Kekchi - Esther

Chapter 1

1:1  Aˈan aˈin li quicˈulman saˈ eb li cutan nak quicuan chokˈ rey laj Asuero. Aˈan quitaklan saˈ xbe̱n li tenamit La India. Ut aˈan ajcuiˈ quitaklan saˈ xbe̱neb chixjunileb li tenamit quicuulac toj saˈ li tenamit Etiopía. Jun ciento riqˈuin cuukub xcaˈcˈa̱l (127) chi tenamit queˈcuan rubel xcuanquil laj Asuero.

1:2  Saˈ li tenamit Susa quicuan lix naˈaj li quitaklan cuiˈ.

1:3  Yo̱ rox chihab roquic chokˈ rey laj Asuero nak quixba̱nu jun li ninkˈe chokˈ reheb li nequeˈcˈanjelac chiru. Ut quixbokeb saˈ li ninkˈe li nequeˈtaklan saˈ li junju̱nk chi tenamit joˈqueb ajcuiˈ li nequeˈcˈamoc be saˈ xya̱nkeb lix soldado eb laj Persia ut eb laj Media.

1:4  Quixbokeb chixjunileb re xcˈutbal chiruheb lix nimal ut lix lokˈal lix cuanquilal ut lix biomal. Li ninkˈe aˈan quicuan cuakib po.

1:5  Nak ac xeˈnumeˈ li cutan aˈan, quixba̱nu jun chic li ninkˈe chiru li neba̱l re li rochoch li rey Asuero. Cuukub cutan chic quibay li ninkˈe aˈan. Chixjunileb li cuanqueb Susa queˈbokeˈ saˈ li ninkˈe, li cuanqueb xcuanquil joˈqueb ajcuiˈ li ma̱cˈaˈeb xcuanquil.

1:6  Queˈxyi̱b chi cha̱bil li neba̱l. Queˈxqˈue li cha̱bil tˈicr sak, rax ut azul ut queˈxbacˈ chiru li ni̱nki pilar yi̱banbil riqˈuin li cha̱bil pec mármol. Li tˈicr chapcho riqˈuin cˈa̱m lino morado. Li cˈa̱m chapcho saˈ li junju̱nk chi pilar riqˈuin argollas yi̱banbil riqˈuin plata. Li cˈojariba̱l, li queˈhilan cuiˈ li ulaˈ yi̱banbil riqˈuin oro ut plata. Li xan yi̱banbil riqˈuin li cha̱bil pec pórfido ut mármol ut riqˈuin li pec alabastro ut jacinto. Eb li pec aˈan kˈaxal terto̱queb xtzˈak.

1:7  Li secˈ li queˈucˈac cuiˈ junes oro ut jalan jala̱nk xyi̱banquil. Kˈaxal nabal li vino xcomon li cha̱bil li narucˈ li rey ut quiqˈueheˈ chi nabal joˈ quiraj aˈan.

1:8  Li rey quixqˈue jun li chakˈrab reheb laj jecˈol vino ut quixye reheb nak ma̱ ani teˈxmin ruheb chi ucˈac. Aˈ yal re li junju̱nk cˈaˈru ta̱raj rucˈbal.

1:9  Ut li reina Vasti, li rixakil li rey, quixba̱nu ajcuiˈ jun li ninkˈe reheb li ixk saˈ li rochoch li rey Asuero.

1:10  Saˈ xcuuk li cutan re li ninkˈe, cˈajoˈ xsahil xchˈo̱l li rey Asuero xban lix calajic. Quixtaklaheb li cuukub chi eunucos li nequeˈcˈanjelac chiru. Aˈaneb laj Mehumán, laj Bizta, laj Harbona, laj Bigta, laj Abagta, laj Zetar ut laj Carcas.

1:11  Li rey quixye reheb nak teˈxbok chak li reina Vasti. Ut quixye reheb nak cua̱nk chak lix corona saˈ xjolom nak ta̱cha̱lk chiru li rey re xcˈutbal lix chˈinaˈusal chiruheb li tenamit ut chiruheb ajcuiˈ li nequeˈtaklan saˈ li junju̱nk chi tenamit xban nak kˈaxal chˈinaˈus lix Vasti.

1:12  Li cuukub chi cui̱nk queˈcuulac riqˈuin li reina Vasti ut queˈxye re li cˈaˈru quixye li rey. Abanan lix Vasti incˈaˈ quixba̱nu li cˈaˈru quiraj li rey. Joˈcan nak cˈajoˈ nak quijoskˈoˈ li rey.

1:13  Xban nak yo̱ xjoskˈil li rey quipatzˈoc reheb li cuanqueb xnaˈleb cˈaˈru us xba̱nunquil. Saˈ eb li cutan aˈan cˈaynakeb li rey chixpatzˈbal xnaˈlebeb riqˈuineb li nequeˈxnau li chakˈrab.

1:14  Cuanqueb riqˈuin li rey laj Carsena, laj Setar, laj Admata ut laj Tarsis. Ut cuanqueb ajcuiˈ laj Meres, laj Marsena ut laj Memucán. Aˈaneb li cuukub chi xni̱nkal ru cui̱nk saˈ xya̱nkeb laj Persia ut laj Media. Junelic cuanqueb aran chixqˈuebal xnaˈleb li rey ut kˈaxal ni̱nkeb xcuanquil.

1:15  Li rey Asuero quixpatzˈ reheb: —¿Cˈaˈru naxye li chakˈrab? ¿Cˈaˈru us takaba̱nu riqˈuin li reina Vasti? Xintaklaheb laj cˈanjel chicuu chixbokbal. Abanan aˈan incˈaˈ xba̱nu li cˈaˈru xinye, chan.

1:16  Ut laj Memucán quichakˈoc ut quixye re li rey ut reheb ajcuiˈ chixjunileb li cuanqueb xcuanquil saˈ eb li tenamit: —Moco caˈaj cuiˈ ta chiru li rey xma̱cob nak quixkˈet li ra̱tin. Xma̱cob ajcuiˈ chiruheb li cuanqueb xcuanquil joˈ ajcuiˈ chiruheb chixjunileb li tenamit li cuanqueb rubel xcuanquil li rey.

1:17  Li cˈaˈru xba̱nu li reina ta̱cuulak saˈ xxiqueb chixjunileb li ixk. Cui teˈrabi aˈan, eb li ixk incˈaˈ chic teˈxqˈue saˈ ruheb lix be̱lomeb. Eb aˈan teˈxye, “Li rey Asuero xtakla xbokbal li reina Vasti ut aˈan incˈaˈ qui-abin chiru,” chaˈkeb.

1:18  Ut anakcuan eb li rixakil li cuanqueb xcuanquil saˈ xya̱nkeb laj Media ut eb laj Persia cau chic teˈra̱tina lix be̱lomeb xban nak teˈrabi li cˈaˈru xba̱nu li reina Vasti. Teˈjoskˈok chiruheb lix be̱lom ut ta̱cua̱nk chˈaˈajquilal chi joˈcan.

1:19  Cui la̱at tixcˈul a̱chˈo̱l, at rey, ta̱qˈue junak chakˈrab ut tzˈi̱banbilak retalil saˈ li chakˈrab re Persia ut re Media re nak ma̱ ani ta̱kˈetok re. Li chakˈrab aˈan tixye nak li reina Vasti incˈaˈ chic tixcˈut rib chi junaj cua chiru li rey ut ta̱isi̱k chokˈ reina. Ut junak chic kˈaxal cha̱bil chiru aˈan ta̱qˈuehekˈ chokˈ reina.

1:20  Nak ta̱e̱lk resil li chakˈrab li ta̱qˈue, at rey, teˈrabi chixjunileb li cuanqueb rubel a̱cuanquil. Ut chixjunileb li ixk teˈxqˈue xlokˈal lix be̱lom, usta cuan xcuanquil usta ma̱cˈaˈ xcuanquil, chan.

