Kekchi - I Peter

Chapter 1

1:1  La̱in laj Pedro. La̱in x-apóstol li Ka̱cuaˈ Jesucristo. Yo̱quin chi tzˈi̱bac e̱riqˈuin la̱ex, li xejeqˈui e̱rib saˈ li junju̱nk chi naˈajej. Yal numecˈ yo̱quex xban nak ma̱cuaˈ e̱tenamit li cuanquex cuiˈ, la̱ex li cuanquex saˈ xcue̱nt Ponto, ut saˈ xcue̱nt Galacia ut Capadocia, joˈ ajcuiˈ li cuanquex saˈ xcue̱nt Asia ut Bitinia.

1:2  Ac najter kˈe cutan qui-ala chak saˈ xchˈo̱l li Dios Acuabej nak la̱exak li sicˈbil e̱ru xban. Santobresinbilakex chic xban li Santil Musikˈej re nak tex-abi̱nk ut texpa̱ba̱nk chiru li Jesucristo. Cuybilak chic le̱ ma̱c xban xquiqˈuel li Jesucristo. Ut chi cua̱nk taxak chi nabal li rusilal li Dios e̱riqˈuin ut li tuktu̱quilal saˈ e̱ya̱nk.

1:3  Lokˈoninbil taxak li Dios Acuabej, lix Yucuaˈ li Ka̱cuaˈ Jesucristo. Saˈ xcˈabaˈ lix nimal ruxta̱n, coyoˈla cuiˈchic xcaˈ cua. Xban nak li Jesucristo quicuacli cuiˈchic chi yoˈyo saˈ xya̱nkeb li camenak, nakayoˈoni li acˈ yuˈam li ma̱cˈaˈ rosoˈjic.

1:4  Yo̱co chixyoˈoninquil li kama̱tan li tixqˈue ke li Dios. Li ma̱tan aˈin incˈaˈ nalaj incˈaˈ na-osoˈ. Cˈu̱lanbil saˈ choxa. Aran ma̱cˈaˈ ta̱muxuk ru ut ma̱ jaruj ta̱osokˈ.

1:5  Xban nak nocopa̱ban, li Dios li kˈaxal nim xcuanquil nocoril chi junelic re nak tocolekˈ. Li colba-ib aˈin ta̱cˈutbesi̱k chi tzˈakal re ru saˈ rosoˈjic li cutan.

1:6  Usta te̱cˈul nabal pa̱y ru li raylal re xyalbal rix le̱ pa̱ba̱l saˈ ruchichˈochˈ aˈin, chisahokˈ saˈ le̱ chˈo̱l xban nak ac colbilex chic.

1:7  Tento nak ta̱yalekˈ rix le̱ pa̱ba̱l re nak ta̱cˈutu̱nk ma tzˈakal re ru. Li pa̱ba̱l kˈaxal cuiˈchic lokˈ chiru li oro li na-osoˈ. Li oro nanumsi̱c saˈ xam re rilbal ma cha̱bil. Joˈcan ajcuiˈ nak tento xyalbal rix le̱ pa̱ba̱l ma tzˈakal re ru. Cui tzˈakal re ru le̱ pa̱ba̱l, tex-oxlokˈi̱k ut ta̱nima̱k e̱ru ut ta̱qˈuehekˈ e̱lokˈal nak tixcˈutbesi cuiˈchic rib li Jesucristo.

1:8  Nequera li Cristo usta incˈaˈ nequeril ru. Nequepa̱b li Cristo, usta incˈaˈ e̱rilom ru. Kˈaxal cuiˈchic numtajenak xsahil saˈ e̱chˈo̱l chixpa̱banquil. Ut incˈaˈ nequetau junak a̱tin re xchˈolobanquil lix sahil e̱chˈo̱l xban nak kˈaxal lokˈ.

1:9  Ut lix kˈajca̱munquil le̱ pa̱ba̱l, aˈan le̱ colbal.

1:10  Eb li profeta junxilaj queˈxchˈolob chak xya̱lal li usilal aˈin qˈuebil e̱re. Queˈxtzˈil rix ut queˈpatzˈoc chirix li colba-ib aˈin.

1:11  Eb li profeta queˈxye resil li raylal tixcˈul li Cristo ut lix nimal xlokˈal li ta̱cˈutbesi̱k mokon. Queˈxqˈue xchˈo̱l chixsiqˈuinquil ani tzˈakal li Cristo. Queˈxsicˈ xya̱lal jokˈe ut cˈaˈru chi cutanil ta̱cˈulma̱nk li yo̱ chi cˈutbesi̱c chiruheb xban li Santil Musikˈej.

1:12  Li cˈaˈru quixcˈutbesi chak li Dios chiruheb li profeta junxil incˈaˈ ta̱cˈulma̱nk nak toj cuanqueb aˈan. Ta̱cˈulma̱nk ban saˈ li cutan nak cuanquex la̱ex. Eb li profeta queˈxchˈolob che̱ru li xya̱lal aˈin, li quicˈuteˈ chak chiruheb xban li Santil Musikˈej li taklanbil chak xban li Dios. Ut eb li ángel queˈraj ajcuiˈ raj xtaubal ru chixjunil li cˈaˈak re ru aˈin.

