ABPGRK - Esther

Chapter 1

1:1  και εγένετο εν ταις ημέραις Αρταξέρξου ούτος ο Αρταξέρξης από της Ινδικής εκατόν εικοσιεπτά χωρών εκράτησεν

1:2  εν δε ταύταις ταις ημέραις ότε ενεθρονίσθη βασιλεύς Αρταξέρξης εν Σούσοις τη πόλει

1:3  εν τω τρίτω έτει βασιλεύοντος αυτού δοχήν εποίησε τοις φίλοις και τοις λοιποίς έθνεσι και τοις Περσών και Μήδων ενδόξοις και τοις άρχουσι των σατραπών

1:4  και μετά ταύτα μετά το δείξαι αυτοίς τον πλούτον της βασιλείας αυτού και την δόξαν της ευφροσύνης αυτού επί ημέρας εκατόν ογδοήκοντα

1:5  ότε δε ανεπληρώθησαν αι ημέραι του γάμου εποίησεν ο βασιλεύς πότον τοις έθνεσι τοις ευρεθείσιν εις την πόλιν επί ημέρας εξ εν αυλή του οίκου του βασιλέως

1:6  κεκοσμημένη βυσσίνοις και καρπασίνοις τεταμένοις επί σχοινίοις βυσσίνοις και πορφυροίς επί κύβοις χρυσοίς και αργυροίς επί στύλοις Παρίνοις και λιθίνοις κλίναι χρυσαί και αργυραί επί λιθοστρώτου σμαραγδίτου λίθου και πινίνου και Παρίνου λίθου και στρωμναί διαφανείς ποικίλως διηνθισμέναι

1:7  ποτήρια χρυσά και αργυρά οίνος πολύς και ηδύς ον αυτός ο βασιλεύς έπινεν

1:8  ο δε πότος ούτος ου κατά προκείμενον νόμον εγένετο ούτως δε ηθέλησεν ο βασιλεύς και επέταξε τοις οικονόμοις ποιήσαι το θέλημα αυτού και των ανθρώπων

1:9  και Αστί η βασίλισσα εποίησε πότον ταις γυναιξίν εν τοις βασιλείοις όπου ο βασιλεύς Αρταξέρξης

1:10  εν δε τη ημέρα τη εβδόμη ηδέως γενόμενος ο βασιλεύς είπε τω Αμάν και Βαζαθά και Χαρβωνά και Βαγαθά και Αβαγαθά και Ζηθάρ και Χαραβάς τοις επτά ευνούχοις του βασιλέως Αρταξέρξου

1:11  εισαγαγείν την βασίλισσαν προς αυτόν βασιλεύειν αυτήν και περιθείναι αυτή το διάδημα και δείξαι αυτήν πάσι τοις άρχουσι και τοις έθνεσι το κάλλος αυτής ότι καλή ην

1:12  και ουκ εισήκουσεν αυτού Αστί η βασίλισσα ελθείν μετά των ευνούχων και ελυπήθη ο βασιλεύς και ωργίσθη

1:13  και είπε τοις φίλοις αυτού κατά ταύτα ελάλησεν Αστί ποιήσατε ουν περί τούτου νόμον και κρίσιν

1:14  και προσήλθεν αυτώ Καρσενά και Σηθάρ και Αδμαθά και Θαρσίς και Μέρες και Μαρσενά και Μεμουχάν επτά άρχοντες Περσών και Μήδων οι εγγύς του βασιλέως οι πρώτοι παρακαθήμενοι τω βασιλεί

1:15  και απήγγειλαν αυτώ κατά τους νόμους ως δει ποιήσαι Αστί τη βασίλισση ότι ουκ εποίησε τα υπό του βασιλέως προσταχθέντα διά των ευνούχων

1:16  και είπεν ο Μεμουχάν προς τον βασιλέα και προς τους άρχοντας ου τον βασιλέα μόνον ηδίκησεν Αστί η βασίλισσα αλλά και πάντας τους άρχοντας και τους ηγουμένους του βασιλέως

1:17  και γαρ διηγήσατο αυτοίς τα ρήματα της βασιλίσσης και ως αν αντείπε τω βασιλεί ως ουν αντείπε τω βασιλεί Αρταξέρξη

1:18  ούτω σήμερον αι τυραννίδες αι λοιπαί των αρχόντων Περσών και Μήδων ακούσασαι τα τω βασιλεί λεχθέντα υπ΄ αυτής τολμήσουσιν ομοίως ατιμάσαι τους άνδρας αυτών

1:19  ει ουν δοκεί τω βασιλεί προσταξάτω βασιλικόν και γραφήτω κατά τους νόμους Μήδων και Περσών και μη άλλως χρησάσθω μηδέ εισελθέτω έτι η βασίλισσα προς αυτόν και την βασιλείαν αυτής δότω ο βασιλεύς γυναικί κρείττονι αυτής

1:20  και ακουσθήτω ο νόμος ο υπό του βασιλέως ον αν ποιή εν τη βασιλεία αυτού και ούτως πάσαι αι γυναίκες περιθήσουσι τιμήν τοις ανδράσιν εαυτών από πτωχού έως πλουσίου

