Calo - Luke - 1

1:1  Á cána que sares han penchabado chibar de pacuaró a narracion es buchías que andré amángue han sinado quereladas.

1:2  Sásta junos as penáron á amángue sos desde o principio as diqueláron sa’ desquerias aquías, y sináron ministres e varda.

1:3  Pre o matéjo ha parecido lachó á mángue, despues de orotar mistós sasta se las quereláron desde o principio, libanartelas de pacuaró, ó baro Theophilo.

1:4  Somia que pincharéles a chachipen de ocolas buchías andré que has sinado instruido.

1:5  Sinaba andré os chibéses de Herodes, Crállis de Judea; yeque erajai, sos se hetó Zacharias, e baji de Abías, y desqueri romi es dugidas de Aaron, y o nao de ocóna Elisabeth.

1:6  Y sinaban os dui lachés anglal de Debél, pirando bi grecos andré os sares mandamientos y eschastras e Erañoró.

1:7  Y na terelaban chaboro, presas Elisabeth sinaba estéril, y os dui chalados dur andré sus chibéses.

1:8  Y anacó que querelando Zacharias desquero ministerio anglal de Debél andré o orden de desqueri begai,

1:9  Segun o costumbre es erajais, sicabó por desquerí baji á chibar o incienso, chalando andré a cangri e Erañoró.

1:10  Y os hambés catanés sinaban abrí manguelando á Un-debél á la ocana e incienso.

1:11  Y dicó al Manfariel e Erañoró, sinando en pindré á la bastarí e altar e incienso.

1:12  Y Zacharias al dicarle cangueló, y peró dal opré ó.

1:13  Tami o Manfariel le penó: Na darañeles Zacharias, presas tirias ocanagimias han sinado juneladas: y tiri romi Elisabeth chindará á tucue yeque chaboro, y araquelarás desquero nao Juan.

1:14  Y terelarás pesquital y alegría, y se asaselarán baribustres manuces andré desquero nacimiento.

1:15  Presas sinará haro anglal o Erañoró; y na piyará mol ni peñacoró, y sinará perelaló e Peniche desde as poriás de sun dai.

1:16  Y á baribústres es chabores de Israel querelará limbidiar al Erañó, o Debél de junós.

1:17  Presas ó chalará anglal de ó sa’ la suncai y sila de Elias, somia querelar limbidiar os carlochines es batuces á os chabores, y os sos na pachibélan al drun es majarés, somia preparar al Erañó una sueti perfecta.

1:18  Y penó Zacharias al Manfariel: ¿en que pincharé ocóno? presas menda sinelo puró, y minri romí sinela dur andré desqueres chibéses.

1:19  Y rudeló o Manfariel y penó: sinelo Gabriel, sos asisto anglal de Debél: y sinelo bichabado á penarte, y á lanarte ocóna nueva lachi.

1:20  Y tucue sinarás musilé, y no astisararás chamuliar disde o chibés andré sos ocóno sinará querelado, presas na pachibelaste á minrias vardas, sos se cumplirán á sun chiros.

1:21  Y os manuces sinaban ujarando á Zacharias: y os sares zibaban de que tasiabase ó andré a cangri.

1:22  Y pur se sicobó abrí, na les astisaraba chamuliar; y chaneláron que habia dicado buchí andré a cangri, y ó lo penó por simaches, y sinaba musilé.

1:23  Y pur sináron cumplidos os chibéses de desquero ministerio, se chaló á su quer.

1:24  Y á la anda de ocónos chibéses se dicó cambri Elisabeth a romi de ó, y sinaba escondida pansch chonos, penando:

1:25  Presas o Erañó me ha querelado ocono andré os chibéses, en que penchabó á nicabar minrio oprobio de enré os manuces.

1:26  Y al zobio chonos o Manfariel Gabriel sinaba bichabado de Debél á yeque foros de Galiléa, sos se hetó Nazareth,

1:27  A yeque bedori romandiñada sat manu, sos se hetó Joseph, e quer de David, y o nao e bedori sinaba Maria.

1:28  Y pur chaló o Manfariel andré, anduque sinaba, penó: Un-debél te diñele golipén, perelali de gracia: O Erañó con tucue: Majari tucue enré as cadchiás.

1:29  Y pur siró juneló ocono, se darañó sat as vardas de ó, y penchababa, que salutacion sinaba ocola.

1:30  Y o Manfariel le penó: na cangueles Maria, presas has alachado gracia anglal de Debél.

1:31  He acoi concebirás andré tiro chepo, y chindarás chaboro, y araquerarás desquero nao Jesus.

1:32  Ocóla sinará baro, y sinará araquerado chaboro e Udscho, y le diñará Un-debél Erañó o throno de David desquero batu; y sinará Crallis deltó andré o quer de Jacob.

1:33  Y desquero chim na terelará anda.

1:34  Y penó Maria al Manfariel: ¿Sasta sinará, ocono? y menda na pincharelo manu.

1:35  Y rudelando o Manfariel, penó: se bestelará opré tucue, y te querelará sombra a sila e Udscho.  Y por ocono o Majaro, sos se chindará de tucue, sinará araquerado Chaboro de Debél.