1:13  Xban nak yo̱quex chiroybeninquil le̱ kˈajca̱munquil, chi ajk ru le̱ cˈaˈux. Chi cua̱nk chi tuktu le̱ chˈo̱l. Ut chi anchal e̱chˈo̱l cheroybeni li usilal li tixqˈue e̱re li Jesucristo nak tixcˈutbesi cuiˈchic rib.

1:14  Chex-abi̱nk chiru li Dios xban nak la̱ex ralal xcˈajol. Me̱ba̱nu chic li nequerahi ru junxil nak toj ma̱jiˈ nequenau li xya̱lal.

1:15  Aban ti̱cak taxak le̱ chˈo̱l ut cha̱bilak taxak le̱ yehom e̱ba̱nuhom xban nak ti̱c xchˈo̱l li Dios li quisicˈoc e̱ru chokˈ ralal xcˈajol.

1:16  Joˈ tzˈi̱banbil retalil saˈ li Santil Hu: Santakex la̱ex xban nak santin la̱in, chan li Dios. (Lv. 11:44-45)

1:17  La̱ex nequeye “at inYucuaˈ” re li Dios nak nequextijoc. Ut li Dios natzˈiloc a̱tin chirix li junju̱nk aˈ yal chanru lix yehom xba̱nuhom. Aˈan incˈaˈ naxsiqˈueb ru. Jun xiquic ban naxba̱nu. Joˈcan nak chexucua̱k ru li Dios junelic, aˈ yal joˈ najtil texcua̱nk saˈ li ruchichˈochˈ aˈin.

1:18  La̱ex nequenau nak xban li Dios colbilex chic chiru li joˈ ma̱joˈil naˈleb li quilajeˈxcˈut chak che̱ru le̱ xeˈto̱nil yucuaˈ. Moco colbilex ta riqˈuin cˈaˈak re ru na-osoˈ joˈ li oro ut li plata.

1:19  Colbilex ban riqˈuin xlokˈlaj quiqˈuel li Cristo. Li Cristo, aˈan li quixmayeja rib chiru li Dios Acuabej joˈ jun li carner namayeja̱c chi ma̱cˈaˈ re̱cˈ ut chi ma̱cˈaˈ xpaltil.

1:20  Relic chi ya̱l nak toj ma̱jiˈ nayoˈobtesi̱c chak li ruchichˈochˈ ac chˈolchˈo chiru li Dios nak li Cristo sicˈbil ru ut xakabanbil re ta̱ca̱mk. Ut anakcuan xcuulac xkˈehil nak li Cristo xcˈutbesi rib xban e̱ra̱bal la̱ex.

1:21  Saˈ xcˈabaˈ li Cristo yo̱quex chixpa̱banquil li Dios, li quicuaclesin cuiˈchic re li Cristo chi yoˈyo saˈ xya̱nkeb li camenak ut quixqˈue xlokˈal. Joˈcan nak xepa̱b ut caˈaj cuiˈ riqˈuin li Dios nequexyoˈonin.

1:22  Saˈ xcˈabaˈ li Santil Musikˈej chˈajobresinbil le̱ ra̱m riqˈuin nak nequepa̱b li tzˈakal ya̱l. Riqˈuin aˈin naru te̱raheb li herma̱n ut incˈaˈ te̱ra e̱rib chi yal xcab rix e̱chˈo̱l. Te̱ra ban e̱rib chi tzˈakal.

1:23  La̱ex yoˈlajenakex chic xcaˈ cua chi acˈ chic le̱ yuˈam. Li yuˈam aˈin ma̱cuaˈ xqˈuehom le̱ naˈ e̱yucuaˈ. Li yuˈam aˈan na-osoˈ. Abanan li acˈ yuˈam natauman riqˈuin xpa̱banquil ra̱tin li Dios. Yoˈyo ut cuan chi junelic.

1:24  Saˈ li Santil Hu tzˈi̱banbil retalil chi joˈcaˈin: Lix yuˈam li cristian saˈ ruchichˈochˈ, aˈan chanchan li pim. Nachakic ut na-osoˈ. Ut lix lokˈal chanchan ratzˈum li pim. Nachakic natˈaneˈ ut na-osoˈ. (Is. 40:6-8)

1:25  Aban li ra̱tin li Dios, aˈan cuan chi junelic. Ut li a̱tin aˈin, aˈan resil li colba-ib li yebil chak e̱re.

Chapter 2

2:1  Xban nak acˈ chic le̱ yuˈam, cherisihak saˈ le̱ chˈo̱l chixjunil li ma̱usilal. Mexbalakˈic chic. Te̱canab li caˈpacˈal u. Mexcakalin chic ut te̱canab ajcuiˈ li yoˈoba̱nc a̱tin.

2:2  Li cˈulaˈal nak toj nayoˈla naraj ru tuˈuc. Us raj nak joˈcano taxak la̱o riqˈuin ra̱tin li Dios. Takaj taxak ru xtzolbal ra̱tin li Dios xban nak aˈan li tzˈakal ya̱l. Tocacuu̱k taxak saˈ li kapa̱ba̱l ut tzˈakalako taxak chiru li Dios re nak tocolekˈ.