1:21  Li cˈaˈru quixye laj Memucán quixcˈul xchˈo̱l li rey joˈqueb ajcuiˈ li ni̱nkeb xcuanquil li cuanqueb aran. Ut li rey Asuero quixba̱nu joˈ quiyeheˈ re xban laj Memucán.

1:22  Ut li rey quixtaklaheb li hu saˈ li junju̱nk chi tenamit. Quixtzˈi̱ba saˈ li ra̱tinoba̱leb ut quixtzˈi̱ba ajcuiˈ joˈ nequeˈtzˈi̱bac saˈ eb li junju̱nk chi tenamit. Quixye reheb nak eb li cui̱nk, aˈaneb li teˈtakla̱nk saˈ li rochocheb. Ut quixye ajcuiˈ nak ta̱yehekˈ resil li chakˈrab aˈan reheb chixjunileb li tenamit saˈ li ra̱tinoba̱leb li junju̱nk chi tenamit.

Chapter 2

2:1  Mokon chic nak ac xnumeˈ xjoskˈil li rey Asuero, quijulticoˈ re lix Vasti li quicuan chokˈ rixakil. Quijulticoˈ re li quixba̱nu ut quijulticoˈ ajcuiˈ re chanru nak quirisi chokˈ reina.

2:2  Ut eb li nequeˈcˈanjelac chiru li rey queˈxye: —Tento takasiqˈueb li tukˈ ixk chˈinaˈuseb li ma̱jiˈ cuanjenakeb riqˈuin cui̱nk chokˈ re li rey.

2:3  Li rey tixxakabeb li teˈxic saˈ chixjunileb li tenamit li cuanqueb rubel xcuanquil chixsicˈbaleb li tukˈ ixk li cˈajoˈ xchˈinaˈusaleb. Teˈcˈamekˈ chak Susa li tukˈ ixk saˈ li rochoch li rey ut teˈqˈuehekˈ chi cua̱nc saˈ li naˈajej li nequeˈcuan cuiˈ li ixk. Teˈcanaba̱k saˈ xcue̱nt laj Hegai li na-iloc reheb li ixk. Aˈan li eunuco li nacˈanjelac chiru li rey. Ut aˈan ta̱qˈuehok reheb chixjunil li cˈaˈak re ru re teˈxtikib ribeb chi cha̱bil.

2:4  Ut li tukˈ ixk li kˈaxal ta̱cuulak chiru li rey, aˈan li ta̱qˈuehekˈ chokˈ reina chokˈ re̱kaj lix Vasti, chanqueb. Ut quixcˈul xchˈo̱l li rey li naˈleb aˈin. Ut quixba̱nu joˈ quiyeheˈ re.

2:5  Aran Susa cuan jun li cui̱nk aj judío aj Mardoqueo xcˈabaˈ. Aˈan ralal laj Jair. Laj Jair, aˈan li ralal laj Simei. Laj Simei, aˈan li ralal laj Cis. Eb aˈan xcomoneb li ralal xcˈajol laj Benjamín.

2:6  Eb aˈan xcomoneb li qˈuila tenamit li queˈisi̱c Jerusalén xban laj Nabucodonosor, lix reyeb laj Babilonia. Rochbeneb laj Jeconías lix reyeb laj Judá nak queˈcˈameˈ aran Babilonia.

2:7  Quicuan jun lix rabin li rican laj Mardoqueo. Nak quicam lix naˈ xyucuaˈ li xkaˈal, laj Mardoqueo quixxoc ut quixqˈuiresi joˈ jun tzˈakal xrabin, xHadasa xcˈabaˈ. Ester nayeman ajcuiˈ re. Cˈajoˈ xchˈinaˈusal li xkaˈal aˈan.

2:8  Nak qui-el resil li chakˈrab li quixqˈue li rey, nabaleb li tukˈ ixk queˈchˈutuba̱c saˈ li tenamit Susa saˈ li rochoch li rey. Ut laj Hegai aˈan li na-iloc reheb. Saˈ xya̱nkeb li tukˈ ixk cuan lix Ester.

2:9  Laj Hegai quixqˈue retal nak cha̱bil lix Ester ut quisahoˈ xchˈo̱l riqˈuin. Joˈcan nak junpa̱t quixqˈue chixjunil li cˈaˈru re, re nak tixtikib rib chi cha̱bil ut quixqˈue li cha̱bil tzacae̱mk re. Quixqˈue cuukub li tukˈ ixk li kˈaxal cha̱bileb li cuanqueb saˈ li rochoch li rey re nak teˈcˈanjelak chiru lix Ester. Ut quixqˈue jun xnaˈaj lix Ester kˈaxal cha̱bil re nak ta̱cua̱nk aran rochbeneb li cuukub chi tukˈ ixk.

2:10  Lix Ester incˈaˈ quixye bar xtenamit chi moco quixye nak aˈan xcomoneb laj Israel xban nak ac yebil re xban laj Mardoqueo nak incˈaˈ tixye.

2:11  Rajlal cutan nanumeˈ laj Mardoqueo chiru lix neba̱l li rochoch li rey bar cuanqueb cuiˈ li tukˈ ixk re xnaubal chanru lix Ester, ma sa saˈ xchˈo̱l ut ma cha̱bileb riqˈuin.

2:12  Nak toj ma̱jiˈ nequeˈxcˈut rib chiru li rey, tento nak teˈxyi̱b rib chiru jun chihab joˈ cˈaynakeb xba̱nunquil eb li ixkˈ aˈan. Li xbe̱n cuakib po teˈxyul li aceite mirra chirixeb ut li cuakib po chic teˈxqˈue li sununquil ban chirixeb. Nak acak xeˈrakeˈ xyi̱banquil ribeb, chi xjunju̱nkaleb teˈcˈamekˈ riqˈuin li rey.

2:13  Ut li tukˈ ixk, li ta̱xic riqˈuin li rey, tento nak ta̱qˈuehekˈ re chixjunil li cˈaˈru ta̱raj re xyi̱banquil rib chi kˈaxal cha̱bil re nak ta̱xic saˈ li rochoch li rey.

2:14  Chiru kˈojyi̱n ta̱xic riqˈuin li rey ut cuulajak chic ta̱xic saˈ lix naˈajeb li ixk li ac xeˈcuan riqˈuin li rey. Li eunuco aj Saasgaz aˈan li na-iloc reheb. Ut li ixk incˈaˈ chic ta̱xic riqˈuin li rey cui incˈaˈ ta̱cuulak chiru li rey ut cui incˈaˈ ta̱bokekˈ xban.

2:15  Nak quicuulac xkˈehil, quicˈameˈ lix Ester riqˈuin li rey. Ma̱cˈaˈ quixtzˈa̱ma. Caˈaj cuiˈ quirocsi li cˈaˈru quiqˈueheˈ re xban laj Hegai li eunuco li na-iloc reheb li tukˈ ixk. Ut chixjunileb li queˈiloc re lix Ester, cˈajoˈ nak queˈsahoˈ xchˈo̱l riqˈuin. Lix Ester li quiqˈuiresi̱c xban laj Mardoqueo, aˈan xrabin laj Abihail.

2:16  Saˈ li xlaje po Tebet xcˈabaˈ re li xcuuk chihab roquic chokˈ rey laj Asuero, nak quicˈameˈ lix Ester riqˈuin li rey.

2:17  Ut li rey Asuero nak quiril ru lix Ester, cˈajoˈ nak quicuulac chiru ut aˈan li kˈaxal quixra chiruheb chixjunileb li ixk li ac queˈcuulac riqˈuin. Quixqˈue lix corona saˈ xjolom ut quixqˈue chokˈ reina chokˈ re̱kaj lix Vasti.

2:18  Li rey quixba̱nu jun li ninkˈe re xqˈuebal xlokˈal lix Ester ut quixbokeb saˈ li ninkˈe chixjunileb li nequeˈcˈanjelac chiru. Incˈaˈ qˈui li tumin quixpatzˈ reheb li junju̱nk chi tenamit. Quixqˈue ban xma̱taneb joˈ quiraj li rey.

