Kapingamarangi - I Peter

Chapter 1

1:1  Mai Peter, tangada agoago-hagau a Jesus Christ, ang-gi nia daangada a God ne-hilihili, ala e-noho be digau mai i-daha i-hongo nia guongo go Pontus, Galatia, Cappadocia, Asia mo Bithynia.

1:2  Goodou ne-hilihili-aga mai i-di hiihai o God Tamana, gaa-hai digau dabu mai i dono Hagataalunga, bolo goodou gi-hagalongo ang-gi Jesus Christ, ge gi-madammaa goodou i ono dodo. Tumaalia mo-di noho i-di aumaalia gii-dohu humalia i godou baahi.

1:3  Gidaadou gi-danggee ang-gi God, Tamana o tadau Dagi go Jesus Christ. Idimaa go dono dumaalia aamua, Ia ne-gaamai gi gidaadou di mouli hoou i dana haga-mouli-aga a Jesus Christ mai i-di made. Di mee deenei gu-haga-honu gidaadou gi-di hagadagadagagee mouli.

1:4  Deenei tadau mee e-kanakana bolo gidaadou ga-hai-mee gi-di maluagina dela ne-benebene go God ang-gi ana daangada. Mee e-benebene-adu gi goodou nia maluagina aanei i-di langi, i-di gowaa dela hagalee mooho, be e-pobo, be e-ngudu gi-daha.

1:5  Nia maluagina aanei ala e-benebene go di mogobuna o God laa adu gi goodou mai di hagadonu, anga gi-di hagamouli dela gu-togomaalia e-gila-aga i-di hagaodi o-di madagoaa.

1:6  Malaa, goodou gi-tenetene, eimaha hogi maa goodou e-lodo-huaidu i-di madagoaa bodobodo, mai i-nia hagamada e-logo ala e-tale-adu gi goodou.

1:7  Tadinga o-nia haingadaa aanei le e-haga-modongoohia bolo godou hagadonu le e-donu. Nia goolo hogi e-mee di-mooho ma-ga-manamana gi-di ahi, malaa, e-hai gadoo be godou hagadonu, ala koia e-hagalabagau i-nia goolo, e-hai-loo gi-hagamada bolo gi-maaloo-ai. Gei goodou ga-hai-mee gi-di tene mo-di madamada mo-di hagalaamua i-di laangi dela e-gila-mai-ai Jesus Christ.

1:8  Goodou e-aloho i Mee, gei goodou digi mmada gi Mee. Goodou e-hagadonu a-Mee, gei goodou e-de-gidee a-Mee dolomeenei. Ga-hidi-ai goodou ga-tenetene huoloo i-di tene dela e-deemee di-haga-modongoohia go nnelekai,

1:9  idimaa, goodou guu-kae di haga-mouli o godou mouli, deelaa tadinga o godou hagadonu a-Mee.

1:10  Mai di haga-mouli deenei, dela ne-hidi-ai nia soukohp namua ga-halahala, ga-haga-dina gi-humalia, ga-kokohp di hai o-di wanga dehuia dela belee gowadu go God gi goodou.

1:11  Digaula ne-hagamada e-halahala di madagoaa behee ge dehee dono dau-mai. Deenei di madagoaa di Hagataalunga o Christ dela i nadau lodo, ne-haga-modongoohia gi digaula di dau-mai nia hagaduadua ala e-hagakono go Christ mo di madamada dela e-gila-mai nomuli.

1:12  God gu-haga-modongoohia gi-nia soukohp aalaa bolo nadau hegau la-hagalee nia mee belee hagahumalia-ai ginaadou, gei nia mee belee hagahumalia-ai goodou, i-di nadau leelee i-nia agoago ala e-donu, ala e-hagalongolongo ginai goodou dolomeenei. Digau hagau o-di Longo-Humalia, aanei digau ala e-hagadele-adu gi goodou nia agoago aanei, mai i-di mogobuna o-di Hagataalunga-Dabu dela ne-hagau-mai i-di langi. Aanei nia agoago e-donu ala e-hiihai labelaa ginai digau di-langi bolo ginaadou e-hai gi-iloo.