2:3  Cui yo̱quex chixba̱nunquil aˈin, ac nequenau nak li Ka̱cuaˈ cha̱bil.

2:4  Cha̱lkex riqˈuin li Cristo, li yoˈyo chi junelic. Eb li cristian queˈxtzˈekta̱na li Jesucristo li kˈaxal lokˈ li sicˈbil ru xban li Dios chixqˈuebal kayuˈam. Li Jesucristo xakabanbil xban li Dios chi cˈanjelac joˈ jun nimla pec kˈaxal cha̱bil li na-oc chokˈ xxeˈ li cab.

2:5  Ut la̱ex chanchanex li cocˈ pec li na-oc saˈ li tzˈac. Xban li rusilal li Jesucristo, naru texcˈanjelak chiru li Dios joˈ eb laj tij li nequeˈmayejac chiru li Dios. Li mayej li kˈaxal lokˈ, aˈan nak te̱kˈaxtesi e̱rib saˈ rukˈ li Dios. Ut le̱ mayej nacˈuleˈ xban li Dios saˈ xcˈabaˈ li Jesucristo.

2:6  Tzˈi̱banbil retalil saˈ li Santil Hu li quixye li Dios chirix li Cristo nak quixye chi joˈcaˈin: La̱in xinsicˈ ru li Colonel joˈ nak laj tzˈac naxsicˈ ru li cha̱bil pec chokˈ xxeˈ li cab. Xinsicˈ ru chokˈ xxeˈ le̱ pa̱ba̱l. Li ani ta̱pa̱ba̱nk re incˈaˈ ta̱chˈina̱nk xchˈo̱l. (Is. 28:16)

2:7  Kˈaxal lokˈ li Cristo chokˈ e̱re la̱ex li ac xexpa̱ban. Abanan chokˈ reheb li ma̱jiˈ nequeˈpa̱ban, ma̱cˈaˈ na-oc cuiˈ. Tzˈi̱banbil retalil saˈ li Santil Hu chi joˈcaˈin: Li pec li quitzˈekta̱na̱c xbaneb laj cablanel, aˈan li pec li kˈaxal cha̱bil li quiqˈueheˈ chokˈ xxuc li cab. (Sal. 118:22)

2:8  Ut tzˈi̱banbil ajcuiˈ saˈ li Santil Hu chi joˈcaˈin: Aˈan ut li pec li queˈxtich cuiˈ li rokeb. Aˈan li pec li natˈanoc. (Is. 8:14-15) Li cristian li nequeˈxtich rokeb chiru, aˈaneb laj kˈetol ra̱tin li Dios. Ac chˈolchˈo nak teˈxcˈul lix tojbal lix ma̱c xban nak nequeˈxtzˈekta̱na li Cristo.

2:9  La̱ex sicˈbil e̱ru xban li Dios. Sicˈbil e̱ru chi cˈanjelac chiru li Dios joˈ nak nequeˈcˈanjelac laj tij. La̱ex lix tenamit li Dios ut santobresinbilex. La̱ex chic ralal xcˈajol li Dios. Sicˈbil e̱ru chixyebal resil lix nimal xcuanquilal li Dios. Li Dios quexrisi saˈ xkˈojyi̱nal ru li ma̱c ut anakcuan cuanquex chic saˈ xcutan xsaken.

2:10  Junxil ma̱cuaˈex ralal xcˈajol li Dios. Aban anakcuan la̱ex chic ralal xcˈajol. Junxil incˈaˈ nequenau lix nimal ruxta̱n li Dios. Aban anakcuan nequenau chic.

2:11  Ex inherma̱n, raro̱quex inban. La̱ex yal numelex arin saˈ ruchichˈochˈ. La̱in nintzˈa̱ma che̱ru nak me̱ba̱nu chic li ma̱usilal li queba̱nu chak junxil xban nak aˈan caˈaj cuiˈ xpoˈbal ru le̱ cˈaˈux naxba̱nu.

2:12  Cha̱bilak taxak le̱ naˈleb chiruheb li ma̱jiˈ nequeˈpa̱ban. Usta yo̱keb chixyebal nak incˈaˈ us le̱ naˈleb, aban cui te̱ba̱nu li us, teˈxqˈue retal ut teˈxnima xlokˈal li Dios nak ta̱cuulak xkˈehil li rakba a̱tin.

2:13  Saˈ xcˈabaˈ li Cristo chepa̱ba̱k chixjunileb li chakˈrab qˈuebil xbaneb li cui̱nk li nequeˈtaklan saˈ e̱be̱n. Chexpa̱ba̱nk chiru li acuabej xban nak aˈan cuan saˈ xcuanquil.

2:14  Ut chexpa̱ba̱nk ajcuiˈ chiruheb li taklanbileb xban li acuabej chi rakoc a̱tin saˈ xbe̱neb li nequeˈxsicˈ xma̱c ut re ajcuiˈ nak teˈxqˈue xlokˈal li cha̱bileb xnaˈleb.