1:21  και ήρεσεν ο λόγος τω βασιλεί και τοις άρχουσι και εποίησεν ο βασιλεύς καθά ελάλησεν ο Μεμουχά

1:22  και απέστειλεν εις πάσαν την βασιλείαν κατά χώραν κατά την λέξιν αυτών ώστε είναι φόβον αυτοίς εν ταις οικίαις αυτών

Chapter 2

2:1  και μετά τους λόγους τούτους εκόπασεν ο βασιλεύς του θυμού και ουκέτι εμνήσθη της Αστί μνημονεύων όσα ελάλησε και ως κατέκρινεν αυτήν

2:2  και είπον οι διάκονοι του βασιλέως ζητηθήτω τω βασιλεί κοράσια άφθορα καλά τω είδει

2:3  και καταστήσει ο βασιλεύς κωμάρχας εν πάσαις ταις χώραις της βασιλείας αυτού και επιλεξάτωσαν κοράσια παρθενικά καλά τω είδει εις Σούσαν την πόλιν εις τον γυναικώνα και παραδοθήτωσαν τω ευνούχω του βασιλέως τω φύλακι των γυναικών και δοθήτω σμήγμα και η λοιπή επιμέλεια

2:4  και η γυνή η αν αρέση τω βασιλεί βασιλεύσει αντί Αστί και ήρεσε τω βασιλεί το πράγμα και εποίησεν ούτως

2:5  και άνθρωπος ην Ιουδαίος εν Σούσοις τη πόλει και όνομα αυτού Μαρδοχαίος ο του Ιαείρου του Σεμεϊ του Κισαίου εκ φυλής Βενιαμίν

2:6  ος ην αιχμάλωτος εξ Ιερουσαλήμ ην ηχμαλώτευσε Ναβουχοδονόσορ ο βασιλεύς Βαβυλώνος

2:7  και ην τούτω παις θρεπτή θυγάτηρ αδελφού πατρός αυτού και όνομα αυτή Εσθήρ εν δε τω μεταλλάξαι αυτής τους γονείς επαίδευσεν αυτήν εαυτώ εις γυναίκα και ην το κοράσιον καλόν το είδει

2:8  και ότε ηκούσθη το του βασιλέως πρόσταγμα συνήχθησαν πολλά κοράσια εις Σούσαν την πόλιν υπό χείρα Γαϊ και ήχθη Εσθήρ προς Γαϊ τον φύλακα των γυναικών

2:9  και ήρεσεν αυτώ το κοράσιον και εύρε χάριν ενώπιον αυτού και έσπευσε δούναι αυτή το σμήγμα και την μερίδα και τα επτά κοράσια τα αποδεδειγμένα αυτή εκ βασιλικού και εχρήσατο αυτή καλώς και ταις άβραις αυτής εν τω γυναικώνι

2:10  και ουχ υπέδειξεν Εσθήρ το γένος αυτής ουδέ την πατρίδα ο γαρ Μαρδοχαίος ενετείλατο αυτή μη απαγγείλαι

2:11  καθ΄ εκάστην δε ημέραν περιεπάτει ο Μαρδοχαίος κατά την αυλήν την γυναικείαν επισκοπών τι Εσθήρ συμβήσεται

2:12  ούτος γαρ ην καιρός κορασίου εισελθείν προς τον βασιλέα όταν αναπληρώση μήνας δεκαδύο ούτως γαρ αναπληρούνται αι ημέραι της θεραπείας μήνας εξ εν τοις αρώμασι και εν τοις σμήγμασι των γυναικών

2:13  και μήνας εξ αλειφομέναις σμυρνίνω ελαίω και τότε εισπορεύεται προς τον βασιλέα και ω αν είπη παραδώσει αυτήν συνεισέρχεσθαι αυτώ από του γυναικώνος έως των βασιλείων

2:14  δείλης εισπορεύεται και προς ημέραν αποτρέχει εις τον γυναικώνα τον δεύτερον ου Γαϊ ο ευνούχος του βασιλέως ο φύλαξ των γυναικών και ουκέτι εισπορεύεται προς τον βασιλέα εάν μη κληθή ονόματι

2:15  εν δε τω αναπληρούσθαι τον χρόνον Εσθήρ της θυγατρός Αβιχάϊλ αδελφού πατρός Μαρδοχαίου εισελθείν εις τον βασιλέα ουδέν ηθέτησεν ων ενετείλατο αυτήν ο ευνούχος ο φύλαξ των γυναικών ην γαρ Εσθήρ ευρίσκουσα χάριν παρά πάντων των βλεπόντων αυτήν

2:16  και εισήλθεν Εσθήρ προς Αρταξέρξην τον βασιλέα τω δεκάτω μηνί ος εστιν Τηβήθ τω εβδόμω έτει της βασιλείας αυτού

2:17  και ηράσθη ο βασιλεύς Εσθήρ και εύρε χάριν παρά πάσας τας παρθένους και επέθηκεν αυτή το διάδημα το γυναικείον

2:18  και εποίησεν ο βασιλεύς πότον πάσι τοις φίλοις αυτού και ταις δυνάμεσιν επί ημέρας επτά και ύψωσε τους γάμους Εσθήρ και άφεσιν εποίησε τοις υπό την βασιλείαν αυτού

