو دَيَرلي قئيمت، سئز ائمان گتئرنلر اوچوندور، آمّا ائمان گتئرمه‌ينلر اوچون: "بنّالارين ردّ اتدئيي داش اِله گوشه داشي اولدو."

2:8  و "بودره‌مه داشي و ائنجئتمه قاياسي". اونلار ييخيليرلار، چونکي کلاما ناموطئع اولورلار. و بونون اوچون ده تعيئن اولونوبلار.

2:9  آمّا سئز سچئلمئش بئر عئرق، شاهانه بئر کاهئنلئک، موقدّس بئر مئلّت و تارييا عاييد اولان بئر خالقسينيز، اِله کي، سئز، او تارينين فضئلتلرئني اعلان اده‌سئنئز کي، سئزي اؤز واله ادن نورونا دعوت ادئر.

2:10  چونکي بئر زامانلار خالق ديئلدئنئز، آمّا ائندي سئز تارينين خالقيسينيز. مرحمته نايئل اولماميشدينيز، لاکئن ائندي سئز مرحمته نايئل اولوبسونوز.

2:11  سوگئلئلر، سئزدن خاهئش ادئرم کي، اجنبئلر و قرئبلر اولاراق جانينيزين ضئدّئنه ساواش قالديران جئسماني شهوتلردن اؤزونوزو اوزاق ساخلايين.

2:12  قيري‌​يهودئلر آراسيندا عالي بئر شکئلده رفتار ادئن کي، سئزه، شر قورانلار آديندا ائفتئرا آتان شيلرده، ياخشي عمل‌لرئنئزي گؤروب، عيادت گونونده تارييا عئزّت ورسئنلر.

2:13  ربّئن خاطئري اوچون هر بشري نئظاما موطئع اولون؛ ائستر ائقتئدار باشيندا اولان پادشاه اولسون،

2:14  ائستر شر قورانلاري جزالانديرماق، ياخشيليق ادنلري ده تعرئفله‌مک اوچون اونون طرفئندن گؤنده‌رئلن والي اولسون.

2:15  چونکي تارينين ائراده​سي بودور کي، ياخشيليق اِتمکله، سئز، عاغيلسيز آداملارين جهالتئني ساکئت اده​سئنئز.

2:16  آزادلار کئمي ياشايين و اؤز آزادليغينيزي پئسلئک پرده​سي کئمي اتمه‌يئن. آمّا اوندان اؤزلرئني تارينين قوللوغونا ورنلر کئمي ائستئفاده ادئن.

2:17  بوتون خالقا حؤرمت ادئن، قارداشليغي سوئن، تاريدان قورخون، پادشاها احتئرام ادئن.

2:18  اي خئدمتکارلار، بوتون احتئراملا آغالارينيزا موطئع اولون؛ آنجاق ياخشي و مولايئم اولانلارا يوخ، منطئقسئز اولانلارا دا.

2:19  چونکي بو، لوطف قازانير، اگر کئمسه تارييا اولان وئجدانين خاطئرئنه حاقسيز عذابلار چکنده، قوصّه​لره دؤزسون.

2:20  چونکي بو سئزه نه شرف گتئرر، اگر گوناه اتدئيئنئز زامان سئزئنله ياوا رفتار ادئلسئن و سئز اونا دؤزه​سئنئز؟! لاکئن اگر دوز اولاني يرئنه يتئره​سئنئز و اونون اوچون عذابا دوشوب اونو صبرله دؤزه​سئنئز، بو، تاريدان لوطف قازانير.

2:21  اونا گؤره کي، سئز بونون اوچون دعوت اولونوبسونوز، چونکي مسئح ده سئزئن اوچون عذاب چکدي و سئزي بئر نومونه قويدو کي، اونون ائزلري ائله گده​سئنئز.

2:22  او کي، هچ بئر گوناه اتمه‌دي، آغزيندا دا هچ بئر حئيله تاپيلمادي.

2:23  سؤيولن واخت، جاوابيندا سؤيوش ورمه‌دي، عذاب چکنده، تهدئد اتمه‌دي، لاکئن اؤزونو صالحلئکله حؤکم اده‌نه تاپشيردي.

2:24  او، اؤزو، بئزئم گوناهلاريميزي اؤز بدنئنده چارميخ اوستونده تحمّول اتدي کي، بئز گوناها اؤلوب، صالحلئک اوچون ياشاياق. چونکي سئز، اونون يارالاري ائله شفا تاپيبسينيز.