2:15  Li Dios naraj nak texcua̱nk saˈ xya̱lal. Nak teˈril le̱ ti̱quilal, li incˈaˈ useb xnaˈleb ut li incˈaˈ nequeˈxnau xya̱lal, incˈaˈ chic teˈa̱tinak che̱rix.

2:16  Libre chic cua̱nkex. Abanan moco xban ta nak libre chic cua̱nkex nak tex-oc chixba̱nunquil li ma̱usilal. Cheqˈuehak ban e̱chˈo̱l chi cˈanjelac chiru li Dios.

2:17  La̱ex aj pa̱banel, chera e̱rib che̱ribil e̱rib. Chexucua̱k ru li Ka̱cuaˈ Dios. Che-oxlokˈi le̱ ras e̱ri̱tzˈin. Ut cheqˈuehak xlokˈal li acuabej.

2:18  Ex aj cˈanjel chex-abi̱nk chiruheb le̱ patrón ut che-oxlokˈiheb. Moco caˈaj cuiˈ ta chiruheb li tu̱laneb. Chex-abi̱nk ban ajcuiˈ chiruheb li joskˈ aj patrón.

2:19  Cui nequecˈul junak raylal chi ma̱cˈaˈ e̱ma̱c, osobtesinbilakex cui nequecuy xban nak yo̱quex chixpa̱banquil li Dios.

2:20  Cui nequexsaqˈueˈ xban nak xesicˈ e̱ma̱c, ut nequecuy xnumsinquil, ma̱cˈaˈ xlokˈal aˈan. Abanan cui nequecˈul li raylal riqˈuin xba̱nunquil li us ut nequecuy, aˈan lokˈ chiru li Dios.

2:21  Li Dios naraj nak te̱ba̱nu joˈ quixba̱nu li Cristo. Li Cristo quixcˈul li raylal saˈ e̱cˈabaˈ la̱ex. Aˈan quicˈamoc be che̱ru re nak la̱ex te̱cuy ajcuiˈ xnumsinquil li raylal.

2:22  Li Cristo ma̱cˈaˈ xma̱c. Ut ma̱ jun sut quibalakˈin.

2:23  Nak quihobeˈ li Cristo, incˈaˈ quixsume ru. Ut nak yo̱ chixcˈulbal li raylal, ma̱cˈaˈ quixye. Incˈaˈ quixmajecuaheb. Quixkˈaxtesi ban rib saˈ rukˈ li Dios, li narakoc a̱tin saˈ ti̱quilal.

2:24  Relic chi ya̱l nak li Cristo, aˈan li quixcˈul li raylal nak quicam chiru li cruz re xtojbal rix li kama̱c la̱o. Aˈan aj e nak quicam re nak incˈaˈ chic texma̱cobk. Texcua̱nk ban saˈ ti̱quilal. Li Cristo quixcˈul li yoqˈuecˈ saˈ kacˈabaˈ la̱o aj ma̱c. Ut riqˈuin li raylal li quixcˈul xexqˈuirtesi̱c.

2:25  La̱ex sachso̱quex saˈ le̱ ma̱c nak quexcuan chak. Chanchanex li carner sachenak li nachaˈchaˈi rib yalak bar chi ma̱cˈaˈ aj ilol re. Abanan anakcuan xexchal cuiˈchic riqˈuin li Cristo ut aˈan chic ta̱ilok e̱re.

Chapter 3

3:1  La̱ex ixakilbej chex-abi̱nk chiru le̱ be̱lom. Cui cuanqueb li be̱lomej li incˈaˈ nequeˈxpa̱b li ra̱tin li Dios, aˈan teˈxqˈue retal le̱ cha̱bilal ut teˈxpa̱b ajcuiˈ li Dios eb aˈan. Kˈaxal us xcˈutbal li cha̱bilal chiru xchˈolobanquil xya̱lal riqˈuin a̱tin.

3:2  Ma̱re teˈpa̱ba̱nk le̱ be̱lom nak teˈxqˈue retal nak neque-oxlokˈiheb ut cha̱bil e̱naˈleb.

3:3  Mixic e̱chˈo̱l riqˈuin xtikibanquil e̱rib. Me̱sicˈ le̱ chˈinaˈusal yal riqˈuin xcha̱bilal le̱ rakˈ. Li tzˈakal chˈinaˈusal ma̱cuaˈ riqˈuin xyi̱banquil le̱ rismal chi kˈaxal chˈinaˈus chi moco riqˈuin rocsinquil li oro.

3:4  Li tzˈakal xchˈinaˈusal li junju̱nk, aˈan lix ti̱quilal xchˈo̱l ut lix tu̱lanil. Aˈan incˈaˈ na-oso. Li ti̱quil chˈo̱lej ut li tu̱lanil, aˈaneb li kˈaxal lokˈ chiru li Dios.

3:5  Joˈcan ajcuiˈ queˈxba̱nu chak li cha̱bil ixk li queˈxpa̱b li Dios najter. Queˈxsicˈ lix chˈinaˈusal riqˈuin li tuktu̱quilal ut li tu̱lanil. Ut eb li ixk aˈan queˈabin ajcuiˈ chiruheb lix be̱lom ut queˈx-oxlokˈiheb.