2:19  ο δε Μαρδοχαίος εθεράπευεν εν τη αυλή

2:20  η δε Εσθήρ ουχ υπέδειξε την πατρίδα αυτής ούτως γαρ ενετείλατο αυτή Μαρδοχαίος φοβείσθαι τον Θεόν και ποιείν τα προστάγματα αυτού καθώς ην μετ΄ αυτού και Εσθήρ ου μετήλλαξε την αγωγήν αυτής

2:21  και ελυπήθησαν οι δύο ευνούχοι του βασιλέως και οι αρχισωματοφύλακες ότι προήχθη Μαρδοχαίος και εζήτουν αποκτείναι Αρταξέρξην τον βασιλέα

2:22  και εδηλώθη Μαρδοχαίω ο λόγος και εσήμανεν αυτόν τη Εσθήρ και αυτή ενεφάνισε τω βασιλεί τα της επιβουλής

2:23  ο δε βασιλεύς ήτασε τους δύο ευνούχους και εκρέμασεν αυτούς και επέταξεν ο βασιλεύς καταχωρίσαι εις μνημόσυνον εν τη βασιλική βιβλιοθήκη υπέρ της ευνοίας Μαρδοχαίου εν εγκωμίω

Chapter 3

3:1  μετά ταύτα εδόξασεν ο βασιλεύς Αρταξέρξης Αμάν τον Αμαδαθού Ουγαίον και ύψωσεν αυτόν και επρωτοβάθρει πάντων των φίλων αυτού

3:2  και πάντες οι εν τη αυλή προσεκύνουν αυτώ ούτως γαρ προσέταξεν ο βασιλεύς ποιήσαι ο δε Μαρδαχαίος ου προσεκύνει αυτώ

3:3  και ελάλησαν οι εν τη αυλή του βασιλέως Μαρδοχαίω Μαρδοχαίε τι παρακούεις τα υπό του βασιλέως λεγόμενα

3:4  καθ΄ εκάστην ημέραν ελάλουν αυτώ και ουχ υπήκουσεν αυτοίς και υπέδειξαν τω Αμάν Μαρδοχαίον τοις του βασιλέως λόγοις αντιτασσόμενον και υπέδειξεν αυτοίς Μαρδοχαίος ότι Ιουδαίός εστι

3:5  και επιγνούς Αμάν ότι ου προσκυνεί αυτώ Μαρδοχαίος εθυμώθη σφόδρα

3:6  και εβουλεύσατο αφανίσαι πάντας τους υπό την Αρταξέρξου βασιλείαν Ιουδαίους

3:7  και εποίησε ψήφισμα εν έτει δωδεκάτω της βασιλείας Αρταξέρξου και έβαλε κλήρους ημέραν εξ ημέρας και μήνα εκ μηνός ώστε απολέσαι εν μία ημέρα το γένος Μαρδοχαίου και έπεσεν ο κλήρος εις την τεσσαρεσκαιδεκάτην του μηνός ος εστιν Αδάρ

3:8  και ελάλησε προς τον βασιλέα Αρταξέρξην λέγων υπάρχει έθνος διεσπαρμένον εν τοις έθνεσιν εν πάση τη βασιλεία σου οι δε νόμοι αυτών έξαλλοι παρά πάντα τα έθνη των δε νόμων του βασιλέως παρακούουσι και ου συμφέρει τω βασιλεί εάσαι αυτούς

3:9  ει δοκεί τω βασιλεί δογματισάτω απολέσαι αυτούς καγώ διαγράψω εις το γαζοφυλάκιον του βασιλέως αργυρίου τάλαντα μύρια

3:10  και περιελόμενος ο βασιλεύς το δακτύλιον έδωκεν εις χείρας τω Αμάν σφραγίσαι κατά τα γεγραμμένα κατά των Ιουδαίων

3:11  και είπεν ο βασιλεύς τω Αμάν το μεν αργύριον έχε τω δε έθνει χρώ ως θέλεις

3:12  και εκλήθησαν οι γραμματείς του βασιλέως μηνί πρώτω τη τρισκαιδεκάτη και έγραψαν ως επέταξεν Αμάν τοις στρατηγοίς και τοις άρχουσι κατά πάσαν χώραν από Ινδικής έως της Αιθιοπίας ταις εκατόν εικοσιεπτά χώραις τοις τε άρχουσι των εθνών κατά την αυτών λέξιν δι΄ Αρταξέρξου του βασιλέως

3:13  και απεστάλη διά βιβλιοφόρων εις την Αρταξέρξου βασιλείαν αφανίσαι το γένος των Ιουδαίων εν ημέρα μία μηνός δωδεκάτου ος εστιν Αδάρ και διαρπάσαι τα υπάρχοντα αυτών

3:14  τα δε αντίγραφα των επιστολών εξετίθετο κατά χώραν και προσετάγη πάσιν ετοίμους είναι εις την ημέραν ταύτην

3:15  εσπεύδετο δε το πράγμα και εις Σούσαν ο δε βασιλεύς και Αμάν εκωθωνίζοντο εταράσσετο δε η πόλις