2:19  Nak queˈchˈutuba̱c cuiˈchic xcaˈ sut li tukˈ ixk, laj Mardoqueo chunchu aran chire li oqueba̱l re li rochoch li rey.

2:20  Lix Ester incˈaˈ quixye reheb bar xtenamit chi moco quixye reheb nak aˈan xcomoneb laj judío xban nak joˈcan quiyeheˈ re xban laj Mardoqueo. Aˈan naxba̱nu li cˈaˈru naxye laj Mardoqueo joˈ quixba̱nu nak toj cuan chiru.

2:21  Nak chunchu chire li oqueba̱l re li rochoch li rey, laj Mardoqueo quirabi li cˈaˈru yo̱queb chixyebal chi ribileb rib laj Bigtán ut laj Teres. Li cuib chi cui̱nk aˈan, aˈaneb li nequeˈcuan saˈ li oqueba̱l chi cˈacˈale̱nc. Cˈajoˈ xjoskˈileb ut yo̱queb xcˈu̱banquil chanru nak teˈxcamsi li rey.

2:22  Nak quirabi nak teˈraj teˈxcamsi li rey, laj Mardoqueo quixye re lix Ester. Ut lix Ester quixye re li rey li cˈaˈru quirabi ut quixye ajcuiˈ nak laj Mardoqueo, aˈan li quiyehoc re.

2:23  Queˈxtzˈil a̱tin chirix li cˈaˈru quixye laj Mardoqueo. Nak queˈxqˈue retal nak ya̱l li quixye, queˈxtakla xyatzˈbaleb li cuib chi cui̱nk li queˈajoc xcamsinquil li rey. Ut chixjunil aˈin quitzˈi̱ba̱c retalil saˈ li hu li tzˈi̱banbil cuiˈ retalil chixjunil li nacˈulman saˈ li tenamit aˈan.

Chapter 3

3:1  Mokon chic li rey Asuero quixqˈue xcuanquil laj Amán chi takla̱nc saˈ xbe̱neb chixjunileb li nequeˈtaklan saˈ eb li tenamit. Laj Amán aˈan li ralal laj Hamedata, xcomoneb aj agagueo.

3:2  Nak quinumeˈ laj Amán, chixjunileb li nequeˈcˈanjelac chiru li rey saˈ li rochoch queˈxcuikˈib ribeb chiru ut queˈxxulub xjolomeb re xqˈuebal xlokˈal xban nak joˈcan quixye li rey. Abanan laj Mardoqueo incˈaˈ quixcuikˈib rib chiru chi moco quixqˈue xlokˈal.

3:3  Ut eb li nequeˈcˈanjelac chiru li rey queˈxpatzˈ re laj Mardoqueo cˈaˈut nak incˈaˈ naxba̱nu li cˈaˈru quixye li rey.

3:4  Junelic yo̱queb xpatzˈbal re laj Mardoqueo cˈaˈut nak incˈaˈ quixba̱nu li cˈaˈru quixye li rey. Abanan laj Mardoqueo incˈaˈ qui-abin chiruheb. Joˈcan nak queˈco̱eb riqˈuin laj Amán ut queˈxye re nak laj Mardoqueo incˈaˈ naxcuikˈib rib chiru xban nak quixye reheb nak aˈan aj judío. Queˈraj rilbal ma tixye na chiru laj Amán nak aˈan aj judío.

3:5  Nak laj Amán quixqˈue retal nak laj Mardoqueo incˈaˈ naxcuikˈib rib chiru, chi moco naxxulub xjolom nak nanumeˈ, cˈajoˈ nak quichal xjoskˈil.

3:6  Ac quirabi resil nak laj Mardoqueo aj judío. Incˈaˈ quiraj xcamsinquil xjunes laj Mardoqueo. Quixcˈoxla nak kˈaxal us xcamsinquileb chixjunileb laj judío li cuanqueb saˈ eb li naˈajej li cuanqueb rubel xtakl li rey Asuero.

3:7  Saˈ li xbe̱n po Nisán xcˈabaˈ nak yo̱ cablaju chihab roquic chokˈ rey laj Asuero, queˈbu̱lic chiru laj Amán re xnaubal jokˈe us xba̱nunquil li quixye laj Amán. Nak queˈbu̱lic chirix li cutan ut chirix li po qui-el nak teˈxba̱nu saˈ li oxlaju xbe lix cablaju po. Li po aˈan Adar xcˈabaˈ. Li bu̱lic nequeˈxba̱nu, Pur nequeˈxye re.

3:8  Laj Amán quixye re li rey Asuero: —Saˈ xya̱nkeb li tenamit li cuanqueb rubel la̱ takl, cuan jun te̱p li tenamit xjuneseb nequeˈxcˈam ribeb. Incˈaˈ nequeˈxjunaji rib riqˈuineb li jun chˈol chic. Jalan lix chakˈrabeb ut incˈaˈ nequeˈxba̱nu li cˈaˈru nacaye la̱at. Ma̱cˈaˈ aj e nak cuanqueb saˈ eb li naˈajej li cuanqueb rubel la̱ cuanquil.

3:9  Joˈcan nak cui naxcˈul a̱chˈo̱l, at rey, ta̱qˈue jun li chakˈrab re nak teˈsachekˈ ru chixjunileb laj judío. Ut la̱in tincˈam chak chokˈ a̱cue oxib ciento millón riqˈuin laje̱b xcaˈcˈa̱l mil kilo li tumin li takamakˈ chiruheb. Tinqˈue aˈan saˈ xnaˈaj la̱ tumin, chan laj Amán.

3:10  Ut quirisi lix matkˈab li rey Asuero ut quixqˈue re laj Amán. Aˈan retalil nak quixcˈul xchˈo̱l li quixye laj Amán, li xicˈ na-iloc reheb laj judío.

3:11  Ut quixye re: —Xoc chokˈ a̱cue li tumin aˈan. Ut ba̱nu li cˈaˈru ta̱cuaj riqˈuineb li tenamit aˈan, chan li rey.

3:12  Joˈcan nak saˈ li oxlaju xbe li xbe̱n po re li chihab aˈan, queˈbokeˈ laj tzˈi̱b li nequeˈcˈanjelac chiru li rey. Ut queˈxtzˈi̱ba li chakˈrab joˈ quixye laj Amán reheb. Li chakˈrab aˈan quitakla̱c riqˈuineb chixjunileb li nequeˈtaklan saˈ li junju̱nk chi tenamit li cuanqueb rubel xtakl li rey. Ut quitakla̱c riqˈuineb laj cˈamol be. Queˈtzˈi̱bac saˈ ra̱tinoba̱leb ut joˈ nequeˈtzˈi̱bac saˈ li junju̱nk chi tenamit. Eb li hu aˈan queˈtzˈi̱ba̱c saˈ xcˈabaˈ li rey Asuero ut quiqˈueheˈ retalil lix matkˈab li rey chiruheb.

3:13  Chirix aˈan eb li hu queˈcˈameˈ saˈ li junju̱nk chi tenamit xbaneb lix takl li rey. Ut yalak bar queˈrabi lix chakˈrab li rey nak teˈcamsi̱k chixjunileb laj judío saˈ li oxlaju xbe li cablaju po Adar xcˈabaˈ. Jun xxiquic nak teˈsachekˈ ruheb laj judío. Teˈcamsi̱k li ti̱x joˈqueb ajcuiˈ li sa̱jeb, ut eb li ixk joˈqueb ajcuiˈ li cocˈal. Ut ta̱xoquekˈ chixjunil li cˈaˈru cuan reheb.

3:14  Li chakˈrab li quixqˈue li rey quitakla̱c saˈ li junju̱nk chi tenamit. Ut qui-el resil yalak bar re nak ta̱cuulak xkˈehil, ac cauresinbilakeb chixba̱nunquil li cˈaˈru quixye li rey.