3:6  Ut joˈcan ajcuiˈ quixba̱nu lix Sara. Qui-abin chiru laj Abraham lix be̱lom. Ut quixye “Ka̱cuaˈ Abraham” re xban nak quix-oxlokˈi. Joˈcan ajcuiˈ la̱ex. Cui te̱ba̱nu li usilal ut incˈaˈ texxucua̱k, la̱ex ajcuiˈ joˈ li ralal xcˈajol lix Sara.

3:7  Ut la̱ex be̱lomej, chexcua̱nk saˈ xya̱lal riqˈuineb le̱ rixakil. Che-oxlokˈiheb. La̱ex nequenau nak eb li ixk kˈuneb xchˈo̱l ut ma̱cˈaˈeb xmetzˈe̱uheb joˈeb li cui̱nk. La̱ex te̱cˈul le̱ ma̱tan xban rusilal li Dios. Joˈcan ajcuiˈ eb li ixk, teˈxcˈul ajcuiˈ lix ma̱taneb. Ut li ma̱tan li te̱cˈul, aˈan li yuˈam chi junelic. Cui te̱ba̱nu aˈin, ma̱cˈaˈ ta̱chˈaˈajqui̱nk e̱re nak textijok.

3:8  Ut tinye ajcuiˈ e̱re, chexcua̱nk che̱junilex chi junajak le̱ chˈo̱l ut chi junajak le̱ cˈaˈux. Cherahak e̱rib che̱ribil e̱rib. Chetokˈoba e̱ru che̱ribil e̱rib ut kˈunak le̱ chˈo̱l.

3:9  Nak teˈxba̱nu ma̱usilal e̱re, incˈaˈ te̱sume ru riqˈuin ma̱usilal. Nak texhobekˈ, me̱sume ru riqˈuin hoboc. Cheba̱nuhak ban usilal reheb li nequeˈba̱nun ma̱usilal e̱re. La̱ex bokbilex chak xban li Dios re nak te̱re̱chani le̱ rosobtesinquil.

3:10  Joˈcaˈin naxye saˈ li Santil Hu: Li ani ta̱raj cua̱nc chi sa saˈ xchˈo̱l re tixnumsiheb li cutan saˈ xya̱lal, incˈaˈ ta̱a̱tinak riqˈuin yibru a̱tin chi moco ta̱ticˈtiˈik.

3:11  Joˈcan nak checanabak xba̱nunquil li incˈaˈ us. Cheba̱nuhak ban li us, joˈ naraj li Dios. Ut cheqˈuehak e̱chˈo̱l chi cua̱nc saˈ tuktu̱quil usilal ut incˈaˈ chic texpletik.

3:12  Li Ka̱cuaˈ Dios narileb li ti̱queb xchˈo̱l. Ut junelic narabiheb nak nequeˈtijoc. Abanan yo̱ xjoskˈil li Ka̱cuaˈ saˈ xbe̱neb li nequeˈba̱nun re li ma̱usilal. (Sal. 34:12-16)

3:13  ¿Ma cuan ta biˈ junak ta̱rahobtesi̱nk e̱re cui nequeyal e̱kˈe chixba̱nunquil li us?

3:14  Abanan cui cuan junak ta̱rahobtesi̱nk e̱re xban nak yo̱quex chixba̱nunquil li usilal, osobtesinbilex xban li Dios. Me̱xucuaheb ru li teˈrahobtesi̱nk e̱re ut mi-oc e̱cˈaˈux xbaneb.

3:15  Cheqˈuehak ban xlokˈal li Ka̱cuaˈ Jesucristo chi anchal e̱chˈo̱l ut chekˈaxtesihak e̱rib saˈ rukˈ. Chenauhak xsumenquil li teˈraj patzˈoc e̱re chirix le̱ pa̱ba̱l. Ac cua̱nk saˈ le̱ chˈo̱l cˈaˈru te̱sumeheb cuiˈ. Ut chesumehakeb saˈ xya̱lal ut saˈ tu̱lanil.

3:16  Chexcua̱nk saˈ xya̱lal ut me̱ba̱nu chic li ma̱usilal re nak ma̱cˈaˈ ta̱chˈiˈchˈiˈi̱nk e̱re saˈ le̱ cˈaˈux. Usta cha̱bil nequeba̱nu xban nak nequepa̱b li Cristo, abanan cuan li nequeˈa̱tinac che̱rix. Eb aˈan xuta̱nal teˈe̱lk xban nak nequeˈkˈaban.

3:17  Cui li Dios naraj nak te̱cˈul li raylal chi ma̱cˈaˈ e̱ma̱c, kˈaxal us nak te̱cˈul li raylal chi ma̱cˈaˈ e̱ma̱c chiru nak te̱cˈul li raylal riqˈuin xba̱nunquil li ma̱usilal.