1:13  Malaa, goodou hagatogomaalia ge gi-haga-noho-ina gi-humalia godou hagamamaanadu. Goodou gii-noho kanakana, gei gi-hagadagadagagee-hua gi-nia maluagina ala ga-hai-mee ginai goodou i-di madagoaa Jesus Christ ma-ga-gila-mai.

1:14  Goodou hagalongo ang-gi God. Hudee heia godou mouli gi-dagi-ina go nia hagadilinga hiihai ala nogo i godou baahi i-di godou madagoaa nogo de-hagalongo.

1:15  Goodou gii-dabu i godou mee huogodoo ala e-hai, gii-hai be God dela ne-gahigahi-mai goodou dela e-dabu.

1:16  Di Beebaa-Dabu e-helekai, “Goodou e-hai gii-dabu, idimaa, Au e-dabu.”

1:17  Goodou gahia a-Mee bolo “Tamana” i godou hai-dalodalo ang-gi God dela e-hagi-aga nia daangada huogodoo gi-di hagi-aga e-dahi, e-hagatau-anga gi nnegau o tangada ne-hai. Malaa, goodou gi-mmaadagu mo-di hagalabagau-ina a-Mee i-lodo godou mouli dela e-mouli i henuailala.

1:18  Idimaa, goodou e-iloo-hua di mee dela ne-haga-dagaloaha goodou gi-daha mo-di balu mouli dono hadinga ai, nogo mouli-ai godou maadua-mmaadua. Goodou hagalee ne-haga-dagaloaha go nia mee mooho-ngoohia, be nia silber be nia goolo,

1:19  gei go tigidaumaha hui-ngadaa, go nia dodo hagalabagau o Christ, dela go Tama-siibi madammaa, ono milimilia ai.

1:20  Mee ne-hili-aga i-baahi o God i-mua di hai o henuailala, ge gu-haga-modongoohia-aga i-nia laangi muliagi aanei belee hagahumalia goodou.

1:21  Goodou ne-hagadonu a God mai i Christ, dela ne-haga-mouli-aga go Mee mai i-di made, gaa-wanga gi Mee nia madamada, malaa, godou hagadonu mo godou hagadagadagagee gii-luia ang-gi God.

1:22  Mai i-di godou daudali di tonu, goodou gu-haga-madammaa goodou, gu-aaloho i-godou duaahina hagadonu, deelaa-laa goodou gi-hagadau aaloho aga i-lodo godou manawa hagatau.

1:23  Nnelekai a God ala e-haga-mouli ge e-noho-hua-beelaa, la-ne-haga-haanau goodou labelaa gii-hai be nia dama ni Tamana dela hagalee made, hagalee nia dama ni tamana dela e-made.

1:24  Idimaa, di Beebaa-Dabu e-helekai, “Nia daangada huogodoo le e-hai be nia geinga-tolo, gei nadau madamada le e-hai be nia akai lodo-geinga. Nia geinga-tolo la-gaa-mae, gei nia akai la-ga-monnono,

1:25  gei nnelekai a Dimaadua le e-noho-hua beelaa, ono hagaodi ai.” Nnelekai aanei la-go di Longo-Humalia dela ne-hagadele-adu gi goodou.

Chapter 2

2:1  Goodou kilia gi-daha nia mee huaidu huogodoo. Goodou kilia gi-daha nia kai-tilikai, mo nia halahalau-dangada, dubua mo nnelekai huaidu.

2:2  Heia goodou gii-hai be nia dama-lligi ala e-hiihai-hua e-inu nia weuu donu o-di hagataalunga, gi-tomo-aga goodou gi-mouli.

2:3  Idimaa, di Beebaa-Dabu e-helekai boloo, “Goodou gu-gidee tumaalia o Dimaadua.”