3:15  Eb li hu aˈan queˈtakla̱c xbaneb lix takl li rey ut qui-el ajcuiˈ resil saˈ li tenamit Susa. Ut li rey Asuero rochben laj Amán queˈcˈojla ut queˈoc chi ucˈac chi saheb saˈ xchˈo̱l. Abanan chixjunileb li cuanqueb saˈ li tenamit Susa, queˈyotˈeˈ xchˈo̱leb ut sachso̱queb xchˈo̱l queˈcana.

Chapter 4

4:1  Nak quirabi li cˈaˈru quicˈulman, laj Mardoqueo quixpej li rakˈ xban xrahil xchˈo̱l ut quixqˈue li kˈes ru tˈicr chirix ut quixqˈue li cha chirix. Ut co̱ saˈ li tenamit. Japjo re chi ya̱bac xban xrahil xchˈo̱l.

4:2  Quicuulac saˈ li oqueba̱l re li rochoch li rey. Abanan incˈaˈ qui-oc xban nak ma̱ ani naru na-oc saˈ li rochoch li rey cui cuan li kˈes ru tˈicr chirix.

4:3  Saˈ eb li tenamit li cuanqueb rubel xcuanquil li rey Asuero quicuulac resil li chakˈrab li quixqˈue. Quicuan jun nimla rahil chˈo̱lej saˈ xya̱nkeb laj judío. Queˈayunic ut queˈya̱bac. Queˈxqˈue li kˈes ru tˈicr chirixeb ut nabaleb queˈxyocob rib saˈ cha xban xrahil xchˈo̱leb.

4:4  Eb li ixk ut eb li eunucos li nequeˈcˈanjelac chiru li reina Ester queˈxye re li cˈaˈru yo̱ laj Mardoqueo. Cˈajoˈ nak quirahoˈ xchˈo̱l lix Ester. Quixtakla li cha̱bil akˈ re laj Mardoqueo re nak ta̱risi li kˈes ru tˈicr li cuan chirix ut tixtikib rib chi cha̱bil. Abanan laj Mardoqueo incˈaˈ quiraj xcˈulbal li quixtakla li reina.

4:5  Li reina Ester quixbok laj Hatac xcomoneb laj cˈanjel chiru li rey li quiqˈueheˈ re ta̱cˈanjelak chiru xban li rey. Quixtakla aˈan riqˈuin laj Mardoqueo re nak tixpatzˈ re cˈaˈru yo̱ chixcˈulbal ut cˈaˈut nak yo̱ chixba̱nunquil chi joˈcan.

4:6  Laj Hatac co̱ chi a̱tinac riqˈuin laj Mardoqueo. Aˈan cuan saˈ li be li cuan chiru li oqueba̱l re li rochoch li rey.

4:7  Laj Mardoqueo quixserakˈi re chixjunil ut quixye ajcuiˈ re li joˈ qˈuial li tumin li quixyechiˈi laj Amán re tixqˈue saˈ lix naˈaj lix tumin li rey cui ta̱sachekˈ ruheb chixjunileb laj judío.

4:8  Quixqˈue jun li hu re, li tzˈi̱banbil cuiˈ li chakˈrab li quixqˈue li rey, li naxye nak teˈcamsi̱k chixjunileb laj judío. Quixye re nak tixkˈaxtesi li hu re lix Ester re tixnau cˈaˈru yo̱queb chixcˈulbal. Ut quixtakla ajcuiˈ xyebal re lix Ester nak ta̱xic chi a̱tinac riqˈuin li rey, ut tixtzˈa̱ma chiru li rey nak ta̱ril taxak xtokˈoba̱l ruheb laj judío, li rech tenamitil lix Ester.

4:9  Laj Hatac quisukˈi riqˈuin lix Ester ut quixserakˈi re chixjunil li quiyeheˈ re xban laj Mardoqueo.

4:10  Ut lix Ester quixtakla cuiˈchic laj Hatac riqˈuin laj Mardoqueo re nak tixye re li a̱tin aˈin:

4:11  —Chixjunileb li nequeˈcˈanjelac chiru li rey, joˈqueb ajcuiˈ li tenamit li cuanqueb rubel xcuanquil, nequeˈxnau nak li chakˈrab naxye nak ta̱camsi̱k li ani ta̱oc riqˈuin li rey chi incˈaˈ bokbil xban li rey, usta cui̱nk usta ixk. Caˈaj cuiˈ nacoleˈ cui li rey tixtaksi li xukˈ oro saˈ xbe̱n retalil nak incˈaˈ ta̱camsi̱k. Ac xnumeˈ laje̱b xcaˈcˈa̱l cutan ut la̱in toj ma̱jiˈ chic ninbokeˈ xban li rey, chan lix Ester.

4:12  Ut queˈxye re laj Mardoqueo li cˈaˈru quixye lix Ester.

4:13  Ut laj Mardoqueo quixtakla xyebal re lix Ester li a̱tin aˈin: —Ma̱cˈoxla nak tatcolekˈ la̱at yal xban nak cuancat saˈ rochoch li rey. Cui tocamsi̱k la̱o, tatcamsi̱k ajcuiˈ la̱at.

4:14  Cui ti̱c ma̱cˈaˈ nacaba̱nu la̱at anakcuan, la̱in ninnau nak cuan jun li ta̱colok reheb laj judío. Aˈut la̱at joˈqueb ajcuiˈ li ralal xcˈajol la̱ yucuaˈ texcamsi̱k. Ma̱re anchal re xtenkˈanquileb la̱ tenamit nak xatqˈueheˈ chokˈ reina, chan laj Mardoqueo.

4:15  Ut lix Ester quixtakla xyebal re laj Mardoqueo chi joˈcaˈin:

4:16  —Tatxic ut ta̱chˈutubeb chixjunileb laj judío li cuanqueb Susa. Ye reheb nak teˈayunik ut teˈtijok chicuix. Incˈaˈ teˈucˈak chi moco teˈcuaˈak chiru oxib cutan ut oxib kˈojyi̱n. Ut joˈcan ajcuiˈ tinba̱nu la̱in cuochbeneb li ixk li nequeˈcˈanjelac chicuu. Chirix aˈan la̱in tinxic chi a̱tinac riqˈuin li rey, usta tinkˈet li chakˈrab. Ut cui tincamsi̱k, chincamsi̱k, chan lix Ester.

4:17  Ut laj Mardoqueo co̱ ut quixba̱nu chixjunil li quiyeheˈ re xban lix Ester.

Chapter 5

5:1  Nak ac xnumeˈ li oxib cutan, lix Ester quixtikib rib chi cha̱bil joˈ xcˈulub xban nak aˈan li reina. Qui-oc saˈ li rochoch li rey ut quixakli saˈ li oqueba̱l re li naˈajej chunchu cuiˈ li rey saˈ lix cˈojariba̱l. Lix cˈojariba̱l na-iloc bar cuan cuiˈ li puerta.

5:2  Li rey quisahoˈ xchˈo̱l chirilbal li reina Ester xakxo aran chire li oqueba̱l ut quixtaksi lix xukˈ oro. Ut lix Ester quinachˈoc riqˈuin ut quixchˈeˈ li ruˈuj lix xukˈ li rey.

5:3  Li rey Asuero quixpatzˈ re: —¿Cˈaˈru xacˈul, at reina Ester? Ye cue cˈaˈru ta̱cuaj ut la̱in tinqˈue a̱cue. Usta yijach lin biomal ta̱patzˈ cue, la̱in tinqˈue a̱cue, chan.

5:4  Ut lix Ester quichakˈoc ut quixye re: —Cui tixcˈul a̱chˈo̱l, at rey, nintzˈa̱ma cha̱cuu nak tatxic ho̱n a̱cuochben laj Amán saˈ li ninkˈe li xincˈu̱b chokˈ a̱cue.—

5:5  Li rey quixye reheb laj cˈanjel chiru: —Bokomak chak saˈ junpa̱t laj Amán ut takaba̱nu li cˈaˈru naraj li reina Ester, chan. Joˈcan nak li rey rochben laj Amán queˈco̱eb saˈ li ninkˈe li quixba̱nu lix Ester.