2:25  چونکي سئز دائم يولونو آزان قويونلار کئمي ائدئنئز، لاکئن ائندي جانلارينيزين چوبان و ناظئرئنه دؤنوبسونوز.

Chapter 3

3:1  همن شکئلده، سئز آروادلار دا، اؤز اَرلرئنئزه موطئع اولون، اِله کي، حتّا اگر اونلاردان بعضئلري کلاما ناموطئع اولالار، هچ بئر کلامسيز، آروادلارينين رفتارلاري ائله قازانيلسينلار،

3:2  او زامان کي، سئزئن ادبلي و حؤرمتلي رفتارينيزي گؤرورلر.

3:3  سئزئن بزه‌يئنئز گرک ساچ هؤرمک، قيزيل تاخماق، يا دا پالتارلار گيمک کئمي ظاهئري اولماسين.

3:4  لاکئن قويون بزه‌يئنئز اوره‌يئن گئزلي ائنساني، روحون او آرادان گتمه‌ين حلئملئک و ساکئتلئيي ائله اولسون کي، تارينين نظرئنده قئيمتلئدئر.

3:5  چونکي قاباقکي زامانلاردا تارييا اومئد باغلايان موقدّس آروادلار دا اؤزلرئني بله بزه‌يئب، اؤز اَرلرئنه موطئع ائدئلر.

3:6  نجه کي، سارا ائبراهئمي آغا چاغيراراق اوندان ائطاعت اتدي. سئز ده اونون اؤولادلاريسينيز، اگر هچ بئر قورخودان دهشته دوشمه‌يئب، صحئح اولاني يرئنه يتئره​سئنئز.

3:7  سئز اَرلر ده، همن آروادلارينيزلا آنلاقلي بئر شکئلده ياشايين، اِله بئل کي، ضعئف بئري ائله ياشاييرسينيز. چونکي او، بئر آرواددير و اونا حياتين فيضئنه سئزئنله هموارئث اولان کئمي احتئرام گؤرسه‌دئن، اِله کي، دوعالارينيزا بئر مانع چيخماسين.

3:8  خولاصه، هامينيز همفئکئر، اؤزگه​لره اورک يانديران، قارداشوار، شفقتلي و روحدا باشي‌آشاغي اولون.

3:9  پئسلئيه پئسلئکله، سؤيوشه ده سؤيوشله جاواب ورمه‌يئن. عکسئنه، برکت دوعاسي ورئن. چونکي سئز اِله بو مقصد اوچون دعوت اولونوبسونوز کي، بئر برکته وارئث اولاسينيز.

3:10  چونکي حياتا جان آتان، ياخشي گونلري سوئب گؤرمک ائسته‌ين، گرک دئلئني شردن، دوداقلاريني دا حئيله سؤزلرئندن ساخلاسين.

3:11  او گرک شردن دؤنسون و ياخشيليق اتسئن. او گرک باريشدان دانيشسين و اونون دالينجا قاچسين.

3:12  چونکي ربّئن گؤزلري صالحلره، قولاقلاري دا اونلارين دوعالارينا آچيقدير. لاکئن اونون اوزو شر قورانلارين ضئدّئنه​دئر.

3:13  اگر ياخشيليق اتمه‌يه قيرت گؤرسده​سئنئز، سئزه کئم زئيان يتئره​ بئلر؟

3:14  آمّا حتّا اگر صالحلئيئن خاطئري اوچون عذاب دا چکه​سئنئز، بختورسئنئز. "اونلارين تهدئدلرئندن قورخمايين، پرئشان دا اولمايين."

3:15  لاکئن مسئحي رب اولاراق اورکلرئنئزده تقدئس ادئن. سئزده اولان اومئد باره​سئنده سئزدن هر کس حساب ائسته‌سه، اونا جاواب ورمک اوچون همئشه حاضير اولون؛ لاکئن مولايئملئک و حؤرمتله.

3:16  وئجدانينيزي تمئز ساخلايين، اِله کي، مسئحده اتدئيئنئز ياخشي رفتاري سؤيَنلر و سئزه بؤهتان آتانلار خجالت آلتيندا قالسينلار.

3:17  چونکي اگر تارينين ائراده​سي بودور، اوندا صحئح اولاني يرئنه يتئردئيئنئز اوچون عذاب چکمه‌يئنئز داها ياخشي‌دير کي، سهو اولاني يرئنه يتئردئيئنئز اوچون عذاب چکه‌سئنئز.