2:4  Malaa, goodou lloomoi gi Tagi, idimaa, go Mee dela go di Hadu-mouli, dela ne-hudu gi-daha go nia daangada be-di balumee, ge gu-hilihili-aga go God guu-hai di hadu hagalabagau.

2:5  Goodou lloomoi be nia hadu-mouli, e-hau di hale daumaha hagataalunga, di gowaa dela e-hai godou hegau dabu mo godou tigidaumaha hagataalunga gi God mai i Jesus Christ.

2:6  Idimaa, di Beebaa-Dabu e-helekai, “Au gu-hilihili-aga dagu hadu hagalabagau, e-dugu e-hai di hadu madaaduge i Zion. Tangada ga-hagadonu di hadu deenei, geia hagalee lodo-huaidu.”

2:7  Di hadu deenei e-hagalabagau huoloo ang-gi digau ala e-hagadonu; gei ang-gi digau ala de-hagadonu: “Di hadu dela ne-haga-balumee gaa-hudu gi-daha go digau hau-hale, la-guu-hai di hadu hagalabagau huoloo i-hongo nia mee huogodoo.”

2:8  Gei nia madagowaa i-golo, e-helekai, “Deenei di hadu dela e-hai nia daangada gi-tingatinga, deenei di hadugalaa dela e-hai digaula gii-too.” Digaula e-tingatinga, idimaa, digaula digi hagadonu ana helekai, deenei di manawa o God ang-gi digaula.

2:9  Gei goodou la-go di madawaawa ne-hilihili, digau hai-mee-dabu ni-di king, nia daangada dabuaahia, nia dama-donu a God ne-hilihili-aga belee hagadele nia mee haga-goboina ala ne-hai gi ono lima, dela ne-gahigahi-mai goodou gi-daha mo-di bouli, gaa-dugu goodou gi-lodo dono maalama madamada.

2:10  I-mua, goodou hagalee nia dama ni God, gei dolomeenei guu-hai nia dama ni Mee. I-mua, goodou nogo de-iloo tumaalia o God, gei dolomeenei, gu-hai-mee gi dono dumaalia.

2:11  Ogu ihoo hagaaloho-nei, au e-hagamahi-adu gi goodou be digau mai i-daha, bolo goodou gi-maaliu-mai gi-daha mo nia hiihai huaidu o godou huaidina, ala e-heebagi ang-gi godou mouli i-nia madagoaa huogodoo.

2:12  Godou hangahaihai humalia gi-heia labelaa i-baahi nia daangada ala digi maalama, idimaa, di madagoaa digaula gaa-hai nadau kai-tilikai bolo goodou digau huaidu, gei digaula ga-mmada-adu gi godou haihai humalia, ga-hagaamu a God i-di Laangi ma-ga-hanimoi-iei Mee.

2:13  Mai di hiihai o Tagi, goodou gi-dugu-anga goodou gi digau huogodoo ala nadau mogobuna dagi: Ang-gi di king aamua, go mee ono mogobuna e-dagi muginua,

2:14  mo ang-gi nia gobinaa ala ne-dongo go mee belee hagaduadua digau ala e-hai nia mee huaidu, ge e-hagaamu digau ala e-hai nia mee humalia.

2:15  Idimaa, deenei di manawa o God bolo goodou gi-dugua nia leelee huaidu o digau ala e-dadaulia, gi godou haihai humalia.

2:16  Goodou gi-mouli be digau maahede, ge hudee haga-hai-hegau-ina godou maahede e-gahu di huaidu, gei gi-mouli be nia hege a God.

2:17  Goodou hagalabagau-ina nia daangada huogodoo. Goodou aloho i godou duaahina dama a Christ. Goodou hagalaamua-ina a God, gei gi-hagalabagau-ina di king.

2:18  Goodou go nia hege, dugu-anga goodou gi godou gau aamua, gei gi-haga-modongoohia-ina gi digaula godou hagalabagau digaula huoloo. Malaa, hagalee anga-hua gi digau ala e-humalia ge dumaalia, mo anga labelaa gi digau ala e-hagamuamua.