5:6  Nak yo̱queb chi ucˈac vino, li rey quixye re lix Ester: —Tzˈa̱ma chicuu li cˈaˈru ta̱cuaj. La̱in tinqˈue a̱cue. Ye cue cˈaˈru ta̱cuaj. Usta yijach lin biomal ta̱tzˈa̱ma, la̱in tinqˈue a̱cue, chan li rey.

5:7  Ut lix Ester quichakˈoc ut quixye re: —Li cˈaˈru nacuaj, aˈan aˈin:

5:8  Cui la̱at ta̱cuaj xba̱nunquil li cˈaˈru tintzˈa̱ma cha̱cuu ut cui la̱at ta̱cuaj xba̱nunquil usilal cue, tatcha̱lk raj cuiˈchic cuulaj a̱cuochben laj Amán saˈ li ninkˈe li tinba̱nu chokˈ e̱re. Ut cuulaj la̱in tinsume li cˈaˈru xapatzˈ cue, at rey, chan lix Ester.

5:9  Laj Amán qui-el saˈ li ninkˈe chi sa saˈ xchˈo̱l. Abanan cˈajoˈ nak quijoskˈoˈ nak quiril laj Mardoqueo saˈ li oqueba̱l re li rochoch li rey xban nak incˈaˈ quixcuikˈib rib chiru chi moco qui-ecˈan saˈ xnaˈaj nak quinumeˈ.

5:10  Laj Amán incˈaˈ quixcˈut lix joskˈil chiru laj Mardoqueo. Nak quicuulac saˈ li rochoch quixtakla xbokbaleb li rami̱g joˈ ajcuiˈ lix Zeres li rixakil.

5:11  Laj Amán qui-oc chixserakˈinquil reheb chixjunil lix biomal. Quixye reheb nak nabaleb li ralal xcˈajol ut nak sicˈbil ru xban li rey. Ut quixye chanru nak quiqˈueheˈ xlokˈal chiruheb chixjunileb ut quiqˈueheˈ xcuanquil saˈ xbe̱neb chixjunileb li nequeˈcˈanjelac chiru li rey.

5:12  Ut quixye reheb: —Caˈaj cuiˈ la̱in xinixbok saˈ li ninkˈe li quixcˈu̱b li reina chokˈ re li rey. Ut xinixbok ajcuiˈ chirochbeninquil li rey saˈ li ninkˈe li tixba̱nu cuulaj.

5:13  Abanan chixjunil aˈan ma̱cˈaˈ na-oc cuiˈ chicuu nak nacuil nak chunchu laj Mardoqueo laj judío chire li oqueba̱l re li rochoch li rey, chan laj Amán.

5:14  Ut lix Zeres li rixakil joˈqueb ajcuiˈ li rami̱g queˈxye re: —Takla xyi̱banquil junak li naˈajej cuib xcaˈcˈa̱l (22) metro xteram ut ta̱yi̱b li cˈa̱m re xyatzˈbal laj Mardoqueo. Ut ekˈela cuulaj ta̱tzˈa̱ma chiru li rey nak tixtakla xyatzˈbal laj Mardoqueo re nak naru tatxic saˈ li ninkˈe a̱cuochben li rey chi ma̱cˈaˈ a̱cˈaˈux, chanqueb. Ut quisahoˈ xchˈo̱l laj Amán riqˈuin li naˈleb aˈan ut quixtakla xyi̱banquil li naˈajej re xyatzˈbal laj Mardoqueo.

Chapter 6

6:1  Saˈ li kˈojyi̱n aˈan nak incˈaˈ quicube xcuara li rey, quixtakla xcˈambal chak li hu li tzˈi̱banbil cuiˈ retalil chixjunil li ac quilajcˈulman, ut queˈoc chirilbal xsaˈ li hu aˈan chiru.

6:2  Saˈ li hu aˈan queˈxtau retalil chanru nak laj Mardoqueo quixye resil nak laj Bigtán ut laj Teres queˈraj xcamsinquil li rey Asuero. Li cuib chi cui̱nk aˈan xcomoneb li queˈcˈacˈalen re li oqueba̱l re li rochoch li rey.

6:3  Li rey quixpatzˈ reheb li yo̱queb chi cˈanjelac chiru: —¿Cˈaˈru xkaqˈue re laj Mardoqueo? ¿Ma xkaqˈue xkˈajca̱munquil li usilal xba̱nu cue? chan. Eb li nequeˈcˈanjelac chiru queˈxye: —Ma̱cˈaˈ quiqˈueheˈ re, chanqueb.

6:4  Saˈ ajcuiˈ li ho̱nal aˈan laj Amán qui-oc saˈ li neba̱l cuan cuiˈ lix naˈaj li rey. Quiraj xtzˈa̱manquil chiru li rey nak tixqˈue chi yatzˈecˈ laj Mardoqueo saˈ li naˈajej li quixqˈue chi yi̱ba̱c laj Amán. Li rey quixpatzˈ: —¿Ani yo̱ chi be̱c saˈ li neba̱l? chan.

6:5  —Aˈan laj Amán, chanqueb li nequeˈcˈanjelac chiru li rey. Ut li rey quixye: —Ocsimak chak, chan.

6:6  Ut laj Amán qui-oc cuan cuiˈ li rey ut li rey quixpatzˈ re: —¿Cˈaˈru us tinba̱nu re junak li cui̱nk li nacuaj xqˈuebal xlokˈal? chan. Saˈ xchˈo̱l laj Amán nak aˈan li ta̱qˈuehekˈ xlokˈal. Quixye saˈ xchˈo̱l: —¿Ani ta chic tixqˈue xlokˈal? Caˈaj cuiˈ la̱in, chan.

6:7  Joˈcan nak laj Amán quixye re li rey: —Cui ta̱qˈue xlokˈal li cui̱nk aˈan, at rey,

6:8  ta̱cˈamekˈ chak li cha̱bil akˈ xcomon li nacaqˈue cha̱cuix, at rey. Ut ta̱cˈamekˈ ajcuiˈ chak li cacua̱y li nacatbe̱c cuiˈ la̱at ut ta̱qˈuehekˈ lix corona li cacua̱y saˈ xjolom li narocsi nak nacatbe̱c chirix la̱at.

6:9  Ut ta̱kˈaxtesi li rakˈ ut li corona re junak li nim xcuanquil li nacˈanjelac cha̱cuu. Ut aˈan ta̱qˈuehok re chirix li cui̱nk li ta̱qˈue xlokˈal. Ut laj cˈanjel cha̱cuu tixberesi li cacua̱y saˈ eb li be ut tixjap re chixyebal: —Joˈcaˈin naxba̱nu li rey re li ani ta̱raj xqˈuebal xlokˈal, chan.

6:10  Ut li rey quixye re laj Amán: —Se̱ba a̱cuib. Cˈam li cuakˈ aˈin ut cˈam li cacua̱y ut ba̱nu joˈ xaye. Ba̱nu aˈan re laj Mardoqueo laj judío li chunchu aran saˈ li oqueba̱l re li cuochoch. Ba̱nu chixjunil li xaye, chan li rey.

6:11  Laj Amán quixcˈam li rakˈ li rey riqˈuin laj Mardoqueo ut quixcˈam ajcuiˈ li cacua̱y. Quixqˈue li rakˈ chirix laj Mardoqueo. Ut nak cuan chirix li cacua̱y laj Mardoqueo, laj Amán quixberesi li cacua̱y saˈ eb li be ut quixjap re chixyebal: —Joˈcaˈin naxba̱nu li rey re li ani naraj xqˈuebal xlokˈal, chan.

6:12  Nak quisukˈi chak laj Mardoqueo chi be̱c co̱ cuiˈchic saˈ li oqueba̱l re li rochoch li rey. Ut laj Amán quixxulub xjolom xban xxuta̱n ut co̱ saˈ junpa̱t saˈ rochoch chi ra saˈ xchˈo̱l.