1:36  Y Elisabeth tiri cachicálli siró tambien sinela cambri de yeque chaboro, sinando puri: y ocono sinela o zobio chonos de siró, sos sinela araquerada a esteril.

1:37  Presas na sinela chi n’astis para Un-debél.

1:38  Y penó Maria: Menda a lacrí e Erañoró, querelese andré mangue segun tiri varda.  Y se chaló o Manfariel.

1:39  Y andré ocolas chibéses se ardiñó Maria y chaló al bur, á yeque foros e chim de Judá.

1:40  Y chaló andré o quer de Zacharias, y saludisaró á Elisabeth.

1:41  Y pur Elisabeth juneló a salutacion de Maria, o chinoró diñó saltos andré desquero trupo: y sinaba Elisabeth perelalí e Peniche.

1:42  Y diñó yeque gole y penó: Majari tucue andré as cadchiás, y majaró o mibao e tiro trupo.

1:43  De duque sinela ocono á mangue, que a Dai e minrio Erañó abillela á mangue?

1:44  Presas yescotria que bigoreó a varda de tiri salutacion á minres canés, o chinoró diñó saltos de pesquital andré minrio trupo.

1:45  Y majaró ma andré tun men, presas sinará querelado o saro ma fué penado á tucue de parte e Erañoró.

1:46  Y penó Maria: Minri ochi engrandece al Erañó:

1:47  Y minri suncai se asaseló andré Debél minrío Salvador.

1:48  Presás ha dicado a chinoría de desqueri lacrí: pues ya desde acana as sarias generaciones araquelarán mangue majari.

1:49  Ha querdi buchías bariás á mangue ó sos terela sila, y majaró o nao de ó.

1:50  Su canrea sinela de generacion andré generacion opré os sares que le darañelan.

1:51  Queró sila sat su murcia: queró najar á os superbios sat as imaginaciones de sus carlochines.

1:52  Queró á os silares perar sus besti, y ardiñó á os humildes.

1:53  Hinchió de buchias lachias á os que terelaban bóquis; y á os balbales mecó chichi.

1:54  Ustiló andré sun chepó á Israel sun lacró, enjallandose de sun canrea.

1:55  Andiar sasta penó á amáres batuces, á Abraham y á sus chaborés deltó.

1:56  Y Maria sinaba sat siró sasta trin chonos: y se limbidió á desquero quer.

1:57  Tami Elisabeth se le chaló o chiros de chindar, y chindó yeque chaboro.

1:58  Y juneláron os quiribés y os cachicállis de siró que o Erañó habia querelado canrea bari sat siró, y se alendáron sat siró.

1:59  Y sinaba que al otoró chibés abilláron á chinar o postin e quilén al chaboró, y le araqueráron del nao de desquero batu, Zacharias.

1:60  Y rudelando desqueri dai, penó: nanai, sino Juan sinará araquerado.

1:61  Y le penáron: cayque sinela andré tiri ráti, sos se heta sat ocola nao.

1:62  Y pucháron por simaches al batu e chaboro, como camelaba que se le araquerase.

1:63  Y mangando li, libanó, penando: Juan sinela su nao: y os sares se zibáron.

1:64  Y yescotria sinaba pendrabado desquero mui, y su chipe, y chamuliaba majarificando á Debél.

1:65  Y peró dal opré os sares sunparales: y se penáron de sarias oconas buchias por os sares bures de Judéa.

1:66  Y os sares que as junelaban, as ujaraban andré sus carlochines, penando: ¿coin penchabais, que sinará ocona chaboro?  Presas a baste e Erañoró sinaba sat ó.

1:67  Y Zacharias sun batu sinaba perelalo e Peniche, y garló baji, penando.

1:68  Majaró o Eraño Debél de Israel, presas abilló y diñó mestepé á sun sueti.

1:69  Y ardiñó á amangue o rogos de golipen andré o quer de David sun lacró.

1:70  Como penó por mui de sus majarés Prophetas, andré os sarés gresés.

1:71  Mestepé de amáres daschmanuces, y de la baste de os sares que na camelan amangue.

1:72  Somia querelar canrea sat amáres batuces, y ojararse de su majarí varda.

1:73  O juramento sos juró á amaro batu Abraham, que ó diñaria á amangue;

1:74  Somia que listrabados de las bastes de amáres daschmanuces, le querelemos servicio bi dal,

1:75  André majaridad, y andré justicia anglal de ó, os sares chibeses de amári chipén.

1:76  Y tucue, chaboro, sinarás araquerado Propheta e muy Udscho, presas chalarás anglal la chiché e Erañoró, somia aparejar desqueres drunés:

1:77  Somia diñar conocimiento de golipen á sun sueti para a remision de desqueres grecos.

1:78  Por as porias de canrea de amaro Debél con qué visitó amangue del Udscho e Oriente:

1:79  Somia diñar dut a junós sos bestelélan andré a rachi, y andré o butron de meripen: somia enseelar amáres pindrés á drun de paz.

1:80  Y o chaboro se querelaba baro, y sinaba querdi silnó andré suncai; y sinaba andré os desiertos, disde o chibes pur nichobeló á Israel.