Chapter 4

4:1  ο δε Μαρδοχαίος επιγνούς το συντελούμενον διέρρηξε τα ιμάτια αυτού και ενεδύσατο σάκκον και κατεπάσατο σποδόν και εκπηδήσας διά της πλατείας της πόλεως εβόα φωνή μεγάλη αίρεται έθνος μηδέν ηδικηκός

4:2  και ήλθεν έως της πύλης του βασιλέως και έστη ου γαρ ην αυτώ εξόν εισελθείν εις την αυλήν σάκκον έχοντι και σποδόν

4:3  και εν πάση χώρα ου εξετίθετο τα γράμματα κραυγή και κοπετός και πένθος μέγα τοις Ιουδαίοις και σάκκον και σποδόν έστρωσαν εαυτοίς

4:4  και εισήλθον αι άβραι και οι ευνούχοι της βασιλίσσης και ανήγγειλαν αυτή και εταράχθη ακούσασα το γεγονός και απέστειλε στολίσαι τον Μαρδοχαίον και αφελέσθαι αυτού τον σάκκον ο δε ουκ επείσθη

4:5  η δε Εσθήρ προσεκαλέσατο Αθάχ τον ευνούχον αυτής ος παρειστήκει αυτή και απέστειλε μαθείν αυτή παρά του Μαρδοχαίου το ακριβές

4:7  ο δε Μαρδοχαίος υπέδειξεν αυτώ το γεγονός και την επαγγελίαν ην επηγγείλατο Αμάν τω βασιλεί εις την γάζαν ταλάντων μυρίων ίνα απολέση τους Ιουδαίους

4:8  και το αντίγραφον το εν Σούσοις εκτεθέν υπέρ του απολέσθαι αυτούς έδωκεν αυτώ δείξαι τη Εσθήρ και είπεν αυτώ εντείλασθαι αυτή εισελθούση παραιτήσασθαι τον βασιλέα και αξιώσαι αυτόν περί του λαού μνησθείσα ημερών ταπεινώσεώς σου ως ετράφης εν χειρί μου διότι Αμάν ο δευτερεύων τω βασιλεί ελάλησε καθ΄ ημών εις θάνατον επικάλεσαι τον κύριον και λάλησον τω βασιλεί περί ημών και ρύσαι ημάς εκ θανάτου

4:9  εισελθών δε ο Αθάχ ελάλησεν Εσθήρ πάντας τους λόγους τούτους

4:10  είπε δε Εσθήρ προς Αθάχ πορεύθητι προς Μαρδοχαίον και είπον

4:11  ότι τα έθνη πάντα της βασιλείας γινώσκει ότι πας άνθρωπος η γυνή ος εισελεύσεται προς τον βασιλέα εις την αυλήν την εσωτέραν άκλητος ουκ έστιν αυτώ σωτηρία πλην ω εάν εκτείνη ο βασιλεύς την χρυσήν ράβδον ούτος σωθήσεται καγώ ου κέκλημαι εισελθείν προς τον βασιλέα εισίν αύται ημέραι τριάκοντα

4:12  και απήγγειλεν Αθάχ τω Μαρδοχαίω πάντας τους λόγους Εσθήρ

4:13  και είπε Μαρδοχαίος προς Αθάχ πορεύθητι και είπον αυτή Εσθήρ μη είπης σεαυτή ότι σωθήση μόνη εν τη βασιλεία παρά πάντας τους Ιουδαίους

4:14  ως ότι εάν παρακούσης εν τούτω τω καιρώ αλλαχόθεν βοήθεια και σκέπη έσται τοις Ιουδαίοις συ δε και ο οίκος του πατρός σου απολείσθε και τις οίδεν ει εις τον καιρόν τούτον εβασίλευσας

4:15  και εξαπέστειλεν Εσθήρ τον ήκοντα προς αυτήν προς Μαρδοχαίον λέγουσα

4:16  βαδίσας εκκλησίασον τους Ιουδαίους τους εν Σούσοις και νηστεύσατε επ΄ εμοί και μη φάγητε μηδέ πιήτε επί ημέρας τρεις νύκτα και ημέραν καγώ και αι άβραι μου ασιτήσομεν και τότε εισελεύσομαι προς τον βασιλέα παρά τον νόμον εάν και απολέσθαι με δέη

4:17  και βαδίσας Μαρδοχαίος εποίησεν όσα ενετείλατο αυτώ Εσθήρ

Chapter 5

5:1  και εγένετο εν τη ημέρα τη τρίτη ενεδύσατο η Εσθήρ βασιλικοίς και έστη εν αυλή του οίκου βασιλέως τη εσωτέρα εξεναντίας της βασιλικής του βασιλέως ο δε βασιλεύς εκάθητο εν θρόνω της εαυτού βασιλείας εν τω οίκω τω βασιλικώ εξαναντίας της θύρας του οίκου

5:2  ως δε είδεν ο βασιλεύς Εσθήρ την βασίλισσαν ισταμένην εν τη αυλή εύρε δε χάριν εν οφθαλμοίς αυτού και εκτείνας ο βασιλεύς τη Εσθήρ την ράβδον την χρυσήν την εν τη χειρί αυτού και προσήλθεν η Εσθήρ και ήψατο της άκρας της ράβδου