6:13  Nak quicuulac saˈ rochoch, quixserakˈi chixjunil li quixcˈul re lix Zeres li rixakil ut reheb ajcuiˈ li rami̱g li nequeˈqˈuehoc xnaˈleb. Ut eb aˈan queˈxye re: —Xatiquib xsachbal la̱ cuanquil chiru laj Mardoqueo. Xban nak aˈan aj judío la̱at incˈaˈ naru tatnumta̱k saˈ xbe̱n. Aˈan ban ta̱numta̱k saˈ a̱be̱n la̱at, chanqueb.

6:14  Ma̱jiˈ ajcuiˈ nequeˈrakeˈ chi a̱tinac nak queˈcuulac li eunucos li nequeˈcˈanjelac chiru li rey chixcˈambal laj Amán saˈ junpa̱t saˈ li ninkˈe li quixcˈu̱b lix Ester.

Chapter 7

7:1  Li rey Asuero rochben laj Amán co̱eb saˈ li ninkˈe li quixba̱nu lix Ester.

7:2  Ut nak ac cuanqueb saˈ li ninkˈe yo̱queb chi ucˈac vino ut li rey quixye cuiˈchic re lix Ester: —Ye cue cˈaˈru ta̱cuaj ut la̱in tinqˈue a̱cue usta yijach lin biomal ta̱patzˈ cue, chan.

7:3  Ut li reina Ester quixye re: —At rey, cui la̱at ta̱cuaj xba̱nunquil usilal cue, caˈaj cuiˈ tintzˈa̱ma cha̱cuu nak incˈaˈ taxak tincamsi̱k la̱in ut incˈaˈ taxak teˈcamsi̱k li cuech tenamitil, chan.

7:4  —La̱in ut eb li cuech tenamitil, xokˈaxtesi̱c re camsi̱c. Ta̱sachekˈ ku chi junaj cua. Cui ta xoxkˈaxtesi̱c chokˈ cˈayinbil mo̱s, ma̱cˈaˈ raj tinye. Incˈaˈ raj xatinchˈiˈchˈiˈi. Aban cui la̱o tocamsi̱k, ta̱cha̱lk jun nimla chˈaˈajquilal saˈ a̱be̱n la̱at, at rey, chan lix Ester.

7:5  Ut li rey Asuero quixpatzˈ re: —¿Ani xcˈoxlan re xba̱nunquil li ma̱usilal aˈan? ¿Bar cuan li cui̱nk aˈan? chan.

7:6  Ut lix Ester quixye re: —Li xicˈ na-iloc ke li naraj xba̱nunquil raylal ke, aˈan ajcuiˈ laj Amán li cuan arin, li incˈaˈ us xnaˈleb, chan. Nak quirabi li cˈaˈru quixye, cˈajoˈ nak quixucuac laj Amán chiru li rey ut chiru li reina.

7:7  Cˈajoˈ nak quijoskˈoˈ li rey. Quicuacli saˈ junpa̱t ut co̱ chirix cab bar aubil cuiˈ li utzˈuˈuj. Laj Amán quicana aran chixtzˈa̱manquil chiru lix Ester nak incˈaˈ ta̱camsi̱k xban nak ac naxnau nak ta̱takla̱k xcamsinquil xban li rey.

7:8  Xban nak cˈajoˈ lix xiu laj Amán, quitˈaneˈ chi rok lix Ester. Nak quisukˈi saˈ cab li rey, quiril nak laj Amán quitˈaneˈ saˈ li cˈojariba̱l bar yo̱ cuiˈ chi hila̱nc lix Ester. Li rey quixjap re ut quixye: —¿Ma yo̱cat ajcuiˈ xcˈoxlanquil xba̱nunquil li incˈaˈ us re li reina chicuu arin saˈ li cuochoch? chan. Toj yo̱ ajcuiˈ xyebal aˈan li rey nak queˈxchap laj Amán ut queˈxtzˈap li ru.

7:9  Ut laj Harbona, jun reheb li eunucos li nequeˈcˈanjelac chiru li rey quixye: —Saˈ rochoch laj Amán cuan li cheˈ cuib xcaˈcˈa̱l metro xteram li quixqˈue chi yi̱ba̱c laj Amán. Ac cuan aran li cˈa̱m li quixqˈue re xyatzˈbal laj Mardoqueo, li cui̱nk li quiyehoc re nak queˈraj a̱camsinquil, at rey, chan. Ut li rey quixye reheb: —Cˈamomak laj Amán ut aran te̱yatzˈ, chan.

7:10  Joˈcan nak laj Amán quiyatzˈeˈ saˈ li cˈa̱m li quixqˈue chi yi̱ba̱c re xyatzˈbal laj Mardoqueo. Ut nak ac xcam laj Amán, quicube xjoskˈil li rey.

Chapter 8

8:1  Saˈ ajcuiˈ li cutan aˈan li rey quixkˈaxtesi re lix Ester li rochoch laj Amán, li xicˈ qui-iloc reheb laj judío. Laj Mardoqueo quicuulac riqˈuin li rey xban nak lix Ester quixye re li rey nak aˈan rechˈalal.

8:2  Ut li rey quirisi chi ruˈuj rukˈ lix matkˈab li quixmakˈ chiru laj Amán ut quixqˈue re laj Mardoqueo. Ut lix Ester quixxakab laj Mardoqueo re nak aˈan chic ta̱ilok re chixjunil li cˈaˈru quicuan chokˈ re laj Amán.

8:3  Lix Ester quia̱tinac cuiˈchic riqˈuin li rey. Ta̱ya̱bak nak quixcut rib chi rok li rey ut quixye: —Ta̱sach taxak xcuanquil li chakˈrab li quixqˈue laj Amán xban xma̱usilal. Incˈaˈ taxak ta̱uxma̱nk li raylal li quixcˈoxla xba̱nunquil reheb laj judío, chan lix Ester.

8:4  Li rey quixtaksi lix xukˈ oro ut lix Ester quicuacli ut quixxakab rib chiru li rey.

8:5  Ut quixye re: —At rey, cui la̱at ta̱cuaj xba̱nunquil usilal cue, ut cui nacacˈoxla nak us xba̱nunquil ut cui niquina̱ra, ta̱qˈue taxak junak li chakˈrab li tixsach xcuanquil li hu li quixtakla laj Amán li ralal laj Hamedata aj agagueo re xcamsinquil chixjunileb laj judío yalak bar cuanqueb saˈ eb li tenamit li cuanqueb rubel la̱ cuanquil.

8:6  ¿Chanru nak tincuy rilbal li raylal li teˈraj xba̱nunquil reheb li cuech tenamitil? La̱in incˈaˈ tincuy cui teˈcamsi̱k li cuechˈalal, chan lix Ester.

8:7  Li rey Asuero quichakˈoc ut quixye re li reina Ester ut re ajcuiˈ laj Mardoqueo laj judío: —Xban nak laj Amán quiraj xsachbaleb ru laj judío, la̱in xintakla xyatzˈbal ut xinqˈue re lix Ester chixjunil li cˈaˈru re laj Amán.

8:8  Anakcuan te̱tzˈi̱ba jun chic li hu saˈ incˈabaˈ la̱in ut te̱tzˈi̱ba li cˈaˈru te̱raj re xtenkˈanquileb laj judío. Ut te̱qˈue retalil lin matkˈab chiru xban nak cui tzˈi̱banbil saˈ incˈabaˈ, ut cui cuan retalil li matkˈab chiru, incˈaˈ naru xjalbal ru li cˈaˈru tzˈi̱banbil, chan li rey.