3:18  Li Cristo quixcˈul ajcuiˈ li raylal chi ma̱cˈaˈ xma̱c. Aˈan ti̱c xchˈo̱l abanan quicamsi̱c re xtojbal rix lix ma̱queb li incˈaˈ useb xnaˈleb. Jun sut ajcuiˈ quicam ut riqˈuin aˈan quitzˈakloc ru. Ut xban xcamic li Jesucristo, naru toxcol li Dios. Ya̱l nak queˈxcamsi li Cristo. Abanan incˈaˈ quicam lix musikˈ.

3:19  Co̱ ban chi a̱tinac riqˈuineb li musikˈej li cuanqueb chi tzˈaptzˈo.

3:20  Aˈan eb li incˈaˈ queˈpa̱ban chak chiru li Dios junxil. Li Dios riqˈuin xnimal xcuyum, quiroybeni nak teˈpa̱ba̱nk. Abanan incˈaˈ queˈpa̱ban. Aˈan quicˈulman saˈ eb li cutan nak laj Noé yo̱ chixyi̱banquil li nimla jucub cab. Incˈaˈ qˈui li queˈpa̱ban ut queˈoc chi saˈ li jucub cab. Cuakxakibeb ajcuiˈ queˈcoleˈ chiru li butˈi haˈ. Chixjunileb li jun chˈo̱l chic quilajeˈcam.

3:21  Li butˈi haˈ, aˈan retalil li cubi haˈ colbilex cuiˈ anakcuan. Li cubi haˈ, aˈan ma̱cuaˈ re risinquil lix tzˈajnil li katibel. Cuan ban xya̱lal. Aˈan retalil nak cuybil sachbil chic li kama̱c. Ut nakatzˈa̱ma chiru li Dios nak cha̱bilak li kacˈaˈux. Colbilo xban nak quicuacli cuiˈchic chi yoˈyo li Jesucristo.

3:22  Li Jesucristo, aˈan quitakeˈ saˈ choxa ut anakcuan cuan saˈ xnim ukˈ li Dios Acuabej xban nak kˈaxal nim lix cuanquil. Li Cristo cuan xcuanquil saˈ xbe̱neb li ángel. Ut cuan ajcuiˈ xcuanquil saˈ xbe̱neb chixjunileb li musikˈej li cuanqueb xcuanquil.

Chapter 4

4:1  Li Cristo quixcˈul li raylal ut quirecˈa tzˈakal li raylal saˈ kacˈabaˈ la̱o. Joˈcan nak chikaqˈue ajcuiˈ kachˈo̱l la̱o chixcuybal li raylal. Julticak e̱re nak ma̱cˈaˈ chic xcuanquil li ma̱c saˈ xbe̱neb li nequeˈxcuy li raylal chi ma̱cˈaˈ xma̱queb.

4:2  Ut jarub cutan chic toj yoˈyo̱kex cheba̱nuhak li cˈaˈru naraj li Dios, ut incˈaˈ chic yo̱kex chixba̱nunquil li cˈaˈru querahi chak ru junxil.

4:3  Tzˈakal taxak li ma̱c li xeba̱nu chak. Xeba̱nu joˈ nequeˈxba̱nu li incˈaˈ nequeˈpa̱ban chiru li Dios. Junxil nasemsot le̱ chˈo̱l riqˈuin li joˈ ma̱joˈil naˈleb. Xeba̱nu chak li cala̱c ut li ninkˈei̱c. Xeba̱nu chak li num cuaˈac num ucˈac. Ut xeba̱nu ajcuiˈ li tzˈekbe̱talil aj naˈleb. Xuta̱nal xeba̱nu chak junxil nak xenima chak ruheb li yi̱banbil Dios.

4:4  Aˈut anakcuan eb li ma̱jiˈ nequeˈpa̱ban nequeˈsach xchˈo̱leb che̱rilbal. Nequeˈxqˈue retal nak ma̱cuaˈex chic jun saˈ xya̱nkeb chixba̱nunquil li ma̱usilal. Ut xban aˈan nequexhobeˈ.

4:5  Aban mokon eb laj hobonel tento nak teˈxkˈaxtesi xcue̱nt chiru li Dios riqˈuin li cˈaˈru quilajeˈxba̱nu chak. Li Dios, aˈan li ta̱rakok a̱tin saˈ xbe̱neb li yoˈyo̱queb joˈ eb ajcuiˈ li camenakeb.

4:6  Aˈan rajbal nak quichˈoloba̱c xya̱lal chiruheb li tenamit. Quirakman a̱tin chirixeb ut eb aˈan queˈcam joˈ nak telajeˈca̱mk chixjunileb li cristian. Chixjunileb li queˈpa̱ban chiru li Dios usta quilajeˈcam, lix musikˈeb yoˈyo̱queb joˈ nak yoˈyo li Dios.

4:7  Li rosoˈjic li ruchichˈochˈ ta̱se̱ba̱nk chak. Joˈcan nak aj-ajak e̱ru, ut cheqˈuehak e̱chˈo̱l chi tijoc.

4:8  Li cˈaˈru tento te̱ba̱nu, aˈan xra̱bal e̱rib che̱ribil e̱rib ut chi anchal e̱chˈo̱l. Ut xban nak nequera e̱rib che̱ribil e̱rib, nequecuy ajcuiˈ e̱ma̱c che̱ribil e̱rib.