5:3  και είπεν ο βασιλεύς τι θέλεις Εσθήρ και τι σου εστί το αξίωμα έως ημίσους της βασιλείας μου έσται σοι

5:4  είπε δε Εσθήρ ημέρα μου επίσημος σήμερόν εστιν ει ουν δοκεί τω βασιλεί ελθέτω και ο βασιλεύς και Αμάν εις την δοχήν ην ποιήσω σήμερον

5:5  και είπεν ο βασιλεύς κατασπεύσατε Αμάν όπως ποιήσωμεν τον λόγον Εσθήρ και παραγίνονται αμφότεροι εις την δοχήν ην εποίησεν Εσθήρ

5:6  εν δε τω πότω είπεν ο βασιλεύς προς Εσθήρ τι εστί σοι βασίλισσα Εσθήρ και έσται σοι όσα αξιοίς

5:7  και είπε το αίτημά μου και το αξίωμά μου

5:8  ει εύρον χάριν ενώπιον του βασιλέως ελθέτω ο βασιλεύς και Αμάν επί την αύριον εις την δοχήν ην ποιήσω αυτοίς και αύριον ποιήσω τα αυτά

5:9  και εξήλθεν Αμάν από του βασιλέως υπέρχαρης και ευφραινόμενος εν δε τω ιδείν Αμάν Μαρδοχαίον τον Ιουδαίον εν τη αυλή εθυμώθη σφόδρα

5:10  και εισελθών εις τα ίδια εκάλεσε τους φίλους και Ζωσάραν την γυναίκα αυτού

5:11  και υπέδειξεν αυτοίς τον πλούτον αυτού και την δόξαν ην ο βασιλεύς αυτώ περιέθηκε και ως εποίησεν αυτόν πρωτεύειν και ηγείσθαι της βασιλείας

5:12  και είπεν Αμάν ου κέκληκεν η βασίλισσα μετά του βασιλέως ουδένα εις την δοχήν αλλ΄ η εμέ και εις την αύριον κέκληκέ με

5:13  και ταύτά μοι ουκ αρέσκει όταν ίδω Μαρδοχαίον τον Ιουδαίον εν τη αυλή

5:14  και είπε προς αυτόν Ζωσάρα η γυνή αυτού και οι φίλοι κοπήτω σοι ξύλον πηχών πεντήκοντα όρθρου δε είπον τω βασιλεί και κρεμασθήτω Μαρδοχαίος επί του ξύλου συ δε είσελθε εις την δοχήν συν τω βασιλεί και ευφραίνου και ήρεσε το ρήμα τω Αμάν και ητοίμασε το ξύλον

Chapter 6

6:1  ο δε κύριος απέστησε τον ύπνον από του βασιλέως την νύκτα εκείνην και είπε τω διακόνω αυτού εισφέρειν γράμματα μνημόσυνα των ημερών αναγινώσκειν αυτώ

6:2  εύρε δε γράμματα τα γραφέντα περί Μαρδοχαίου ως απήγγειλε τω βασιλεί περί των δύο ευνούχων του βασιλέως εν τω φυλάσσειν αυτούς και ζητήσαι επιβαλείν τας χείρας Αρταξέρξη

6:3  είπε δε ο βασιλεύς τίνα δόξαν η χάριν εποιήσαμεν τω Μαρδοχαίω και είπαν οι διάκονοι του βασιλέως ουκ εποίησας αυτώ ουδέν

6:4  εν δε τω πυνθάνεσθαι τον βασιλέα περί της ευνοίας Μαρδοχαίου ιδού Αμάν εν τη αυλή είπε δε ο βασιλεύς τις εν τη αυλή ο δε εισήλθεν ειπείν τω βασιλεί κρέμασαι τον Μαρδοχαίον επί τω ξύλω ω ητοίμασε

6:5  και είπον οι διάκονοι του βασιλέως ιδού Αμάν έστηκεν εν τη αυλή και είπεν ο βασιλεύς καλέσατε αυτόν

6:6  είπε δε ο βασιλεύς τω Αμάν τι ποιήσω τω ανθρώπω ον εγώ θέλω δοξάσαι είπε δε εν εαυτώ Αμάν τίνα θέλει ο βασιλεύς δοξάσαι ει μη εμέ

6:7  είπε δε προς τον βασιλέα άνθρωπον ον ο βασιλεύς θέλει δοξάσαι

6:8  ενεγκάτωσαν οι παίδες του βασιλέως στολήν βυσσίνην ην ο βασιλεύς περιβάλλεται και ίππον εφ΄ ον ο βασιλεύς επιβαίνει

6:9  και δότω ενί των φίλων του βασιλέως των ενδόξον και στολισάτω τον άνθρωπον ον ο βασιλεύς αγαπά και αναβιβασάτω αυτόν επί τον ίππον και κηρυσσέτω διά της πλατείας της πόλεως λέγων ούτως έσται παντί ανθρώπω ον ο βασιλεύς δοξάζει