8:9  Saˈ junpa̱t queˈbokeˈ laj tzˈi̱b li nequeˈcˈanjelac chiru li rey saˈ li oxib xcaˈcˈa̱l xbe li rox po Siván xcˈabaˈ. Ut queˈxtzˈi̱ba chixjunil li quixye laj Mardoqueo. Li hu quicuulac saˈ li jun ciento riqˈuin cuukub xcaˈcˈa̱l chi tenamit li cuanqueb rubel xcuanquil li rey saˈ li tenamit La India, toj saˈ li tenamit Etiopía. Li hu quicuulac riqˈuineb laj judío ut riqˈuineb li cuanqueb xcuanquil ut riqˈuineb ajcuiˈ li nequeˈtaklan saˈ xbe̱neb li soldado. Li hu quitzˈi̱ba̱c saˈ li ra̱tinoba̱leb ut joˈ nequeˈtzˈi̱bac saˈ li junju̱nk chi tenamit. Ut quitzˈi̱ba̱c ajcuiˈ li hu saˈ li ra̱tinoba̱leb laj judío ut joˈ nequeˈtzˈi̱bac eb aˈan.

8:10  Laj Mardoqueo quixtzˈi̱ba li hu saˈ xcˈabaˈ li rey ut quixqˈue retalil lix matkˈab li rey chiruheb li hu. Quixtaklaheb li cui̱nk chixcanabanquileb li hu. Queˈco̱eb chirixeb lix cacua̱y li rey, li kˈaxal cau nequeˈa̱linac.

8:11  Saˈ li hu li quixtakla li rey quiyeheˈ reheb laj judío nak teˈxchˈutub ribeb saˈ li junju̱nk chi tenamit cuanqueb cuiˈ, ut teˈpletik re xcolbaleb rib chiruheb li xicˈ nequeˈiloc reheb. Ta̱ru̱k teˈxcamsiheb ut teˈxsach ruheb yalak ani li teˈcha̱lk chi camsi̱nc reheb aˈ yal bar xtenamiteb, usta cui̱nk, usta ixk, usta cocˈal. Ut teˈxxoc li cˈaˈru cuan reheb, chan li rey saˈ li hu.

8:12  Chixjunil aˈin teˈxba̱nu chiru jun cutan, saˈ li oxlaju xbe li po Adar. Aˈan lix cablaju po re li chihab.

8:13  Ut li hu aˈin li quixtakla li rey quicana joˈ chakˈrab ut qui-el resilal saˈ chixjunileb li tenamit re nak ac cauresinbilakeb laj judío chi numta̱c saˈ xbe̱neb li xicˈ nequeˈiloc reheb nak ta̱cuulak xkˈehil li ac yebil resil.

8:14  Eb lix takl li rey queˈco̱eb saˈ junpa̱t chirixeb lix cacua̱y li rey, li kˈaxal cau nequeˈa̱linac, joˈ quiyeheˈ reheb xban li rey. Ut qui-el ajcuiˈ resilal li hu saˈ li tenamit Suza bar cuan cuiˈ li rey.

8:15  Nak laj Mardoqueo qui-el riqˈuin li rey cuan chirix li cha̱bil akˈ joˈ narocsi li rey, rax ut sak. Cuan saˈ xjolom jun nimla corona oro. Ut cuan li tˈicr saˈ xbe̱n li rakˈ. Li tˈicr aˈan yi̱banbil riqˈuin cha̱bil tˈicr lino morado. Nak queˈril laj Mardoqueo, cˈajoˈ nak queˈsahoˈ xchˈo̱l li cuanqueb saˈ li tenamit Suza.

8:16  Ut eb laj judío queˈsahoˈ xchˈo̱l ut queˈqˈueheˈ xlokˈal.

8:17  Saˈ li junju̱nk chi tenamit li quitakla̱c cuiˈ li chakˈrab li quixqˈue li rey, cˈajoˈ nak quisahoˈ saˈ xchˈo̱leb laj judío ut queˈninkˈei̱c xban nak aˈan jun nimla cutan chokˈ reheb. Ut nabaleb li ma̱cuaˈeb aj judío queˈoc saˈ xya̱nkeb xban nak qui-oc xxiuheb xbaneb laj judío.

Chapter 9

9:1  Li oxlaju xbe li cablaju po Adar, aˈan li cutan xxakabanbil xban li rey nak teˈsachekˈ ruheb laj judío, ut aˈan ajcuiˈ li cutan li yo̱queb chiroybeninquil li xicˈ nequeˈiloc reheb laj judío re nak teˈnumta̱k saˈ xbe̱neb. Abanan incˈaˈ queˈnumta saˈ xbe̱neb laj judío. Laj judío ban queˈnumta saˈ xbe̱neb li xicˈ nequeˈiloc reheb.

9:2  Ut saˈ eb li tenamit li cuanqueb rubel xcuanquil li rey Asuero, eb laj judío queˈxchˈutub ribeb chi pletic riqˈuineb li queˈajoc xsachbal ruheb. Ut ma̱ jun quiru xcolbal rib chiruheb laj judío xban nak qui-oc xxiuheb chiruheb.

9:3  Chixjunileb li cuanqueb xcuanquil ut eb li nequeˈtaklan saˈ eb li tenamit, joˈqueb ajcuiˈ li nequeˈtaklan saˈ xbe̱neb li soldado, queˈxtenkˈaheb laj judío xban nak queˈxucuac chiru laj Mardoqueo.

9:4  Queˈxucuac xban nak laj Mardoqueo nim xcuanquil saˈ li rochoch li rey ut naˈno ru yalak bar saˈ eb li tenamit li cuanqueb rubel xcuanquil li rey. Ut rajlal yo̱ chi nima̱nc lix cuanquil li quiqˈueheˈ re.

9:5  Ut eb laj judío queˈxcamsiheb chi chˈi̱chˈ chixjunileb li xicˈ nequeˈiloc reheb. Queˈxba̱nu reheb li cˈaˈru queˈraj.

9:6  Saˈ li tenamit Suza bar cuan cuiˈ li rey queˈxcamsi o̱b ciento chi cui̱nk.

9:7  Ut queˈcamsi̱c li laje̱b chi cui̱nk ralaleb laj Amán. Aˈaneb aˈin lix cˈabaˈeb: laj Parsandata, laj Dalfón, ut laj Aspata,

9:8  laj Porata, laj Adalía, ut laj Aridata,

9:9  laj Parmasta, laj Arisai, laj Aridai ut laj Vaizata.

9:10  Aˈaneb li laje̱b chi ralal laj Amán li ralal laj Hamedata, li xicˈ queˈiloc reheb laj judío. Eb laj judío queˈxcamsiheb, abanan incˈaˈ queˈxcˈam li cˈaˈru cuan reheb.

9:11  Saˈ ajcuiˈ li cutan aˈan quicuulac resil riqˈuin li rey joˈ qˈuial li queˈcamsi̱c aran Suza, li tenamit cuan cuiˈ li rey.

9:12  Ut li rey quixye re lix Ester: —Arin Suza queˈcamsi̱c o̱b ciento li cui̱nk xbaneb laj judío. Ut queˈcamsi̱c li laje̱b chi ralal laj Amán. ¿Ani ta cuiˈ ta̱naˈok re chanru xcˈulman saˈ eb li junju̱nk chi tenamit li cuanqueb rubel incuanquil? Ye cue cˈaˈ chic ru ta̱cuaj anakcuan, ut la̱in tinqˈue a̱cue. Ye cue cˈaˈru ta̱cuaj, ut ta̱uxma̱nk joˈ ta̱cuaj, chan li rey.

9:13  Lix Ester quichakˈoc ut quixye: —Eb laj judío xeˈxba̱nu anakcuan joˈ tzˈi̱banbil saˈ li chakˈrab li xaqˈue reheb. Cui la̱at ta̱cuaj, ta̱takla xyebal reheb laj judío li cuanqueb arin Suza nak ta̱ru̱k teˈxba̱nu ajcuiˈ cuulaj joˈ xeˈxba̱nu anakcuan. Ut nacuaj ajcuiˈ nak teˈtˈuyuba̱k riqˈuin cˈa̱m chiruheb li tenamit li laje̱b chi camenak li ralal laj Amán, chan.

9:14  Li rey quixtakla xyebal nak ta̱uxma̱nk joˈ quixye lix Ester. Ut qui-el resil saˈ li tenamit Suza. Ut eb li laje̱b chi ralal laj Amán, li queˈcamsi̱c queˈtˈuyuba̱c aran Suza chiruheb li tenamit.