4:9  Chexqˈuehok ochochna̱l che̱ribil e̱rib chi sa saˈ e̱chˈo̱l.

4:10  Chikajunilo jalan jala̱nk li cˈaˈru ta̱ru̱k takaba̱nu. Ac kama̱tan kama̱tan qˈuebil ke chikaju̱nkal xban li Dios. Tento nak takatenkˈa li kas ki̱tzˈin riqˈuin li cˈaˈru nocoru chixba̱nunquil re nak incˈaˈ ta̱cana̱k chi ma̱cˈaˈ rajbal li ma̱tan qˈuebil ke xban li Dios.

4:11  Cui ani cuan xma̱tan chi a̱tinac, chixyehak ra̱tin li Dios. Cui ani naraj cˈanjelac, chi cˈanjelac aˈ yal chanru lix cacuilal qˈuebil re xban li Dios. Riqˈuin chixjunil li cˈaˈak re ru ta̱uxma̱nk, nimanbilak taxak xcˈabaˈ li Dios saˈ xcˈabaˈ li Jesucristo. Aˈan laj e̱chal re li nimajcual cuanquilal ut lokˈoninbilak taxak chi junelic kˈe cutan. Joˈcan taxak.

4:12  Ex inherma̱n, misach e̱chˈo̱l nak ta̱cha̱lk li ra xi̱cˈ saˈ e̱be̱n. Chanchan li xam nak nachal saˈ e̱be̱n re xyalbal rix le̱ pa̱ba̱l. Me̱cˈoxla nak caˈaj cuiˈ la̱ex yo̱quex chi cˈuluc re.

4:13  Chi sahokˈ ban saˈ e̱chˈo̱l nak yo̱quex chi cˈuluc raylal joˈ quixcˈul li Cristo xban nak yo̱quex chi tzˈako̱nc riqˈuin li raylal li quixcˈul aˈan. Ta̱cuulak xkˈehil nak li Jesucristo tixcˈutbesi lix nimal xlokˈal ut la̱ex kˈaxal cuiˈchic ta̱sahokˈ saˈ e̱chˈo̱l.

4:14  Us xak e̱re cui texhobekˈ xban nak nequepa̱b li Cristo. Aˈan retalil nak lix Musikˈ li Dios cuan e̱riqˈuin ut aˈan li kˈaxal lokˈ. Relic chi ya̱l nak tzˈekta̱nanbil li Dios xbaneb li nequeˈhoboc e̱re, abanan che̱ru la̱ex, kˈaxal lokˈ ut nim xcuanquil.

4:15  Cheqˈuehak retal: mexma̱cob. Xuta̱nal chokˈ e̱re nak te̱cˈul junak raylal xban elkˈac, malaj ut xban li camsi̱nc, malaj ut xban li yoˈoba̱nc chˈaˈajquilal saˈ xya̱nkeb le̱ ras e̱ri̱tzˈin, malaj ut xban xba̱nunquil cˈaˈak chic re ru incˈaˈ us.

4:16  Cui ut nequecˈul raylal xban nak nequepa̱b li Cristo, aˈan moco xuta̱nal ta. Chenima̱k ban xlokˈal li Dios xban nak la̱ex chic ralal xcˈajol.

4:17  Cuulac re xkˈehil li rakoc a̱tin. Ta̱ticla̱k kiqˈuin la̱o, li ralal xcˈajol li Dios. Tento nak ta̱rakekˈ a̱tin saˈ kabe̱n la̱o aj pa̱banel. Ut ta̱rakekˈ ajcuiˈ a̱tin saˈ xbe̱neb li incˈaˈ nequeˈxpa̱b li Dios. Abanan kˈaxal numtajenak cuiˈchic li raylal teˈxcˈul eb aˈan.

4:18  Joˈcaˈin tzˈi̱banbil chak retalil saˈ li Santil Hu: Cui li ti̱c xchˈo̱l elajic ta̱colekˈ, ¿ma tojaˈ ta chic junak laj ma̱c incˈaˈ elajic ta̱colekˈ?

4:19  La̱ex li yo̱quex chi xcˈulbal li raylal joˈ naraj li Dios, cheqˈuehak taxak e̱chˈo̱l chixba̱nunquil li cha̱bilal. Chekˈaxtesihak e̱rib saˈ rukˈ li Dios. Aˈan li quiyoˈobtesin ke ut ma̱ jokˈe ta̱paltok chiku.

Chapter 5

5:1  Ut anakcuan tinye cuib oxibak li a̱tin reheb laj cˈamol be saˈ e̱ya̱nk la̱ex aj pa̱banel. La̱in ajcuiˈ e̱rochben chi cˈamoc be ut quicuil tzˈakal nak li Cristo quixcˈul raylal. La̱in tintzˈako̱nk ajcuiˈ joˈ nak la̱ex textzˈako̱nk saˈ lix nimal xlokˈal li ta̱cˈutbesi̱k.