6:10  είπε δε ο βασιλεύς τω Αμάν καλώς ελάλησας ούτως ποίησον τω Μαρδοχαίω τω Ιουδαίω τω θεράπευοντι εν τη αυλή και μη παραπεσάτω σου λόγος ον ελάλησας

6:11  έλαβε δε Αμάν την στολήν και τον ίππον και εστόλισε τον Μαρδοχαίον και ανεβίβασεν αυτόν επί τον ίππον και διήλθε διά της πλατείας της πόλεως και εκήρυσσε λέγων ούτως έσται παντί ανθρώπω ο βασιλεύς θέλει δοξάσαι

6:12  επέστρεψε δε ο Μαρδοχαίος εις την αυλήν Αμάν δε επέστρεψεν εις τα ίδια λυπούμενος κατά κεφαλής

6:13  και διηγήσατο Αμάν τα συμβεβηκότα αυτώ Ζωσάρα τη γυναικί αυτού και τοις φίλοις και είπον προς αυτόν οι φίλοι και η γυνή ει εκ γένους Ιουδαίων Μαρδοχαίος και ήρξω ταπεινούσθαι έμπροσθεν αυτού πεσών πέση ου μη δύνη αυτόν αμύνασθαι ότι θεός ζων μετ΄ αυτού

6:14  έτι αυτών λαλούντων παραγίνονται οι ευνούχοι επισπεύδοντες τον Αμάν επί τον πότον ον ητοίμασεν Εσθήρ

Chapter 7

7:1  εισήλθε δε ο βασιλεύς και Αμάν συμπιείν τη βασιλίσση

7:2  είπε δε ο βασιλεύς τη Εσθήρ τη δευτέρα ημέρα εν τω πότω τι εστιν Εσθήρ βασίλισσα και τι το αίτημά σου και τι το αξίωμά σου και έσται σοι έως ημίσους της βασιλείας μου

7:3  και αποκριθείσα είπεν ει εύρον χάριν ενώπιον του βασιλέως δοθήτω η ψυχή τω αιτήματί μου και ο λαός μου τω αξιώματί μου

7:4  επράθημεν γαρ εγώ τε και ο λαός μου εις απώλειαν και διαρπαγήν και δουλείαν ημείς τε και τα τέκνα ημών εις παίδας και παιδίσκας και παρήκουσας ου γαρ άξιος ο διάβολος της αυλής του βασιλέως

7:5  είπε δε ο βασιλεύς τις ούτος ος ετόλμησε ποιήσαι το πράγμα τούτο

7:6  είπε δε Εσθήρ άνθρωπος εχθρός Αμάν ο πονηρός ούτος Αμάν δε εταράχθη από του βασιλέως και της βασιλίσσης

7:7  ο δε βασιλεύς εξανέστη εκ του συμποσίου εις τον κήπον ο δε Αμάν παρακάλει την βασίλισσαν εώρα γαρ εαυτόν εν κακοίς όντα

7:8  επέστρεψε δε ο βασιλεύς εκ του κήπου Αμάν δε επιπεπτώκει επί την κλίνην αξιών την βασίλισσαν είπε δε ο βασιλεύς ώστε και την γυναίκα βιάζη εν τη οικία μου Αμάν δε ακούσας διετράπη τω προσώπω

7:9  ειπε δε Χαρβωνά εις των ευνούχων προς τον βασιλέα ιδού και ξύλον ητοίμασεν Αμάν Μαρδοχαίω τω λαλήσαντι περί του βασιλέως και ώρθωται εν τοις Αμάν πηχών πεντήκοντα είπε δε ο βασιλεύς σταυρωθήτω επ΄ αυτό

7:10  και εκρεμάσθη Αμαν επί του ξύλου ο ητοίμασε Μαρδοχαίω και τότε ο βασιλεύς εκόπασε από του θυμού

Chapter 8

8:1  και εν αυτή τη ημέρα ο βασιλεύς Αρταξέρξης εδωρήσατο τη Εσθήρ όσα υπήρχεν Αμάν τω διαβόλω και Μαρδοχαίος προσεκλήθη παρά του βασιλέως υπέδειξε γαρ Εσθήρ ότι ενοικείωται αυτή

8:2  έλαβε δε ο βασιλεύς τον δακτύλιον ον αφείλετο Αμάν και έδωκε Μαρδοχαίω και κατέστησεν Εσθήρ Μαρδοχαίον επί πάντων των του Αμάν

8:3  και προσθείσα ελάλησε προς τον βασιλέα και προσέπεσεν επί τους πόδας αυτού και ηξίου αφελείν την Αμάν κακίαν και όσα εποίησε τοις Ιουδαίοις

8:4  εξέτεινε δε ο βασιλεύς Εσθήρ την ράβδον την χρυσήν και εξηγέρθη Εσθήρ παρεστηκέναι τω βασιλεί

8:5  και είπεν Εσθήρ ει δοκεί σοι και εύρον χάριν πεμφθήτω αποστραφήναι τα γράμματα τα απεσταλμένα από Αμάν τα γραφέντα απολέσθαι τους Ιουδαίους οι είσιν εν τη βασιλεία σου