2:19  God ga-hagahumalia-laa goodou i-di-godou manawa-hagakono i-nia hagaduadua e-dee-tau gii-kae go goodou, idimaa, goodou e-iloo bolo goodou e-hai di mee dela e-hiihai ginai a God.

2:20  Maa goodou ga-manawa-hagakono gi godou dadaaligi e-tau gi godou huaidu, di humalia-aha e-gila-adu gi goodou? Maa goodou ga-manawa-hagakono gi godou dadaaligi i di gili nia huaidu hagalee ne-hai go goodou, God ga-hagahumalia laa goodou.

2:21  God ne-gahigahi goodou gi-di mee deenei, idimaa, ma go Christ dela ne-hagaduadua i goodou, ga-gowadu gi goodou di hagatau humalia bolo goodou gi-daudalia, gi-kawe-ai.

2:22  Mee digi hai dana mee hala, tangada ne-longono di kai tilikai mai dono ngudu ai.

2:23  Nia daangada ne-leelee huaidu i Mee, gei Mee digi helekai hai-baahi. I-lodo dono hagaduadua, gei Mee digi hagahuaidu-ina digau nogo dadaaligi Ia, gei Mee ne-dugu anga-hua ono hagadagadagagee huogodoo gi God, Tangada Hai-gabunga e-donu.

2:24  Christ guu-kae tadau huaidu i-ono lodo gi-di loobuu, bolo gii-mmade gidaadou gi-di huaidu ge gi-mouli gi-di tonu. Ono gowaa moholehole ne-hagahili-ai goodou.

2:25  Goodou guu-hai be nia siibi ne-de-gidee nadau ala, gei dolomeenei goodou gu-laha-mai gi-muli e-daudali di-godou Dangada Hagaloohi, Tangada dela e-benebene godou mouli.

Chapter 3

3:1  I-di hai la-hua, nia ahina hai lodo, goodou dugu-anga goodou gi godou lodo. Idimaa, hunu ginaadou hagalee hagadonu nia helekai a God, gei godou mouli humalia gaa-hai digaula gi-hagadonu. Goodou hagalee hai-loo bolo gi-helekai,

3:2  idimaa, digaula gaa-bida gidee-hua godou mouli madammaa, mo di-godou hagalaamua God.

3:3  Goodou hudee laagei-ina goodou gi-di hai e-dala godou libogo, gi-nia hau-goolo, be gi-nia gahu ala e-gahu goodou.

3:4  Gei godou madamada gi-heia-mai i godou lodo donu, di madamada o-di hagataalunga balabala mo hila-gi-lala e-de-ngudu, dela e-kaedahi e-dahidamee i-mua nnadumada a God.

3:5  Idimaa, deenei di hai o-nia ahina dabu namua, e-hagadagadagagee gi God. Digaula e-hai ginaadou gi-madamada, i-di nadau dugu ginaadou gi nadau lodo.

3:6  Be di hai a Sarah ne-hagalongo gi Abraham, gaa-gahi a mee bolo dono dagi. Goodou guu-hai nia dama-ahina ni mee maa goodou ga-mouli humalia, ga-hagalee mmaadagu i dahi mee.

3:7  I-di ala la-hua, goodou nia daane hai lodo, goodou gii-noho i-baahi godou lodo, gi-iloo bolo godou lodo le e-paagege. Gei goodou gi-hagalabagau-ina digaula, idimaa, digaula ga-hai-mee labelaa gi-di mouli kisakis i-baahi o God, gadoo be goodou. I-di godou hai di mee deenei, hudee haga-deaadee-ina di-godou hai dalodalo.

3:8  Malaa, goodou gii-buni godou hagamaanadu mo godou hiihai. Goodou hagadau-aaloho i godou mehanga, dumaalia, ge hila-gi-lala.

3:9  Goodou hudee huia di huaidu gi-di huaidu, be nnelekai huaidu gi nnelekai huaidu, gei gi-huia-anga nnelekai huaidu gi nnelekai humalia, idimaa, ma go di humalia dela ne-hagababa-adu go God i dana gahigahi goodou.