5:2  La̱ex laj cˈamol be, tintzˈa̱ma che̱ru nak te̱qˈue e̱chˈo̱l chirilbaleb li ralal xcˈajol li Dios joˈ nak laj ilol xul narileb lix xul chi anchal xchˈo̱l. Te̱qˈue e̱chˈo̱l chixchˈolaninquileb laj pa̱banel li kˈaxtesinbil e̱re xban li Dios chi ma̱cuaˈ minbil e̱ru. Te̱ba̱nu ban chi anchal e̱chˈo̱l. Me̱ba̱nu yal xban xrahinquil ru le̱ tojbal. Cheba̱nu ban xban nak te̱raj cˈanjelac chiru li Dios.

5:3  Me̱taklaheb saˈ joskˈil li kˈaxtesinbileb e̱re. Te̱taklaheb ban saˈ xya̱lal. Cha̱bilakex chiruheb re nak teˈril le̱ cha̱bilal.

5:4  Li Jesucristo aˈan tzˈakal laj ilol ke. Cui nakachˈolaniheb chi us li kˈaxtesinbileb ke, li Jesucristo tixqˈue kakˈajca̱munquil nak tol-e̱lk cuiˈchic. Li kakˈajca̱munquil aˈan incˈaˈ nalaj incˈaˈ na-osoˈ. Ut totzˈako̱nk ajcuiˈ riqˈuin lix nimal xlokˈal.

5:5  Ut anakcuan, ex herma̱n, tinye cuib oxibak a̱tin e̱re la̱ex li toj sa̱jex. Chex-abi̱nk chiruheb li nequeˈcˈamoc be saˈ e̱ya̱nk. Me̱nimobresi e̱rib che̱ribil e̱rib. Chetenkˈa ban e̱rib che̱ribil e̱rib che̱junilex joˈ tzˈi̱banbil saˈ li Santil Hu: Li Dios naxtzˈekta̱naheb li kˈetkˈeteb ut naxba̱nu usilal reheb li nequeˈxcubsi ribeb.

5:6  Checubsi biˈ e̱cuanquil chiru li Dios li kˈaxal nim xcuanquil re nak li Dios tixnimobresi le̱ cuanquil nak tixtau xkˈehil.

5:7  Checanabak saˈ rukˈ li Dios chixjunil li cˈaˈak re ru yo̱ e̱cˈaˈux chirix xban nak li Dios naxqˈue xchˈo̱l che̱rix la̱ex.

5:8  Chicua̱nk e̱naˈleb re xcolbal e̱rib chiru laj tza xban nak laj tza yo̱ chixsicˈbal ani ta̱ra̱le. Laj tza aˈan chanchan li cakcoj ca̱mc re xban xtzˈocajic ut yo̱ chixsutinquil rib yalak bar re xsicˈbal ani tixcamsi re tixtiu.

5:9  Me̱qˈue e̱rib chi a̱le̱c xban laj tza. Cauhak ban e̱chˈo̱l saˈ le̱ pa̱ba̱l. Michˈinan e̱chˈo̱l nak ta̱cha̱lk junak raylal saˈ e̱be̱n. Nequenau nak ma̱cuaˈ caˈaj cuiˈ la̱ex yo̱quex chi cˈuluc raylal. Joˈcan ajcuiˈ nequeˈxcˈul le̱ rech aj pa̱banelil yalak bar jun sut saˈ ruchichˈochˈ.

5:10  La̱ex te̱cˈul li raylal. Cuyomak cuan caˈchˈinak xban nak chi se̱b ajcuiˈ nocoxtenkˈa li Dios. Aˈan ta̱tzˈakobresi̱nk e̱ru. Aˈan ta̱tenkˈa̱nk e̱re re nak incˈaˈ ta̱chˈina̱nk e̱chˈo̱l. Tixqˈue ban xcacuil e̱chˈo̱l. Li Dios, li naqˈuehoc ke li usilal, aˈan quibokoc ke chi tzˈako̱nc riqˈuin lix nimal xlokˈal saˈ choxa kochben li Cristo.

5:11  Aˈan taxak chinima̱k xcuanquil chi junelic kˈe cutan. Joˈcan taxak.

5:12  Laj Silvano, aˈan jun tzˈakal aj pa̱banel. Aˈan ta̱cˈamok re li hu aˈin xintzˈi̱ba chokˈ e̱re. Moco qˈui ta li a̱tin xintzˈi̱ba e̱re. Riqˈuin li a̱tin aˈin yo̱quin chixqˈuebal e̱naˈleb. Xinchˈolob xya̱lal che̱ru chanru li rusilal li Dios. Aˈin taxak chiqˈuehok xcacuil e̱chˈo̱l.

5:13  Eb laj pa̱banel li cuanqueb Babilonia nequeˈxtakla xsahil e̱chˈo̱l. Eb aˈan sicˈbil ajcuiˈ ruheb xban li Dios joˈ la̱ex. Naxtakla ajcuiˈ xsahil e̱chˈo̱l laj Marcos, li ninra joˈ cualal.

5:14  Cheqˈuehak xsahil e̱chˈo̱l che̱ribil e̱rib riqˈuin santil utzˈuc u xban nak nequera e̱rib. Chicua̱nk taxak li tuktu̱quil usilal e̱riqˈuin xban nak la̱ex chic ralal xcˈajol li Cristo. Joˈcan taxak.