9:15  Eb laj judío li cuanqueb Suza queˈxchˈutub cuiˈchic rib saˈ li ca̱laju xbe li po Adar. Ut queˈxcamsi oxib ciento chic li cui̱nk, abanan incˈaˈ queˈxchˈeˈ li cˈaˈru cuan reheb.

9:16  Ut eb laj judío li cuanqueb saˈ eb li tenamit li cuanqueb rubel xcuanquil li rey queˈxchˈutub ribeb re xcolbaleb rib chiruheb li xicˈ nequeˈiloc reheb. Queˈxcamsi oˈlaju xca̱cˈa̱l mil (75,000) chi cui̱nk abanan incˈaˈ queˈxchˈeˈ li cˈaˈru cuan reheb.

9:17  Aˈin quicˈulman saˈ li oxlaju xbe li po Adar. Ut saˈ li ca̱laju xbe li po Adar queˈhilan ut queˈninkˈei̱c xban xsahil xchˈo̱leb.

9:18  Aˈut eb laj judío li cuanqueb Suza queˈxchˈutub ribeb re xcolbaleb rib saˈ li oxlaju ut saˈ li ca̱laju xbe li po. Ut saˈ li oˈlaju xbe li po queˈhilan ut queˈninkˈei̱c xban xsahil xchˈo̱leb.

9:19  Joˈcan nak eb laj judío li cuanqueb saˈ eb li cˈaleba̱l li incˈaˈ sutsu xnaˈajeb saˈ tzˈac, nequeˈxninkˈei li ca̱laju xbe li po Adar re xjulticanquil chanru nak queˈcoleˈ. Nequeˈsahoˈ saˈ xchˈo̱leb ut nequeˈxqˈue xma̱taneb chi ribileb rib.

9:20  Ut laj Mardoqueo quixtzˈi̱ba retalil li cˈaˈru quicˈulman ut quixtakla li hu reheb laj judío li cuanqueb saˈ eb li tenamit li cuanqueb rubel xcuanquil li rey Asuero, li cuanqueb chi nachˈ joˈ ajcuiˈ li cuanqueb chi najt.

9:21  Quixye reheb nak teˈxninkˈei ru li cutan li ca̱laju ut li oˈlaju xbe li po Adar. Teˈxninkˈei rajlal chihab, chan.

9:22  Teˈxninkˈei ru li cutan aˈan xban nak aˈan li cutan queˈcoleˈ cuiˈ chiruheb li xicˈ queˈiloc reheb. Ut saˈ li po aˈan quisukˈi chokˈ sahil chˈo̱lej li rahil chˈo̱lej li cuanqueb cuiˈ. Teˈxninkˈei ruheb li cutan aˈan ut teˈxqˈue xma̱taneb chi ribileb rib ut teˈxqˈue xma̱taneb li nebaˈ.

9:23  Ut eb laj judío queˈcˈay chixba̱nunquil joˈ queˈyeheˈ reheb xban laj Mardoqueo saˈ li hu li quixtakla reheb.

9:24  Teˈxninkˈei rajlal re xjulticanquil chanru nak laj Amán li ralal laj Hamedata laj agagueo, li xicˈ qui-iloc reheb laj judío quixcˈu̱b ru chanru nak xsacheb raj ru laj judío ut queˈbu̱lic re xxakabanquil lix cutanquil. Li bu̱lic “Pur” xcˈabaˈ saˈ ra̱tinoba̱leb.

9:25  Abanan lix Ester quia̱tinac riqˈuin li rey. Ut li rey quixqˈue li chakˈrab nak chixjunil li raylal li quixcˈoxla xba̱nunquil reheb laj judío ta̱tˈanekˈ saˈ xbe̱n laj Amán. Ut quixtakla xyatzˈbal laj Amán joˈ ajcuiˈ li laje̱b chi ralal.

9:26  Joˈcan nak Purim nayeman reheb li cutan li nequeˈxninkˈei ru. Li cˈabaˈej aˈan isinbil riqˈuin li a̱tin “pur”. Li a̱tin “pur” naraj naxye “suerte”. Xban li cˈaˈru tzˈi̱banbil saˈ li hu ut xban li cˈaˈru quicˈulman, li cˈaˈru queˈril ut li cˈaˈru queˈrabi resil,

9:27  chixjunileb laj judío queˈxye nak teˈxba̱nu li ninkˈe aˈin rajlal chihab. Ut queˈxcˈaytesi ajcuiˈ li ralal xcˈajoleb xninkˈeinquil li cutan aˈan. Ut queˈxye nak li joˈ qˈuialeb li queˈoc saˈ xya̱nkeb laj judío teˈxninkˈei ajcuiˈ li cutan aˈan. Junelic teˈxninkˈei ru li cuib chi cutan aˈan rajlal chihab.

9:28  Saˈ eb li tenamit li cua̱nkeb cuiˈ laj judío rajlal chihab teˈxba̱nu li ninkˈe Purim joˈqueb ajcuiˈ li ralal xcˈajol li teˈcua̱nk mokon. Incˈaˈ teˈxcanab xba̱nunquil li ninkˈe Purim re nak incˈaˈ ta̱sachk saˈ xchˈo̱leb laj judío li cˈaˈru quicˈulman.

9:29  Ut li reina Ester, lix rabin laj Abihail, rochben laj Mardoqueo laj judío, queˈxtzˈi̱ba jun chic li hu. Ut queˈxye nak tento xba̱nunquil li ninkˈe Purim. Ut xban nak cuanqueb xcuanquil chi takla̱nc, tento nak ta̱uxma̱nk li cˈaˈru queˈxtzˈi̱ba saˈ li hu.

9:30  Ut queˈxtakla li hu reheb chixjunileb laj judío li cuanqueb saˈ li jun ciento riqˈuin cuukub xcaˈcˈa̱l chi tenamit li cuanqueb rubel xcuanquil li rey Asuero. Ut queˈxtakla xsahil xchˈo̱leb ut queˈxqˈue xcacuil xchˈo̱leb.

9:31  Ut queˈxqˈue li chakˈrab nak rajlal teˈxba̱nu li ninkˈe Purim. Teˈxba̱nu joˈ quixye laj Mardoqueo laj judío, ut joˈ quixye li reina Ester. Eb laj judío ac queˈxcˈu̱b ru nak teˈxba̱nu aˈin ut nak teˈxcˈut chiruheb li ralal xcˈajol li teˈcua̱nk mokon re xjulticanquil chanru nak queˈayunic nak queˈxcˈul li raylal.

9:32  Li chakˈrab li quixqˈue lix Ester quixqˈue xcuanquil li ninkˈe Purim ut quitzˈi̱ba̱c retalil saˈ li hu.

Chapter 10

10:1  Li rey Asuero quixtitzˈ xtojeb chixjunileb li cuanqueb rubel xcuanquil. Quixtitzˈ xtojeb li junju̱nk chi tenamit joˈqueb ajcuiˈ li naˈajej li sutsu̱queb xban li palau.

10:2  Tzˈi̱banbil retalil chixjunil li quixba̱nu li rey Asuero riqˈuin xnimal xcuanquil. Ut tzˈi̱banbil ajcuiˈ retalil li cuanquil li quixqˈue re laj Mardoqueo. Chixjunil aˈin tzˈi̱banbil saˈ li hu natzˈi̱ba̱c cuiˈ chixjunil li quilajeˈxba̱nu lix reyeb laj Media ut eb laj Persia.

10:3  Nim li cuanquil li quiqˈueheˈ re laj Mardoqueo. Caˈaj cuiˈ li rey Asuero nakˈaxoc re lix cuanquil. Nim xcuanquil laj Mardoqueo saˈ xya̱nkeb laj judío. Quiqˈueheˈ xlokˈal xbaneb chixjunileb li rech tenamitil xban nak quixsicˈ li us chokˈ reheb ut quixtenkˈaheb chi cua̱nc saˈ tuktu̱quil usilal.