3:10  Idimaa, di Beebaa-Dabu e-helekai, “Tangada dela e-hiihai e-haga-tenetene dono mouli, e-hiihai e-mmada gi-di madagoaa humalia, geia gii-lawa gi-daha mo ana helehelekai huaidu mo ana helehelekai-tilikai.

3:11  Mee e-hai-loo gii-huli gi-daha mo nia mee huaidu gi-heia nia mee humalia, gi-halahala-ina di noho i-di aumaalia, mai i-lodo dono manawa hagatau.

3:12  Idimaa, Dimaadua e-benebene-hua digau ala e-donu, gei e-hagalongo gi nadau dangidangi, gei Mee e-huli gi-daha mo digau ala e-haihai nia mee huaidu.”

3:13  Ma koai dela e-mee di hagahuaidu goodou ala ma-ga-hagamahi huoloo e-hai nia mee humalia?

3:14  Maa goodou gaa-hai digau e-hagaduadua i godou haihai humalia, e-maluagina go goodou! Goodou hudee mmaadagu i-nia daangada, ge hudee hagabaubau e-logo.

3:15  Gei goodou gi-hagalaamua-ina a Christ i-lodo godou manawa, dugu-ina a-Mee e-hai di-godou Dagi. Hagatogomaalia i-nia madagoaa huogodoo, gii-mee-ai di-godou helekai gi tangada dela ga-heeu-adu bolo gi-haga-modongoohia-ina di hagadagadagagee dela i godou baahi.

3:16  Gei gi-heia di-maa i-di manawa hila-gi-lala mo-di hagalaamua, i-lodo godou manawa madammaa, idimaa, digau ala e-dili nadau kai-tilikai i-di godou haihai nia mee humalia i-baahi o Christ, digaula gaa-tee, ge ga-langaadia i nadau kai-tilikai ne-hai.

3:17  Maa deenei di hiihai a God, e-koia e-humalia bolo gi-duadua di hai nia mee humalia i-di hai nia mee huaidu.

3:18  Idimaa, Christ ne-made-hua haga-dahi gi-nia huaidu digau huogodoo. Tangada hai mee donu, e-pono digau hai mee hala, belee laha-mai goodou gi God. Mee ne-made i tuaidina, ga-mouli-aga i-di hagataalunga.

3:19  Gei Mee gaa-hana i-di hagataalunga, ga-agoago gi-nia hagataalunga ala nogo lawalawa.

3:20  Malaa nia hagataalunga aanei, la-go nia hagataalunga o digau de-hagalongo gi God i-di madagoaa God nogo tali maalia digaula, i-di madagoaa Noah nogo hau dana waga. Digau nogo i-lodo di waga, la dogowalu huogodoo ala ne-mouli i toloo deelaa.

3:21  Toloo deelaa la di haga-modongoohia o-di babdais, dela e-haga-mouli goodou dolomeenei. Nia wai aanei la-hagalee go di haga-madammaa nia dogolia i tadau gili, gei di hagababa ne-hai ang-gi God mai i-di manawa madammaa. Di babdais e-haga-mouli goodou mai i-di mouli-aga o Jesus Christ,

3:22  dela guu-hana gi-di langi, guu-noho i-baahi gau-donu o God, e-dagi nia daangada di-langi, nia dagi, mo digau mogobuna o-di langi huogodoo.

Chapter 4

4:1  Malaa, idimaa Christ la-gu-hagaduadua dono huaidina, gei goodou gi-maaloo labelaa be-di hagamamaanadu dela ne-hai go Mee, idimaa, tangada dela ga-hagaduadua dono huaidina, ia ne-huli gi-daha mo nia huaidu.

4:2  Dolomeenei gaa-hana gi-muli i-di waalooloo o godou mouli, goodou gi-daudalia-hua di manawa o God, hagalee go nia hiihai dangada.