3:18  چونکي مسئح ده گوناهلار اوچون بئر دفه​لئک اؤلدو؛ عادئل اولان بئري ظالئم اولانلار اوچون، اِله کي، جئسمن اؤلموش لاکئن روحدا دئرئلمئش اولوب، بئزي تارينين يانينا گتئرسئن کي،

3:19  اوندا دا گدئب زئنداندا اولان روحلارا دا اعلان اتدي.

3:20  او روحلار کي، بئر زامان تاري نوحون گونلرئنده صبرله گؤزله‌دئيي واخت، گمي تئکئلرکن، ناموطئع ائدئلر. او گمئده آز آدام، يعني، سکّئز نفر سودان صاغ-سالامات چيخديلار.

3:21  او سو ائله تمثئل اِدئلن تعمئد ده کي، جئسمئن کثئفلئيئني گؤتورمک يوخ، تمئز بئر وئجدان اوچون تارييا توسّول اتمکدئر، عئسا مسئحئن اؤلولردن دئرئلمه‌يي ائله ائندي سئزي نئجات ورئر.

3:22  او کي، گؤيه قالخاندان سونرا تارينين صاغيندادير. ملکلر، ائقتئدار و قودرت صاحئبلري ده اونا موطئع اولونوبلار.

Chapter 4

4:1  بلجه، چونکي مسئح بئزئم اوچون جئسمن عذاب چکدي، سئز ده اِله او مقصدله سئلاحلانين. اونا گؤره کي، جئسمن عذاب چکن گوناهدان آرتيق کسئلئب کي،

4:2  جئسمده قالان واختيني آرتيق ائنسانلارين شهوتلري اوچون يوخ، تارينين ائراده​سي اوچون ياشاسين.

4:3  چونکي کچمئش زامانين عؤمرو سئزه بسدئر کي، قيري‌​يهودئلرئن هاوا-هوسلرئني يرئنه يتئرئب، فوجور، شهوتلر، کفلئلئک، عئشرت، عيش مجلئسلري و ائيرنج بوتپرستلئکلر دالينجا قاچيبسينيز.

4:4  و بونلار هاميسيندا اوندان تعجّوبله‌نئرلر کي، سئز اونلارلا برابر همن فئسقئن ائفراطينا طرف قاچميرسينيز. بوندان اؤتري ده سئزي سؤيورلر.

4:5  لاکئن اونلار او تارييا جاواب وره‌جکلر کي، دئرئلري و اؤلولري موحاکئمه اتمه‌يه حاضيردير.

4:6  اونا گؤره کي، ائنجئلئن خوش خبري اؤلولره بو سببدن موژده ورئلدي کي، اونلار ائنسانلار کئمي جئسمن محکوم اولدوقلاري حالدا، تارينين ائراده​سئنه گؤره روحن ياشاسينلار.

4:7  هر شيئن آخيري ياخيندير. بونا گؤره، عاغيلينيزي باشينيزا ييغين و دوعالار اوچون آييق دورون.

4:8  هر شيدن اوّل بئربئرئنئزه اولان محبّتي جوشقون ساخلايين، چونکي محبّت بئر چوخ گوناهين اوستونو اؤرتر.

4:9  گئلِيلئک اتمه‌دن بئربئرئنئزه قوناقپرورلئک ادئن.

4:10  هر کس نه عطا آليب، تارينين قاتباقات فيضئنئن ناظئري کئمي، اونو بئربئرئنئزئن خئدمتئنده ائشه سالسين.

4:11  دانيشان اِله دانيشسين کي، اِله بئل، تارينين سؤزلرئني نقل ادئر. خئدمت ادن، تارينين وردئيي قووّتله خئدمت اتسئن کي، تاري، هر شيده، عئسا مسئحئن واسئطه‌سئله عئزّت تاپسين کي، عئزّت و سلطنت ابددن ابده کئمي اونوندور. آمئن.

4:12  سوگئلئلر، ائمتاحانينيز اوچون آرانيزدا باش ورمئش اولان بو حئدّتلي اوددان تعجّوب اتمه‌يئن کي، گويا قرئبه بئر شي باشينيزا گلئر.

4:13  لاکئن مسئحئن عذابلاريندا شرئک اولدوغونوز اوچون سوئنئن، اِله کي، اونون شؤوکتئنئن ظوهوروندا دا بؤيوک شنلئکله سوئنه​سئنئز.