8:6  πως γαρ δυνήσομαι ιδείν την κάκωσιν του λαού μου και πως δυνήσομαι σωθήναι εν τη απωλεία της πατρίδος μου

8:7  και είπεν ο βασιλεύς προς Εσθήρ ει πάντα τα υπάρχοντα Αμάν έδωκα και εχαρισάμην σοι και αυτόν εκρέμασα επί ξύλου ότι τας χείρας επήνεγκε τοις Ιουδαίοις τι έτι επιζητείς

8:8  γράψατε και υμείς εκ του ονόματός μου ως δοκεί υμίν και σφραγίσατε τω δακτυλίω μου όσα γαρ γράφεται του βασιλέως επιτάξαντος και σφραγισθή τω δακτυλίω μου ουκ έστιν αυτοίς αντειπείν

8:9  εκλήθησαν δε οι γραμματείς εν τω πρώτω μηνί ος εστι Νισάν τη τρίτη και εικάδι του αυτού έτους και εγράφη τοις Ιουδαίοις όσα ενετείλατο τοις οικονόμοις και τοις άρχουσι των σατραπών από της Ινδικής έως της Αιθιοπίας εκατόν εικοσιεπτά σατράπαις κατά χώραν και χώραν κατά την αυτών λέξιν

8:10  εγράφη δε διά του βασιλέως και εσφραγίσθη τω δακτυλίω αυτού και εξαπέστειλαν τα γράμματα διά βιβλιοφόρων

8:11  ως επέταξεν αυτοίς χρήσασθαι τοις νόμοις αυτών εν πάση πόλει βοηθήσαί τε αυτοίς και χρήσασθαι τοις αντιδίκοις αυτών και τοις αντικειμένοις αυτοίς ως βούλονται

8:12  εν ημέρα μία εν πάση τη βασιλεία Αρταξέρξου τη τρισκαιδεκάτη του δωδεκάτου μηνός ος εστιν Αδάρ

8:13  τα δε αντίγραφα εκτιθέσθωσαν οφθαλμοφανώς εν πάση τη βασιλεία ετοίμους τε είναι πάντας τους Ιουδαίους εις ταύτην την ημέραν πολεμήσαι αυτών τους υπεναντίους

8:14  οι μεν ουν ιππείς εξήλθον σπεύδοντες τα υπό του βασιλέως λεγόμενα επιτελείν εξετέθη δε το πρόσταγμα και εν Σούσοις

8:15  ο δε Μαρδοχαίος εξήλθεν εστολισμένος την βασιλικήν στολήν και στέφανον έχων χρυσούν και διάδημα βύσσινον πορφυρούν ιδόντες δε οι εν Σούσοις εχάρησαν

8:16  τοις δε Ιουδαίοις εγένετο φως και ευφροσύνη

8:17  κατά πόλιν και χώραν ου αν εξετέθη το έκθεμα χαρά και ευφροσύνη τοις Ιουδαίοις κώθων και ευφροσύνη και πολλοί των εθνών περιετέμοντο και Ιουδάϊζον διά τον φόβον των Ιουδαίων

Chapter 9

9:1  εν γαρ τω δωδεκάτω μηνί τη τρισκαιδεκάτη του μηνός ος εστιν Αδάρ παρήν τα γράμματα τα γραφέντα παρά του βασιλέως

9:2  και εν αυτή τη ημέρα απώλοντο οι αντικείμενοι τοις Ιουδαίοις ουδείς γαρ αντέστη φοβούμενος αυτούς

9:3  οι γαρ άρχοντες των σατραπών και οι τύραννοι και οι βασιλικοί γραμματείς ετίμων τους Ιουδαίους ότι ο φόβος Μαρδοχαίου επέκειτο αυτοίς

9:4  προσέπεσε γαρ το πρόσταγμα του βασιλέως ονομασθήναι εν πάση τη βασιλεία

9:6  και εν Σούσοις τη πόλει απέκτειναν οι Ιουδαίοι άνδρας πεντακοσίους

9:7  τον τε Φαρσανδαθά και Δελφών και Ασφαθά

9:8  και Φοραδαθά και Αδαλία και Αριδαθά και Φαρμασθά και Αρισαϊ

9:9  και Αριδαϊ και Βαϊζαθά

9:10  και τους δέκα υιούς Αμάν Αμαδαθού Βουγαίου του εχθρού των Ιουδαίων και ου διήρπασαν εν αυτή τη ημέρα

9:11  επεδόθη δε αριθμός τω βασιλεί των απολωλότων εν Σούσοις

9:12  είπε δε ο βασιλεύς προς Εσθήρ απώλεσαν οι Ιουδαίοι εν Σούσοις άνδρας πεντακοσίους εν τη πόλει εν δε τη περιχώρω πως οίει εχρήσαντο τι ουν αξιοίς έτι και έσται σοι

9:13  και είπεν Εσθήρ τω βασιλεί δοθήτω τοις Ιουδαίοις χρήσθαι ωσαύτως την αύριον ώστε τους δέκα υιούς Αμάν κρεμάσαι

9:14  και επέτρεψεν ο βασιλεύς ούτως γενέσθαι και εξέθηκε τοις Ιουδαίοις της πόλεως τα σώματα των υιών Αμάν κρεμάσαι