4:3  Idimaa, di waalooloo o godou mouli mai-i-mua, goodou nogo hai nia mee digau ala e-noho i-lodo di bouli ala e-hiihai e-hai. Goodou guu-hai nia hagadilinga mee huaidu huogodoo haga-langaadia-dangada, hai be-di manu, gai tagaao, hai hoo huaidu, hagalongoaa, inu gi-libaliba, mo nia hai-daumaha ang-gi nia balu-god.

4:4  Malaa, dolomeenei gei digau o lodo di bouli gu-homouli i-di godou dee-buni-anga gi ginaadou e-hai nia hagadilinga mee huaidu aanei. Gei digaula ga-helehelekai huaidu i goodou.

4:5  Malaa, digaula e-hai gi-hagi-aga ginaadou gi God, di God dela e-hagi-aga digau mouli mo digau mmade.

4:6  Malaa, deenei tadinga di Longo-Humalia dela ne-hagadele labelaa ang-gi digau ala guu-mmade dolomeenei, ang-gi ginaadou ala guu-kae di hagi-aga baahi gi tuaidina, be-di hai o digau huogodoo ala e-hagi-aga. Di Longo-Humalia ne-hagadele ang-gi digaula bolo i-lodo nadau mouli hagataalunga, digaula e-mouli be-di mouli a God dela e-mouli-ai.

4:7  Di hagaodi o-nia mee huogodoo la-gu-hoohoo-mai. Goodou gi-madamada humalia i godou huaidina, gei gi-kanakana, gii-mee-ai goodou di hai-dalodalo.

4:8  I-mua nia mee huogodoo, gei goodou hagamahi gi-hagadau-aaloho, idimaa, di aloho le e-daabui nia hagadilinga huaidu huogodoo.

4:9  Hugee godou hale gi tangada-nei mo tangada-nei, hudee helekai e-logo.

4:10  Tangada-nei mo tangada-nei la-gii-hai be tangada madamada humalia nia hagadilinga wanga-dehuia a God, gei gi-haga-hai-hegau-ina nia wanga-dehuia ala ne-kae koia i-baahi o God, e-hagahumalia digau ala i-golo.

4:11  Digau ala e-agoago, gi-agoago i-nia helekai a God. Digau ala e-hai-hegau, gi-hai-hegau gi-nia mahi ala ne-wanga go God gi ginaadou, gi-hagaamuina a God i-nia mee huogodoo mai i Jesus Christ dela e-hai-mee gi-nia madamada mo nia mahi, dolomeenei gaa-hana-hua beelaa. Amen.

4:12  Ogu ihoo hagaaloho, goodou hudee homouli gi-nia hagadilinga haga-mmaemmae ala e-tale-adu gi goodou ala e-hagamada goodou, be nia hai haga-goboina ala e-hai-adu gi goodou.

4:13  Gei goodou gii-tene gi di-godou hai-mee gi-di hagaduadua o Christ, gii-mee goodou di-honu i-di tene i-di madagoaa ono madamada ma-ga-kila aga.

4:14  E-maluagina go goodou, maa goodou ga-hagahuaidu, idimaa goodou ala e-daudali a Christ. Di mee deenei e-haga-modongoohia bolo di Hagataalunga madamada, di Hagataalunga o God, la-gu-i godou baahi.

4:15  Maa tangada i goodou ga-hagaduadua, hagalee ne-hagaduadua bolo mee tangada daaligi-dangada, tangada-gaiaa, tangada de-hagalongo, be tangada e-hagahuaidu nia moomee digau ala i-golo.

4:16  Maa goodou ga-hagaduadua idimaa goodou nia dama ni Christ, goodou hudee langaadia, gei goodou gi-danggee hagaamuina a God i-di godou haga-ingoo gi-di ingoo o Christ.

4:17  Di madagoaa di hagi-aga gaa-dae-mai, e-daamada i-nia dama a God i-mua. Maa di hagi-aga deenei ga-daamada i gidaadou, malaa, ga-haga-lawa behee i-baahi digau ala hagalee hagadonu di Longo-Humalia dela mai baahi o God?