4:14  اگر مسئحئن آديندان اؤتري تحقئر اولوناسينيز، خوش حالينيزا! چونکي شؤوکتئن و تارينين موقدّس روحو سئزئن اوستونوزده ساکئندئر.

4:15  قوي سئزلردن هچ کئم قاتئل، اوغرو، شر قوران، يا دا فوضول بئري کئمي عذاب چکمه‌سئن.

4:16  لاکئن اگر بئر مسئحي کئمي عذاب چکئر، قوي اوتانماسين. لاکئن قوي بو آددا تاريني عئزّتلندئرسئن.

4:17  چونکي زامان يتئشئب کي، موحاکئمه تاري اوئنئن اهلي ائله باشلانسين. و اگر او، اول بئزئمله باشلانير، بس گؤر تارينين ائنجئلئندن ائطاعت اتمه‌ينلرئن آخيري نه اولاجاق؟!

4:18  و اگر صالح آدام چتئنلئکله نئجات تاپير، تاريسيز و گوناهکار آدامين عاقئبتي نه اولاجاق؟

4:19  بونون اوچون، قوي تارينين ائراده​سئنه موطابئق عذاب چکنلر، ياخشيليق اده‌رک جانلاريني امئن اولان خالئقه تاپشيرسينلار.

Chapter 5

5:1  آرانيزدا اولان آغساقّاللاري کي، من ده اونلارلا بئر آغساقّال و مسئحئن عذابلارينا شاهئد و گله​جک شرئکي‌يَم ده، تشوئق ادئرم:

5:2  تارينين آرانيزدا اولان سوروسونه چوبانليق ادئن. مجبوري يوخ، اورکدن و تارينين ائراده​سئنه موطابئق اونلارا نظارت ادئن؛ بي​آبيرچيليق قازانج اوچون يوخ، شؤوقله.

5:3  سئزه تاپشيريلانلارا آغاليق اتمه‌يئن، لاکئن ثوبوت ادئن کي، سورويه نومونه​سئنئز.

5:4  و باش چوبان ظوهور اتدئيي واخت، عئزّتئن سولمايان تاجيني آلاجاقسينيز.

5:5  سئز جاوانلار دا، اِله‌جه آغساقّاللارا موطئع اولون. و هامينيز بئربئرئنئزئن حاقّيندا باشي‌آشاغيليق پالتارينا گيئنئن، چونکي تاري مغرورلارا ضئدّدئر، لاکئن باشي‌آشاغي‌ اولانلارا فيض ورئر.

5:6  بونا گؤره، تارينين گوجلو اَلئنئن آلتيندا اؤزونوزو آلچالدين کي، او دا اؤز واختيندا سئزي اوجالتسين.

5:7  و هامي نئگاراچيليقلارينيزي اونون اوستونه قويون، چونکي او، سئزئن قيدئنئزه قالاندير.

5:8  تئزباش دورون، آييق قالين. سئزئن دوشمنئنئز ائبلئس نرئلده‌ين بئر آصلان کئمي گزئب، اودماغا بئرئني آختارير.

5:9  ائماندا مؤحکم دوروب، اونون قاباغيندا موقاوئمت ادئن و بئلئن کي، دونياداکي قارداشلارينيز دا همن عذابلاري چکئرلر.

5:10  آز بئر مودّت عذاب چکدئيئنئزدن سونرا، بوتون فيضئن تاريسي کي، سئزي مسئحده اؤز شؤوکتئنه دعوت اتدي، اؤزو سئزي کامئل ادئب تصدئق اده​جک و سئزه قووّت ورئب، سئزي برقرار اده​جک.

5:11  سلطنت ابددن ابده کئمي اونون اولسون. آمئن.

5:12  بو مکتوبو امئن قارداشيميز (چونکي من اونو بله گؤرورم) سئلوانوسون واسئطه​سئله سئزه قيساجا يازميشام و تشوئق ادئب شهادت ورئرم کي، تارينين حقئقي فيضي بودور. اوندا مؤحکم دايانين!

5:13  سئزئن کئمي سچئلمئش بابئلده‌کي ده سئزه سالام گؤنده‌رئر، اِله‌جه ده اوغلوم مرقوس.

5:14  بئربئرئنئزي محبّت اؤپوشو ائله سالامالايين. مسئحده اولان بوتون سئزلره باريش اولسون.