9:15  και συνήχθησαν οι Ιουδαίοι εν Σούσοις τη τεσσαρεσκαιδεκάτη του Αδάρ και απέκτειναν άνδρας τριακοσίους και ουδέν διήρπασαν

9:16  οι δε λοιποί των Ιουδαίων των εν τη βασιλεία συνήχθησαν και εαυτοίς εβοήθουν και ανεπαύσαντο από των πολεμίων απώλεσαν γαρ αυτών μυριάδας επτά πεντακισχιλίους τη τρισκαιδεκάτη του Αδάρ και ουδέν διήρπασαν

9:17  και ανεπαύσαντο τη τεσσαρεσκαιδεκάτη του αυτού μηνός και ήγον αυτήν ημέραν αναπαύσεως μετά χαράς και ευφροσύνης

9:18  οι δε Ιουδαίοι εν Σούσοις τη πόλει συνήχθησαν και τη τεσσαρεσκαιδεκάτη και ανεπαύσαντο ήγον δε και την πεντεκαιδεκάτην μετά χαράς και ευφροσύνης

9:19  διά τούτο ουν οι Ιουδαίοι οι διεσπαρμένοι εν πάση χώρα τη έξω άγουσι την τεσσαρεσκαιδεκάτην του Αδάρ ημέραν αγαθήν μετ΄ ευφροσύνης αποστέλλοντες μερίδας έκαστος τω πλησίον

9:20  έγραψε δε Μαρδοχαίος τους λόγους τούτους εις βιβλίον και εξαπέστειλε τοις Ιουδαίοις όσοι ήσαν εν τη Αρταξέρξου βασιλεία τοις εγγύς και τοις μακράν

9:21  στήσαι τας ημέρας ταύτας αγαθάς άγειν τε την τεσσαρεσκαιδεκάτην και την πεντεκαιδεκάτην του Αδάρ

9:22  εν γαρ ταύταις ταις ημέραις ανεπαύσαντο οι Ιουδαίοι από των εχθρών αυτών και τον μήνα εν ω εστράφη αυτοίς ος ην Αδάρ από πένθους εις χαράν και από οδύνης εις αγαθήν ημέραν άγειν όλον εις αγαθάς ημέρας γάμων και ευφροσύνης εξαποστέλλοντας μερίδας τοις φίλοις και τοις πτωχοίς

9:23  και προσεδέξαντο οι Ιουδαίοι καθώς έγραψεν αυτοίς ο Μαρδοχαίος

9:24  πως Αμάν Αμαδαθού ο Μακεδών επολέμει αυτούς καθώς έθετο ψήφισμα και κλήρον αφανίσαι αυτούς

9:25  και ως εισήλθε προς τον βασιλέα λέγων κρεμάσαι τον Μαρδοχαίον όσα δε επεχείρησεν επάξαι επί τους Ιουδαίους κακά επ΄ αυτόν εγένοντο και εκρεμάσθη αυτός και τα τέκνα αυτού

9:26  διά τούτο επεκλήθησαν αι ημέραι αύται φουρίμ διά τους κλήρους ότι τη διαλέκτω αυτών καλούνται φουρίμ διά τους λόγους της επιστολής ταύτης και όσα πεπόνθασι δι΄ αυτήν και όσα αυτοίς εγένετο και έστησε

9:27  και προσεδέχοντο οι Ιουδαιοι εφ΄ εαυτοίς και επί το σπέρματι αυτών και επί τοις προτεθειμένοις επ΄ αυτών ουδέ μην άλλως χρήσονται αι δε ημέραι αύται μνημόσυνον επιτελουμενον κατά γενεαν και γενεαν και πόλιν και πατριαν και χωραν

9:28  αι δε ημέραι αύται αχθήσονται εις τον άπαντα χρόνον και το μνημόσυνον αυτών ου μη εκλίπη έως γενεών

9:29  και έγραψεν Εσθήρ η βασίλισσα θυγάτηρ Αβιχάϊλ και Μαρδοχαίος ο Ιουδαίος όσα εποίησαν το τε στερέωμα της επιστολής των φουρίμ

9:31  και Μαρδοχαίος και Εσθήρ η βασίλισσα έστησαν εαυτοίς καθ΄ εαυτών και τότε στήσαντες κατά της νηστείαν αυτών και την βουλήν αυτών

9:32  και Εσθήρ λόγω έστησεν εις τον αιώνα και έγραφη εις μνημόσυνον

Chapter 10

10:1  έγραψε δε ο βασιλεύς επί την βασιλείαν της τε γης και της θαλάσσης

10:2  και την ισχύν αυτού και την ανδραγαθίαν πλούτόν τε και δόξαν της βασιλείας αυτού ιδού γέγραπται εν βιβλίω Περσών και Μήδων εις μνημόσυνον

10:3  ότε Μαρδοχαίος διεδέχετο τον βασιλέα Αρταξέρξην και μέγας ην εν τη βασιλεία και δεδοξασμένος υπό των Ιουδαίων και φιλούμενος διηγείτο την αγωγήν παντί τω έθνει αυτών