4:18  Di Beebaa-Dabu e-helekai, “Ma e-haingadaa huoloo ang-gi digau humalia e-hagamouli, malaa dehee di hai ang-gi digau huaidu de-hagadonu?”

4:19  Malaa, digau ala e-hagaduadua idimaa deenei di manawa o God ang-gi digaula, la-gi-heheia nadau haihai humalia mo di hagadagadagagee mo nadau mouli hagatau ang-gi di God manawa-dahi dela ne-hai digaula.

Chapter 5

5:1  Au e-hagamahi-adu gi goodou i-nia mee aanei, goodou go digau mmaadua-daumaha. Gei-au tangada madua-daumaha labelaa, guu-hai tangada e-haga-modongoohia di hagaduadua o Christ, gei au e-madalia labelaa e-hai-mee gi-di madamada dela ga-gila-aga. Malaa, au e-hagamahi-adu gi goodou,

5:2  bolo goodou gi-ngalua be digau hagaloohi-siibi o-di hagabuulinga siibi dela ne-dugu-adu go God, gi-benebene-ina mai godou hiihai manawa be di hiihai a God gei hagalee mai godou de-hiihai.

5:3  Goodou hudee heia goodou gii-dagi digau ala e-benebene, gei goodou heia nia mee e-kawe go digaula.

5:4  I-di madagoaa Tangada Hagaloohi-siibi Aamua ga-hanimoi, goodou gaa-kae di hau madamada dela hagalee ngudu dono dingidingia.

5:5  Gei goodou ala go nia dama-daane, goodou gi-dugu-anga goodou gi digau mmaadua. Goodou gi-hila-gi-lala, gi-hagadau-maamaa i godou mehanga. Idimaa, di Beebaa-Dabu e-helekai, “God e-hai-baahi gi-nia daangada ala e-hagamuamua, ge e-wanga dono dumaalia gi digau ala e-hila-gi-lala.”

5:6  Malaa, goodou gi-hila-gi-lala, i-lala nia mogobuna o God, go Mee dela ga-haga-menege-aga goodou i dono madagoaa humalia.

5:7  Dugu-ina godou manawa-gee huogodoo gi Mee, idimaa, Mee e-madamada humalia i goodou.

5:8  Goodou gi-hagatogomaalia ge gi-kanakana, idimaa, di-godou hagadaumee go Setan, e-heehee ge e-wolowolo gadoo be-di laion, e-halahala dana dangada e-gai.

5:9  Goodou gi-hai-baahi gi di-godou hagadaumee, gei gi-mau-dangihi i-di godou hagadonu, idimaa, goodou gu-iloo bolo godou duaahina-daumaha ala e-noho i-nia madagowaa huogodoo i henuailala, e-hai be goodou i-lodo di hagaduadua dela e-tale ginai goodou.

5:10  I-muli di hagaduadua bodobodo-nei, God honu tumaalia dela ne-haga-gahi-mai goodou gi-hai-mee gi dono madamada dee-odi i-di godou hagadaubuni ang-gi Christ, ga-haga-manawa lamalia, hagamaaloo-aga, ge haga-mau-dangihi goodou.

5:11  Nia mogobuna gi-madalia a-Mee gaa-hana-hua beelaa. Amen!

5:12  Au e-hihi di lede bodobodo deenei mai i-di hagamaamaa o Silas, e-dugu ko-au bolo tuaahina manawa-dahi. Au e-hagamaaloo-aga godou manawa, ge e-haga-modongoohia-adu gi goodou bolo deenei go tumaalia donu o God. Goodou gii-tuu maaloo i tumaalia deenei.

5:13  Godou duaahina nohongo-dabu i Babylon gu-hilihili-aga gadoo be goodou mai di manawa o God, digaula mo dagu dama-daane go Mark, e-hagau-adu di-nadau hagaaloho.

5:14  Goodou gi-hagadau hagaaloho i godou mehanga i-di aloho dama a Christ. Di aumaalia gi-madalia goodou huogodoo ala e-buni-anga gi Christ.